بسم الله الرحمن الرحيم
السلام عليكم ورحمه الله وبركاته

عدنا الى تقارير السفر بعد ما نقطعت عنها مدة سنتين بسبب كورنا والحمدلله على كل حال وابدي معاكم هالرحلة المختلفه..

كنزٌ دفين، اكتشافُ ارضٍ ضائعةٍ كنـا نعـرف بوجودها ولكن لم نستطع الوصول إليها ( كـولـومبيـا )

عنوان الموضوع خذيته من كتاب عشت لأروي - للكاتب الكولومبي " غابرييل غارسيا ماركيز".



لان صج صج حسيتها كنز مدفون وماندري عنه ولانعرف عنه شي .

يتكلم عن كولومبيا وحياته بشكل مفصل و ثوراتهم..

من خذيت الموافقة على كولومبيا وانا اعد الايام و الساعات والدقايق عشان اطير خصوصا عقب سنتين عجاف مافيهم سفر احس اني في حلم .

وهذي حكايات عالمــــية ثانية تتحقق لي بزيارة كــولومبيـــا

من كل بلاد الدنيا ،، من كل بقاع الارض
قصص شتى ،، تروى حتى
نعرف احوال الانسان و الكل هنا جيران

فاذا زرناهم بالصوره،،في احلى دنيا مسحورة
كي نتسلى ،، صرنا اهلا

في قصص الشعوب ،، في قصص الشعوب
طرائف لا تنتهي ،، و عالم حلو بهي
يسكن في القلوب،،في قصص الشعوب


هنــــــــا كـــولــومبيـــــا





رحلة كولومبيا شلون خذيت الموافقة..
طبعا عارفين موال الحنه على الادارة العليا والضغط عليها عشان اخذ موافقة سفرة الرحلة هذي وفي ظل الجائحة الكورونية مو بالسهولة نحصل على الموافقه ..
شلون تروحين وكورونا وطلع متحور يديد ومن هالحجي اللي ما يخلص ..
والرد مني يبا خلاص طعمنا والكل يسافر وان شاء الله ماكو الا العافيه واللي بيصير اهني بيصير فيني اهناك اي بس اهني انتي عندنا مو اخر الدنيا وانتي راعية ربو و ديرة خطرة والخ .. بعد حنه و رنه تمت الموافقه كولولوووولوووش الحمدلله ..

والحين السؤال الصعب من الكل وين بتروحين ؟؟

قلت كـولـومبيــا

الاجابات

اخوي عصابة بابلو راح يخطفونكم.. اختي واي خطره
بنات عمي وااي شموديج مجرمين وبعيدة ..
غيرهم مخدرات - يذبحونكم - يبوقونكم - اجرام - عصابات - واي يمه تخرع .. الخ من كلمات

عدوا وخربطوا من اللي تسمعونه حواليكم شي مو طبيعي اللي كنت اسمعه من الكل .. وقلت الديره امان ومافيها خطر ان شاء الله وبروووووح ..

عقب كل اللي سمعته منهم

بديت بالاستعدادت اللازمة قبل السفر

الرحلة مستواها : متــوسط ( اللياقة البدنية ) لكن لحالتي الصحية يبيلها لياقه اعلى وتعتبر علي عاليه ..

اولا : الفــــــــــيزا





الفيزا الكولومبية نطلعها من سفارتهم في ابوظبي ( للكويتيين - البحرينيين - العمانيين ) في مكتب صغير بين بنت كويتية واماراتيه شغلهم عالايميل والواتس اب اهم اللي يطلعون الفيزا لنا كلنا ولازم نجهز الاوراق هذي..
1- لازم تذكرة فيها دخول و خروج
2- الفنادق
3- كشف حساب 6 اشهر
4- شهادة استمرارية العمل بالانجليزي
5- صوره خلفيه بيضا 4*3
6- صورة الجواز + الفيز الموجودة " شنغن - بريطانية - امريكية " تفيد وتساعد انهم يطلعون لنا فيزا.
7- صوره على صفحتين اختام عشوائية.
8- كتاب بصيغة زيارة لدولتهم نحط الاسم وتاريخ الميلاد والغرض من الزيارة والمناطق والفترة ونوقع.

هذي الطلبات كلها من غير الجواز ارسلهم للبنات واهما يدزونها للسفاره مع دفع رسوم الفيزا والخدمة 74 دينار.

السعوديين من سفارة كولومبيا في مصر..

القطريين و الاماراتيين يدخولون من غير فيزا..

ثـانيـا : العمــــلات

عملة كولومبيا بيزو كولومبي peso





يفضل صرف العملة بالاول الى دولار امريكي ولما توصلون تحولونها الى بيزو..

1$= 300. فلس = 3,957 بيزو

ثـالثـا : الطـيــــــــران



تم الحجز عن طريق مكتب عشان الجائحة لا سمح الله اي تغيرات طارئة ولان المخطط فيه جم وجهه اقدر اغير

طيران دولي : كويت - اسطنبول - بوغوتا (عاصمة كولومبيا)

نيويورك - اسطنبول - كويت

بسعر 615 دينار كويتي ( المغادرة بزنس الردة سياحية واسوي ابقريد )

هذا كان حجزي الطبيعي للرحلة ..

