|
المقدمة بسم الله الرحمن الرحيم السلام عليكم ورحمه الله وبركاته جميعا الحمدلله ع السلامه ورجعنا ارض الوطن ارض الامن والامان ، بلاد الحرمين يارب لك الحمد حمدا كثيييرا على جميع نعمك وكرمك وفضلك علينا باننا مسلمون وعايشين ف اطهر وانقى مكان على وجه الارض :(141): من جد من جد محد يحس بالنعمه اللي هوا فيها لين مايخرج ويشوف العالم برا كيف عايشين ..! بدايه حابه اقولكم انا اول مره اسافر خارج السعوديه ، رجعت وانا بس احمد الله على النعم اللي انعمها علينا ، اخذت من الوقت الكثير وانا افكر كيف تقريري يكون مميز ومفيد للجميع ..! فححاول قد ما اقدر اني ابدع في كتابته ،، طبعا ما انسى اول شيء قبل لا أبدأ ، اوجه الشكررر الجزيل لكل اعضاء المنتدى من استفدت منهم في هذه الرحله وكالعاده نرد الجميل بالأجمل منه �� ان شاء الله .. :(125)::(125): ولاتؤاخذوني ان حصل تقصير علما باني اول مرة اكتب تقرير هكذا في منتدى .. بس من الان اقولكم انا انسانه احب التفاصيل جدا ودقيقه ويمكن تلاحظوا هذا الشيء في تقريري ،، وان شاء الله ماتحسوا بملل في قراءة التقرير ،، بداية ،، يارب لك الحمد انه جاء هذاك اليوم اللي قررنا انا وابو جاسم انه نتوكل على الله ونقرر نسافر ،، طبعا قبل السفر ب 5 شهور تقريبا بدات انا رحله الصولات والجولات عن ماليزيا واقرا جميع التقارير واتفرج كل الفيديوهات في اليوتيوب المهم الين ما كونت فكره عامه عن المكان اللي انا رايحتله ،، وبعدها قررت اش الاماكن اللي تستاهل نروحها واش اللي نكنسلها طبعا مع الأخذ بعين الاعتبار راحة اولادي وراحتنا ،، فكنا محتارين بين لنكاوي ولا بينانغ وحده فيهم لازم نختار !! قررنا تكون بينانغ ،، لاننا مانبغا نركب طياره ولا نبغى نركب سفينه .. فضلنا البر احسن وافضل واريح لنا مع سيارتنا المستأجرة ،، فتم القرار ووزعنا الايام لكل مدينه ومن ثم بدات رحله اختيار الفنادق ،، اما الفنادق فنوعنا في اختيارها اخذنا الارخص والانظف واخذنا الغالي وذلك للتوفير في المصاريف .. موعد الرحلة : من ٧ نوفمبر ٢٠١٦ الى ٢٢ نوفمبر ٢٠١٦ عدد الايام : ١٤يوم من دون يوم الوصول والمغادره على الخطوط الجويه السعوديه ، الدرجه السياحيه الذهاب والعوده ( جدة - كوالا - جده ) دايركت سبب اختيارنا للدايركت ( عشان الاولاد خلاص تعب واحد ونخلص ، لانه لو ترانزيت لسا ننزل ونحمل شنطنا والعربيه مشحونه ف الشنط فلو نزلنا ترانزيت حنحمل الاتنين الله يحفظهم ونتبهدل قدام العالم ويتبهدلوا معانا مساكين >> بخصوص تعب الاطفال ابشركم طلعت لي عضلات ماشاء الله تبارك الله اذكروا الله بس :yolks00380:سرت سوبر وومن وابوهم سار سوبر مان :yolks00250:) اعضاء الرحله : ٢ كبار ( انا وابو جاسم )- ٢ اطفال ( ٣ونص جاسم - سنه راشد ) توزيع الايام ( ٥ ايام سيلانجور - ٦ ايام بينانغ - ٤ ايام كوالا ) ميزانيه الرحله : ٢٥ الف شامله التذاكر والفنادق وكل شيء الميزانيه بالتفصيل : التذاكر : ٦٣٠٠ ريال ذهاب وعوده الفنادق : من بوكينغ جميع الحجوزات ٣٥٠٠ ريال ( طبعا تفاجأنا انه بوكينغ مايحسب الضرايب ) الزياده بنسبه ٦٪ للضرايب فصارت سعر الفنادق مع الضرايب ٤٠٠٠ريال مجموع التذاكر والفنادق : ١٠٣٠٠ريال التسوق والمصاريف الاخرى ( شامله التذاكر للحدايق واستئجار السياره والاكل والبقاله ) : ٩٧٠٠ريال وتبقى لنا ٣٠٠٠ ريال رجعت معانا للسعوديه :yolks00300: يعني ماشاء الله تبارك الله انبسطنا وغيرنا جوو واتسوقنا وادلعنا والحمدلله رجعت معانا فلوس زياده كمان واصلا هذي خطة ابو جاسم الجهنميه ناويها من واحنا هناك اننا نرجع ويبقى معانا فلوس عشان نمشي حالنا في الشهر اللي بعد السفر :yolks00320:، بس لو جات عليا ماني راجعه السعوديه لين اخلص كل سنت ورنجت معايا :(89): ( اصلا تدروا انه كان باقيلي من فلوسي ف محفظتي ٢٠٠ رنجت ، وانا ف مطار كوالا راجعين ع السعودية ، لفيت السوق كله عشان ابغى اخلص فلوسي عشان ارتاح نفسيا اني صرفت لاخر قطره :yolks00250:بس خاب ظني اش تسويلي ٢٠٠ رنجت في محلات المطار اللي كل ابوها رولكس وشانيل ومايكل كورس وباقي الشله المصونه �� ، فقررت اني اخلص ماتبقى من رنجيتات في الصيدليه << على فكرة الصيدليه اسمها تقريبا gurdain ترى ماني متاكده من الاسبلينغ بس كذا اسمها فظيييييعه ارخص من النهدي عندنا :(60): انا قضيت منها كل شيء وبالكميات كمان ، بعدين حرجع اتطرق لموضوع الصيدليه ، كل شوي ادخل في تفاصيل اكثر هههههه ،،،) هدف الرحله : ١- الاستمتاع والترفيه وتغير الجو مع افراد العايله السعيده ٢- تجربه شيء جديد ماقد جربته في حياتي ملاحظة مهمه جدا : قبل لا ابدا في سرد التقرير حبيت اقولكم انه سقف اهداف الرحله بالنسبه ليا شخصيا كان جدا اقل من المتوقع ،، والسبب انه كانت نصيحه اختي ليا مجربه السفر قالت لي انه السفر مع الاولاد حيجيب المفاجأت الجميله والغير متوقعه ، فلا تتحممسي ع الفاضي وبعدين تروحي هناك وتنصدمي وتتنكدي �� ،، وفعلا صدقت في كل كلمه قالتها ، ومانكدت على نفسي ولا حاجه الحمدلله من جد والله نصيحه لكل ام او اب بيسافروا لاتتوقعوا تخلصوا كل الاماكن اللي مخططين لها في السفر عشان لا تتنكدوا وانتوا هناك ع الفاضي ومايستاهل اصلا يكفي انكم سافرتوا مع بعض وغيرتوا جو وشميتوا هواء يرد الروح واستمتعوا بالمناظر وكل شيء جميل هناااك << فيا بكيه ابغى ارجع تاني ماليزيا :(88)::(88): المهم نرجع لتكمله موضوعنا ،، اسماء الفنادق سيلانجور : فندق البوتيكي ٣٣ ، لمدة ٥ ايام 800 رنجت بدون فطور بينانغ : تم السكن في فندقين الاول : قولدن ساندن شانغريلا ، لمدة ٤ ايام 1800رنجت شامل الافطار الثاني : هارد روك ، لمدة ٢ يومين 1500رنجت شامل الافطار كوالا : فندق ميترو٣٦٠ لمدة ٤ ايام 850 رنجت شامل الافطار مع الضرايب الاسعار ، وحتطرق لكل فندق .. التطبيقات للجوال : اوبر وجراب وقوقل ماب الأماكان المخطط لها للزيارة : سيلانجور ( 5 أيام ) : 1- منتزه الماينز وندرلاند 2- الاي ستي 3- مسجد بتروجايا 4- ملاهي ديسا ووتر بارك 5- كيدزانيا الاطفال 6- حديقة الحيوانات زوو نيقارا 7- صنواي لاجون 8- مطعم الطربوش في البيراميد 9- مطعم صاقر الهندي في صنواي لاجون بينانغ ( 6 ايام ) : 1- بيت القهوه ( coffe tree ) 2- هضبة بينانغ 3- الحدايق ( الفراشات والفواكه والتوابل والطيور ) والشلالات 4- ملاهي ايكو سكيب 5- مطعم منارة كومتارو في جورج تاون 6- مول جيرني بلازا 7- مول كوينسبي 8- تناول العشاء على مطعم ع البحر ( uncle zack ) 9- الانشطة البحرية 10 - متحف الالعاب 11- السوق الليلي 12- رحلة بالقارب للشواء والصيد الى جزيره القرود . 13- كافيه هارد روك كوالا ( 4 ايام ) : 1- زيارة البرجين . 2- زيارة المنارة برج الاتصالات . 3- الاكواريوم . 4- مجمع سوريا والبافليون 5- الاوت لت التايمز سكوير . 6- مطعم ناندوز 7- اوت لت ميتسيو بجانب المطار 8- جنتنغ وركوب التلفريك . 9- السوق الصيني . هذي كانت الخطه قبل السفر للاماكن والزيارات اللي نبغا نروحها << الظاهر مع ورعانك ماظنتي روحتي مكان من الخطه :yolks00250: الاجزاء المهمه في التقرير بشكل عام : والتي سوف اتطرق اليها مفصلا ،، ١- زياره المستشفى مرتين في اول خمس ايام ! ٢- رأي الشخصي في مطعم الطربوش في البيراميد مول بسلانجور، ومطعم 59 sixty في برج جورج تاون في بينانغ .. ومطعم صاقر في صنواي لاجون ، ومطعم ناندوز في التايمز سكوير بكوالا ٣- تجربة استئجار السياره في جميع ايام الرحله ٤- سلبيات وايجابيات الرحله بالتفصيل في كل جزء حذكره .. ٥- نصايح مهمه كثييره ٦- رأي في بعض محلات ماليزيا والفرق بينها وبين محلاتنا ف السعوديه .. ٧- اسعار تذاكر الحدايق والملاهي مرتفعه !! ٨- افضل مشترواتي من ماليزيا .. 9- الاطفال والسفر 10- أهم تجهيزات السفر للاطفال 11- اهم مقتنيات المطبخ المفيدة ف السفر 12- افضل وأحسن وأروع وأجمل مطعم أكلت فيه في ماليزيا 13- أدمنتها من اول رشفة ( شنطة كاملة للقهوة البيضاء ) << لحد يقول لي اعطيني كيس ^_^ 14- مشكلة الملابس المتسخة .. 15- السفر والريجيم وما أدراكم ما الريجيم << ادري انكم تدروا اش اقصد هههههه ان شاء الله ما اكون نسيت شيء ههههه المهم واكيد مع سرد التقرير حفتكر اشياء اكثر كمان وملاحظات اما الان عزيزي القارئ او القارئة / إذا لم يسبق لك السفر من قبل للخارج فاتوقع انه تقريري حيفيدك جدا باذن الله ،، أما من سبق لهم السفر فما اقوله ليس بجديد عليكم واذا استفدتوا شيء ايضا فـ لله الحمد واتمنى لكم وقتا ممتعا مع رحلتــــــي الجميلة والبسيطة والمليئة