تجربتي في استخراج الفيزا الألمانيه بالرياض ( مارس 2015 )

SGR · 17-03-2015, 10:14 PM

السلام عليكم ورحمه الله وبركاته

أطرح لكم تجربتي في استخراج الفيزا الألمانيه
من المكتب الموحد ب أم الحمام بالرياض

تم حجز موعد بتاريخ 2015/3/3 - القسم الرجالي
عن طريق الموقع
http://www.vfsglobal.com/Germany/Sau...pointment.html
بقيمه 125 ريال
( لازم يكون معك فيزا عشان تحجز )

المستندات الي احضرتها كانت كالتالي :
( طبعا كلها لازم تكون بالأنجليزي )

- نموذج الفيزا + التعهد رقم 54+55
- حجز الطيران
- حجز السكن
- تعريف بالعمل موضح فيه الراتب ومختم
- كشف حساب لأخر 3 شهور ويكون مختم من البنك ( الكشف الي تطبعه من النت غير مقبول )
- تأمين طبي يغطي مده السفر
- عدد 2 صور شخصيه خلفيه بيضاء مقاس 3.5×4.5 ( بدون شماغ )
- الجواز + صوره من أول 3 صفحات

تم الوصول والموعد حقي كان الساعه 10.30
بس انا دخلت من الساعه 10 جيت عند موظف الأستقبال وعطاني رقم
ثم رحت للباب الخاص بالالمانيه والشنغن بشكل عام شيك الموظف الي عند الباب ان اسمي موجود ثم دخلت
كان فيه شويه زحمه في المكان واكثر السفارات الي عليها زحمه كانت الألمانيه والسويسريه والنمساويه
اما الأيطاليه فااااضين ماعندهم احد
الألمانيه كان فيه بطئ من الموظفين كانو بطيئين شوي طبعا كلهم هنود ياله يخلص الي قدامه
( اكثر م استفزني موظفي المكاتب هم سبب التأخير والفوضه الموجوده هناك )
بعضهم ماخذ الوضع كأنه ببيت ابوه !!!! يتحرك ويروح ويجي ومعاه ذا الشنطه في ايده

وزي ماقلت كان فيه بطئ شديد من الموظفين في انهاء الأجرائات
بس جاء واحد هندي سوبر فايزر وخرشهم وجلس على روسهم وقامو يخلصون بسرررعه
انا انتظرت تقريبا 45 دقيقه ثم جاء رقمي رحت وعطيته الأوراق
سئلني كم ليله بتجلس في المانيا ؟ وايش محطه الوصول ؟

واخذ الأوراق كلها وقام يدقق فيها كلها
خصوصا اوراق السكن
ورجع لي بعدها حجز الطيران
ثم خلص وعبا كل شي وقال ادفع 260 ريال
وعطاني الورقه البيضاء عشان استلام الجواز بعدين ..
بعد كذا قال انتظر ينادون اسمك عشان التبصيم
مكتب التبصيم عباره عن مكتب صغير ومكانه
جنب الموظف الي اخذ مني الأوراق
انتظرت 10 دقايق ثم ناداني وبصمت
وخلاص قال من 7 الى 14 يوم تجيك رساله

تاريخ التقديم 2015/3/3
تاريخ استلام الرساله الي تفيد ب انتهاء الجواز 2015/3/16
اخذت حوالي 13 يوم مع الويكند
( يعني تقريبا اخذت 9 ايام عمل )

اي استفسار او مساعده حنا حاضرين

الغردقاوي · 17-03-2015, 10:20 PM

تجربه مفيده جدا وسردك بطريقة مبسطه وواضحه
يعطيك العافيه على المعلومات المفيده
ونتمنى لك رحلة سعيده

MOBARKI · 18-03-2015, 02:06 AM

شكرا لذكر تفاصيل تجربتك

يعطيك العافية

آخـــرفـــرصـــة · 18-03-2015, 03:42 AM

الله يعطيك العافية

ننادي دوماً بتخصيص مكتب مستقل لأصحاب المكاتب و السماسرة

مو معقول انتظر وراء واحد معاه 20 جواز مثلاً

اقتراح موجه لمسئولي المكتب الموحد

تجربة مفيدة شكراً على طرحها

tab_el · 18-03-2015, 08:27 AM

الله لا يهينك اخوي

شاكر لك طرح التجربة

رحلة سعيدة ..

