عائدون .. مغرمون وعاشقون ~ لزيزا وخصوصا كاميرون . رحلتي2 ( 2014sep ) - الصفحة 17

ياسمين و جوري · 10-02-2015, 12:43 PM

الله على التقرير الرائع شوقتنا لزيزا
وعرفتنا على منتجع رائع الاندمان
الكازمي والتقرير

kazami · 10-02-2015, 04:36 PM

طبعا بتلاحظون ان في هاليوم مافيه كثير من المزارات. لسببين الاول ان الاغلب مرهق وتعبان. أصبع وكتف
والثاني أننا كنا متخوفين من الأمطار . وهذا ماحصل فيما بعد.

بعد الراحة والافطار قررنا قبيل الظهر أننا نطلع للبراشوت. ونتونس شوي. وبسم الله وتولى القيادة أبوكتف أحمر
وأنا تفرغت للتصوير..

واتجهنا الى شاطئ رهو الذي يقع شمال جزيرة لنكاوي وهالشاطي المميز الجميل
يوجد به فندق رهوTanjung Rhu والفورسيزون.
وفي هالشاطي ايوجد ايضا شركة البراشوتات اللي نبيها. وتتميز أنها شركة فخمه ومتخصصه بالألعاب والانشطة وأسعارها نااااااار. لكن أمان في البراشوت بشكل عجيب.
حيث انك تركب وتجلس وهم يتكفلون بالصعودللأعلى من داخل القارب ثم يرجعونك داخل القارب بدون ان تحرك اصبع.
عكس البراشوت العادي اللي يسحبونك من الشاطي ولازم تجري شويتين.ووقت النزول
يصفر اللي تحت واذا سمعت التصفير فوقتها تشد الحبل بتوازن حتى تعود سالما للشاطي.
والاغلب ياينزل بالبحر ويغرق مثل اخوي.. يايتم سحبه على وجهه على الرمل لانه شد الحبل بقوة. وقد شاهدت واحد في فلامنقو. جرررررووووه جروووووه الين قال بس.
واليكم لمحة بسيطة عن هالشركة

وبالصورتين السابقتين شوفوا اعلى موقع لهم. تراه موقعنا.

واليكم صورة توضح شوطئ لنكاوي

ومعلومة للفائدة(طريقة البراشوت الآمن هي دينمو فيه واير يقوم الدينمو بإطلاق الواير فيرتفع البراشوت ويقلع المرء. وعند الانتهاء يلف الدينمو الواير فيعود البراشوت للقارب,))

المهم وصلنا المكتب حقهم.

وهالعلامة حقتهم بالشاطي..

وهنا كان واقف الموتر الشبح حقي

وطلبنا برشووت لأربع افراد وقالو النفرين ب400رينقت. ياهوووه وش هالسعر ؟؟!!
من هنا ومحاولات و مكاسرة واسعار محدده وبالاخير وصلنا ب700. وقالو نمد الوقت من 10دقايق الى 15دقيقة قلت تم ودفعت لهم بالفيزا.

ولازم تلبس هالسوارة البلاستك

واتجهنا الى الشاطئ فهناك مظلة لهم يتم فيها شرح للبراشوت واجراءات السلامة
وايضا فيها الملبوسات الخاصه مثل سترات النجاه . وصندوق امانات للأغراض الخاصه,

وهاي هي سترة النجاه

ولمحة على الشاطي..

وبعد الشرح
توجهنا الى القارب.
وتعرفون اصبعي مصاب ولاأبي يلمسه الماء وسرت انطنط وعرضة جنوبية الين ركبت

وركب معنا عائلة سعودية قحطانية مكونه من زوجين وابن عمره تقريبا سنتين. وكانو نعم الرفقه. وفندقهم الدانا وسيارة فخمة وصلتهم الى البراشوت ومعه سواق والسواق بمضلته وراهم. وانا مسكين حتى الكازامية تضيعني بعض المرات.والمشكى على الله.

