السلام عليكم ورحمة الله وبركاته

مساء الخير عليكم جميعاً
اليوم كان عندي موعد في مكتب التاشيرات كان موعدي 2:30 الظهر وصلت 2 تقريباً قال لي الموظف لازم قبل الموعد ب 15 دقيقة علشان تدخل لموعدك ، وقتها قلت خل بشوف تجارب الشباب ودخلت الموقع ولقيت تجربة واحد من الشباب ، وتفاجأت انهم ممكن يطلبون دفتر العائلة مترجم ( طبعاً لحالي والوالد هو الكفيل ) فـ رحت بسرعة ل مكتب سيف قريب من مكتب التاشيرات قلت موعدي الحين ابيك تترجم لي دفتر العائلة ( الحرص زين قلت خل تصير اوراقي كاملة ولا ينقص شيء احسن من اني اتقروش )
المهم وصلت للموعد يمكن 2:35 طلب توكلنا حارس الامن والموعد شافه وقال تفضل ☺ ، ندخل في زبدة الموضوع :

رحت للكاونتر الي برا عطتني رقم وقالت رح ل سكشن 1 ، رحت كان قدامي واحد بعدها جت موظفة ثانية على الكاونتر وجاء رقمي

طلبوا :
صورة وحدة
الموعد
النموذج حق التأشيرة
كشف حساب اخر شهرين للوالد
تعريف راتب
التأمين
حجز السكن ( كان من بوكينج الغاء مجاني )
حجز طيران ( كان وهمي )
صورة من جواز الوالد لصفحة 1 و 2 و 3
ورقة تكفل بالمصاريف موقعة من الوالد
صورة من جواز سفري ( كان ما معي وقالت لي اطلع لم الكاونتر الي برا وصوره بسرعة وتعال )
الجواز الأصل
صورة من اخر شنقنين لي
تقريباً هذا الي اخذوه

صورة دفتر العائلة قالت ما ابغاها ( يا سفاب الترجمة 😥 )
صورة بطاقة الأحوال ما يبغونها

قالت لي خلاص رح سدد المبلغ وتعال رحت وسددت ورجعت عطتني ملف قالت رح بصم ، انتظرت تقريباً 10 دقايق بصمت وقالوا لي خلاص يوصلك على اراميكس دفعت لهم 407 ، الصراحة ما خذ مني وقت اكثر من نص ساعة ، مهب العادة بس من حظي الحمد لله 😅🙏🏼

عاد يا رب يعطوني 4 سنوات ونرتاح 😥😥

سألت الموظف كم يبغالها وقت وتطلع قال من 3 الى 5 أيام عمل بالكثير

هذي كانت تجربتي اليوم دعواتكم لي بالتوفيق 🙏🏼