ايه والله ماعليه ويز تجربتي مدري عاد عن الباقين
الرامبلا كنت ابي نستغل الوقت ونقدر نرجع الفندق اي ساعه وموب سيء مره مزعج لكن عادي الامور سهالات

شكرا لردك ومتابعتك

تكملة اليوم الثاني
خلصنا من القرية الاسبانية اخذنا تاكسي رحنا لحي el bran منطقة حلوة وقريبه للرامبلا فيها ساحة وشوارع تتفرع تسوق واكل وقهاوي
اخذنا بطاطس من محل **كل مطاعمهم البطاطس مرة عجيب مع صوصات مختلفه اكلنا وحنا نتمشى بعدين لقينا جلسات وجلسنا وكملنا تسوق وتمشي اللي نلقاه نشتريه
بعدين قالو العيال هنا محل تراميسو حلو اجلسي ونروح نجيب منه وجلست وجابو وقهوة واكلنا
**مدري يمكن عشان شتاء والجو حلو الاتكل والقهاوي مالها حزة مرتبة عندنا كل وقت عادي ..
كملنا لين فندقنا مشي مريح كان ماتحس بالتعب كله محلات وتمشيه وكراسي اجلس ويسبقوني وارجع لهم
رجعنا وجلسنا نفكر في سالفة الروحة الى ""اندورا ""

هلا والله ايه انا وانا اقرا تقاريرك احس فيه تشابه بس انتي ماشاءالله تصويرك حلو انا تصوير امهات
مره يشوق الرامبلا وبرشلونه كلها ونيسه حتى عيالي مع انهم راحوا لها اكثر من مره قالو خيره اضفناها للجدول
عادي اضفنا شنط عقب وانا اجيب اللي تتسفط وتنفتح عقب تعبينها مره ماتقول شي
منوره والله

جلسنا نشوف مواعيد الباصات اللي تودي اندورا
اندورا للي مايعرفها مدينة ماتتبع احد ولا فيها ضرايب وبعد منطقه بارده وحنا لها سبق فالصيف وكانت معقوله
وخساره ليت نوينا سياره افضل يصير الواحد حر نفسه مايرتبط بمواعيد باصات
شفنا مواعيد الباصات الاحد ومحدوده شوي قلنا نخليها الاثنين ونجلس برشلونه الاحد فيه اماكن مامريناها
…
اليوم الثالث وكان يوافق يوم احد طلعنا نفطر في الحي القوطي في مقهى قديم وعنده شوروس واشياء ثانيه
وعيالي تحمسوا من شد الحماس شبهوا المالك بجدهم يقولون والله نفس الحركات ههههه
افطرنا عنده وكان المكان جميل وخفيف طينه
وبعدها قعدنا نتمشى في الحي القوطي وناس يسوون عروض
وشرينا بعض التدكارات
يتبع

مشينا لزارا ولقيناه مسكر حسافه اتذكره في سفره سابقه وفي مدريد كان حلو وبضاعته احسن من زارا الرياض
بس ماكتبه الله .
وصلنا سقرادا فاميليا
من قوقل :
كاتدرائية ساجرادا فاميليا (اسبانى: La sagrada Família) أو كنيسة العائلة المقدسة، وهي كنيسة كاثوليكية رومانية، تعد من أضخم كنائس أوروبا، تقع في حي ساجرادا فاميليا فى مدينة بارسلونا، كاتالونيا في اسبانيا. ابتدى في بناها سنة 1882، ولَم يكتمل بناها الى الان ومتوقع ينتهى البناء سنة 2026 , اختيرت سنة 2007 ضمن قائمة كنوز اسبانيا الاتناشر.[5]
واللي بانيه جاودي بعد له بيت مشهور ومزار رحنا له عقب .
حلو المكان فيه جلسات واكشاك والشوارع المحيطه به خرشه وحركة .
جلسنا شوي بعدين اخذنا تاكسي لبيت قاودي رحنا بس مادخلنا البيت
معلومة عني : موب مرة على المتاحف وهالاشياء بس اوصلها اسم مريت عليها
ودخلنا محل تابع له فيه تشوكلت وكوفي وورتنا الحلال بدون مانسالها
وكان فيه زيت زيتون مرة شوقني بس خفت يتكسر ماوصل قالت ماعليك بلفه زين ولفته والحمدلله وصل الرياض بالسلامه .
جو العيال الباقين وكملنا تمشيه .
قالوا بناكل في برقر اسمه بادن بادن كانوا جايينه قبل كورونا يناير 2020 رجعوا وبدت التعليق
وانا مشتهيه باييلا او اكل صدقي موب برقر قلت باخذ معكم بطاطس وبعدين ندور مطعم لي .
وجا والله ماشاءالله مرة يشهي اكله والمكان مريح مرة وحبيبين اللي يشتغلون .
خلصوا اكل ومشينا كملنا طريق ورحنا بالتاكسي للرامبلا نزلنا بدايته وحلو هو المحلات فاتحه دخلنا كم محل
ولقينا محل يبيع شالات واشياء هنديه خذنا منه هدايا واشياء حلوة .
كملنا تمشيه ورحنا للكوفي حق الكوكيز اخذنا منه تقهوينا فيه
كان يوم مباراة السوبر الاسباني المقام في الرياض رحنا مطعم كنت شايفته اول يوم عند المول حلو مكانه يطل عالبحر جلسات خارجيه وشكل اكلهم زين وتقييمهم حليو في قوقل .
رحنا وكانوا مشغلين المباراة وهو يبربر اسباني يوم قال الرياض فجأة عيونا قلوب خضراء صدق شعور غريب مرة ياملحنا والله وملعبنا ..
اخذنا باييلا خضار وباييلا دجاج وبطاطسهم العجيب وكرات جبنه على اساس العيال نقنقه ماكلين برقر بس الحمدلله امداه تهضم بالعافيه .
خلصنا العشا والمباراة خلصت لكن مرة كنت تعبت واخذت تاكسي انا والبنات والعيال قالوا بيكملون مشي يشوفون احتفالات الفوز .
رجعنا الفندق وانتهى يومنا وناوين نقوم بكرة ابكر شي نلحق الرحله حقت اندورا ..

