السلام عليكم ورحمة الله وبركاته .
يسعدلي أوقاتكم ياسادة ياكرام بكل خير وسعادة . مشرفين - اعضاء - زوار


مدة الرحلة تقريبا 23 يوم بما فيها أيام السفر ؟
بانكوك - بوكيت

الرحلة / جدة - مومباي - بانكوك اليوم الأول وقضاء يوم في بانكوك
اليوم الثاني / بانكوك - بوكيت

قضاء 14 يوم في بوكيت

ثم العودة الى بانكوك 5 أيام

العدد / 2 أنا والمدام

الوسيلة air india

النصيحة الأولى / لاتفكر في يوم في حياتك تاخد رحلة ترانزيت لدولة الهند أيا كانت المدينة اللي حتنزل فيها . مومباي أو نيودلهي أو اللي تكون والسبب سوء تعاملهم لا أعمم ولكن الأغلبية . دي تجربتي الشخصية وقد يخالفني البعض الرأي .

الرحلة من بانكوك لبوكيت والعكس عالخطوط التايلندية . مدة الرحلة مابين إقلاع وهبوط 1:20 ساعة و20 دقيقة تقريبا

النصيحة التانية في الذهاب كان المسموح 20 ك لكل شخص العودة كانت 15 ك ؟؟ بصراحة شي عجيب مما إضطرني إلى عمل اب قريد ودفعت تقريبا 4300 بات لتفادي زيادة الوزن ؟
لأني لو كنت حدفع الزيادة حتكون 5500 بات . بس حبيت انوه لهذه النقطة . إنه اثناء الحجز يجب التأكد من المسموح بالكيلو . طبعا اضافة الى الشنطة اليدوية يوزنوها وماتزيد عن 7 كيلو . أي زيادة حتدفع عليها .

إستلام السيارة من مطار بوكيت .
بعد الوصول تنتقل إلى المبنى الآخر المسافة بسيطة وسهلة ومعاك عربية الشنط . تكمل إجراءات استلام السيارة وتدفع المبلغ ......الخ . أنا عامل تأمين شامل عالسيارة . ودي خطوة مهمة محد يضمن إيش المقدر والمكتوب . ولكن من باب الإحتياط .

أستلمت السيارة بعد ما شيكت عليها . تويوتا يارس اتوقع موديل 2021 نظيفة ممتازة قير اتوماتيك زجاج كهربا . مفتاح ريموت .

ملاحظة مهمة

لازم يكون معاك فيزا غير مسبقة الدفع . فبدونها لايمكن اتمام الإستئجار . كما يتم حجز مبلغ 9000 بات على حساب الفيزا كتأمين . يتم استرداده في غضون اسبوعين الى ثلاثة من بعد تسليم السيارة لهم . إذا لم يكن عليها أي ملاحظات تذكر

النت
معايا إشتراك من شركة رنت كونكت . أول ما وصلت بانكوك اشتغل معايا الجهاز وكان كعادتهم رائع جدا .

بسم الله الرحمن الرحيم شغلت السيارة وحاسس نفسي ضايع كسائق في اليمين هههههه.
استجمعت جميع قوايا العقلية والعضلية والفسيولوجية واللولبية .
هاااااا أمشي أحرك ولا أستنى شوية .
ياااااااربي ليش استأجرت سيارة ههههه
بسم الله عشقت ريوس وأحلى يا شوماخر سائق الراليات الشهير . بس ماكنت لابس خوذة هههه

وأنطلقت على بركة الله مشغل القوقل ماب متجها للفندق .
اليومالأول والثاني كان في شوية لخبطة وخاصة بين المؤشر والمساحات . مسحت القزازكتييييييير ههههه

لكن بعد كدا ولله الحمد كانت الأمور ولا أروع وكأني بسوق سيارتي في السعودية .

النصيحة التالتة / اللي عنده القدرة على المغامرة والقيادة بنطام الطارة اليمين . أنصح وبشدة يستأجر سيارة ويريح دماغه تماااااااااما في موضوع المواصلات .

عن نفسي بصراحة استمتعت جدا جدا جدا . ولكن كلامي ليس مدعاة للمغامرة ؟ فقط للناس اللي تمشي بعقلها وغير متهورة ورايح ينبسط ؟

جميع نقاط التفتيش اللي صادفتها في بوكيت محد كلمني لكن يوقفوني يطالعوا فينا ونعدي بكل تقدير وإحترام .

