نامت عيوني على حسنك ؟؟ - الصفحة 5

q8ya metnaqla · 28-01-2015, 12:14 AM

مرتين اكتب الجزء الثالث وينمسح والله حرررره
باجر انزله لكم ان شاءالله (

فيصل · 28-01-2015, 01:08 AM

الشلال روووووعه
السياره مواقفها بفلوس صح أم تغيرت
وأعتقد فيه اللاما عند المواقف

الايمان · 28-01-2015, 10:32 AM

ابرار
بصراحه انا صدقت قصة اللي تبكي
اكيد حبيبها كويتي ههههههههههه

MOBARKI · 28-01-2015, 01:46 PM

تقرير و تفاصيل روعه

صور ابداااع تسلم يدك

متابع

حريــر · 31-01-2015, 08:07 AM

ماشاءالله عليك اسلوبك حلو تحمسييين

بسالك اختي هل الواحد يحتاج يعتمد على سيارة في كل تنقلاته ؟

q8ya metnaqla · 03-02-2015, 03:47 PM

اقتباس:
المشاركة الأصلية كتبت بواسطة فيصل
الشلال روووووعه
السياره مواقفها بفلوس صح أم تغيرت
وأعتقد فيه اللاما عند المواقف
والله يا بوغازي كل الشلالات اتينن شكثر مرينا على شلالات ماشاءالله ..
عدل ماتغيرت بفلوس اي موجوده

اقتباس:
المشاركة الأصلية كتبت بواسطة الايمان
ابرار
بصراحه انا صدقت قصة اللي تبكي
اكيد حبيبها كويتي ههههههههههه
كااااااااااااااااااااااااااك اي حبيبها كويتي

اقتباس:
المشاركة الأصلية كتبت بواسطة MOBARKI
تقرير و تفاصيل روعه

صور ابداااع تسلم يدك

متابع
الله يسلمك مباركي اشكرك على كلامك الطيب

اقتباس:
المشاركة الأصلية كتبت بواسطة حريــر
ماشاءالله عليك اسلوبك حلو تحمسييين

بسالك اختي هل الواحد يحتاج يعتمد على سيارة في كل تنقلاته ؟
مشكووره حرير
اذا من منطقه لي منطقه يفضل سياره لان جمال الطبيعه لاشعوري يوقفج في اي مكان يعني لوكنت في قطار ما راح اقدر اوقف اي مكان يعجبني من جذي فضلت السياره مع اني من محبين القطارات

q8ya metnaqla · 04-02-2015, 10:23 PM

اكمل معاكم اليوم الجزء الاخير من اليوم الثاني في انترلاكن

ووين رحنا

قلنا نرجع الفندق نسوي ريفريشمنت ونصلي وبعدها نطلع لمشوارنا الثالث

ومنها ريحنا سيارتنا ليومنا باجر

والمشوار اللي الحين بنروح له خطوتين بينا وبينه

وهذيل بعض الصور والنهر يكون ورا فندقنا

وصلنا وجهتنا

هاردر كلم harder kulm

المكان اللي نقدر نشوف انترلاكن كلها من فوق

وهذي اوقات العربانه اللي توصلنا والعربانه

تأسر القلوب

نور خده يشبه البرق المنير ... أو كما بدر ٍ تجلا من سحاب
مالين عوده له المغمر صغير ... والمجدل مثل ما جنح الغراب

فيديو قصير
تنبييه : في موسيقى

عطشان اسمع يانهر

عمر الصحاري والجفاء

عمري أنا ما مر على عمري مطر

عطشان ... لدموع الشتاء

مشتاق ... للون الخضر

صبري عزف .. صبري نزف

الشتا .. بالصيف اختفاء.. والغيم ..ماعنده وفاء
وانا العطش بيتي .. ونسيمي عاصفة

مقطع فيديو
تنبييه : في موسيقى

فوق متنه سابحً مثل الحرير ... ينتشل وان هبه النسناس ساب
يارسول الخير عجل بالمسير ... وإنت بالمعروف تجزي بالثواب

