بسم الله الرحمن الرحيم
اولا راح اتكلم بشي بسيط بعيدا عن الموضوع فاستحملوني شوي
لكن وجب مني اني اذكر هذا الشي
انا من الناس اللي كانت تتابع المنتدى هذا من وقت طويل بدون ما اكون مسجل فالمنتدى ولكن بعد قرار اغلاق المنتدى القديم من ادارة الياهو بدأت ادخل على كثير من المواضيع اللي توقعت اني راح احتاجها فيوم من الايام و بدأت احفظ و احفظ و احفظ الى ان وصلت لموضوع اعلان المنتدى الجديد ما اخفيكم كيف كانت المشاعر مبتهجة ووعدت نفسي انه بمجرد يكون المنتدى الجديد جاهز راح اسجل و بإذن الله اقدم للمنتدى بحجم ما استفدت منه فالسنين السابقة ...
نرجع الحين لموضوعنا
الفيزا البريطانية و ما ادراك ما هي الفيزا البريطانية
طبعا الاغلب يعرف انه لازم نعبي الفيزا عن طريق الموقع و هذا هو الرابط
www.visa4uk.fco.gov.uk
تعبئة الابلكيشن سهلة جدا بس يعيب عليه طوله وكثرة التفاصيل
موضوعنا راح يكون فالخطوات ما بعد تعبئة الفيزا على الموقع
راح تظهر لك الخانات اللي تحت application copleted باللون الرمادي
و كل ما نخلص شي راح يتحول للون الاخضر
بعد تعبئة الابلكيشن نروح declaration signed و هو عبارة عن صفحة راح يكون فيها خانة توقع فيها الكترونيا طريقتها انك تكتب فيها اسمك فقط
ثم راح يحولك عالجزء اللي بعده
اللي هو حجز الموعد appointment و هذا الجزء من خلاله راح تحجز تاريخ المقابلة و وقتها و مكانها و نوعها ان كنت تريدها vip او عادي و الفرق بينهم ف الصالات و سرعة الادوار و تعاونهم معك و سهولة اجراءاتك اذا كنت vip و ايضا من هالخيار ممكن تختار اذا تبغاها فوقت اسرع وهو عادة من 5-7 ايام عمل , بعد ما تحجز الموعد راح يكون عندك خاصية طباعة الموعد وهذا من اهم الاشياء لان لو ما عندك ورقة الموعد مستحيل ان حارس الامن يدخلك و مستحيل انهم يستقبلوا اوراقك و نصيحتي يكون موعدك بدري قدر الامكان عشان لو كان فيه اي طلب زايد او اي غلط لا قدر الله يكون عندك امكانية تحضر الورق و تجيبه قبل لا ينتهي الدوام في نفس اليوم
الخيار ما قبل الاخير راح يكون
الدفع اللي هو ال payment و راح يعطوك مهلة من بعد اختيار الموعد ان ما خاب ظني 6 ساعات للدفع لو ما دفعت فيها راح يتلغي الابلكيشن كامل و الموعد و تعيد من البداية وكان الله في عونك طبعا الدفع اون لاين و ما فيه الا هذا الخيار يعني لازم تكون مجهز الفيزا او الماستر كارد او غيره
بعد الدفع انت راح يكون عندك كل الخانات خضرا يعني مكتملة و راح يكون عندك خيار باللون الاسود و هو طباعة الابلكيشن print application راح تضغط عليه و يجيك الابلكيشن حقك مثل ما عبيته لازم تطبعه مع ورقة الموعد
وراح يكون عندك الشكل كذا
الان بعد ما خلصنا من الموقع وسوينا كل المطلوب نجي للطلبات اللي سبحان الله كل شوي تتغير و من شخص ل شخص يطلب اشياء عجيبة غريبة ولكن نصيحتي جهز كل شي و بزيادة عشان ما تتعذب ف الرجوع لهم مرة ثانية لان صارت لي مواقف كثيرة فاصدار الفيزا
1- ورقة الموعد ( تطبعها بعد اخذ الموعد من الموقع )
2- الابلكيشن ( تطبعه من الموقع بعد دفع المبلغ )
3- كشف الحساب الشخصي او حساب الشخص المتكفل بالمصاريف خلال ( 6 شهور ) ويكون الشهر المقدم فيه الطلب او اللي قبله بحد اقصى و يكون باللغة الانجليزية او عربي و مرفق معاها ترجمة معتمدة مصدقة من الغرفة التجارية
4- خطاب تعريف بالراتب و يكون باللغة الانجليزية او عربي و مرفق معاها ترجمة معتمدة مصدقة من الغرفة التجارية
5- صورتين حديثة 4x6 مثل حجم صورة جواز السفر و تكون بدون شي يغطي الشعر للرجال و بدون نظارات و للنساء يكون الحجاب على اطراف الوجه بحيث يوضح الوجه كامل
6- صورة من جواز السفر
7- صورة من اي فيزا بريطانية قديمة ( ان وجد )
8 - ورقة موافقة الجهة اللي راح تدرس فيها ( اذا كان غرضك دراسة )
و بكذا انتهينا من الطلبات
اللي راح يكون عليك بعد كذا انك تجهز الاشياء هذي و تتجه عندهم ف الموعد
وراح تقدم لهم الاشياء المطلوبة وراح يطلبوا منك الاتجاه لمكان معين ياخذون فيه بصمة اليد و يصوروك صورة الفيزا و بكذا تكون انتهيت و تنتظر يرسلون لك رسالة على الايميل يخبروك بوصول الفيزا للمركز بالنسبة لسكان الرياض تستلمها فنفس يوم الرسالة
بالنسبة لسكان الغربية و الشرقية تستلمها بعد 24 ساعة من استلام الرسالة عالايميل
ان شاء الله يكون كل شي واضح
و ان اخطأت فهو من الشيطان و مني و ان اصبت فهو من الله
1الاعجاب
04-01-2015, 01:46 PM
ما بعد تعبئة نموذج ال visa من الموقع 
العرض الشجري
المواضيع المتشابهه 