ماعدا في يوم من الايام في نقطة تفتيش وقفوني سألني عن الرخصة . طلعت الرخصة . شافها قالي ممكن تجنب على جنب نتكلم شوية قلت يمكن يبغى يصاحبني هههههه

جنبت ونزلتلوا . الأخ متعود يشوف الرخص اللي هيا عبارة عن دفتر . وأنا رخصتي الدولية بطاقة زي الرخص تبعنا . فشك في الموضوع . المهم بيني وبين نفسي بقول عهدك عهد قمري . لالالالالا وما سك رخصة دفتر في إيده شكلوا موقف واحد على جنب فبيوريني هيا .

المهم تفهم الموضوع وقلتلوا دي رخص دولية جديدة بالرغم من وجود الدفاتر أيضا وبكل أدب وإحترام اعطاني الرخصة ومشيت .

صحيح معظم الشوارع رايح جاي بدون فواصل في النص ومعظم بوكيت طلعات ونزلات ومنعطفات . لكن متعة في جو المطر وحولك المناظر الخلابة . مرة البحر على يمينك ومرة على شمالك متااااااااع .
وميزة السيارة منت مرتبط بشي معين ولا مشوار معين وكل اغراضك معاك وما تخاف تنسى شي ..... الخ من المميزات اللي اغلبكم يعرفها .

السكن اليوم الأول في بانكوك كان فندق 5 نجوم .
اليومين الأولى في بوكيت في منتجع 5 نجوم على بحيرة
11 يوم كانت في فندق 5 نجوم عالمحيط مباشرة فاصل ( سكة ) ميزة الفندق موقف السيارة في نفس دور اللوبي ومسقوف ( بدروم واسع جدا ) حماية للسيارة من المطر والشمس
اليوم الأخير في بوكيت كان في منتجع 4 نجوم وسبب إختياره كنت أبغى مسبح خاص وعالمحيط مباشرة مافي فاصل ( سكة ) .
5 ايام بانكوك الأخيرة كانت فندق 5 نجوم عالنهر مباشرة .
وجميع الفنادق مواقفها عليها حراسات ومراقبة بالكاميرات . يعني بإذن الله ما تشيل هم سيارتك ابدا .
وكان الإختيار توفيق من الله أولا ثم اجتهاد شخصي مني .

أخدت جولة على كتير من الفنادق الخمس نجوم في بوكيت من باب الاستطلاع والاستكشاف . لكن بأمانه الفندق اللي كنت فيه يتفوق عليهم بمميزات عديدة أول ميزة موقف السيارة تاني ميزة موقعه عالمحيط وليس ببعيد عن باتونغ تقريبا 15 دقيقة بالسيارة . تالت ميزة سهولة الدخول والخروج من الفندق مافي درج ولا شتل عشان يطلعك وينزلك . الغرف نظيفة ووواسعة حسب اختيارك لنوع الغرفة . أنا سكنت بآخر دور اللي هو الدور الثامن يوجد به مرافق متعددة
بلياردو سكواش صالة رياضية .....الخ . البوفيه كبير وواسع ومتنوع . وجود شطاف أكرمكم الله في الحمام

لو ليا نصيب ورجعت بوكيت ما حسكن إلا فيها كمدة إقامة طويلة ؟

والله نسيت أنا إيش قاعد أكتب كتسلسل أفكار ههههه


نكمل إن شاء الله بعد مراجعة ما كتبته اعلاه

ملاحظة هامة . بالنسبة لموضوع وزن الشنط دا الكلاام ينطبق على الخطوط التايلندية الداخلية ما بين بانكوك وبوكيت .

أما الخطوط الهندية كان الوزن المسموح 40 ك للشخص و8 ك للشنطة اليدوية

الجميل في بوكيت ياحبايب . إنه الفعاليات كتييييير . وتحتار فيما بينها .
كنت ناوي أطلع كرابي 4 أيام وكنسلت الفكرة رغم إنها ماهي بعيدة بالسيارة ساعتين ونص تقريبا . ومن الافكار اللي كنسلتها أيضا إني أروح خاو لاك يومين وكنسلت وبرضها قريبة مدة ساعة يالسيارة .