بعد ماخلصنا جولتنا من فوق ونزلنا نتمشى تحت قلنا نروح نركب العبارات ونتمشى في البحيره رحنا ولا للاسف توهم مسكرين وخالصين وبدا الغيم يتيمع

احلى شي القواري (دراجه هوائية)

بعدها حاشنا اليوع ومن امس مخططين نتعشا في المطعم الايطالي يم هوتر

وهذي طاولتنا وطلباتنا

وصل الطبق السويسري جيز فوندو

ريحه الجبن من كثر ما اهي معتقه تبط الراس الطبق لاباس فيه بس ريحه الجبن صراحه

السباغتي والبيزا حاضرين

والحمدلله ونسيت جم الحساب

وهذي اللقطة قبل المطره الحلوه

الاجواء اتينن

اذا طق المطر ورد عشب اخضر وسط حوشك

واذا صار الورد جوري على غصونك تذكرني

وهذا اخر فيديو لي هالجزء سريع وقصير

تنبييه : في موسيقى

واهني انهي يوميمعاكم في انترلاكن على امل ان القاكم باجر ووين رايحيين

وشنو صار معانانكبر وننسى

اتمنى يعجبكم هالجزء

أبن السلطنة, فارس من خيال و هاوية الاسفار معجبون بهذا.

فيصل · 05-02-2015, 11:06 AM

مشلكتي لما سافرت سويسرا ما خططت
وطبيعتي كذا ما أخطط لنفسي كثير
مطل هاردركلم صراحه ما كنت اعلم عنه شفته بتقرير فهد ابوفارس مشرف الصور أول مره ثم تقرير عاشق الخالد ثم تقريرك
وكل مره أقول هالمكان روعه وكل الناس تعرفه وأنا ما طرى علي بالمره
لها زياره انترلاكن ان شاءالله ونزور هاالمكان
كل الشكر

q8ya metnaqla · 05-02-2015, 09:19 PM

اقتباس:
المشاركة الأصلية كتبت بواسطة فيصل
مشلكتي لما سافرت سويسرا ما خططت
وطبيعتي كذا ما أخطط لنفسي كثير
مطل هاردركلم صراحه ما كنت اعلم عنه شفته بتقرير فهد ابوفارس مشرف الصور أول مره ثم تقرير عاشق الخالد ثم تقريرك
وكل مره أقول هالمكان روعه وكل الناس تعرفه وأنا ما طرى علي بالمره
لها زياره انترلاكن ان شاءالله ونزور هاالمكان
كل الشكر

حسافه بوغازي
انا اذا معاي قروب لازم اخطط له ولا يا كلوني بس اذا بروحي لا عادي
المره اليايه ان شاءالله لازم تزوره

q8ya metnaqla · 06-02-2015, 09:13 PM

مسائكم نور ونوير

اليوم الثالث والاخير من انترلاكن كالعاده قعدنا مبجر تريقنا وجهزنا اغراضنا لان ورانا سفره لمنطقة ثانيه فلازم نستغل اليوم عدل ..
قلنا الساعه 9 الصبح نطلع ونحرك وفعلا تحركنا ورحنا صبينا بانزين .. المهم واحنا نصب سألت اختي قلت لها اهي قالت 91 اللي سلمتنا السياره مو تنسين وسجلنا بالورقه رقم النوع وصبينا ومشينا الى وجهتنا

مشينا وتوكلنا على الله

وجهتنا كانت نمر على فوكس اوت لت وبعدها ندش منطقتنا لكن اللي حصل شي ما كان يخطر على البال ..
فجأه وانا اسوق دواسه البانزين مو قاعده تدوس خففت السياره بروحها واهني كنت قاطعه مسافه ساعه وربع تقريبا يعني مو باجي شي على وصولنا الاوت لت لان اهو ياخذ وقت ساعتين و 38 دقيقه ..

