مقارنة بين العمة والوردة - الصفحة 2

فيصل · 20-11-2015, 08:26 PM

مساء الخير

لم أزر الفلبين

انتظر قصتك

napil · 22-11-2015, 08:25 AM

اقتباس : المشاركة الأصلية كتبت بواسطة فيصل

مساء الخير

لم أزر الفلبين

انتظر قصتك

ياصباح الخير .. يهمني رايك بالعمه وعن ايجابياتها وسلبياتها ...!!!!

napil · 22-11-2015, 02:49 AM

السلام عليكم ورحمة الله وبركاته

ابدأ بالقصة الأولى ومن خلالها اطرح مواقف حصلت لي بهذه الرحله .. القصة تبدأ من جزيرة انير وهي منطقة جميله وتعتبر شعبيه نوعاً ما .. وفيها مزارات جميله كالشلالات والتي تذهب لها بالسياره ثم تقطع الباقي صعودا ونزولاً مشياً .. واستأجرت مرشد وشاركني في المرشد اثنان من الجنسيه الاندنوسيا وكبل من استراليا .. اثناء العوده من الشلال كانت الأمور تمام التمام وفي وسط الطريق طلع علينا ذاك الثعبان وتناقز المرشد والي معاه يمين ويسار واخوكم بالله لاهي يصور بالنوكيا مادريت الاوهو بين رجولي واحمد الله اني كنت لابس جزمه اعزكم الله من نوع ترفل فوكس اول نهشه له بالجزمه اليسار ودعسته باليمين وجلس يتلوى لين جو التلوح بعد عشر دقايق تمنيت لو تشوفو الأسترالي ثور يوم اطلق رجوله وخلى الي معاه راساها في الطين ورجولها معلقه بالشجر واشك انه هو الي دافها لانها قامت تلعن فيه . اما المرشد رجع يسوي حاله بطل يقول أبعدت مجموعه ورجعت لكم مارفعت الجزمه الا يوم رجلي خدرت والذيبه الاستراليه هرست باقي الثعبان بالخشب وهي الي كانت تشجعني وتقولي لا ترفع رجلك الا اذا هي عاضتك قبل قلت مااحس بأي الم برجلي اليسار بس تراها نهشتها اتفقنا انهم يفسخون جزمتي والشراب يشوفو في محل لناب الثعبان وهو مازال يتلوى الزين انه جاء تحتي ارض صلبه واخوكم داعس بكل ثقله وافرك رجلي .. وبالفعل شلنا الجزمه مافي اثر للناب برجلي والعضه جت بالربل .. ورشو عليها معطر لو فيه جرح تحس بلذعت المعطر والحمدلله مافي شي ..ونشأت صداقه مع هالكبل وكان هذا الموقف الأول وليست القصه الأولى .. من ضمن السوليف معاهم ذكرو لي ان الشاليه حقهم صاحبه دكتور اندنوسي وعنده كم شاليه لو اني حاب انتقل لمجمعهم وجابها الله من سالفه لأني كنت بمجمع مايعلم فيه الا الله .. مريتهم وقابلت الدكتور ورحب واعطاني شاليه بجنب شاليه الاستراليين .. وهو ساكن فوقنا .. انبسطت معاهم جداً .. قالو لي بكره بنروح لجبال فيها مثل الكهوف حفرت أيام اليابانين وفي مناظر جميله هناك .. المهم ان ثقافة السياحه نشأت عندي من هالكبل ذكرت لكم سابقاً انهم كبل ولكني الى ساعة اعداد هذا التقرير لا اعلم هل هم ازواج ولا كبل .. لأنها عادتي لا اسئل عن أي أمور شخصيه ولا انا من نوعية الي ينصح ولا يقدم مواعظ اخر ماعندي لو اشوف شي اسكت .. حتى انهم مره حصل قدامنا هوشه بين ازواج بالشاليه القريب مننا وهم قامو يفكوهم ويهدوهم وانا ولا كأني اشوف شي .. سألوني ماتأثرت من الي حاصل قلت لهم بكل بساطه مااحب أفلام الدراما .. ماتو من الضحك وشكلها عجبتهم اجابتي ..كيف تفهمهم ان الي يفرع بالهوشه ماينوبه الا تقطيع ثيابه .. المهم رحنا للكهوف وهنا الموقف الثاني .. نزلنا من السياره الا بوجهنا ذاك الاندنوسي الي معلق أنواع الكاميرات والالبومات والايبغى يصورنا ولا نشري منه فلاشه فيها أنواع الصور للكهوف المهم حاول بالاستراليين وقالو معانا كاميراتنا ونلقى متعه بالتصوير فيها اطلق سراحهم ونشب لأبو كاميرا نوكيا محدثكم ههههههه والله النشبه .. المهم بعد قرق سفهته وكملت مشواري .. قبل نبدأ ندخل الكهوف في منطقه مابين مواقف السيارات والطريق كان فيه تماثيل لأنواع من الحيوانات منها الزرافه والجمال وحمير وأنواع كثيره من الحيوانات .. دخلنا الكهوف وصورنا وخلصنا وحنا طالعين الا الاندنوسي المصور واقف عند الجمال يقولي تبي صوره لك مع (الفاملي) حقك مجاناً قلت له لا تصور مع الحمير اهلك ورميت له خمسين الف بالأرض ضحكو عليه كل الموجودين حتى أصدقائه الي معاه ضحكو وزادت الطين بله الاستراليه قالت هذا فلم كوميدي احسن من فلم الدراما الأول وتضحك بهستيريا.. المهم الرجال تنح ثواني يطالع وكان صاعقه صافقته وحط اغراضه بالأرض وهرب .. وحنا نمشي جاني اندنوسي قالي اطلع من هنا احسن لك قلت ليش اطلع قال هذا بهلول يقصد انه سببيكه ماتعرف ايش يسوي وانت شفته كيف هرب جروني الاستراليين بالقوه وركبنا السيارة وبيني وبينكم النحشه زينه وعلمو الدكتور بالقصه وضحك واخذت استفسر منه عن ردت فعله مع انه هو الي بدء بالاستهزاء .. والاستراليين يشرحو له كيف انه تنح وبعدها هرب وكيف انه هرب من الفرح لما عرف انه لقى الفاملي حقه وراح يبشر الباقين .. مصرقعين هالاستراليين .. من هالموقف طلعت بأجابتين أولها انهم يشبهونا او يسمونا بالجمال ثانيها . لاتهزئ اندنوسي امام أصدقائه وهذي الي شرحها لي الدكتور يقول انا اجزم انه مازعل من ضحك الأجانب عليه زعل من ضحك أصدقائه وانا اقولك لاتروح هناك ولا تقرب من المنطقه لأن هالسالفه راح يتحاكو فيها سنين على هالبهلول

