بسم الله الرحمن الرحيم
ردا لمعروفكم اكتب لكم تقرير رحلتي الى بولندا وتحديدا كراكوف وزاكوباني .‏
تاريخ الرحلة كان في 6/8/2025 والعودة 14/8/2025 ‏
العدد ستة افراد اب وام واربعة ابناء اكبرهم 17 سنه واصغرهم 3 سنوات .‏
لماذا اكتب لكم هذه التفاصيل حتى يستفيد الجميع ويعرف ان البلد مناسب لجميع الاعمار والفئات سواء عائلة او شباب .‏
الرحلة كانت عبر الخطوط البولندية من الرياض الى وارسو وترانزيت 4 ساعات ثم كراكوف .‏
اسعار التذاكر كانت تتغير بشكل كبير وكلما تأخرت كلما زادت القيمة وربما تصل الى الضعف لذلك دائما احرص كل الحرص على ‏التخطيط المبكر جدا راح تلقى اسعار مناسبه جدا وتختار الوقت المناسب والمقعد المناسب .‏
أنا للأسف تأخرت قليلا في الحجز لضروف صعبة جدا وكانت اسعار التذاكر تقريبا ثمانية آلاف ولكن تأخرت وحجزتها ب 11000 ‏تقريبا شامل حقيبه لكل مسافر وحجز المقاعد .‏
طيران ناس عنده مباشر الى كراكوف ولكن كانت اسعار 16 الف و17 الف فكان الطيران البولندي خيار ممتاز ولو كان نفس السعر ‏راح اخذ البولندي خدمه ممتازة وطياره مريحه وضيافه مميزه جدا الاكل فيها طيب والكراسي مريحة ويتم فيها توزيع بطانيات ‏ومخدات وتلوين للاطفال خدمات ما تلقاها بالطيران الاقتصادي .‏
من المهم جدا تختار وقت وصلولك الى أي بلد يكون في الصباح من الساعه 8 والى الساعه 5 او قبل افضل لعدة اسباب من اهمها ‏تلقى مكاتب تاجير السيارات فاتحة و دخولك للفندق يكون مبكر وتستفيد من اليوم وتمشي اول يوم في البلد بالنهار افضل من وصولك ‏ليلا خاصة في الدول الأوربية .‏
الدخول في مطار وارسو سهل والحمد لله لكن لابد من انك تكون مجهز حجوزات الفنادق معاك ممكن يسألونك عنها ، انا سألوني ‏عنها ووين تبي تروح أي مدينه وكم يوم وختموا لي الجوازات ودخلت بكل سهوله .‏
بالنسبة لحجز السيارة اذا عددكم خمسة افراد واقل امورك سهله واذا ستة اشخاص وفوق ايضا ميسره ان شاءالله لكن الخيارات اقل ‏ولابد من الحجز المبكر ، وانا كنت متواصل مع شخص سعودي هناك يؤجر سيارات وكلته قبل شهر وقال ازهلها كلمني قبل ‏اسبوعين وقبل اسبوعين من الرحلة كلمته وقال كل الي عندي مؤجر حال يحصل لي لكن ما توفر الى قبل يوم من الرحلة مالقيت ‏عنده وكان المعروض لعدد ستة اشخاص سعره معقول تقريبا لكن المشكلة في الوديعه كانت مرتفعه يأخذون تقريبا 7000 ريال وديعه ‏وانا ما اريد هذا الشئ ، وأيضا بعض المكاتب تقييمها سئ فما حبيت اخذ منهم طيب كيف حليت الموضوع ؟ ‏
دائما كل مشكلة ولها حل ولازم تتحمل تبعات تأخيرك فجيت ودخلت على قوقل ماب ورحت الى مطار كراكوف وطلعت ارقام ‏مكاتب تأجير السيارات وراسلتهم على الواتس اب وحصلت شركة ‏ENTER PRISE ‎‏ وحصلت عندهم سياره تسع مقاعد وليست سته ‏كبيره مره ولكن ارتحت للمكتب قال نرسل لك العقد على الايميل وتجي عندنا تدفع شامل كل شي تأمين ومقعد اطفال وتسليمها ايضا ‏في مكتب وسط كراكوف لسبب اذكره لكم لاحقا ، فعلا وصلت ورحت للمكتب ودفعت لهم وكان التأمين 800 ريال فقط واستلمت ‏السياره وكانت ماشية 7000 كيلو فقط جديده موديل 2025 .‏
