وعليكم السلام

انا الان في جورجيا وقبل السفر سويت بحث وراسلت كم شركة وبالاخير حجزت :
- السكن من موقع AirBnb
- حجزت سيارة من موقع https://www.discovercars.com/ وهو موقع وسيط لان مالقيت السيارة اللي ابي عند الشركات العالمية ( كنت ابحث عن سيارة رفيعه ) لان بعض الاماكن والشلالات الوصول لها صعب بالسيارة الصغيرة .

- حجزت الطيران من طيران ناس .

ارخص حجز سكن ومواصلات من الشركة كان ب 16000 لمدة اسبوعين لاربع اشخاص . زودت ع المبلغ شوي وحجزت سكن ومواصلات وطيارة لمدة 25 يوم .

-
نصيحتي احفظ قريشاتك واحجز سيارة ويكون الضمان ( صفر ) بحيث ماتتحمل اي شي لو صار اي شي واختر السيارة دركسون يسار لان عندهم النوعين يمين ويسار . ويفضل السيارة تكون رفيعه موب شرط دفع رباعي .

- الرخصة السعودية مقبولة .
- السواقة سهلة تقريبا وترى سواقتهم مثلنا في السعودية يعني مافيه تقيد بالانظمه 100% والدوارات الافضلية مهيب للي بداخل الدوار .

- السرعة غالبا 40-60 كيلو في الساعه بس الطرق جدا جدا ممتعه .
لو بتروح قودواري وتزور المطل عند كنيسة الثالوث ( ماشوفه يستاهل ) الطرق صعب شوي وفي بداية الطريق في مواقف تقدر توقف وتخلي احد يطلع بك فوق ( انا سقت فيه هو ضيق ولفات كثيرة زاعمال صيانة ) بس ماحست بصعوبة .

- السكن من Air Bib رخيص جدا ومتوفر خيارات كثيرة وممتازة .

بالنسبة لي تبليسي ماتستاهل اكثر من يومين او ثلاثة بالكثير .

- باتومي حلوه وحوالينها فعاليات كثيرة وكانت رحلتي لها وبرجع له وابجلس فيها بعد كم يوم وحبيتها اكثر من تبليسي .

- قودواري لو بتروح لها هي حلوه بس مافيها فعاليات لانها شتوية بس فيها طيران شراعي وجبالها سبحان الخالق جميله جمال لايوصف وتستاهل للي يحب الكشتات يومين وتسكن في القرى اللي بعد قودواري ( بعد ماتنزل من الجبال فيه منطقة مره زينه لو صملت عطيتك الموقع .

- برجومي حلوه وتستاهل ثلاث ايام وحولها اماكن تمشي كثيرة وحولها باكورياني قرية في الجبال توني اليوم واصلها وباجلس فيه شوي .

- كوتايسي فيها فعاليات كثيرة بس مابعد وصلتها .

- الاكل متوفر الحلال بس اكلهم دسم وغالبا بتلقى المنيو كبير بس الفعلي كم وجبه مثل الخاشبوري ( بيض وجبن باكثر من طريقة ، والكينكالي ( مثل المنتو بس عجينة سميكه بلحم البقر ) ويصلحونه بالخنزير فلازم تسئل . والاوستري (صالونة لحم بقر ) .

الاسعار خارج تبليسي اتعب وانا اقول رخيصه .. حتى الاماكن السياحية اشوف اسعارها رخيصه .

- الشعب مره ودود .

- لو اخذت سيارة وحبيت تزور مثلا ينابع المياه المعدنية او المسابح في برجومي مثلا فتلقى في السنتر ناس يودونك بـ 100 لاري للسيارة ويمشونك على الاماكن اللي السيارة ماتوصلها بسهولة .

سعر اللاري
1 لاري = 10.10 ريال يعني تقريبا مثل الريال بس لاتجيب ريال معك جب يورو او دولار والبطاقة البنكية تشتغل بس بعض القرى والاماكن الشبكة ضعيفة او ماعندهم جهاز الشبكة وما يقبلون الا كاش ..


--
حمل تطبيق YandexGo
تطبيق تكاسي رخيص مره واحسن من التكاسي .. بتوفر 50 % من سعر التكاسي ( في تبليسي ما سقت السيارة ابدا لانها زحمه شوي وارتحت مع التكاسي بالتطبيق اللي قلت وكان اغلى مشوار يمكن 14 لاري ) والمعدل كان 6 لاري للمشوار