تجربة لمقيم حضرمي في إستصدار الشنقن من الأسبانية ..

alenore · 31-07-2016, 10:24 PM

بسم الله الرحمن الرحيم
السلام عليكم ورحمة الله وبركاته ..
تحية طيبة لرواد هذا المنتدى والذي من خلاله إستفدت منه الكثير
تحية طيبة خصيصاً للرائع الأخ أبو غسان على مجهوده الجميل ومواضيعه الجبارة اللي ريحت لكثير من المتقدمين للفيزا ..
ومن باب رد الجميل لهالمنتدى وليستفيد غيري حبيت أحط تجربتي في إستصدار الشنجن من السفارة الأسبانية

مثل ما هو باين من العنوان معكم مقيم حضرمي مولود وعايش في الرياض
وجميع أهلي الوالدين الله يحفظهم وأخواني واللي إستفدنا جميعاً من خير هالبلد
الله يحفظها ويديم عليها نعمة الأمن والأمان ..

تقديمي للفيزا كان فيه أكثر من تحدي ، التحدي الأول بحكم الجنسية وظروف بلدنا يعتبر التقديم في هالوقت مجازفة كبيرة وممكن بنسبة كبيرة تنرفض ..
التحدي الثاني بعد ما حجزت للأهل ونا عادة أحجز جداً من بدري طلعت عندنا مناسبة عائلية قبل سفرنا بأيام قليلة وراحوا أهلي سحبوا علي وهونوا عن السفر ومشكلتي إني صعب أأجل إجازتي لوقت ثاني لأنه مجدولة الإجازات بين الموظفين المهم إني نويت السفر بلحالي وهذا التحدي الثاني قلت السفر مجموعة فرصتهم أعلى من السفر منفرد بالنسبة لوضعنا ..

المهم لغيت حجوزات الوالدة وأخواني وعملت موعد يوم الثلاثاء ما قبل الماضي كان التاريخ 19 يوليو وجهزت كل المتطلبات اللي كانت :
1ـ النموذج والتعهد .
2ـ أصل الجواز وصورتين شخصية 3.5x4.5
3ـ تذاكر الطيران .
4ـ تذاكر التنقلات الداخلية .
5ـ حجوزات الفنادق .
6ـ صورة الإقامة
7ـ صورة شنقن سابقة .
8ـ كشف الحساب ل 6 شهور انا جبتها من بداية السنة وصورة للماستر .
9ـ تأشيرة خروج وعودة .
10ـ خطاب تعريف مصدق من الغرفة التجارية موضح فيه عدم ممانعة الشركة وضمانها بعودتي في الوقت المحدد
11ـ كرت العمل مترجم .
12ـ تأمين صحي خذيته من أليانز الفرنسي الشهر ب 86 ريال .
13ـ خطاب مني للسفارة يوضح الغرض من الرحلة .
14ـ أضفت من عندي خطاب تعريف للوالد من الشركة اللي يعمل فيها يكون داعم لي .

لاحظت يوم جيت عملت الموعد بعد ما تختار التاريخ معد فيه خيار تختار الوقت مثل أول هو حط لي الوقت من عنده الساعة ثمان الصبح
وفعلا وصلت المكتب حدود سبع ونصف شفت مافيه أحد حول البوابة قعدت في السيارة أراجع أوراقي لين ثمان إلا خمس رحت خذيت نفسي ودخلت لقيت الصدمة !!
سرا طويل عريض خخخخخخخخخ ما انتبهت له ونا في السيارة لأن زجاج المبنى كاتم ، ف اللي وصل بدري لا يعمل مثلي وينتظر يخش على طول لأنه الدعوة أرقام واللي يجي بدري يخش بدري
المهم أول مادخلت بدو يدخلون المراجعين طلعت الدور الأول عطيته ورقة الموعد وقام عطاني الرقم ، توجهت للصالة الكبيرة حقت الأفراد فاضي كان واللي فيه أغلبهم حقين المكاتب
وجا دوري بعد ثلاثة طلب أول شي ورقة الموعد عشان يطابقها بالجواز وبدا بعدها يراجع الأوراق وصار يطابق الوصول والتنقل ويطابقها مع حجوزات الفنادق إلين ما وصل لخطاب التعريف
دقق فيه وقالي وين التعهد حق الشركة ، قلت له في آخر الخطاب موضح عدم الممانعة والتعهد بعودتي
راح قالي لأ كان لازم يكون فيه رقم جوال مديرك في حالة ما رجعت يحصلون رقم يتواصلون معه
قلت له يبن الحلال في الورقة الرسمية للشركة فيه الرقم الثابت ومنه بيوصلون لأي شخص يبغونه وقلت له يعني أنا ممكن أطلع وأحط لك أي رقم وأي إسم وأرجع لك
قالي هذا طلب السفارة ونا بدوري خلاص إقتنعت إني لازم أعدل خطاب التعريف ومعد فيه داعي أخوض ويضيع الوقت وقلت له خلاص بعدله وبرجع
قال تعالي قبل 11 أو إعمل موعد جديد قلت هنا ويييين يعمي مع هالزحمة أرجع لك قبل 11 ، هنا قلت في نفسي أول ما أوصل الدوام بدور على موعد إذا حصلت شي قريب حجزت وإذا مالقيت بروح في نفس اليوم وبكلم المشرف
المهم رجعت الدوام والحمدلله لقيت موعد على اليوم اللي بعده الأربعاء وعدلت في خطاب التعريف وإستئذنت من مدير القسم إني بحط إسمه ورقم جواله ووافق جزاه الله خير
طبعاً لازم أعطيه خبر ولا أخاف تتصل عليه السفارة تتأكد وهو ما يدري عن شي وأتوهق فيها خخخخخخخخ وطلعت ختمته من الغرفة التجارية .