اخذتها لمدة خمسة ايام طلعت علي ب 3500 ريال يعني اليوم تقريبا ب 700 ريال ، اعرف ان السعر مرتفع ولكن ضريبة التأخير و ‏مكره اخاك لا بطل . وفي الحقيقه لم اندم اطلاقا على استعمال سياره كبيره بهذا الحجم بل بالعكس شالت اغراضنا وزياده والجميع ‏يجلس وين ما يحب بدون مشاكل مع الاطفال حفظهم الله .‏
‏** مهم جدا **‏
عند الاستئجار لابد من احضار بطاقة فيزا فيها رصيد لا تقبل الشحن في الغالب وتحضر البطاقة نفسها معك لا تقبل الي في الجوال ‏وتحضر الرخصة السعودية معك ويكون تاريخها ساري ، واحتياطا تحضر معك الرخصة الدولية قد تحتاجها مع المرور عندهم .‏
مخطط الرحلة :‏
الوصول للمطار واستلام السياره والذهاب مباشره الى زاكوباني وقضاء 3 ايام ثم العوده الى كركوف وقضاء 5 ايام .‏
سؤال ليش ما تجلس وتريح في كراكوف ثم تروح زاكوباني ؟
المسافه بينهم قليله من ساعه ونص الى ساعتين ، ولا احب كثرة التنقلات في الفنادق خاصة مع عائلة نزل عفش وحط عفش لذلك ‏مباشرة توجهت الى زاكوباني خاصة اني مخطط الوصول 12:30 واصلا اغلب دخول الفنادق عندهم يكون بعد الساعه 2 . لذلك ‏استغل الوقت وتوجت الى زاكوباني .‏
الوصول للمطار كان الساعة 11:30 واستلمت السياره تقريبا 12:30 ومنها انطلقت الى زاكوباني وسكنت في شقة (‏Polana ‎Szymoszkowa Ski Resort‏) تبعد عن السنتر تقريبا 5 دقائق بالسياره او اقل شقة نظيفه وجميله و آمنه ، تدخل المواقف ‏بالريموت ثم تفتح باب الكراج بالريموت وتوقف بالقبو . اطلالاتها جميله جدا





مكونه من غرفتين نوم وصاله مقسومه قسمين وبلكونه ‏ودورة مياه وفيها كل ما تحتاجه من اغراض المطبخ والتنظيف وصاحب الشقه متعاون جدا ويجد فيها فناء خارجي لجميع الشقق ‏وكان ينقصها لو وضع فيها مراجيح للاطفال صغيره وانا متأكد لو راسلته كان وضعها في المره القادمه ، وهذي بعض الصور لها .‏
بعد استلام الشقه ريحنا شوي ثم خرجنا الى سوبرماركت كبير لشراء الاغراض وهذي نقطه مهمه لكل مسافر احرص على اخذ ‏الاغراض الاستهلاكية من المتاجر الكبيره ارخص واكثر عرض مثل كرتون ماء مثلا واغراض الفطور وبعض مستلزمات الاطفال ‏وتوجهت بعدها الى حديقة زاكوباني .‏


حديقة جميله جدا وموقعها جميل محاذية للسنتر وتعشينا في مطعم (فيلا توسكانا الايطالي) لازم تجربونه اكل لذيذ وموقع جميل جدا ‏وسعر مقبول . صدقني راح ترجع له . وراح اذكر لكم في الاخير المطاعم المميزه الي جربتها .‏
ومع اننا في اغسطس الا انه في الحديقه اخر العصر وبداية المغرب الجو بارد وما استعدينا بالجاكيتات ، ومن بكرا شرينا جاكيتات ‏خفيفه للايام المقبله .‏
ثاني يوم صباحا وبعد الافطار توجهنا الى عربات التلفريك الجبلية (‏Gubałówka‏) ‏