جان توووووقف السياره وسط الشارع وفووووووق الجبل وطريج بس حارتين رايح راد وتحتنا الوادي .. واختكم اهني ماهي عارفه شتسوي ونزل من السياره اشوف اشفيها واجيك ياربي كل شي اوكي شنو صار ارد اشغلها مافي فايده مو راضيه اجيك على الماي والمكينه والدهن كل شي تمام .. بس انا كنت شاكه في البانزين بس انا سويت اللي اهما قالوا عنه الرقم 91 .. وبدينا نعدل حركه المرور والسيارات رايحه راده علينا انا جهه وبنت عمي جهه المهم واتصل على الشركه يا انهم ما يردون او مشغوول ينيت .. لاني قاعده احاتي امي ادري اهي قاعده وساكته بس ادري انه سكرها مشلل بالعلالي والوسواس لاعب فيها .. واحاتي ابرتها ف تنرفزت مو عارفه شسوي فجأه وقف لنا اماراتي وزوجته ومسكين ماقصر معانا يحليله بس قلناله توكل على الله مانبي نعطلكم .. جان اقول بدق على الشرطة ...

كلمت الشرطة جان يقول انتوا وين قلت وانا شدراني ماكو يافطات ولا شي عشان اعرف اللي اعرفه اني فوق جبل وتحتي وادي وطالعين من انتر رايحين الاوت لت جان يقول لازم اعرف انتي وين بالضبط

وقف ورانا ريال جبير مع مرته علبالهم في اشاره انتهزت الفرصه وقلت اكلمهم قبل ما اسوي لهم درب وانا اكلم الشرطي قلت لحظة الحين يقولك هذا احنا وين رحت اسألهم ولا الطيبين مايتحجون انجليزي ... ياااااليل الليل يا ابرار شتسوين جان يقولي اتعرفين الماني قلت لا الماني ولا فارسي عربي وانجليزي غيرهم مافي .. وانا اكلمهم قلت انطر واكتب لهم في العم قوقل للترجمه بالالماني وعرفوا شنو انا ابي ( قلت قول حق الشرطي احنا واقفه سيارتنا ونبي احد ياخذنا ووين واقفين اشوه فهموا بعد الترجمه وكلموا الشرطي ) بعدين سويت لهم طريج وراحوا

المكان اللي احنا واقفين فيه اسمه سوستن الاسم اللي بالصوره فوق .. جان يقولي الشرطي خلاص احنا كلمنا الشركة واهما راح ايونكم .. والله ونقعد ساعه على ما وصلنا الونش جود اهني الساعه تقريبا 1 يعني راح علينا الاوت لت المهم ويشيل سيارتنا الونش وامي واختي فيها وانا وبنت عمي جدام مع السايق ) والمنظر مخيييييف واحنا في الونش صراحه .. الحين انا استانست الونش شفته مكمل الطريج قلت زين يقص باجي الدرب ولا ياخذ فوق تحت ويردنا عايدي قلت ليييييييييييييييييش حرام وساعه وربع اللي صعدتهم والله دخت يكفي اني خايفه وانا اصعد هالجبل اللي احس ماله نهايه جان يقول نرجع شركتنا وياخذكم تاكسي يوصلكم انترلاكن عشان تاخذون سياره من اهناك قلت لااااااا مو من صجكم والله حراااااام وصلنا كراج راعي الونش واقوله شنو فيها السياره لاني شاكة انه المكينه طقت من بعد ال 91 بعد الفحص جان يقولي المكينه قلتله عشان البانزين صح جان يقول ايي لازم تصبون ديزل مو 91 قلت ادري ولان في استيكر مكان البانزين مكتوب ديزل بس مو مني لان الشركة اهما اللي قالوا لي 91 وبعدها قال خلاص الحين تدفعون تصليحها وتروحون واتناجر معاهم واكلم الشركة وقالوا لا مو منكم من موظفتنا ومادفعنا اشوه ..

