عائدون .. مغرمون وعاشقون ~ لزيزا وخصوصا كاميرون . رحلتي2 ( 2014sep )

kazami · 20-08-2015, 06:34 AM

اصبحنا واصبح الملك لله.. هاهو فجر اليوم الثالث بكاميرون قد انبثق.. ولاح بالافق.

كنت قد قررت ان يكون هذا اليوم بلا جولات. فالاسترخاء مطلب والتمتع بالاجواء يطرب.
وخصوصا ان كاميرون للقلب دواء. وقد اعطيت السائق اجرته باليوم السابق وودعته وقالي
بعطيك ثلاجة شاي خاصة لك من بيتي . قلت مايرد الكريم الا اللئيم . والى هذه الساعة
وانا انتظره. وباذن الله مايتاخر.

المهم بعد الافطار البسيط الذي تعرفونه.. رجعت للغرفة وفتحت النافذه وكان الشارع قدامي.
فقلت مافي حل الا اشوف لي غرفة فاضية واطلالتها حلوه واتكي واللي يسير يسير.
بالفعل لقيت وحده واخذت هاللقطات الجميلة والتي تبين ان الجو يبشر بالمطر... تفضلو:

وعلى طوووووول مايكممل هالجلسة ويزينها الا كوب شاي بوه. واحد شاي يامعلم وصلحووه.
ومضى الوقت دون ان اعلم وارتفعت الشمس كثيرة. وبدا الجمال يظهر بكل وضوووووووووووح.

نسيم عليل.. وخليل وليس اي خليل. في كاميرون حيث الجمال الاصيل.
واجتمعت في هذا المكان كل الامور التي تذهب عن النفس الحزن.

وعندما قاربت الساعة 11صباحا قررنا اولا النزول الى الميني ماركت
الذي مباشرة تحت الفندق وبجوار الماركت مطعم ماليزي.طبعا اخذ
بعض الخفاييف وبوارد ومشينا.. وهاي صورة للوحة المطعم

ثم اقرب تكسي وبنروح على عجل الى مناحل العسل. فالمدام وصاحبتها يبون
يشترون من هناك بضائع التجميل وشوية شغلات حريم وطبعا كلها بالعسل.
كريمات . اقنعه. شمبوهات. مرطبات وغيرها.. ولاادري من مدحها لهم..

طبعا بصراحة المكان جدا عادي وليس فيه شي يستحق الزيارة الا المتجر.
يعني اللى بيروح يتفرج تراه عادي ولايستاهل العناء. واليكم الصور:

واسفل المتجر حديقة فيها خلايا النحل:

ماعجبني المكان اللي تحت.. والمتجر ازين..

وكانت الاسعار نوعا ما مقبولة. وبعد كذا قضينا اللى بغيناه وعلى التاكسي ويامعلم تانا راتا لاهنت.
قال السواق ماتبغون حديقة الفراشات.. وبس ناظرنا اللوحة وانسدت نفسيات البنات ورفضو الفكرة
وكنسلت الاقتراح وتوجهناا الى تانا راتا. واليكم الصورة اللي تخووووف .خخخخ عشان الخنافس:

للاسف الطريق مزدحم وانا قرفت من الجلسة ويوم قربنا قلت للسواق بنزل اكمل طريقي مشي.

واول شي شفته هو فندق سنتري باينز. هالفندق يعتبر اقتصادي بكاميرون واجمل مافيه موقعه
كويس وقريب من الخدمات.وهو بالضبط قبل تانا راتا باقل من كيلو.
طبعا حول الفندق وقبله محل صرافه وبنك وصرافة اليه ومطاعم ومغسله ومحل مساج وشقق
ومكتب باصات تابع شركة سي اس فيما اظن.. واليكم الصور:

بعد كذا واصلنا السير الى تانا راتا وقبل مانوصلها كان يوجد مجموعة حدائق ومكاتب وادارات رسمية
قلت اخذ فيها فره واخذ لكم كم صورة. تفضلو:

تممدنا شوي بالحديقة فالجلوس فيها والاجواء الباردة كانت ترد الروح. وبعدها دخلنا تانا راتا واليكم الصور:

المبنى البني اللي بوسط الصورة السابقة. هو موقف التكاسي والباصات.وتستطيع تقص التذاكر فيه لبعض الشركات.
والان خلونا
نواصل صور تانا راتا. فهي قلب كاميرون ماليزيا. وبها اغلب الخدمات والاسواق والمطاعم ومحلات الصرف:

وكما لاحظتم مكتب شركة سي اس للباصات موجود بتانا راتا ايضا. وهذا المكتب هو مكاني غدا عند المغادرة,

لقطة للطريق الذي سنسلكه عند مغادرتنا الى كوالا باليوم التالي. ونفس الطريق يوصلكم لمزرعة الشاي
وللشلالات.

