مرحبا اختي
رحله سعيده بأذن الله
الله يخلي لكم ولدكم ويحفظه
الجو اكيد بكون بارد جدا
واذا تقدرون تاخذون معاكم غاري اطفال مع تلبيس بلاستيك وتغطون فيه الطفل حتى يمنع الهواء البارد عليه يكون افضل


اي اختي لندن امان ان شاء الله مافيها شي
بس اهم شي فليل ماتمشون لحالكم بالمنطاق خلف المطاعم في اجور رود
خلف مطعم بيروت اكسبرس وماريوت ماربل ارش
ها الاماكن مافيها شي بس للحيطه
بس بصفه عامه لندن فيها امان تحت السيطره كثير من العرب والخليجيين

هيلتون متروبول حلو بس يكون مكانه في نهايه شارع العرب
وعندكم فندق ثيستل ماربل ارش ايضا حلو

اذا تبغون فندق غالي ومكانه روعه وامان فندق ماريوت بارك لين

في شارع اجور رود في مطعم اسمه مروش يكون بالزاويه تدخلون مع الدخله الفرعيه بتحصلون سوبر ماركت فيه مظلات لونها اخضر
هذا سوبر ماركت الوادي الاخضر يبيع كل الاشياء الي تحتاجونها اغراض تتشابه مع بقالات الخليج

المطاعم في اجور رود الي ارشحها لكم

مطعم الارز له فرعين مقابلين بعض ومطعم السليماني ومطعم مروش وجنبه باللفه مطعم الزعفراني وجنب مطعم الزعفراني سوبر ماركت الوادي الاخضر

مطعم مسكوف في النايتس برج قريب من السفاره مقابل السفار الكويتيه بالشارع الثاني

وفي بعض المطاعم الهنديه لو انتو من عشاق الاكل الهندي خبريني و اوصفهم لج


وعندكم محل حلو للكوكيز بينز كوكيز مقابل محل دزني لاند في شارع اكسفورد

محلات شراء الالعاب اشهر محلين

محل دزني لاند في شارع اكسفورد
ومحل هاملز مابين اكسفورد و بيكاديلي ( اذا محتاجين اوصفه خبريني )

المجمعات التجاريه
سلفردج و ويست فيلد

الاماكن الي تروحين لها

شارع اجورد رود شارع العرب
شارع النايتس برج ( هارودز - محل جباتي وكرك - مطعم مسكوف ) ومحلات اخرى
شارع سلون ستريت ( شارع متفرع من اكسفورد فيه اشهر الماركات العالميه )
محل بريمارك ( محل متعدد الطوابق بأسعار رخيصه ) في شارع اكسفورد مقابل فندق كمبرلاند وفندق ثيستل

بيكاديلي ( التمشي فيه وخاصه بدايه المساء واشهر محل فيها m&m
تحذير مهم ( جنب بيكاديلي في شارع اسمه سوهو ارجو عدم الاقتراب منه لما يحتويه من محلات وانشطه مخله با الاداب ويتعارض مع ديننا الحنيف )
فقط للتنبيه يمكن الذهاب اليه بدون قصدج

ساعه بغ بن ولندن آي

متحف الشمع مدام توسو

شارع كوينز وي ( فيه مجمع صغير اسمه وايت ليز )

قصر الملكه اليزابيث

الهايدبارك
احسن وقت قبل المغرب الدخول من بوابه الماربل ارش المقابله لشارع اكسفور والذهاب على طول سيده بتحصلون البحيره والمطاعم هناك احلى جلسه واطعام البط
وبعدها تكمله المشوار الناحيه الثانيه من الحديق وتطلعون من البوابه بتكونون مقابلين للسفاره الكويتيه
اذا رحتي يسار 200 متر بتشوفين مطعم مسكوف العراقي على يمينج
واذا رحتي يمين السفاره وتمشين مع المحلات بتشوفين هارودز يسارج

هذا الي يحضرني الحين لو تذكرت شي برجع اكتبه
ومابه قصور في الاخوان الاخوات ماراح يقصرون اكيد