السلام عليكم ورحمة الله وبركاته

تجربتي في استخراج فيزا شنغن الاسبانية من مكتب BLS

طبعا راح اذكر ادق التفاصيل حتى اللي بيروح يكون عنده تصور كامل عن المكان اللي بيروح له

المكتب له فرع في الرياض فقط ( واحة غرناطه )

عنوانهم : واحة غرناطة - البرج A4 - الدور 12

وسمعت انه جاري افتتاح فرع للمكتب في جده خلال اشهر

حجزت موعد في المكتب عن طريق موقعهم الالكتروني

https://saudi.blsspainvisa.com

المكتب يبدأ دوامهم الساعه 8 الى الساعه 2 الظهر لاستقبال الطلبات

ومن الساعه 2 الى الساعه 3 تسليم جوازات فقط

كان موعدي يوم الاحد الساعه 8 صباحا

حظرت الساعه 7:30 وبقيت انتظرهم عند الاستقبال تحت حتى بدأ دوامهم .

بعدين طلعت لمكتبهم في الدور 12

طبعا الدور 12 عباره عن مطعم او مطبخ كبير وطاولات حتى يكون استراحه للموظفين و يطبخون فيه وكذا بالاضافة لمكاتب لعدة شركات . ومن ضمن المكاتب مكتب BLS .

مكتب BLS صغير وهو عباره عن غرفتين ، الغرفه الاولى فيها ثلاث موظفين ، اثنين من الجنسيه الهنديه وواحد سوري اتوقع ، وهم المسؤولين عن استقبال الاوراق .

والغرفه الثانيه فتاه سعوديه وهي المسؤوله عن التبصيم والتصوير .

دخلت للمكتب وماكان فيه مراجع غيري ، الموظف اخذ مني الملف كامل وقالي استريح في مكان استراحة الموظفين ( المطعم ) .

طبعا الاوراق اللي اخذوها معروفه وتلقاها موضحه في هذا الموضوع ومافيها اي تغيير .
‏https://www.arabtrvl.com/vb/t5780.html
بالاضافه لبطاقة العمل مترجمه .

المهم الموظف راح للمكتب واخد الاوراق اللي يحتاجها من الملف وبعدين ناداني ولقيته مرتب الاوراق وكاتب عليها بياناتي وكل شئ وطلب ادفع الرسوم 300 ريال ( كاش )

وبعدها اعطاني وصل وقعت عليه وعطاني نسخه واخذ هو نسخه .

وقالي روح الغرفه الثانيه حتى تبصم وتتصور ، مع انه كانت عندي فيزا اخذتها العام الماضي وبصمت وقتها في المكتب الموحد ، لكن بصمت مره ثانيه .

خلصت التبصيم والتصوير وقلت لهم انا من مدينه بعيده عن الرياض وما اقدر استلمها ، وابغاكم توصلونها لمدينتي
قالوا نوصلها عن طريق ارامكس ولكن تدفع لارامكس 160 ريال

طبعا ضروري تكلمهم عن التوصيل لانه انا كلمت الموظف وكتب عنواني على الظرف حتى يرسلون الفيزا عليه

سمعت انه فيه ورقه لازم تعبيها اذا تبغى خدمة التسليم عبر ارامكس ، لكن كلمت الموظف السوري وقال خلاص مافيه داعي انا اتصل عليك لما توصل الفيزا وذكرني بمدينة التسليم .

كل هذا استغرق ربع ساعه فقط و بعدها طلعت من عندهم
ودخلت الساعه 1 الظهر على رقم التتبع في موقعهم وكان مكتوب في ما معناه ان الاوراق في طريقها للسفارة .

طبعا هذا الكلام كله يوم الاحد .

ومر اسبوع كامل والتتبع في الموقع ماتغير وماحد اتصل علي .

والاسبوع اللي بعده يوم الثلاثاء اتصل علي موظف ارامكس يخبرني انه وصلت لي شحنه علشان اروح استلمها

طبعا كنت عارف انه الجواز ، رحت استلمته ودفعت 160 ريال

فتحت الظرف ولقيت الجواز وداخل الجواز ظرف اخر مدبس في احد اوراق الجواز .

فكيت الدبوس ولقيت الفيزا ولله الحمد وكان مدتها سنتين

طبعا من وقت تقديمي الاوراق حتى استلامي الفيزا مدة عشر ايام .

وسلامتكم واعتذر على الاطاله