لقطة لمدخل تانا راتا لمن هو قادم من كوالا.

احد الفنادق التي ضمن تانا راتا.

واخيرا وصلنا آخر تانا راتا وقدامي محلات بسيطة لبيع الملابس والالعاب واشياء اخرى. وايضا حلقة خضار.

أول محل دخلته كان فيه عجوز ماليزية مسلمه ومشغله تلفازها الصغيرة وفيه محاضرة
يتخللها قران بصوت الشيخين الشريم والمعيقلي. قسم بالله يوم سمعت صوتهم ابتسمت وفرحت.
لان اول مره اشاهد هالشي في ماليزيا. وقتها افتكرت ان معي في حقيبة الظهر سي دي قران للشيخين
السديس والشريم. فقمت طلعته واعطيتها. وشفت الدهشة في وجهها وفهت دقايق ثم شكرتني
وراحت شغلته ويوم اشتغل هاتك دموع ياولد. وانا غرقت ولاعرفت وش اسوي؟ مدري تاثرت ولا ذكرتها
بشي محدد والا وش السالفة. ورجعت لي تشكرني وقالت قض من عندي ولك نصف السعر واقل.
والحمدلله والله مانويت الا الاجر وربي يشهد. والكازامية بس سمعت هالكلام راحت خمت نص البضاعة.

وبصراحة البضاعة ممتازة والملابس جودتها عالية واحسن ماعجبني اني ماقد شفت هالملابس بباقي
المدن. لان هالملابس كلها لازم مكتوب فيها كاميرون هايلاندز.وتصميماتها روعه ورسوماتها معالم لماليزيا.
اعجبتني مره.. وقررت اخذ هدايا لجميع اهلي واخواني واولادهم. والحمدلله نالت رضاهم رغم اني اعطيتهم
سابقا هدايا اخرى اجمل. لكن هذي كانت مميزة. خصوصا انها تبقى. ومازلت اراها الى هذه اللحظة على الاولاد
والاخوان.
طبعا شي ب30 يسير ب12 واللي ب20 يسير ب8 وهكذا. غير بعض ملابس الصغار تقول هدية.
انحرجت مررررره وحاولت اتفاهم معها واقولها معانا فلوس. لكن تعرفون عناد العجايز وبالاخيرة قلت
مبسوطة وليش انكد عليها. براحتها. وخرجنا من المحل بحملة قلاب ملابس.

بعدها مرينا حلقة الخضار المجاورة واشترينا الفاكهة الغريبة الرامبوتان ..بالإنجليزية: Rambutan..
وطعها حالي على حامض. ولها فوائد عظيمة لكن الصدق مااعجبت رفاقي كلهم. وهاي صورتها:

ثم رجعنا لوسط تانا راتا وقصدنا مكان يسد الجوع الذي بداخلنا..وهالمكان هو((بيت الكاري))مطعم ممتاز جدا..

وسبحان الله بس دخلنا لمطعم فاذا بالغيوم تتلبد والقطرات تنزل.قلنا الحمدلله اننا انهينا جولتنا بنجاح.

ولازم تكسي يشيل البضاعة اللي معنا والجو مايسمح بالمشي. وعدنا للفندق وعندما خف المطر
في منتصف العصرية. نزلنا الى حديقة الفرولة فالاسكريم مايتفوت. وطبعا لاداعي لتكرار الصور. فاصل

لقطة ختام

أبن السلطنةمعجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
فنادق كاميرون	شهد	ماليزيا	9	05-06-2015 05:21 PM
فندق ليك هاوس .. في كاميرون هايلاند بعدسة ابو ساره11*	أبوعبدالله (الاسفار )	ماليزيا	4	19-03-2015 08:12 AM
فندق century pines resort في كاميرون هايلاند بعدسة أحمد ياهوو	أبوعبدالله (الاسفار )	ماليزيا	4	19-03-2015 03:26 AM
القيادة في ماليزيا وخصوصا لنكاوي	Ahmedzahran	ماليزيا	11	10-01-2015 03:07 PM