رابــعــــــا : الفنــــادق



حجزت ليلتين في نيويورك فندق 1hotel عند السنترال بارك بسعر 262 دينار.

خـامســا : الصحـــــــة و التطعيمـــــــات



قبل السفر بفترة كافية عليكم التأكد من الوجهة اللي رايحين لها اذا تحتاج الى اي تطعيمات ..

- لازم مراجعة عيادة المسافرين في دولتكم او الصحه الوقائية .
- تلقي التطعيمات اللازمة قبل شهر من السفر على الاقل ليتمكن الجسم من تكوين المناعة .
-اصحاب الامراض المزمنة مراجعة دكتورهم عشان يعرفون لو في تطعيمات تتعارض مع ادويتهم ..

التطعيمات العـالميــــة :

- الحمى الصفراء ( ينصح عند السفر لهذه البلدان : وسط وغرب افريقيا - وسط و جنوب امريكا )
- الحمى الشوكية ( ينصح عند السفر لهذه البلدان : جنوب الصحراء الكبرى الافريقية )
- الالتهاب الكبدي (أ) ( ينصح عند السفر لهذه البلدان : امريكا الجنوبية و بعض الاجزاء من افريقيا و اسيا و شرق اوروبا )
- الالتهاب الكبدي (ب) ( ينصح عند السفر لهذه البلدان : امريكا الجنوبية و بعض الاجزاء من افريقيا و اسيا و شرق اوروبا )
- التهاب الدماغ الياباني
- التهاب الدماغ المنقولة عبر القراد
- التيفود (ينصح عند السفر لهذه البلدان : بعض جنوب شرق اسيا - امريكا الجنوبية و الوسطى - وبعض افريقيا )
- داء الكلب
- الملاريا ( ينصح عند السفر لهذه البلدان : المناطق الواسعة بأفريقيا و غرب افريقيا جنوب شرق اسيا - شرق اوروبا - الباسفيك - وسط وجنوب امريكا - الشرق الاوسط - امريكا اللاتينية )

الخط الساخن لسكان الكويت

ألو صحة 151

والحمدلله كولومبيا ما نحتاج لها تطعيم مثل ما خذيت لما رحت المكسيك ..

اللهم الحدث اللي عايشينه الحين مع هالوباء الله يزوله عنا وهم كـــورونـــا لازم نكون مطعمين مع شهادة التطعيم..

و طبعا احتياطات كورونا ومتحوراتها عارفينهم



بما ان زيارتنا الى كولومبيا يعني العيشة بتكون بين الغابات والجبال محتاجين ندهن جسمنا بسبري وكريم الوقاية من الحشرات و اي كائنات تنقل الامراض
هذا النوع ممتاز كان معاي ..



يفضل تشترون من صيدلياتهم او تاخذون من صيدليات امريكا بصراحه ممتازين ..

ســادســاً : الطقـــس



في وقتنا كان الجو وايد حلو ومعتدل مو برد وايد ولا حاار وكان فيه اشويه امطار خفيفه في بعض المناطق..

ســابعــاً : القـــــروب



مكون من : قايد كويتي "صاحب الشركة" - قايد كولومبي محلي
عدد المسافرين : 5 نساء من الكويت و 1 من روسيا - 3 رجال من الكويت و 1 من روسيا .. يعني عددنا من غير القايديين 10

ثـامنــاً : الأمـــان



على الاماكن اللي زرناها ما حسينا في شي انخاف منه .. واللي شفته الوضع كان طبيعي الا موقع واحد قال لنا القايد اهني انتبهوا على اغراضكم وراح اقولكم وين في التقرير..

الرحلة مع شركة كويتية سياحية شبابية ..

والحين عقب ما خلصنا الاشياء المهمة نبدي العد التنازلي للاستعدادت

تم دفع رسوم الرحلة

1,700 دينار كويتي ( شاملة : السكن في 7 مناطق - التنقلات - دخول المرافق والانشطة - 3 وجبات يوميا وسناكات - الطيران الداخلي - الاكراميات - و 100 دينار من المبلغ مصروفنا يتم تحويلة على ما نوصل )

بعد الدفع و التأكيد

رحت الى مركز انا سلبي اول pcr اسويه من بدت كورونا



خدمة السيارات عجيبه خفيفة و سريعة



سويت المسحه الساعه 4 العصر و الساعه 8 م وصلتني نيقتيف الحمدلله.. قبل السفر ب 48 ساعه

خلصت المسحة و بديت في تجهيز المتطلبات للسفر
زمان عن الاوراق ردينا لهم في هالوقت

شهادة تطعيم - التذكرة - نتيجة المسحة - الفيزا الكولومبية مطبوعه ونحطها مع الجواز- التأمين - اجراءات دخول كولومبيا الصحية..



هذا موقع اجراءات دخول كولمبيا الصحية على الصوره..



تمشون خطوه خطوه



وتعبون كل البيانات المطلوبة








لما توصلون النهاية و يعطونكم التأكيد على الايميل ..



هذا شكل ورقة تأكيد الدخول