بأصوات البكاء الصادرة من جسومي ورشودي :yolks00780: لمشاهدة بقيه اجزاء التقرير بكل سهوله اضغط على الجزء الذي تود قراءته : جزء يوم السفر http://www.arabtrvl.com/vb/285946-post15.html ::: جزء سيلانجور http://www.arabtrvl.com/vb/286762-post34.html ::: جزء بينانغ http://www.arabtrvl.com/vb/287654-post57.html ::: جزء كوالا http://www.arabtrvl.com/vb/288872-post72.html ::: جزء المطاعم http://www.arabtrvl.com/vb/289357-post87.html ::: جزء المولات http://www.arabtrvl.com/vb/290562-post94.html ::: جزء اهم الملاحظات http://www.arabtrvl.com/vb/290584-post95.html |
الحمدلله عالسلامه اختي و لاشك التفاصيل تجعلنا نستفيد اكثر صيدليات ماليزيا جارديان و واتسون .. لازم امر عليهم في المطار لأن السوايل ممنوعه .. اشتري منهم ماي و يحطونه في كيس خاص و بهذا اقدر ادخله الطياره معاي |
ما شاء الله بداية رائعة و قوية لتقرير أتوقع أن يكون متابع من كثير و أنا واحد منهم و مع أنه أول تقرير لك ألا أسلوب الكتابة يجبرك على المتابعة السفر مع الأولاد متعب وبالفعل يمنع الواحد من اكمال مخطط الرحلة الميزانية حلوة و تخطيطكم للرحلة حلو باقي نستمتع بالتفاصيل متابعين معاك و الله يحفظ لكم جاسم و راشد |
ما شـــاء الله الحمدلله عالسلامه عزيزتي ، و ان شاء الله كانت رحله ممتعه و تركت اثر طيب و محفز لرحلات قادمه باذن الله بالنسبه لموضوع الميزانيه ، برافو عليكم :e32f: بالنسبه لمفاجات السفر ، فهذي حلاة السفر ، ثقي انه غالباً بتقابلين مفاجآت سواءً رحله مع الابناء او بدون عزيزتي ، اسلوبك ما شاء الله جذاب و يدفع للمتابعه بانتظار تجاربك و نصائحك و سوالفك الممتعه عن ماليزيا :) و يعطيك العافيه |
حمد لله عالسلامة ام جسومي باين تقرير ناري من اوله مليان تفاصيل وحكايات ولا تنسي الصور فهي اهم مايميز التقرير الحمد لله انك استفدت من تقارير الاعضاء وان رحلتك كانت ناجحه سلامة الاولاد الف سلامه عليهم وهكذا هم الاطفال في هذه السن الصغيره دائما عرضه للامراض وخصوصا لو تغير المناخ والبلاد احجزيلي مقعد اول ولا تطيلي الغياب |
برافووووو بداية تقرير من عضوه جديده قديرة باين من الكتابه انه بيكون من التقارير المميزه في المنتدى ربي يخليكم لبعض ويخلي لكم جسومي ورشود متابعين بقعد يم زميلتي ام زياد ...:70:تابعي |
هلا ام جسومي الحمدلله على السلامة بشري اخدتي المطبخ معاكي او لا:1: ماشاء الله الميزانية ممتازة لعدد الايام والفنادق بعضها اول مرة اسمع فيه خصوصا اللي في سيلانجور اتمنى انك اضفتي لنكاوي لانها لؤلؤة ماليزيا ان شاء الله تزوريها قريب باذن الله صراحة لما قرات البداية قلت هاذا تقرير ناري واكيد راح يكون مرجع للكثير ماقصرتي حبيبتي وفي انتظارك:e204: |
hgt pl] الف حمدلله على السلامة منتظرين التقرير على احر من الجمر الله يعين الاطفال الكل قلي متعبين ربي يحفظهم ويحميهم اتوقع مقدما الاستفادة من تقريرك بحكم ان لي سفرة باذن الله في يناير اول مرة مع الاطفال في حفظ الرحمن |
ماشاءالله متابعين معاك الموضوع صحيح كلامك مستحيل الواحد يلحق على كل الاماكن بس لازم يستمتع قدر الامكان ويكون مرن و اسبوعين في ماليزيا غير كافيه ابدا |
الحمد لله ع السلامة أم جاسم .. اختيار موفق لماليزيا كوجهة سفر مميزة ... بداية راااائعة تعطي انطباع بتمكن جميل من الكتابة والطرح .. التفاصيل هي مايبحث عنه من يخطط ويرتب للسفر .. فلا تبخلي علينا .. أعجبتني قناعتك ونظرتك للسفر .. وهذا الشيء يساعد على الاستمتاع بالرحلة .. اختياركم لفندقي بينانغ مميز .. أما بقية الفنادق أنتظر تقييمك لها .. تقريرك ... بدايته تجعل منه محط اهتمام ويستحق المتابعة لبقية الأجزاء .. ننتظرك .. مع دعواتنا لك بالتوفيق وجزيل الأجر لنفع إخوتك الباحثين |
متاااابعين تقرير باين انه مفيد جدا ننتظر خصوصا أني راح اسافر ان شاء الله في ابريل |
حمدلله عالسلامة اختي الكريمة فعلا السفر مع الاطفال مزعج ومتعب وفي نفس الوقت صعب الواحد يتركهم كل هذه المدة .. اعمار اطفالك الله يحفظهم مثل اعمار اطفالي واعتقد اني عانيت مثل معاناتك منتظرين تقريرك بشغف ..وانطباعك عن الهارد روك هل مازال رائعا ام نزل مستواه بحكم تجربتي له قبل سنتين ونصف |
وعليكم السلام ورحمة الله وبركاته الحمدلله علي السلامه نحمد الله علي النعم ما شاء الله خمسة أشهر جدا رائعه للتخطيط راح ينعكس علي رحلتكم بإذن الله بالخير ما شاء الله ميزاينه مناسبه ورجع معكم مبلغ عسي ما شر لزيراه المستشفي بس خمس أيام لسلانيجور مش كثيره |
اقتباس:
الله يسلمك ي رب :e303: حتى انا حسيت انها كثيرة ، بس ارتحنا فيها والحمد لله انها كانت 5 ايام عشان اولادي كانوا اصلا مريضين فهذي الخمس ايام جات من صالح الاولاد .. الحمد لله وعندما توجهنا الى بينانغ كانوا الحمد لله بخير وصحة وسلامه ،،،:e022::e022: اقتباس:
ربي يسلمك من كل مكروه أخي :e303: ويحفظلك فلذات قلبك ي رب في الهوا سوا أجل :e419: تابع الاحداث وبالتفصيل كل شيء حكتبه ان شاء الله عن كل فندق :e045::52: اقتباس:
يشرفني متابعتك ي جميلة :e303: جهزي ورقتك وقلمك ، وسجلي معايا الملاحظات اللي تفيدك :e327: اقتباس:
الله يسلمك من كل مكروه اخي :e303: حلوا المعلومه هذي مشكوور والله :72: اقتباس:
اللهم امييين يارب واياك :e022::e022: صراحة جميلة هذه الكلمات ، رفعت مستوى الحماس عندي اني أكمل التقرير ف أسرع وقت و أكثر فايدة .. :e327: اقتباس:
ربي يسعدكم كلكم والله :e022: مرررا مبسووططه بكلماتكم المعنويه العالية ثقوا اني باذن الله ماحقصر ان شاء الله مع اني ولا شيء من تجارب العمالقة اللي ختموا ماليزيا ماشاء الله ويمكن ختموا العالم لفلفه ههههه ماششششاء الله تبارك الله اوووه انتي تدري اني من وانا هناك خططت اني راجعه راجعه باذن الله لماليزيا بس من دون الاولاد طبعا من الحين اعطيت اهلي خبر ، عشان كل واحد يستعد يمسك لي واحد فيهم :24::24: اقتباس:
ي لبى هالنوور ي جميلتي انتي أكيد ما حقصر ان شاء الله ، الصور ف الطريق مع تكملة التقرير وربي يسلم لي قلبك من كل شر من عنيا أهوو في الطريق التكملة بس باقي اضيف الصور ... .:e303::e022: اقتباس:
امين حبيبتي ويحفظلك ربي كل غالي على قلبك :e32d:،، يشرفني تواجدكم في المقاعد الأماميه :e327::e327: حتستمتعوا صدقوني :e022: اقتباس:
يسعدلي هالطله ي جميلتي :e022: حقك عليا ، انا عارفه انها جميله بس الظروف واخر ما توصلنا اليه اننا نكنسلها حتفهمي عليا مع تكملة التقرير ،، وان شاء الله يارب اذا كتب لي سفرة جاية ازورها ،، اصلا ماليزيا ما تقدري تخلصيها من مرة وحده لازم لها اربع خمس سفرات لها :e022: اقتباس:
الله يسلمك أخي ولا يهمك في اقرب فرصه حخلص التقرير ان شاء الله من حماسكم والله حمستووووني أسرع ف الكتابة وان شاء الله حتستفيد كثيييير واذا استفدت بلغني عشان افرح اني افدتك :e303: اقتباس:
سعيدة بمروك ي جميله :e022: مريت على تقريرك مرور بسيط وليا عودة ان شاء الله لتقريرك بس افضى باذن الله :e022: اقتباس:
الله يسلمك يارب الحمد لله كله بفضل ربي :e022: وشكرا شكرا لكم من القلب على الكلمات الجميلة والله اول مرة أجرب اكتب كتابة مرتبة ،، << مواهب مدفونه دفنوني العيال :9::24::24: وأكيييد أرجو من هذا التقرير النفع الاول والاخير .. اصلا وانا اكتب هذا التقرير اتخيل نفسي قارئة وماعمري سافرت من قبل .. فأزيد في التفاصيل والدقة .. استمتعواا بالمتابعة :e303: |
جزء يوم السفر يوم السفر ونبدأ بسم الله ..... !!! <<<< لحظاااات بس اخذ لي رشفة هادئة من كوبي الدافيء من القهوة البيضاء ذات الرائحة العبقة اللي تنطح ريحة الكابتشينو اللي كنت مدمنته سابقا ... :yolks00610: [IMG]http://www.arabtrvl.com/up/uploads/a...0176395852.jpg[/IMG] يوم السفر : هوا اليوم المنتظر والمترقب بفارغ الصبر ،، عدد الشنط اللي انشحنت للطائرة : 3 شنط طقم الكبير : ملابسي انا وابو جاسم .( ما كثرنا ملابس ) والوسط : شنطة المطبخ ( في الجزء القادم حتكلم عن محتوياتها ) والصغير : ملابس جسومي ورشودي .