والسبب إنه بوكيت فيها كل شي تحتاجه . فليش أهجول نفسي !!!

فالنصحية . لا تغامروا من باب المغامرة فقط رغم اننا 2 ومعانا سيارة فموضوعنا سهل إلا إني فضلت بوكيت والاستقرار بها عن باقي المناطق .



تجربتي مع الجزر .

يمكن أشهر جزيرتين هما جيمس بوند وفي في .

رحت المارينا مشوار يمكن ساعة الا ربع بالسيارة . أبغى أشوف موضوع بوت مرتب شخصي استأجره . لكن محاولتي بآءت بالفشل . كلها مملوكة وخاصة ..... الخ

بدأت أبحث في المكاتب المنتشرة في كل بوكيت وبا مكترهاااااااااااا هناك . على أساس أبغى بوت خاص وليس مع قروبات . ووجدت إختلاف في الأسعار .

المهم لقيت مكتب في أحد شوارع باتونغ بالصدفة أمام مطعم كنت بتعشى فيه . قلت خليني اروح اشوف معاهم . توصلت معهم إلى إتفاق جيد ولكن في داخلي متخوف نوعا ما من عدم المصداقية والالتزام ....الخ

كنت أبغى أحجز تاني يوم . ولكن دخلت أشوف أحوال الطقس فترددت وقلت لا . حفكر وأرجع لكم أخدت الواتس تبعهم . ومشيت

طبعا تاني يوم الناس اللي راحوا رحلات بحرية للجزر عاشوا أوقات صعيبة ورعب وخوف وغثيان ....الخ بسبب سوء الأحوال الجوية والأمطار الشديدة . فحمدت الله إني مارحت وأتمنيت للجميع العودة بالسلامة .

بعدها بيومين وانا متابع للطقس رأيت إنه يوم الجمعة كان مناسب . فحجزت وكانت المفاجأة .

مرحبا ممكن رقم القوارب لا هنت

شكرا على النصائح المهمه
تأجير السيارة متعه وخصوصا لما يكون السكان يمين ذكرتني بلندن حسيت الدنيا بالعكس
ياريت تذكر لنا اسامي الفنادق والمنتجعات

نكمل يا أحبة . ما أبغى بصراحة أمطمط في التقرير البسيط . عشان لايكون ممل والبعض يقعد ينتظر معلومة ؟

المفاجأة كانت من روعة مصداقية المكتب اللي اتعاملت معاه رغم رغم اللي بيديروه 2 من النساء كبار في السن محترمين جدا .

معظم المكاتب كان متوسط السعر 25000 بات للبوت الخاص . وبعضهم يطلب أكتر .
لكن أنا اخدته ب 19500 بات .

جاني الميكروباص للفندق حسب الموعد تماما . لوحدي انا والمدام فقط وتم نقلنا الى المرسى مسافة نص ساعة تقريبا بالسيارة لمقر الشركة هناك . وتم استقبالنا والترحيب وتقديم مشروبات مجانا عاملين مثل البوفيه . دفعت باقي المبلغ عندهم لأن المكتب أخد 6000 بات كحجز مؤكد .


البوت ممتاز وعدد 2 ماطور . وطاقم الفريق مكون من 4 أشخاص القائد و2 مساعدين ووحدة بنوته بصراحة كانت رائعة في كل شي . والفريق بالكامل رااااااااااائع جدا .

ميزة البوت الخاص إنك حر نفسك في الحركة والتنقل بدون التقيد بمواعيد . تاخد راحتك بدون مضايقات من الفضوليين والزحمة . وجود حمام خاص اكرمكم الله . حرية الجلسة في البوت لوحدك ..... الخ من المميزات .

أبحرنا على بركة الله في تمام العاشرة صباحا . ومررنا بالعديد من الجزر مابين توقف وعبور حتى وصلنا جيمس بوند وأخدنا بها الوقت الأطول . بمرافقة البنوته الرائعة اللي ما تركتنا لحظة وحدة .

ولما نرجع للبوت نلاقيهم محضرين لنا في كل مرة مشروبات مختلفة وفواكه مقطعة وموية باردة . وكان الجو رائع جدا أغلب وقته غيوم ولكن بدون أمطار .

