الخوف و فوبيا الطيران

Abu Talal · 08-11-2021, 09:57 AM

السلام عليكم ورحمة الله وبركاته

إخواني و أخواتي أعضاء المتندى
في موضوعي هذا حاب اذكر لكم معاناتي مع الطيران وعشقي للسفر بنفس الوقت
ومن الممكن المشاركة من الاعضاء بتجاربهم ونصايحهم ومعاناتهم

أنا شخص أعشق السفر والسياحة, لدرجة ممكن ارتب للسفره من اسماء فنادق وأماكن سياحية وتجميع معلومات قبل السفر ب 6 شهور بحيث اني اختار الدولة المناسبة والفنادق المناسبة وأكون فكرة عن الدولة المراد السفر لها

أستمتع بالقراءة عن السفر وعن رحلات وتقارير وتجارب الأعضاء من ناحية الفيزا السفارة المطارات الاجراءات وكل شي

وسافرت بمساعدتكم خلال الـ 6 سنوات الماضية إلى:
الإمارات - البحرين - قطر
مصر
إيطاليا - سويسرا - النمسا - ألمانيا - فرنسا - اليونان
البوسنة
إندونيسيا

ولكن الطامة الكبرى بالنسبة لي هي الطيارة ثم الطيارة ثم الطيارة

وضعي يكون مافي أحسن منه من بداية التخطيط للسفر إلى حجز الطيران والفنادق واستخراج الفيزا
ولكن قبل السفر بيوم تبدأ معاناتي مع هم الطيران والطيارة

حقيقة أشوف الأشخاص اللي يستمتعون بالمطار وجو المطار وممر السعادة حتى بريحة المطار
( الله لا يضرهم ولا يغير عليهم ) وأتمنى بيوم من الأيام أكون مثلهم

أنا أول ما ادخل المطار يبدأ القولون يضرب عندي درجة حرارة جسمي تختلف راسي حار يديني بارده الامور كلها تتلخبط واصير على هالحال وبعد ركوب الطيارة والجلوس في الكرسي تزيد شوي

اول ما اجلس اربط الحزام أطفي الجوالات وأي شخص اشوفه ماسك جواله احس ودي اكسره لأن اشارة اطفاء الجوالات اشتغلت احس هو اللي بيتسبب بكارثه لنا

وقت الإقلاع حدث ولا حرج بدون اي تعابير في وجهي ولا اي حركه بس متمسك في الكرسي وساااااااااااااااااااااااااااااكت

تبدأ وناستي اذا طفت اشارة ربط الاحزمة هنا ابدا اضحك اسولف يتغير المود 180 درجة
حتى نقترب من بلد الوصول وتبدا الطيارة بالهبوط ويرجع وضعي نفس أول ما ارتاح إلا لما حس ان الطيارة لمست المدرج هنا أقدر أقول بدت إجازتي صح

صحيح إن وضعي صعب شوي بس لما اشوف بعض الاشخاص اللي ما يسافر بسبب الطيران اقول الحمدلله انا احسن منه, ع الاقل انا اتحمس في البداية واحجز ولا عمري كنسلت سفرة عشان الطيران بس أكلها في الأخير واتحسف اذا ركبت الطيارة
والحمدلله ما أتوب وارجع أكرر هالشي

تكلمت في هالموضوع مع أحد الأقارب وهو كابتن طائرة ودخلت معاه في حديث طويييييل جداً
وشفت بعض مقاطع في اليوتيوب لكباتن سعوديين يتكلمون في نفس الموضوع
ولكن لا حياة لمن تنادي على نفس وضعي للحين

ممكن بعض النصائح منكم أو ذكر تجاربكم أو معاناتكم لعل نستفيد من بعض
لأن صراحة متعة المطار والطيران هذي انا ماحسيت فيها أبدا في سفراتي كلها

وآسف على الإطالة

الايمان, آخـــرفـــرصـــة, بن قوت و 3 آخرون معجبون بهذا.

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
الانتقال إلى العرض العادي الانتقال إلى العرض المتطور العرض الشجري

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
‹( رحلة الجوف ... حـُلـْوَة الوصوف )›	نـــواف	بوابة السعودية	26	31-08-2021 09:36 AM
النية (اليونان ) لاكن الخوف من الراتب	i.aldobayan	فيزا شنغن	4	07-07-2020 02:11 PM
طيران ناس الى الجوف والقريات	عادل الردادي	بوابة السعودية	8	22-05-2017 08:43 PM
بحيرة دومة الجندل (الجوف )	طارق عنايات	بوابة السعودية	39	15-02-2016 06:48 PM