26 Aug

هذا اليوم المخطط كان رحلة الى شلالات كوسان والي تبعد عن سيبو تقريبا ثلاث ساعات سيارة.

أسعار التاكسي او السيارات الخاصة كانت بحدود ٣٥٠٠ الى ٥٠٠٠ بيسو رايح وجاي ينتظرك هناك،، لكن بعد السؤال اتضح لنا ان فيه باصات تودي لكواسان ايضا،، باسعار رمزية ومعقولة جدا،،

اتجهنا الى محطات الباصات في الجزء الجنوبي من سيبو،، وطلع فيه باص يطلع كل ثلاثين دقيقة، ( طبعا الباصات توقف في محطات كثيرة جدا) بس شغل سريع مرة،، لكن للامانة بالذهاب الرحلة استغرقت ثلاث ساعات فقط،، والعودة تقريبا ٢ ونص بسبب ان الخط فاضي ورجعنا مع اخر باص الي هو الساعة ٨ باليل

باص مكيف مع انترنت مجاني : ٢٨٠ بيسو
باص بدون مكيف هواء خارجي ١٢٥ بيسو

الاسعار كلها لخط واحد فقط العودة نفس السعر

انت وحظك اذا انت مستعجل اركب اول باص تشوفه،، هناك بدون حجز اول مايوقف الباص اركب احجز مكانك والحساب اثناء الرحلة

نزلنا محطة كوسان، الا تجمعو علينا اشخصاص بغرض الخدمة او انه يوصلك للشلال،، المهم اعتذر مع ابتسامة لان الطريق واضح جدا جدا..

رسوم الدخول ٤٠ بيسو.. تقريبا مسافة مشي ربع ساعة الين توصل للشلال..

طبعا اذا وصلت منطقة الشلال الدعوة فوضى،، يعني كل شخص يجيك يعرض عليك الخدمات( لاتسوي او تطلب شي الا وانت عارف السعر الي راح تدفعها) انتبه لاغراضك،، لاتجيب معك اشياء ثمينة،، لا تكشخ باللبس خل عادي جدا..

احد المواقف الي صارت لنا هناك اخذنا طاولة ٣٠٠ بيسو واثنين حولنا،، اتقفنا على اننا راح نركب بالبامبو ٣٠٠ بيسو. والصراحة كانت مرة ممتعة جدا،، تقريبا مدتها ٢٠ الى ثلاثين دقيقة

بعد خلصنا تفاجئنا عطونا فاتورة بقيمة ٢٢٠٠ بيسو،، بدا شغل الاستهبال منهم،، وتجمع حولي
تقريبا اربع اشخاص،، طبعا الصوت ارتفاع وانا رفضت ادفع المبلغ،، اخر شي عطيتهم كامل ١١٠٠
قيمة ركوب البامبو الشخص ٣٠٠ يعني اثنين ٦٠٠
وقيمة اتعاب الاشخاص الي يجدفون فيك عطيت كل شخص ٢٥٠ يعني ٥٠٠ لاثنين..

طبعا الحركة منهم كانت جس نبض يشوفون انت بتدفع او لا،، لان مافيه اسعار واضحة ،، فا من الافضل الاتفاق على سعر قبل اي شي عشان ماتدخل نفسك في دوامة..

افضل وقت تكون هناك بداية الظهر على ١٢ عشان تاخذ كامل وقتك وتلف المنطقة كاملة.

مشينا قبل غروب الشمس،، اذا انت جاي بالباص اول ماتطلع من منطقة الطريق المؤودي الى الشلال راح تشوف محطة الباص مكتوب سيبو..

منطقة الشلال تستاهل الزيارة..

الصور قليلة جدا لان اكثرها كانت شخصية: