قبل السفر ب48 ساعه بدا البحث عن تذاكر اخترت طيران ناس تذكره ذهاب فقط الي تيرانا ب1900 ريال طبعا بسبب تاخر الحجز تم الحجز عن طريق الموقع الرسمي لطيران ناس بعدها ذهب لمكتب سياحه و سفر حتا يحجز لي حجز عوده وهمي مسترد في حال طلبو مني حجز العوده عند دخولي اوروبا الحجز هذا تقدمه لموظف الجوازات لو سالك عنه طبعا المكتب هذا يلغيه لك بعد يومين و ياخذ رسوم 70 ريال كان حجز عوده بعد90 يوم من فيينا للرياض.
يوم السفر:
كان يوم الجمعه 5 اغسطس الظهر وصلت المطار بدري رحت كاونتر ناس طبعت البوردنق و شحنت الشنطه و اتجهت للصاله اشوف بالشاشه مالقيت رحله تيرانا😳 قلت ممكن مانزولها شوي تنزل مع ان بالوقت نزلو رحلات بعدها سالت موظف قالي شوف رحله براغ😳وش دخل طيب؟ قال هي طياره وحده تروح براغ و تيرانا😳طيب من ينزل اول براغ او تيرانا؟ قال مدري 😳اذا انت ماتدري من يدري؟ قال الموظف الي على البوابه هو الي يدري😂 قلت طيب اصلا هدف الرحله الوناسه لو تقولي نروح طوكيو اول بعدين تيرانا ماراح اقول شي ماراح اسمح بتعكير المزاج😉 طلعت للاونج مرحبا مالقيت مكان اجلس فيه ( ممكن لان يوم جمعه) صليت في مسجد اللونج و نزلت جلست عند البوابه الين فتحت و بدا الناس بالدخول يوم وصل عندي الدور بالدخول سالت الموظف من اول براغ او تيرانا قالي مادري😳اذا انت ماتدري من يدري؟ خلاص على البوابه حنا طبعا جميع المسافرين على الرحله مصدومين و منفجعين اهل تيرانا و اهل براغ الكل يحسب نفسه لحاله و الجميع يبي يعرف من اول ينزل دخلت للطياره و اخبرونا الملاحين ان الطياره متجه الي تيرانا اول 👍🏻 و تجلس50 دقيقه في تيرانا بعدها الي براغ😍 يعني فاز فريقنا😁 طبعا طول الرحله تذمر من مسافرين براغ لانه ماحطو بالموقع ان الرحله راح توقف في تيرانا😂 طبعا طياره مافيها شاشات ولا اي برنامج ترفيهي و دايم اذا ركبت طياره زي هذي اول شي ادعي ربك يجي جنبك واحد مسولفجي يضيع على الوقت و هذا اصعب انتظار و انت جالس بكرسي الطياره و تستني الراكب الي جنبك يجي😂على شان تعرف مويته😂 صبرت دقايق و جاء الراكب الي جنبي الصراحه انه يستحق جائزه اثقل طينه بالوجود😂 حاولت افكفك صواميله اخليه يسولف نضيع الوقت سوا مابي منك شي بس على شان مانمل😂بس اتصور كان يحسب الكلام بفلوس نفس الكلام بالجوال😂 خلاني اعد السحب جبهتي لصقت بالطاقه مافي شاشه ولا شي و فوقها ثقل طينه😂