ميزة زاكوباني كل شي قريب جدا جدا فهذه القمة مطلة على السنتر وقريبه من الحديقه والمواقف هناك كثيره لكن افضل موقف ‏وقفت فيه واصبحت كل يوم اوقف فيه اذا احتجت المنطقة (‏Parking pod Gubałówką‏) ، مريت على بعض المواقف شغل ‏عشوائي والتذكره يكتبها لك بيده والساعه اما بعشرين او ثلاثين زلوتي ، اما هذه المواقف كرت الكتروني وفيه حاجز والدفع بالبطاقة ‏والساعه بعشره ومواقف كبيره جدا وموقعها مميز سواء لعربة الجبل او السنتر او الحديقه او سوق المزارعين .‏
رحنا الى شباك التذاكر حق عربات التلفريك وكان فيه سرى طويل شوي و جتنا عجيز تبيع تذاكر معها جاهزه بدون سرى وتاخذ ‏مكسب عليها شوي وحسبناها وشريته منها وعلى طول اختنا ودخلتنا داخل ورقينا بدون أي انتظار (هنا تنطبق مقولة لو كان الوقت ‏يشترى لاشتريته ) حنا هنا شرينا وقتنا وتقريبا كان مكسبها مننا 80 ريال شريت راحتي وراحة ابنائي بسعر مقبول .‏
الجبل فوق جميل جدا اطلاله جميله فعاليات واكشاك واول مره اجرب الجبن المشوي وكان لذيذ جدا اخذنا وحده للتجربة ثم اخذنا ‏بعدها اربع .سعرها خمسه زلوتي يابلاش .‏
بعد ما تمشينا رحنا الى الزحليقه جميله جدا ويركبها الصغير والكبير والصغير لابد يكون معه شخص كبير .‏
ميزة بولندا اسعار الفعاليات رخيصه فمثلا صعود العربة تقريبا 28 زلوتي للشخص والزحليقه اظنها ب 25 او اقل للشخص ‏والاطفال مجانا تحت سن معين اما خمس او سبع .‏
ممكن تجلس في الجبل اربع ساعات وبعدها نزلنا على السنتر مشي ما تحتاج سياره اصلا نهاية السنتر هي بوابة الصعود .‏
تمشينا في السنتر الى قريب المساء وتوجهنا الى مطعم وتعشينا فيه وعدنا الى المنزل تقريبا الساعه 10 مساء .‏




السنتر حتى في المساء فيه حياة وناس لكن دائما يفضل خاصة للعوائل الرجوع مبكر لعدة اسباب اهمها تجنب مقابلة احد سكران ‏وايضا النوم مبكر والاستيقاظ مبكر واستغلال النهار كامل خاصة ان النهار طويل جدا ممكن تبدا تظلم على ثمان ونص او تسع ‏الاربع .‏
ثالث يوم الذهاب الى قلب برونين (ممشى الغيوم) تبعد عن زاكوباني 25 دقيقه تقريبا وهو عباره عن مبنى خشبي كبير مفتتح هذي ‏السنه 2025م كبير جدا ترقى على قدميك الى الاعلى وفيه مطلات جميله جدا جدا وفي الأعلى اذا قلبك قوي فيه ممشى زجاجي ‏وأيضا فيه ممشى من الشبك وممرات شبكية اذا قلبك قوي تمشي عليها وتتفرج على الناس وكيفية محاولاتهم وخوفهم من المشي ، ‏واصلا بعض الناس يخاف يكمل كامل الممشى ، واذا وصلت للقمه ممكن تنزل مثل ما صعدت او تنزل بالزحليقه السريعه جدا جدا ‏وقيمة الزحليقة 10 ريال واما قيمة الصعود للقمة فيه تذاكر عائلية تكون ارخص وفيه تذاكر فرديه اظن الشخص ب 70 ريال . وهذي ‏فعالية لابد من تجربتها .‏



ثم بعدها رجعنا الى زاكوباني ورحنا للحديقة وكان يوم جمعة وبكرا السبت اجازه فكان فيه فعاليات في الحديقه واكشاك جميله زادت ‏جمال الحديقه جمال .‏
بعدها رحنا ناكل في مطعم ووقع الاختيار على مطعم عربي للاسف لم يكن اختيار موفق غالي وطعمه غير مقبول ولا احب اذكر ‏اسمه لكن انا نادرا ما اروح آكل في مطاعم عربية في السفر لسببين اولا انت جاي تجرب مطاعم وأكل غير اكلك ثانيا بعض المطاعم ‏العربية تستغل السائح فملا هذا المطعم في المنيو كاتب دجاج مع رز ب 115 ولما احضر الطبق صارت نصف دجاجه مع الرز ‏والرز ناشف ، ولكن دائما لا يعكر مزاجك شي اعتبرها تجربه ودرس تتعلم منه .‏
بعدها تمشينا في السنتر الى المساء وكان حيوي جدا بسبب الاجازة .‏
رجعنا الى الشقة استعدادا للذهاب غدا الى كراكوف .‏
الساعه 11 صباحا سلمنا الشقه حسب المتفق عليه بعد ترتيبها ومن المهم جدا اتباع تعليمات المؤجر في وقت الخروج و طريقة تسليم ‏الشقة من حيث النظافة ، وصاحب او صاحبة الشقة كان جدا لطيف ولم اقابله ولكن حضرت مندوبه عنه وارجعوا لنا التأمين مباشرة ‏و بالواتس اب صار بيننا تواصل حتى بعد نهاية الايجار وتم ارسال مواقع وفعاليات في كراكوف لكي نحضرها ، فزبدة الكلام إن ‏احسنت استعمال المنشئة وارجعتها كما كانت فلن تجد إلا حسن التعامل منهم .‏
الطريق من زاكوباني الى كراكوف تقريبا ساعة واربعين دقيقه ممتع وجميل وبعضها طرق سريعه وبعضها تدخل في قرى ، ‏وصلنا الى كراكوف وسكنت في فندق ومركز مؤتمرات دبل ثري باي هيلتون . نظيف جدا وموقعه في حي جميل وبعيد قيلا عن ‏السنتر ولا احب اسكن في السنتر لقدم المباني وضيق الشوارع والذهاب للسنتر سهل .‏
انصح بالفندق هذا بسبب مساحة الغرف وتنوع الافطار ومكان الافطار ممتاز طاولات داخليه وخارجيه والسعر مناسب ، لكن ‏المواقف اليوم الواحد ب 60 زلوتي .‏
طبعا المخطط عندي اني اخلي السياره معي في كراكوف يومين فقط ثم ارجعها الى مكتب قريب من الفندق وعلى كذا لازم تستغل ‏السياره وتزول الاماكن البعيده واما القريبه فيكفيها التكسي .‏
وانا من عادتي احب اسوق في اوروبا ولا استعمل التكاسي فالقياده عندهم سهله ومنظمه جدا جدا بس يبي لك تقرا وتطلع ولا ‏تستعجل ولكن في كراكوف قلت بجرب التكاسي وكانت فعلا تجربه ممتازه بحكم التخطيط السليم لاستعمال السياره وحاجتي لها .‏
فلما وصلنا للفندق في كراكوف وريحت شوي توجهت الى حديقة الحيوانات وصلت لها الساعه اربع وهي تغلق الساعه سبع حديقة ‏ممتازه جدا جدا لازم تزورها اذا معاك اطفال وتزور مكان اطفال الحيوانات وكلها جميله تمشي على اقدامك في غابة .‏
واذا وصلت لمواقف الحديقة قص تذكرة للمواقف وللباص الي يبي يوديك من المواقف الى داخل الحديقه لانه بعيد جدا صعب تمشيه ‏مشي .‏
اليوم الثاني خليته لمدينة الالعاب (انرجي لانديا) بالسياره تقريبا ساعه تذكرة الشخص الكبير 229 والطفل تقريبا 160 .‏
مدينة العاب جميلة وكبيره جدا وتصلح للكبير والصغير . بعض الالعاب فيها زحمة وطابور طويل خاصة اننا وافقنا يوم الاحد فرحت ‏وشريت للابناء الكبار تذكرتين دخول سريع وفعلا ليست خسارة فأنت تشتري الوقت وفرحة الابناء وتكفيهم عناء الوقوف الطويل . ‏وممكن تستعملها انت ايضا في العاب اخرى فتذكرة الدخول السريع اظنها لك في كل لعب مره واحده .‏
بعد ما انتهينا من الالعاب توجهت الى الحي اليهودي وتمشينا فيه وتعشينا في مطعم بيتزا له اكثر من فرع وانصحكم فيه ‏‏(‏pizzatopia‏) البيتزا يفرد قدامك العجينه وانت اختر المكونات حط الي تبي واحذف الي ما تبي تاكل وانت مرتاح وطعمها جدا لذيذ ‏وسعرها مناسب جدا تقريبا الواحده ب 45 زلوتي تزيد او تنقص حسب المكونات وحجمها كبير حبتين بيتزا تكفي ثلاثة اشخاص ‏بالراحة .‏
ثالث يوم ذهبت للمكتب وارجعت السيارة لهم بعد تعبئتها ديزل فل استلمها شيك عليها وقال كل شي تمام وخلال نصف ساعه ارجعوا ‏لي الوديعة مباشره مكتب تعاملهم رائع وخدماتهم ممتازه .‏
الان جاء وقت التكاسي عندي اوبر وبولت ويوجد عندهم شركة محليه لكني ما جربتها اسعار اوبر وبولت رخيصه جدا واصلا ‏المشاوير في كراكوف قصيره فانا كنت اطلب سياره تحمل 6 اشخاص وكان السعر بالعشرينات الى الثلاثين زلوتي واحيانا 10 ‏زلوتي حسب المشوار الاهم خل الدفع بالبطاقة اريح لك اضف بطاقتك بالتطبيق ومن يوم تنزل يخصم منك الملبغ وبس ماتحاسبه ‏كاش ويرجع باقي او ما معه او يعطيك هلل مالها قيمة تضيع منك .‏
بعد ارجاع السياره طلبت تكسي وذهبت الى اوت لت فاكتوري سوق جميل مهم تزوره وبعده رجعنا للفندق نزلنا اغراضنا وريحنا ‏شوي ثم توجهنا للسنتر وجلسنا فيه باقي اليوم .‏
من الغد توجهت الى منجم الملح ، كان مزدحم ، ولم احجز تذاكر مسبقا ، والتذاكر سعرها مرتفع واذا شريت تذكره راح يجي دورك ‏بعد ساعه ونص ، لذلك استخرت الله وسحبت على منجم الملح ما زرته واصلا ما تحمست جدا لزيارته بعد الصور الي شفتها ، ‏صحيح انه شي مميز لكن ان تيسر الحمد لله وان ما تيسر فالحمد لله ايضا .‏
توجهت لقلعة فافل قلعة جميله وكبيره ومطله على النهر ، مهم جدا انك تصادف فيها جو غيم لانه في الشمس ما تنفع ، تمشينا في ‏القلعه و شفنا اطلالاتها الجميله على النهر وتتعجب من هذا البناء القديم جدا وهذه القوة من مئات السنين .‏
بعد ما نزلنا توجهنا وأخذنا جوله بالنهر جوله جميلة مدتها نصف ساعه واذا تبي اكثر ممكن ، جربناها في العصر الجو جميل ‏والناظر جميله ، وكان بودي تجربها ايضا في الليل لكن ما تيسر والحمد لله .‏
بعدها رجعنا الى سنترنا الجميل تمشينا وتعشينا ورجعنا للفندق .‏
وهنا إنتهت الرحلة على خير حفظنا فيها ذكريات جميلة وتفرغنا فيها للأسرة والأطفال واعطيناهم حقهم في الاجازة واستمتعنا معهم ‏فحمدا لله على نعمه وتيسيره .‏

كتبت هذا التقرير على عجالة وبعد شهر تقريبا من العوده فمن المؤكد أني نسيت بعض النقاط ولكن ما ذكرته كتبته ولكم مني اجمل ‏التحايا ...‏