ماعلينا اهم شي الاخلاق .
واليكم لقطات متنوعه من ماحولنا

وبدأ القحطاني أبو علي يستعد للأقلاع.

وهاهو بالسماء محلقا كالنسر.

وكما لاحظتم الغيوم بكل مكان.. خصوصا ان به غيمة مخيفة جهة تايلند جايه ومعها مطر.

وقلت لأخوي اطلع قبلي . فالوقت يدهمنا ولو فاتني البرشوت قد ركبت نفس التجربة قبل
سنة. وعادي اذا فاتت. قال تم. وطلع وماجلس بالجو الا 12دقيقة ودهمنا المطر.

وأصبح في حكم المؤكد أنني لن اصعد والكازمية تتمنى انها الي فوق بالبراشووت .
وجلست اردد ياقلب لاتحزن. ترن ترن. ماعليه خيره ولعلها أفضل لنا.
وشوفو البراشوت من رحلتي عام2013

وعند عودتنا الى الشاطي اشتد المطر ومع سرعة القارب اصبحت حبات المطر كالرصاص
مؤلمة وتحرق. وبدأ الطفل الصغير بالبكاء وغرقت الكام ولامعنا شي نتغطى به وحوسة.
والحمدلله دفدفنا الوضع ووصلنا الشاطي بالسلامة. واتجه الجميع للمظلة الا انا فاتجهت للسيارة ودقت السلف ورحت يم المظلمة واخذت ربعي من هناك. وكانت الاستغراب على
وجه ابوعلي. وكأنه يقول كيف تسوق والدركسون عكس؟ .جاوبته قبل مايتكلم قلت سهلة وممتعه. وودعناه ومشينا.
وعلى مكتبهم وقلت هات فلوسي وقالو مافي كاش ترجع لك على حساب الفيزا.. وبالفعل اسبوع وهي راجعي.

طبعا الكازامية عطوها العاملين منشفة يوم غرقت وشالتها معها للذكرى.

لقطة ختام..

نصحية في الاخير.. الاخوات اللي يرغبن بركوب البراشوت يفضل لهم لبس بنطال ليس بالواسع وشررراب اكرمكم الله. ويكون لون البنطال بلون العباءة اسود. هذا لمن يريدو الحشمة. وطبعا بالقارب كل واحد يلبس أهله حبال الكرسي اللي مربوطة بالبرشوت.
وجولة موفقه للجميع.

himzmz · 10-02-2015, 04:20 PM

اخيرا وصلت فوق
ياسلام عليك وعلى تميزك
يعطيك العافية

himzmz · 10-02-2015, 10:07 PM

يا عيني على المتعة واﻻكشن يا كازامي
بالفعل الشركة دي رايقة ولهم مكتب اخر عند فندق الدانا مباشرة بجانب البقالة والمغسلة
السعر والله نااااار
وعدم ركوب البراشوت لعله خيرة لك وتعوضها ان شاء الله في مرات مقبلة

A.Alsubhi · 10-02-2015, 11:56 PM

ايه ده الجمال ياعيني عليك جزء ولا اروع والجو يبكي واللي راح لنكاوي وماراح شاطئ رهو فاته نص عمره باختصار افضل وانظف واجمل شاطي هو رهوووو روعة روعة روعة

طارق عنايات · 11-02-2015, 12:31 AM

جزء جميل

ايام لنكاوي لا تنسى

تابع أيها الكازمي

kazami · 11-02-2015, 01:35 PM

الحمدلله طلعنا من البراشوت والدنيا مطر ومرينا على فندق فورسيزون

وبعدها على شارع سينانغ نبي مطعم كايف.

ووصلنا الى وجهتنا ولم تكن تمطر هنا. مجرد غيوم. والوقت اللي وصلنا فيه كان منتصف الظهيره.
وبعد مشاورات اخترنا مطعم القصر.

وكان لديه اصناف عربية وهندية.