جميع ماتم في الرحلة مشمول في السعر بما فيها جولة الكياك والغداء في أحد المطاعم وكان لنا مكان خاص في المطعم . والميزة كنا نحن من نقرر متى نغادر .

قد ما حثني على فريق البوت ما راح أوفيهم حقهم من خدمة وجودة قيادة وإحترام وتقديم فواكه وعصائر وآيس كريم ......

كانت رحلة رائعة بكل المقاييس ولله الحمد . التفاصيل كتير ولكن بعطيكم الزبدة وما قد تستنبطوه منها

النصيحة
اللي يبغى يروق ويستمتع ياخد بوت خاص لأني اثناء الرحلة شفت بوتات القروبات زحمة البوت اعتقد لايقل عن 30 شخص . إضافة الى مواعيد محددة للوقوف والابحار في الاماكن المتعددة ولكم أن تتخيلوا أكرمكم الله حمام واحد ؟ .

بالنسبة للقروبات ان لم تخني الذاكرة الفرد لجزيرة جيمس بوند 2000 بات .

السلام عليكم كيف الحال استاذي الفاضل
ممكن اسم الشركة اللى اخذت منه البوت الخاصلاني طالعة بعد اسبوعين باذن الله

في آخر مرحلة اثناء عودتنا من جيمس بوند . توقفنا في جزيرة . قريبة من المرسى . وبها شاطئ رائع به كافيهات ومأكولات خفيفة .....

اللي عجبني في هالشاطئ هو وجود الجيتس كي . الناس محدودين فقط العابرين اللي يجو هالشاطئ فمافي شغل النصب اللي نسمع عنه في بعض الشواطئ . ويطلعولك مشاكل في الدباب ..... الخ من الافلام الهندية تبدأ الجولة بربع ساعة بمبلغ 1000 بات . عاد انت واختيارك للوقت فأستمتعتنا صراحة بالدباب في هالمنطقة . وبعدها رجعنا وهالمرة كان في مد للبحر فتوقفنا بالبوت أمام مقر الشركة وليس في المرسى وأعادونا للفندق بنفس الميكروباص

تجربتي مع خيول الشاطئ في بوكيت .

قلت خلينا نروح نركب خيل عالشاطئ . مشينا مسافة ساعة الا تلت تقريبا لمقر ايجار الخيول .

ولكن للأسف كان الحجز فل . من هنا من هناك يهديكم يرضيكم هههههه مافي فايدة . قالولي ممكن تحجز لبكرة . حجزت لتاني يوم عالساعة 11 قبل الظهر . وأكدوا عليا الحضور قبل الموعد بربع ساعة تقريبا للتجهيز .

في نفسي
قلت إيش التجهيز هادا كلها خيل ونننط عليه ونمشي هههه ؟ دفعت مبلغ 1000 بات تأكيد حجز والفرد للجولة ساعة ب 1200 بات .

المهم جيت تاني يوم متأخر يمكن 10 دقايق عن الموعد لقيتهم مصنقرين شوية هههه . المهم قالوا الجولة ساعة حنخصم منها وقت التأخير . قلت عادي اصلا ساعة جولة بالخيل عالشاطئ كتير وسبق جربتها في جزيرة بالي .

طلع الموضوع أكبر مما كنت أظن خيل ونط وأمشي .

عربة خيول يجرها ونيت ينقلها للشاطئ ولازم البوت الخاص الله يكرمكم والخوذة .

ركبنا الونيت وعربة الخيول مقطورة ورانا فيها 2 خيل على عددنا حتى وصلنا للشاطئ المسافة ماهي بعيدة يمكن 5 دقايق بالسيارة .

نزلوا الخيل من العربة . وركبنا ومع كل خيل سايس خاص وبسم الله جولتنا والمدة المتبقية من الساعة المتبقية لنا . وكانت رحلة جميلة وممتعة أنصح بها .


ولكن ضرورة الحجز قبل لا تتورطوا في المشوار اللي فهمته بعدين إته لهم ويب سايت ممكن تحجز من خلاله .


ملحوظة هااااااامة

ركوب الحصان بالوزن مازاد عن 85 كجم للشخص الواحد ما حيركب .

ما أعرف مدى تغاضيهم عن هالموضوع كوزن زايد . ولكن هادي المعلومة اللي أنا اخدتها منهم .

وبالفعل تم وزن كل منا على حدة . وكنا في الحد المسموح .