وصل التاكسي الساعه 2:15 الظهر وراااااح اليوم علينا يالله الحمدلله يت على جذي .. على ما وصلنا انترلاكن الا الساعه 3 وننزل واتهاوش مره ثانية قلت شلون ماتردون ادق محد يرد او مشغول خليتونا ندق على الشرطة وقعد يعتذر وقلت ليش ماتيبون سياره بديله بدال ماترجعونا جذي يروح الوقت جان يقول لا اهني نظامنا غير لازم من المكتب تاخذون المهم جيكنا على سيارتنا اليديده وتوكلنا على الله

وهذي سيارتنا اليديده

وكانت فولفو

قبل ما ناخذ السياره امي حنت علينا الا نروح بالقطار قلت يما ماكو الا العافيه خلينا على السياره واحنا حاجزينها وخالصين وبعدين القطار بعيد وتبديل مايسوى .. اقتنعت ومشت معانا .. ضبطنا القارمن وتوكلنا على الله ومشينا في هالجبل الى ماله نهاااااااااااااااااااااااااااايه والله كل اشوي نصعد وانا في قلبي اقول يا ابرار وين صاعدين احنا احس مافي نهايه وابي اعرف شنو راح اشوف وطبعا الطبيعه كل اشوي اتغير من تحت لي فوق من تحت الخضره اتينن وكل ما صعدنا خفت الخضره والله انا حسيت انه راسي افتر من دورة الجبل وقاعده احاتي طريج الرده انه مايصادفني جذي جبل ثاني ..

وصور اسم المنطقه مره ثانية عشان ما انساها ولايمكن انسها من بعد هالموقف )

المهم كانت وجهتنا نروح الاوت لت ومن بعد الاوت لت منطقتنا المقصوده واهي ميلان ) مدينه التسوق ...

بس هالصور اللي صورتهم في هاليوم من اللويه اللي صارت نسيت التصوير والله ..

الطريج اخذ منا من انترلاكن الى ميلان 3 ساعات و 45 دقيقه من غير توقف وصلنا على الساعه 7 المغرب ميلان وعلى طول عالفندق وهذي صور فندقنا

هذا اسم فندقنا

NH Collection Milano President
وهذا في بوكنغ

http://www.booking.com/hotel/it/nh-collection-milano-president.en-gb.html?aid=376381;label=bookings-naam-xjlPGMQw2OEYfLOTJiaLiwS59504141833%3Apl%3Ata%3Ap1% 3Ap2594%2C000%3Aac%3Aap1t1%3Aneg;sid=b282888809d79 8d0a54ef0eee182e490;dcid=1;ucfs=1;srfid=75c431e27d 4b3601e64e5931766e6d1d29020646X2;highlight_room=

الفندق ممتاز صراحه وايد حبيته شرح والغرف حلوه وسيعه ونظيفه والحمامات عزكم الله وموقعه خلف الدومو ممتاز وانصح فيه ..
وهذي بعض الصور

وهذي غرفتنا

وهذي وانا برا واقفه بالبلكونه

الكبت

الحمام عزكم الله

وهذيل من البلكونه والجو الحلوووو

صاله الريوق والبوفيه

طبعا اول يوم وصول وعقب اللي صار معانا ميتين من اليوع ولازم نييب شي زين حق امي ولا راح يصير زعل وملت من الاكل الامريكي والايطالي رحنا ندور مطعم ولقينا هندي بس وين مكانه ماادري وخذينا برياني وجيكن بتر وردينا الفندق وتعشينا الحمدلله ..

واهني انهي معاكم اليوم الاول من ميلانو على ان القاكم في اليوم الثاني ووين رحنا ..

أبن السلطنة, فارس من خيال و هاوية الاسفار معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
الأسواق والتسوق في إيطاليا .. بقلم ام عيوني	فريق التطوير	بوابة ايطاليا	15	26-08-2019 05:51 AM