بعد الغداء ( كبسة لحم غنم )

انطلقنا الساعه الثالثه للمقناص للمرة الثانيه هذا اليوم

ونحن نردد

يا كريم يا كريم ماخاب طلابك





تلاحظون في هذي الصورة كثرة الشجر والشوك والعشب وصعوبة الرؤيه
والله لو وراها عشرين غزال مادرينا عنها



وبعد اول نص ساعه محبطه !!

رضوان / الحين بنستخدم التكتيك الجديد في القنص .. بينزل اثنين منكم هنا ومعاهم المساعد حقي .. واحنا بنلف بالسياره حول المنطقة .. وبالتالي الحيوانات عندما ترانا سوف تهرب باتجاه الاثنين اللي نزلوا

نزل ابونمر وابوسعود وأخذوا بندقية قناصه ورافقهم مساعد رضوان ومعاه جهاز لاسلكي للتواصل مع رضوان



احنا كملنا طريقنا



بعد نص ساعه من البحث .. بدا الشغل المزبووووط

توقف السائق وكلم رضوان على غزال شاهده مختبئ خلف شتلة صغيره غير بعيدة عننا

رفع رضوان البندقيه ونظر من خلال منظار البندقيه وكان في وضع يسمح باصطياد الغزال وقال انه غزال من نوع ( ستين بوك ) واشر لنا على مكانه

ثم قدم البندقيه بسرعه لعبدالرحمن الذي كان بجواره لاصطياده ولكن عبدالرحمن فضل ان يقوم نجم باصطياده ..

وبين شد وجذب أخذ رضوان البندقيه وقام بإطلاق الرصاصة على الغزال واصابه في مقتل

نجم / جاك عشاك الغزال يابو حمزه

ابو حمزه / ياعيني ياعيني هذا الكلام الحلووو



شوفوا الغزال وش حلاه وايش زينه



وهاتك ياتصوير وسنابات لهذي الذكرى العظيمه

أخوكم نجم متصور أول واحد معاه



وضعنا الغزال في السياره

وكملنا المسيره .. وتفاءلنا خيراً

ثم رجعنا لبقية المجموعة .. الذين كانهم حظهم سئ ولم يصطادوا شيئاً

انقضت الساعة اللاحقه دون فائدة

ولاحت لنا زرافة الأمس وكأنها تقول لنا / أنا هنا صيدوني !!

والله لو تتكلمي وترقصي ما احنا صايدينك

بعد ذلك وصلنا لمنطقه وكأنها مخصصه لأكل الحيوانات

رضوان / هنا تلاحظون مكان للماء .. ومكان للأكل

هذا المكان نستخدمه وقت البرد ككمين للغزلان .. وقت الشتاء تموت الاشجار .. والزرع يقل كثيراً فلا يجد الغزال أكل يأكله .. فنضع له بعض الاكل .. وبعض الماء .. فياتي ونصيده

صوره لمكان الماء



صوره لمكان الاكل



ابو نمر / وأكيد هذاك البرج العالي يجلس فيه الشخص ليصيد الغزال



رضوان / نعم صحيح .. ولو لاحظتم احنا لافينه بقماش اسود عشان مايبان القناص .. بيجلس القناص حوالي ساعتين وأحيانا ثلاث ساعات ينتظر !!

أبوحمزه / بالله أجلس ثلاث ساعات فووووق !! لا جوال يسليني !! ولا احد يكلمني !!

نجم / اللي يبغى الدح ما يقبول أح

فضلنا العودة للاستراحة لكي يتمكن العمال والخدم من سلخ وتقطيع الغزال



ثم سلمناه للطباخ لعمل الغزال بطريقتين .. كبسه .. وشوربه مع لحم مسلوق

أثناء اعداد العشاء تفرجنا على كلاسيكو الارض بين برشلونه وريال مدريد

ثم حضر العشاء المنتظر

وبعد العشاء

نجم / الحين هذا الغزال اللي ازعجتنا فيه من السعوديه !!!! طعمه عاااادي جداً !!!

عبدالرحمن / ولحمته ناشفه بعض الشئ !!

أبونمر / يارجال ولا حق تعبنا ومطاردتنا !!! والله ياطعم الخروف الحري أحسن منه مية مره

أبوحمزه / لكن الشوربه لذيذه .. ولحمه مسلوق ألذ .

ابوسعود / ياشباب ترى الغزال هو كذا لحمته ناشفه .. ولا تنسون انه غزال بري وكله عضلات .. مافيه شحم .

تداخل مامادو / المفروض الغزال ماتطبخونه من يوم تصيدونه .. تخلونه يومين على الأقل في الثلاجه وبعدين تطبخونه .

نجم / ياسلام هو احنا اللي طبخنا والا انت !! وبعدين كم يوم احنا حنجلس هنا !! كلها خمسة ايام .

مامادو / معوضين في الغزال القادم ان شاء الله ..

يتبع ..