اسعاره متوسطة وأيضا جودة الطعام متوسطة فهو لذيذ ولكن تحسه مو جديد بل مسخن.
مجرد أحاسيس.
وبعد الانتهاء رأيت كتف أخوي مازال به أحمرار. وتبين لنا أنه جلس في أحد الكنبات اللي بالاستقبال قبل يوم وإتكأ بكتفه وهو مكشوف على خداديه هناك. ومن بعدها أحس بحكة
وحرارة بكتفه. قلت له حصل خير والحمدلله أنها جات كذا.. وثاني مره قول أذكارك. وفجأه صاح أخذ عقلي..
وش فيه؟
ولد وش تحس؟
وش بك؟
ماذا لديك؟
مالذي تحس به؟
قال نسيت نظارتي بمكتب البراشوت.. آآآآآآآآآه
روعتني والحريم وراء قفلت معاهم لانهم أرادو التسوق شويتين في شارع سينانغ.
والان أصبحنا مضطرين للعودة لشمال لنكاوي. وقلت نختصر الطريق ونكسب ونروح من
الطريق الزراعي.

ثم انتهينا من الطريق الزراعي وقب مانوصل وجهتنا مرينا بمحل يبيع فواكة واسسسسفط يامعلم.

ووصلنا المكتب واخذنا النظارة ووجدنا الامطار مازالت في هالمكان فقررنا نجلس ونستمتع.
ومضى الوقت سريعا.. وبعدها الى التسوق.
للأسف لايوجد صور مناسبه في هالعصرية الممله ((أكره التسوق)).

والحمدلله مع غروب الشمس قررنا العودة للفندق وتجهيز الشنط ثم النوم مبكره.
ونحن بطريق العودة مرينا على محل للبيتزا قريب الدانا. واخذنا شي بسيط لطوارئ الليل. فالاندمان منعزل ولازم ناخذ احتياطنا.

وعند الوصول تم النفير الى الغرف مباشرة ولم يحين موعد صلاة العشاء الا وكل
شي منتهي. وكل الترتيبات على مانريد. وكانت عيوننا كذا
اخوي ذهب للعيادة اول ماوصل وراح هو والطبيب الى الادراة. وقالو لأخوي تبي اي شي أحنا حاضرين؟ قال ابي اعرف السبب عشان المره الجاي اتجب هالشي. فقامو بتفتيش
الكنبات والكشف على الخداديات ولكن مافي شي ملفت للنظر أو يوحي بالخطر.
فاعتذرو له بلباقة وتمنو له الشماء ووعدو بزيادة الحصر وبتغيير الاثاث وتنظيفه.
وبعدها
فخلد الجميع للنوم ماعداي. وذلك لان لدي شي لم انتهي منه الا وهو(( فلوسي اللي عند ادارة الفندق)) وهالفلوس سحبوها من الفيزا في بادئ الامر على انها من قيمة الحجز ولكن حصل تخفيض وتوفر لي حوالي 550رينقت. وقالو اذا وصلت عندنا نعطيك هالمبلغ الزائد.
وانا من أول ماطبيت الفندق أبلغتهم وذكرتهم بهالشي وقالو مافي مشكلة. حقك موجود.
توجهت للاستقبال وقابلت واحد وقلت له لي فلوس زايدة عندكم. في البداية حسيت انه يماطل. متى؟؟ كيف؟؟ ماقد حصل هالشئ؟؟ عندك ورقة الحجز؟؟ خليني اشوف الجهاز!!
ثم بالاخير قال كلامك صحيح بس أنت لازم تستفيد منها في مرافق الفندق فقط ولايمكن أعادتها. وقتها . شوي وانفجر.. قلت له:: هالكلام تعلمني به وأنا خارج. وينك من أول يوم؟؟!! تراني جيتكم وكلمتكم بالمبلغ وقت دخولي ليش مانبهتوني على هالنقطة وكان أمداني اروح المساج او اسوي ترقية او اتعشى بمطاعمكم او او او. وانصدم يوم قلت انا بكرة الصباح مغادر على 9بالضبط. حاول يرقع حاول يقلب الموقف علي لكن مامعه مفر.
بالاخير قلت له كلمة وحده قلت للأسف أنتم (( سيئين )). ومشيت وفجأه ناداني
رجعت وقالي بكلم ادارة الفندق الان لحظة,, واتصل وقالو له: عطه يستاهل.. وفتح الصندوق وطلع لي الدراهم ومدها واعتذر,, وقال لكم هدية من الفندق وهي 300رينقت
لك غرفة.. موكاش. لكن من المطعم تطلبون اللي تبون بقدر هالمبلغ. طالعت فيه وقلت شكرا. وفي نفسي اقول بعد ايش؟ الشعب نايم ويمكن مالهم نفس. لكن يبقى هذا الكرم وهذه الترضية وهذه الهدية من شيم الاندمان. وقد احسنت الظن فلعل الموظف لم يعلم او انهم يمنعون رد المال للعميل عموما. لكن اعتذاره وتعامله بعد الاتصال تبين ثقافة هذه الادارة الراقية واصبح الاندمان اجمل من ذي قبل. فالان فندق رائع. وادارة تعاملها جميل.

