السلام عليكم اخواني الكرام

مخطط اسافر سفره العمر وعندي جدول لزياره مدن ابي رايكم فيها واقتراحاتكم ….
الخطه كالتالي :
نيويورك
اولاندو
ميامي
كروز للبهاماس
بعدين من ميامي للاس فيغاس
بعدين من لاس فيغاس ارجع للرياض
الميزانيه ( عشان كل شي يكون واضح لكم وتساعدوني بسهولة ) 60 الف للسكن والطيران ( قابل للزياده )
المصروف يمكن 60 الف للشخصين
مده السفره 20 يوم ويمكن اقل
وش رايكم بالجدول
عل الميزانيه كافيه للاستمتاع

شكرا لكم

الجدول ممتاز
لكن لاس فيغاس ماتسوى العنوة بروحها
خلك شرق و رحلة ثانية اجمع فيها الغرب لاس فيغاس و سان دييغو و لوس انجلوس و سان فرانسيسكو

خل الجدول

3 نيويورك
6 اورلاندو
5 ميامي
5 الباهاماس او حسب الكروز اللي اخترته وبس احجز من وقت عشان تختار اللي تبيه بالضبط
1 ميامي للعودة او نيويورك

يعطيك العافيه عل الرد السريع

اورلاندو مقرر تكون اطول من 6 ايام احس قليله عليها 6 خاصه انه مقررين نزور كل الالعاب هناك زي دزني وغيرو
ابي رايك بالميزانيه هل كافيه
ومره اخرى يعطيك العافيه

اي صح اورلاندو 9 ايام ممتازة
كم يوم رحلة الباهاماس

الميزانية تعتمد كم سعر التذاكر
كم تكلفة الكروز
كم مدينة ملاهي بتزور

هذي راح يحدد نص الميزانية إذا عرفتها ممكن تتوقع باقي الميزانية

ميزانية 60 ألف على 20 يوم لشخصين .. ممتازة الله يبارك لكم فيها

طمنتني كنت خايف ماتكفي

بالنسبة ل فيجاس مانصحك تضيفها شخصيا ماشوف فيها فعاليات كثير يمديك تسويها ويوم واحد يكفيها فلو تلغيها يمكن افضل.

البهاماز تحتاج تتأكد من الجزر اللي راح تزورها لان ممكن تحتاج فيزا.

ميامي اشوف يكفيها ٣ أيام ووممكن تضيف الباقي لاورلاندو خصوصا انك تبي تزور جميع باركات ديزني (تحتاج يوم لكل واحد فيهم).

ودام تبيها رحلة العمر لازم تضيف الويندي سيتي شيكاغو.

بالنسبة للميزانية هذي مع التسوق ولا بس الفعاليات والاكل؟ أمريكا غليت كثير ومن زيارة لي هالسنة الوضع صار مكلف جدا، مثلا الفطور للشخص حوالي 25 دولار، ماقول الا الله يرحم ايام زمان اكشخ فطور مايعدي 10 دولار😂

والله وانا اخوك الخطه ال60 الف تسوق واكل وتمشيه الفعاليات الغالب بحجزها قبل كم شهر يعني زي الكروب والباركات احنا شخصين كل شخص 30 الف فيه احتمال انه نخلي ميزانيه التسوق لحال للحين اخطط وارتب

أنا في امريكا حاليا وبالتحديد اورلاندو
بالنسبة للكروز عندك اكثر من ميناء في فلوريدا للرويال كاريبيان (في ديزني وفي كارنفال) أنا فضلت الكربيان
نرجع للموانئ ( ميامي و اورلاندو كانفارل) أنا رحت عبر ميناء كانفارل لأنه قريب من اورلاندو، وفيه كروز حديث ما كمل السنة ورحلته ثلاث ايام تمر على جزيرتي ناسو و كوكو كاي، نفس المسار موجود في ميامي لكن الكروز قديم ، لكن في كروز جديد عملاق اسمه icon of the seas ينطلق من ميامي لكن عيبه بالنسبه لي ان رحلته لا تقل عن 7 ايام للكاربيان
اورلاندو جميل ويادوب 7 أيام وميامي جميله و 4 ايام تكفيها
نيويورك غالية كثيرة 4 ايام كفاية عليها