القصه اكملها بعد شوي لأجل المساحه

napil · 22-11-2015, 04:17 AM

القصة الأولى : بدأت لما انتقلنا لمنطقه ثانيه اسمها شاريتا .. منطقه ارقى من انير وهذا من وجهت نظري ونظر الاستراليين .. المهم شافوني حريص على الأكل وسألوني انت حريص علشان (الهام) الخنزير آجلكم الله .. قلت لهم لا انا عندي معده حساسه وادنى شي يأثر فيني .. المهم اننا ملينا من السمك والروبيان .. قالو بكره بنقلبها باربكيو ولقينا واحد بيجيب الدجاج والشوايه ويشوي لنا على البحر وسبق اننا نسقنا مع الدكتور انه يضبط لنا الجلسه على الشاطى وشرينا 4 توصيلات كهرب علشان السماعات توصل للشاطئ وفعلاً كانت سهره جميله وانا قلت لهم بشرط ان تكاليف كل شي علي وهم ماصدقو قالو تم .. والله من الرخص ذيك الأيام

كانت سهره جميله بكل المعايير .. حتى اهل الشاليهات الي حولنا سيرو علينا وأصحاب الدراما كانو من المسيرين .. نمنا متأخرين .. نمت ساعتين وقومني بطني الم ماشفته بحياتي ودوخه واستفراغ الله يكرمكم .. قلت تلبك معوي مع هواء البحر ويروح سويت شاهي ثقيل وأول شربتين من الكوب واستفرغ .. كل شوي اروح لدورة المياه اعزكم الله .. الوضع تطور ماقدرت افارق دورة المياه.. مغصني بطني وانا اكتب تذكرتها من أيام الله لايعودها .. المهم دقيت على الاستراليين قالو نفس الحكايه عندهم مغص ونفس الأعراض .. جبنا الدكتور وقال ارسل احد يجيب لكم مطهر معده من الصيدليه .. وريته معي مطهر اسمه (فلاس جيل ) قال هذا افضل بكثير المهم اخذت اربع حبات دفعه وحده .. وجابو الدواء للاستراليين المصيبه ان دكتورنا اكثر واحد عرمش العظام ماجاه شي .. الاستراليين بعد الدواء يقولو انهم تمام التمام وانا لا الوضع زاد عن كونه تلبك معوي جربت الدواء حقهم مانفع .. رحنا كلنا لعياده الي فيها دكتوره اندنوسيه من أصول صينيه والفاجعه انها ماتعرف انجليزي .. الدكتور والدكتوره طلعو بنتيجه انه لازم تحليل .. ارسلنا التحاليل للمختبر ودفعنا مبلغ علشان سريع سريع يعطونا النتيجه قالو اقل شي 8 ساعات ومعناها بكره وهذا اسرع ماعندهم ..جلست لليوم الثاني وانا بجحيم حتى شفايفي جفت وصار فيها زراق .. جت النتيجه مع الدكتوره وبيدها مغذي وتقول هذا لازم ينتقل لطورئ جاكرتا الحين قالو نجيب لك سيارة اسعاف وخرابيط ولازم أوراق وروتين يطول قلت السواق حقي يوديني وربطو المغذي بعلاقة السيارة وانطلقنا وساعتين ونص وحنا بطوارئ المستشفى الي يشتغل فيها الدكتور بمنطقة البرماتا هجو ونسق معاهم وبلغهم ان حالته خطره وان عنده تسمم اسمه السلامونيا من الدجاج .. المهم غسيل معده وابر ومغذيات جلس معي الدكتور يقول للممرضات هذا لو ماهو متعافي كان ودع من زمان جلس ثلاثة أيام وفقد كل السوائل الي بجسمه .. وقالي تعرف ان الدجاج ماكان ناضج وانك لو تأكل أي نوع من أنواع اللحوم نيئه مايجيك مثل اكل الدجاج ممكن يجيك تلبك معوي لكن الدجاج حامل فايروس السلامونيا وماكان استوائها جيد جداُ تتسمم .. بعد اربع وعشرين ساعه اتصل فيني الدكتور والاستراليين يتطمنو علي .. ويسألوني عن اغراضي ايش نسوي فيها قلت لهم ارسل لكم السواق ياخذها لان كل شي فلوسي وتذاكري وكل شي هناك ..