رجعت الغرفة واسيقظت الكازامية وناظرتني. وقالت في وجهك ضحكة غريبه وش السالفة.؟؟ واعطيتها العلم قالت: اجل خل البيتزا للقرود.ثانيا وش ورانا خلنا نطلب أكل زين وفخم وحار ودق مع العيش باللي نقدر والباقي يشيلونه. قلت تم .
وهات المنيو وطلبنا . ورحت عند اخوي وصحيته وقلت لكم عشاء مجاني قال من صدقك؟
انا البيتزا ماأكلتها ابي انام. قلت براحتك بس هذا عشاء فخم وترضية من الفندق. قال
وش رايك تطلب لي على ذوقك وانا بروح انام. وبصحى اذا وصل.

طبعا ماحبيت ابالغ وارمي انعمه ونلعب بها. فطلبت فقط مااشوف اننا سناكله وطلع المبلغ لي فقط ب170رينقت تقريبا . ومثلها لاخوي.واهم شي التحلية.

صورت الحلى لكم من كل جانب عشان تشوفون قد ايش حجمها..مره كبيره

وثم خلدنا للنو وانتهى هذا اليوم الجميل .

abdullah h · 11-02-2015, 09:17 AM

تقرير مميز ومتابعين ياكازمي

كتكات783 · 11-02-2015, 10:44 AM

أهلا بالرائع ( كازامي )
أينما تحل يحل الإبداع معك ...
أجزاء جميلة وسلسلة ممتعة من الجولات في الساحرة لنكاوي ..
أزعجتني سالفة الإصبع والله من وصفك لها حسيت بالألم ..
تجربة البراشوت ما جربتها وأول مرة أسمع عنها ..
واصل أيها الجميل فمازال تقريرك يضفي جمالا لذائقتنا ..

حجــازية · 11-02-2015, 04:16 PM

سلامة الوالده ماتشوف شر
الله يشيفها شفاءً لايغادر سقما هي وجميع المسلمين
تفاصيل جميله وصور رائعه
شكرا لك

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي العرض المتطور الانتقال إلى العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
فنادق كاميرون	شهد	ماليزيا	9	05-06-2015 05:21 PM
فندق ليك هاوس .. في كاميرون هايلاند بعدسة ابو ساره11*	أبوعبدالله (الاسفار )	ماليزيا	4	19-03-2015 08:12 AM
فندق century pines resort في كاميرون هايلاند بعدسة أحمد ياهوو	أبوعبدالله (الاسفار )	ماليزيا	4	19-03-2015 03:26 AM
القيادة في ماليزيا وخصوصا لنكاوي	Ahmedzahran	ماليزيا	11	10-01-2015 03:07 PM