السلام عليكم ورحمة الله وبركاته ،،

اسعد الله (مساكم / صباحكم ) أخواني وأخواتي الكرام ..

اليوم بأذن الله راح أتكلم عن تجربتي بتأجير السيارة في سويسرا ( مطار جنيف ) أو أوروبا بشكل عام لان نفس الخطوات تماماً ،


***( خطواتنا قبل السفرة )

* 1

- بعد الأتكال على الله أخترنا الوجهة المراد السفر لها (سويسرا).



* 2
- بحثنا في النت عن شركة لتأجير السيارات عالمياً
( Europcar , Avis , Hertz , sixt )


* 3
- وتم اختيار شركة Avis واختيار مدة التأجير وكانت المدة 7 ايام.



* 4
- لم نظمن الحجز من النت فتوجهنا إلى مكتب الشركة في الكويت ( وطبعاً مكتب التأجير موجود في أغلب دول الخليج)



*5
- تم أختيار حجم المركبه لثلاثة اشخاص مع ثلاثة حقائب والموظف لم يعطينا نوع السياره لان أغلب شركة التأجير تعطيك عدد الركاب و عدد الحقائب وهم يختارون نوع السيارة .



*6
- تم دفع مبلغ السياره لمدة 7 ايام وطلع تقريباً السعر = 125 دينار كويتي.




*7
- بعد الإنتهاء من دفع المبلغ اعطانا الموظف ورقة تأكيد الحجز ( ولازم تحتفظ فيها علشان تسلمها لمكتب تأجير السياره الموجود في المطار عند وصولك إلى أوروبا)



*8
- لابد قبل الذهاب إلى اوروبا
1: ليسن دولي
2: ليسنك المحلي
3: بطاقة فيزا أو مستركارد ( علشان يسحبون منك مبلغ بسيط ويرجعونه بعد ماتخلص من السياره)



*** ( خطواتنا بعد الوصول إلى مطار جنيف )



*1
- بعد الوصول إلى مطار جنيف ولله الحمد ،، خلصنا من أمور الجمارك توجهنا إلى مكتب Avis الموجود في مطار جنيف واذا ماعرفتو شلون تروحون لمكتب التأجير تحصلون علامة داخل المطار على شكل (سيارة وفوقها علامة مفتاح ) وهذي العلامة توصلكم إلى مكاتب التأجير في المطار.




*2
- وصلنا حق الموظفه وعطيناها الورقة اللي استلمناها من مكتبهم في الكويت وطبعاً كل أمورنا مشت بسلاسه ولله الحمد وحبيت أنبهكم على شغلات مهمه ( اذا تبون حماية شاملة للسياره لازم تضيفون مبلغ )
- واعطتنا هذه الورقة وكما تشاهدون رقم 1 سعر المبلغ المراد سحبه من بطاقة الفيزا ورقم 2 مكان توقيعك








*3
- اذا تبي ترتاح لما تأجر السياره قول حق الموظف عند اعطأه الورقه كلمة وحده وهو راح يفهم ماتريد وحتى لو ماتعرف انجليزي اكتبها بالعربي وهذي الكلمة ( سوبر انشورنس ) ومعنى الكلمة حماية شاملة للسياره علشان ترتاح من الحوادث لاقدر الله.



*4
- خلصنا من امور الدفع وطبعاً اخذو مبلغ من بطاقة الفيزا وهو تقريباً نفس سعر حجز السياره 125 دينار (وبعد الانتهاء من ارجاع السياره يرجعون المبلغ لك )


*5

- اعطتنا الموظفه مفتاح السياره ورقم المصفط ومكان المواقف وطبعاً كل شي تسجله لك بورقه علشان لاتضيع وكان رقم المصفط 386 ومكان المواقف p51 ،، وخلصنا من المكتب وتوجهنا الى الباص وثم الى مكان المواقف p51 ووصلنا الى رقم المصفط وحصلنا السياره وكانت جيب مرسيدس 2016 .






( نصائح قبل الحجز )

- يفضل اختيار السياره ديزل (لان اوفر من ناحية الصرف)
- اختيار سياره اكبر حجماً لكي تتسع للحقائب.




وفي الختام ان شاء الله اني وفيت بالشرح وأي سؤال ان حاضر وبالخدمة

وعليكم السلام رحمه الله وبركاته

شكرا لك أخي عبدالله
سوف أنقل تجربتك لقسم تأجير السيارات حتي تعم الفائده

شكراً استاذ عبدالله خالد
تقرير رائع وخطوات مفيده اخذتنا معاك خطوه خطوه
جزاك الله كل خير وهذا دليل كرمك وطيب روحك
بانتظار مواضيع جديده وياهلا

اشكرك اخوي عبدالله على طرح تجربتك

يعطيك ألف عافية

لك الشكر اخوي

على طرح تجربتك

شكراً للفائدة الكبيرة بذكر التجربة

تجربة جميلة

الله يعطيك العافية

بعد كم يوم رجعوا لك المبلغ المحجوز ؟

شكرا ع المعلومات
انما انا وفقت في تأجير سياره استلمتها في ميونخ ورديتها في فينا لكن مع غرامه مخالفه سبعين دولار اي خمسين كويتي والسبب انه مومودينها المغسلهزيغسلونها وينظفونها من داخل مثل ما اخذتيها تردينها عشتو اقهروني بس الحمدلله كانت خوش سياره

الله يبارك لك على التجربه الرائعه

يعني انت دفعت قيمه الحجز كامله في الكويت

+

831.82 اورو في المطار ويوم رجعت السياره رجعوها لك هذا المبلغ ؟

حسب ماسمعت وقريت لو تستأجرها من داخل جنيف ارخص لان ياخذون رسوم المطار.

مشكور