قال الدكتور لا ماعليك توصلك لحد عندك بأمانات المستشفى ولا توقع على الورقه اذا ناقصه روبيه .. وفعلاً جت كامله والفلوس والأوراق كلها مقرطسه وملابسي وشنطي على ماهي عليه .. حاسبت الدكتور بأن تركت له المبلغ بالرسبشن .. وحاسبت المستشفى بعد مرور 24 ساعه وقالو لازم تجلس قلت اذا على الرز المسلوق ادبره من أي محل غيرها في شي قالو امشي على الادويه .. تركتهم وسكنت بفندق عزيز على قلبي ودايم اخر ثلاث أيام من نهاية رحلتي اسكن فيه فندق السانتيكا .. المهم الاستراليين قالو حنا بننزل لجاكرتا ياليت نشوفك واذا انت طيب روح معانا لبالي قلت لا كم يوم وارجع لبلدي وانتم مرو علي بفندقي تراه سويت كبير وقريب من المطار ريحو قبل الرحله لان رحلتهم بالليل الحاصل انهم فعلاُ وصلو للفندق وشنطهم على ظهورهم .. واخذو شور على السريع قالطين الجماعه وجلسو يقولون انهم راحو لجزيره داخل البحر تبعد ساعه وعليها بالبوت من شاريتا وانها روعه وتمنينا انك معانا .. قلت المره الجايه ان شاء الله اعود لها ومن هنا تبدء القصه الثانيه .. الحين ابي الهوم لانه فعلاً على زود المرض جاني هوم سك .. ودعتهم وراحو .. وانا رجعت للسعوديه ونقصت خلال عشرة أيام تسعه كيلو .. الخلاصه رغم التسمم وقوة الاحداث رجعت لها .. فمازال لحبها بقايا .. أتمنى اني أكون ماطولت عليكم بتفاصيل احداث القصه

القصه الثانيه ان شاء الله عن قريب

فيصل · 23-11-2015, 10:22 AM

العمه زرتها يا أستاذي في عام واحد اربع مرات في كل مره تزداد الأسعار
جميله للمجموعات
جميله بغير أوقات الأجازات لدينا
إذا وفقت بسائق مميز بإذن الله سوف تنبسط
ممكن أكرر الزياره أي وقت إن شاء الله

napil · 24-11-2015, 04:38 AM

اقتباس : المشاركة الأصلية كتبت بواسطة فيصل

العمه زرتها يا أستاذي في عام واحد اربع مرات في كل مره تزداد الأسعار
جميله للمجموعات
جميله بغير أوقات الأجازات لدينا
إذا وفقت بسائق مميز بإذن الله سوف تنبسط
ممكن أكرر الزياره أي وقت إن شاء الله

اوافقك الرأي في كل ماذكرت .. وسفرك في عام واحد اربع مرات يدل على استمتاعك بهذه السفرات أتمنى ان تجد السعاده في سفراتك القادمه ..

سدهارتا · 02-12-2015, 08:42 PM

قد لا أفيدك في المقارنة
لأني لم أزر الفلبين
وزرت أندونيسيا مرة واحدة فقط ..
أعجبتني جدا جزيرة بالي
أما جاكرتا فلم تعجبني أبدا ..
توقفت عند مغامراتك والمواقف التي واجهتك .. وتواصلك مع الآخرين
أحييك على حيويتك وخروجك على الروتين .!

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
مقارنة بين الدول الاسكندنافية	آخـــرفـــرصـــة	بوابة اسكندنافيا	58	02-09-2019 01:25 AM
مقارنة بين ماليزيا و اندونيسيا	ali-333	بوابة اندونيسيا	28	02-07-2015 06:15 AM
صرف العملة ضروووري	مسااافره	رحلات الجزر والكروز	4	10-02-2015 03:56 PM
تحويل العملة من الان ؟	الشهري	البوابة السياحية	10	02-02-2015 07:56 PM