فيصل · 18-03-2015, 12:37 PM

شكرا لذكر تجربتك
صدقت بعض الموظفين سيء

الشهري · 18-03-2015, 10:32 PM

جزاك الله خير على نقل التجربه

عندي استفسارات بعد اذنك

انا بقدم ان شاء الله اخر الشهر

هل يشترط تعريف الراتب نسخة لكل شخص ام يكفي انا بس عن زوجتي

استفساري الاهم انا وصولي وعودتي ميونخ وباعمل حجوزات وهميه

8 ايام ميونخ و2 يومين النمسا بعدين 2 يومين ميونخ الاخيرة

وما راج الغي الحجوزات هل تتوقع يدققون او يشكون في توزيع الايام

جزاك الله خير اخي الكريم

ملللوك · 21-03-2015, 07:35 PM

اقتباس : المشاركة الأصلية كتبت بواسطة الشهري

جزاك الله خير على نقل التجربه

عندي استفسارات بعد اذنك

انا بقدم ان شاء الله اخر الشهر

هل يشترط تعريف الراتب نسخة لكل شخص ام يكفي انا بس عن زوجتي

استفساري الاهم انا وصولي وعودتي ميونخ وباعمل حجوزات وهميه

8 ايام ميونخ و2 يومين النمسا بعدين 2 يومين ميونخ الاخيرة

وما راج الغي الحجوزات هل تتوقع يدققون او يشكون في توزيع الايام

جزاك الله خير اخي الكريم

بالنيابه عن صاحب الموضوع
بخصوص تعريف الراتب الأصل خله معك وصور منه نسخه وأرفقه مع أوراق زوجتك

ما أتوقع يشكون هاذي سفرتك وانت حر كم يوم تجلس في اي مدينه
بس دامها حجوزات وهميه الأفضل ننقص ايام ميونخ واضف حجز وهمي في بادن بادن الألمانيه

بحيث تكون كذا
4 ايام ميونخ - 2 يوم النمسا - 4 ايام بادن بادن بعدين 2 يوم ميونخ

ولاتلغي الحجوزات الا بعد ماتطلع من المطار وتخلص من موظف الجمارك
لأنهم يطلبونها بعض الأحيان

بالتوفيق

الشهري · 22-03-2015, 02:19 PM

اقتباس : المشاركة الأصلية كتبت بواسطة ملللوك

بالنيابه عن صاحب الموضوع

بخصوص تعريف الراتب الأصل خله معك وصور منه نسخه وأرفقه مع أوراق زوجتك

ما أتوقع يشكون هاذي سفرتك وانت حر كم يوم تجلس في اي مدينه

بس دامها حجوزات وهميه الأفضل ننقص ايام ميونخ واضف حجز وهمي في بادن بادن الألمانيه

بحيث تكون كذا

4 ايام ميونخ - 2 يوم النمسا - 4 ايام بادن بادن بعدين 2 يوم ميونخ

ولاتلغي الحجوزات الا بعد ماتطلع من المطار وتخلص من موظف الجمارك

لأنهم يطلبونها بعض الأحيان

بالتوفيق

ما قصرت اخوي ملوك

طيب وش رايك ٣ ايام بيرتساو
٥ايام قارمش
٢ يومين سالزبورغ
٢يومين ميونخ

بحيث كلها حقيقيه ما عدا قارمش وهمي لان مكانه كابرون في الاصل

كذا اعتمد تشوفه احسن

أرسلت بواسطة iPhone بإستخدام Tapatalk

PrinceOfPersia · 19-03-2015, 01:56 AM

كل الشكر والتقدير على نقل التجربة التي عشتها بنفسك

بعض الأحيان نحكم على الأمور بحسنها أو قبحها بسس ما قيل لنا أو سمعناه
ولكن من يمر بالتجربة هو من يحكم بشفافية

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تجربتي مع الفيزا الفرنسية بالرياض	Mousa	فيزا	18	13-03-2018 09:02 PM
تجربتي في استخراج الفيزا الفرنسيه من جده	memo	فيزا	11	03-08-2015 02:07 AM
تجربتي في استخراج الفيزا من السفاره الايطاليه بالدوحه	Mrs. Nancy	فيزا	9	01-06-2015 01:55 PM
تجربتي في الفيزا الالمانيه اليوم 29/4/2015	الشهري	فيزا	20	08-05-2015 04:14 PM
تجربتي في استخراج الفيزا الفرنسية	ريلاكس مان	فيزا	16	02-05-2015 11:21 PM