الساعه تشير الى الواحده ظهرا بعد ما اخذنا شور سريع وبدلنا وتنشطنا وسويتلي قهوه اصحصح منها نزلنا اللوبي اسوي تمديد للحجز واخذنا نفسنا وع التاكسي للقريه العثمانيه طبعا اذا شفتو نفسكم متأخرين ومابقى شي ع الاذان انصح بالصلاة بالفندق وبعدها الخروج وتقدرون تقدمون وتجمعون صلاة العصر او العشاء او لا باي مكان تصلون بالنسبه لي اذا كنت بالخارج طالعه وبرحله ما اصلي الا بعد عودتي للشقهً او الفندق لانه احتاج ازالة مكياج بالكامل والوضوء بالصح والتمام

** للأسف شاهدت كثير من السواح وعاملات المحلات والمطاعم يتوضون غلط مكان الميك اب ماتقرب الماء له وتمسح فقط باقي الوجهه كيف مادري وباي دين ومذهب وعرف انه الوضوء مكان المكياج ماتغسله يعني العين الفم لا والله مسخره صار لعب في الدين والواجبات المهم الله يهدي ويعطي مافي نياتهم ويسامحهم ويغفرلهم زلاتهم

لذلك انا اصلي بعد عودتي حتى لو قضاء تكون الصلاة لكن بطهاره ووضوء كامل وصحيح لا استهانه في صلاتك وواجباتك

الان نحن بالطريق الى القريه العثمانيه سبق وزرتها لكن شحيته ماشافتها ولابد اني اخليها تشوفها لانها معلم مهم في بورصه
واعتقد سبق وقتلكم السفر مو بس سوق والعاب وناسه وسهر ومطاعم لا ثقافه وانا دوم احرص اني اعلمهم ثقافات كل دوله