اليوم الرابع قبل الاخير
صحينا الصبح بدري عشان نلحق باص اندورا
اخذنا تاكسي رحنا لمحطة باصنا اسمه دايركت هي محطه كبيره مره
الباص اللي يروح اندورا مقابل للمحطه الكبيره عباره عن صاله قص تذاكر ومقهى صغير
وصلنا قبل موعدهم حول عشرين دقيقه سباق مع الوقت راحوا العيال ياخذون التذاكر وجلست شوي عقب المراكض اريح
الحمدلله ركبنا الباص ومعنا كروسان اخذتاه من المحطه ومويه
مشينا الطريق مره جميل وقرى صغيره تهبل تمنينا اخذنا سياره ونوقف على راحتنا
وصلنا بعد تقريبا ثلاث ساعات الا ربع او حولها كان الجو سنو خفيف يهبل مره
انبسطنا كان ودنا نشوف ثلوج بس يالله العوض ولا القطيعه ..
قبل نوصل وقف زي تفتيش ودخل اثنين بوليس شيكوا عالجوازات والفيزا سبق رحنا مااتذكر كان فيه تفتيش
اندورا مدينه جميله السنتر عباره عن محلات وسوق كبير مفتوح وفيه مول مسكر
جميله مره والاسعار عندهم ارخص كثير خاصه العطور والتجميل
يهبل مره تقش وماتفكر في شي
تفرقنا هو شارع طويل مافيه ضيعه كل واحد يشوف وش يحب
فجأة تجمعنا نتقهوى الا انفاجيء بنتي الكبيره تسحب شنطة ههه شرتها عشان تشيل مقاضيها
وبكره رحلتنا داخليه قلت اجل خل نوقف متقهوى واضيف شنطة للحجز وش نسوي بعد
الحمدلله اضفتها ووقفنا شربنا شاهي واحد قهوة وبطاطس
وكملنا تسوق
بعدين قبل نرجع للباص مرينا مقهى عنده هوت تشوكلت وشوروس اخذنا منه ومشينا للمحطه عشان نلحق باص الساعه ست وربع
الحمدلله وصلنا على الوقت وركبنا الباص
عاد هنا قلت زين مااخذنا سياره الطريق بعضه اظلم ومتعرج وانا مااحب الطرق كذا
وصلنا برشلونه ورجعنا لفندقنا وطلبنا برقر بادن بادن
احتجنا رقم اسباني وكلكنا موظف الاستقبال وعطاهم رقمه واستلم طلبنا
اكلنا ونمنا ورانا رحله الفجر لايطاليا
وبكذا انتهى جزء برشلونه ..
حبيت اضيف رحلتي ولو بدون صور بس لان ماشفت تقاربر جديده هنا قلت اضيف اي معلومه
نشوفكم في رحلات ثانيه ان شاءالله

الله يعطيك العافية

وخاصة انك نقلت لنا تجربتك مع طيران حديث ودخيل علينا
تتقريبا مثلك احب تكون شاشة قدامي حتى لو ما اتابع شي

حاجه نفسيه

الله يعافيك ابو منار وشكرا للرد
ايه والله المقصد انقل التجربه والطيران جديد وزين سعره للي يهتم بالميزانيات

قبل انهي قسم برشلونة بتكلم عن مطارهم
رحنا الصباح مبكر رحلتنا الى بولونيا على طيران vueling وهو ايضا طيران داخلي اقتصادي وكل يوم ضايفين شنطة من البنات والحمدلله .
دخلنا المطار لقينا كاونترات مكتوب شيك ان ذاتي حتى الشناط بصراحة ماقد جربناها بس قلنا يالله نسويها اسرع يمدينا نروح نفطر ومانمسك طابور سوينا طباعة للبوردينق وحطينا عدد الشناط وطبع لنا ستكراتها ووديناها للميزان بعد ماحطينا لكل شنطة ستكر واخذنا جزء منه زي مايسوي الموظف وبس يوزنها الجهاز وتروح للسير استودعتهم الله اول مرة اسويها والحمدلله الامر سهل جدا .
رحنا للتفتيش وبصراحة زعلوني الاسبان والله احبهم ومحترمين الا موظفهم نشب للبنات يشيلون جاكيتاتهم
وفهمناه انها زي رسمي ماينشال (انا ماقال لي شي لان لابسه جكيت طويل مسكر مرة مافيه مجال ينفتح )
وولدي يتكلم اسباني حاول معه ويشرح له في مطارات كثير يودون البنات مكان صاد وفيه موظفه تفتش بالعادة . المهم خلصنا الحمدلله بالسلامة وبنتي الصغيره تتحلطم قلت لها تعودي موظفين المطارات لا تحاكينهم ابد لازين ولا شين والله الواحد يخاف بعد .
رحنا بعدها مابعد فتح احد لين فتح كوفي اخذنا منه سندوتشات وشاهي وقهوة والحمدلله ورحنا عند بوابتنا .
انتهى جزء برشلونه
انا احبها كثير ومن المدن اللي عادي اكرر زيارتها ماامل منها .