بسم الله الرحمن الرحيم

الأحد
15 / 7 / 2018

لابد وأن مر عليكم في يوم من الأيام دعايه لأحد المجمعات السكنيه في اسطنبول ..

في هذه الرحله كان مقرر زيارة أحد الأقارب الذين يسكنون في أحد هذه المجمعات .. وتعرفت عن قرب عليها وما وجدته بها

وقبل ما اخوض في تفاصيل ها المجمع واعرض صوره عليكم ..

احب أن أخبركم ان احنا صحينا هذا اليوم منزعجين من أصوات النزلاء .. ورنين هاتف الريسبشن .. وهوشة عائله روسيه مع الموظف لان ابنهم كسر حاجه في الغرفه ما أدري وش هي ..
مشكله الغرف من غير عازل !!



انطلقنا انا وعائلتي (حفظها الله ) الساعة الثانية عشر ظهراً إلى جامع السليمانيه







ادينا فيه صلاة الظهر والعصر



يوجد أمام الجامع العديد والعديد من المطاعم والكافيهات المطلة على البسفور .. هذه المطاعم من عدة أدوار .. واجمل دور طبعاً هو التراس بجلسته الجميله المطله على البحر وعلى مدينة اسطنبول

صوره للمباني اللي أمام الجامع .. وعليها دوائر حمراء



صور من الجلسات الجميله في هذه المطاعم

جلسات روقاااااااااااااان







لفينا أغلب المطاعم وكانت جميع الطاولات الزينه المطلة مباشرة على البحر مليانه !!

وكان الجو حرررررررررر والشمس حااااااااره بشكل لا يطاق
( بعدين عرفنا أن هذي موجة حر ضربت اوروبا كلها )

تعبنا من اللفلفه .. وذبحنا الجوع والحر .. وجلسنا في أحد المطاعم
طلبنا فطور وشاي وعصيرات وايس كريم







ما طولنا بسبب ارتفاع درجة الحراره .. ورجعنا للفندق نتجهز لزيارة قريبنا

اللي يسكن في مجمع سكني اسمه ( bizim evler 6 ) في حي ( esenyurt ) بجوار مطار أتاتورك الدولي

في الطريق للمجمع كنت أفكر في شكله !!

وش يبغى قريبي بمجمع سكني مقفل عليه بسور !!

وليه أستاجر فيه بالسنه !!

وكم سعر الايجار !! وليه ما اشترى تمليك !!

أكيد ها المجمع بعيييييد !!

وكيف يقضي فيه ثلاثة أشهر الصيفيه !!

وشهر بالشتويه !!

وش عنده من خدمات !! ومطاعم !!

وكان في بالي شكوى الناس من أن المجمعات السكنيه لا تكون مطابقه للدعايه !!

وصلنا .. بعد نص ساعه فقط !! من فندقنا بمنطقة السلطان أحمد !! مو بعيد يعني .. حلووو

اطالع والا أشوف أبراج سكنيه من 22 دور

أبراج ملونه جميله .. تفتح النفس .. مو أبراج صماء مسلحه

مجمع كبيييييير













وسيكورتي وأمن عند البوابه



المجمع جاهز من مجاميعه ..

أمن ( سيكيورتي ) ..

صيانه وخدمات

نظافه

عدد 3 سوبرماركت

العديد من المطاعم والكافيهات والمحلات المختلفه

وسط المجمع نوافير منظرها يشرح الخاطر

ألعاب أطفال

ملاعب كرة قدم

كرة سله

بلياردو

ألعاب كمبيوتر

مسبح داخلي



















الحقيقه تفاجأت من مستواه الراقي !! وتوفر الخدمات .. ومستوى المطاعم والكافيهات اللي فيه وحوله



سوبر ماركت كبيرررر



صور من داخل شقة قريبي .. ويلاحظ الاطللاله الجميله على النوافير ومنطقة الألعاب
الصراحه روقاااااااااااااااان







نزلنا تمشينا عند منطقة النوافير .. ومنطقة ألعاب الأطفال
وملاعب كرة القدم والسله
وشفنا المسبح الداخلي



كما يوجد مولين كبار بالقرب من المجمع .. أحدهما ( مول اسطنبول ) المعروف الكبير

اللي فاجاني أكثر واكثر !! سعر الايجار !!
فقد كان رخيص جدا!!

الشقة الأرضيه تبدأ من 25000 خمسة وعشرين الف ريال سعودي في السنه !!
( السعر ذا احنا ندفعه في عشرة أيام في تقسيم !! )

وكل ما تطلع دور يزيد السعر

ويختلف الايجار حسب الشقق .. فيوجد شقه بغرفه .. وغرفتين .. وثلاثه .. وأربعه

والشقق جاهزه بمطبخها فقط .. والفرش عليك

وفيه شقق ايجار .. وفي شقق تمليك

التمليك يبدأ من ثلاثمئة ألف ريال سعودي .. إلى مليون ريال

يوجد عيب واحد لابد من ذكره .. وهو أنه احياناً يأخذ الطريق من المجمع إلى منطقة السلطان أحمد ساعه تقريباً بسبب زحمة السير

في المساء ذهبنا إلى مطعم للعشاء في حي ( بهجه شهير ) المجاور للمجمع

المطعم رااااقي

خرفان تلف فوق الجمر .. ومشويات .. ولحم لذييييييذ



بعد العشاء .. رجعنا للمجمع .. وارتحنا وشربنا شاي في أحد الكافيهات الراقيه



صور للمجمع وقت البرد والثلوووووج





يوجد في اسطنبول العديد والعديد من هذي المجمعات السكنيه

زياره احببت أن أنقلها لكم

اللي يفكر يشتري شقه أو يستأجر بعد التقاعد .. فأنا أنصحه باسطنبول
يجلس في ها المجمع ويريح أعصابه .. ويستمتع بجو اسطنبول الجميل

وإذا يبغى تقسيم أو اورتاكوي أو منطقة السلطان أحمد قريبه منه نص ساعه أو خمسه وأربعين دقيقه وهو واصلها

يتبع ..