اليوم الثاني الموعد حسب الورقة ثمان وعشر ونا من سبع ونصف مسنتر في الطابور تعلمت الدرس حقت اليوم اللي قبله
والمرة ذي كنت أول واحد وجيت عند نفس الشخص وأول شي خليته يشوفه خطاب التعريف وقالي أوكي وقعد يراجع الأوراق مره ثانيه ويعلم بالقلم الأصفر عجبتني هالحركة عشان يريح على السفارة
وبعد ماخلص قام رجع لي كرت العمل قالي هذي خاصة بالسعوديين وصورة بطاقة الماستر وأهم شي رجع لي خطاب تعريف الوالد قلت له ياخي حطه ما راح يثقل عليكم لمن تحملونه خخخخخخخخخ
هنا عطاني ذيك النظرة اللي حسيت فيها إني راح أنرفض قالي طلبات السفارة واضحة أي شي زايد عن المطلوب نرجعه وإذا إحتاجوا شي راح نكلمك
وبعدها حاسبت كنت مجهز فكه معي 330 ريال وعطاني الإيصال سألته عن وضعي قالي أوراقك كلها كاملة وما عندك مشكلة ، بعدها رحت بصمت وصورت رغم إني كنت مبصم قبل أقل من 3 سنوات
ع المسا من نفس اليوم جتني رسالة إنه طلع للسفارة والخميس هذا اللي راح 28 يوليو جتني على آخر الدوام رسالة انه وصل للمركز الموحد وقعدت معلق على أعصابي لين اليوم الأحد
وطلعت ع المركز حول الثنتين العصرية سلمته الإيصال عطاني الظرف واللي فهمته إذا فيها رفض يكون مدبس من برع الظرف قلت يمكن بداخله ورحت أتحسسه وحسيت مافيه إلا الجواز مدري ليه راكبه في دماغي إني بنرفض
ركبت السيارة فكيت الظرف وفتحت الجواز لقيته بداخلها الفيزا الدخول لمرتين ومدتها 6 شهور
ي عمي أهم شي الفيزا طلعت وأشوف الوقت اللي خذته المعاملة معقول من خميس لخميس يعني 6 أيام عمل .
وبس هذي قصتي طولت عليكم بالسالفة طبعي أحب التفاصيل عاد الله يعينكم إذا جيت أعمل تقرير سفرتي كذا راح يكون
وضعت تجربتي حتى غيري يستفيد رغم إني نادراً ما أكتب مواضيع في منتديات ويعرف إنه الموضوع سهالات
لنا وفي عيد الفطر قريب أحد زملاءي من نفس جنسيتي طلع شهر عسل لأسبانيا
أهم شي أوراقكم تكون كاملة وكشف الحساب يكون فيه مبلغ جيد ..

وتحية طيبة للجميع

النمسا, فيصل, tab_el و 3 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
استفسار عن الشنقن	عاشقة السفر	فيزا	8	16-04-2016 05:49 PM
استفسار عن الشنقن..	دايم الليل	فيزا	3	06-11-2015 11:49 PM
استفسار عن الشنقن	عاشقة السفر	فيزا	9	18-10-2015 03:56 PM
استفسار عن الشنقن	ABO MOHAMD	فيزا	10	16-04-2015 10:06 AM
الشنقن الفرنسية ؟	مسافرة مسافرة	فيزا	4	21-03-2015 02:15 PM