( كل اللي في الدولاب اخذته حتى ملابسهم القديمه ، حتكلم عنها في وقت لاحق ) [IMG]http://www.arabtrvl.com/up/uploads/a...0178144963.jpg[/IMG] عدد الشنط على الطائرة : 5 شنط << ماهذا العدد ي لطييف ..!!!! الاولى : شنطة كروس لابو جاسم فيها جميع الاوراق المهمه والفلوس ( للي مايعرف شنطة الكروس الصغيره اللي لها حبل طويل ) الثانية : شنطة ظهر لابو جاسم تحتوي على ( علبة حليب جديده لراشد حجم صغير – علبتين مويه جديده – سناكات ليا ولابو جاسم وكتابين – لعبة راشد ..) الثالثة : شنطة كروس ليا ( جوالي محفظتي- كريم يد طبي في علبة صغيره – علبة عدساتي ( عدسات شفافه طبيه ) – سلك شاحني – بخاخ معقم ) الرابعة : شنطة جسومي ع الظهر ( كتاب قصص – ايباد – سناكات – زمزمية المويه ) الخامسة : شنطة رشودي : كبيره قليلا اللي تنشال ع الكتف وتحتوي ( 6حفايض – مناديل مبلله حجم صغير 20 منديل ف الكيس – علبة لمقسمات الحليب تحتوي على 4 اقسام يعني اربع رضعات او 4 وجبات – غيارين ملابس المقفله كامله ( بربتوز كامل ) – 1 علبة المويه حق الاطفال ماينفك الغطاء منه بسهوله – 2 سكويزات عصير لرشودي – 1 سكويز شورة خضار لرشودي ( الصورة ف الاسفل للسكويزات ) – دواء خافض حرارة – رضاعتين – علبة صغيره حافظة للمويه الحارة ابو 250مل تقريبا ( تكفيني لثلاث رضعات واذا خلصت اقدر اعبيها من الطياره او من أي كافيه ، طبعا على حسب حجم رضاعة طفلك ،، انا طفلي يرضع رضاعه ابو 120مل الصغيره ،، فاذا كان طفلك اكبر فاكيد هذا الحجم من حافظه المويه الحاره حتكفيه لرضعه واحده ،، المهم ماعلينا الفكره كلها انه هذه الحافظه ترى تثقل عليكي فاحرصي انه ماتكون كبيرة لانها وزن ع الشنطة ) – طبعا جهاز الانكر شاحن متنقل 20000 امبير يشحن الايفون 7 مرات ) [IMG]http://www.arabtrvl.com/up/uploads/a...0178145935.jpg[/IMG] هذي هيا الاسكويزات اروع واسهل شيء للاطفال ،، انا اسوي اكلهم فيها وافرزنها ف الفيرزر ،، وتقدروا تسووا الاكل فريش ويتناولها بسهوله طريقتها بالشفط يخرج الاكل بسرعه .. أسوي فيها عصيرات فريش كوكتيل - او شوربة خضار ... مفيدة جدا في السفر للاطفال لانه مايحتاج امسك ملعقة وصحن وااكل طفلي اثناء الطياره او السياره او حتى في جلوسي ف المطعم ،، لاحظت انه طفلي يخلصها في اقل من دقيقتين ، بعكس الوقت اللي استغرقه بالملعقه والصحن أقعد ربع ساعه اأكل فيه :yolks00470: غير المعركة اللي تصير بيني وبينه ويعدم ملابسه ويعدمني معاه .. الزبدة : ترا هذا الشيء مو جدا ضروري بس اللي حابة تجربها حتنبسط معاها ، ومو شرط للسفر تفيدك في اي مكان تخرجي فيه من البيت :58: وعربية وحدة صغيرة الحجم عند باب الطيارة ياخذوها مني ويحطوها عند الشنط بس قبل لازم لمن تشحني الشنط تخليهم يحطوا على عربية ولدك الاستيكر نفسه اللي يحطوه على الشنط .. [IMG]http://www.arabtrvl.com/up/uploads/a...0178144632.jpg[/IMG] هذا الاستيكر اللي ينحط على العربية اوك وكذا خلصت من كل شيء وحطيتكم في الصورة تمام ،، مستوعبين الكم الهائل من العفش ..!! الحين نجي لاهم الملاحظات : ( الاخطاء اللي وقعت فيها ) : 1- عدد الشنط المبالغ فيه ع الطائرة ... وهذا اكبر غلط وقعت فيه من وجهة نظري ، تخيلوا معايا كيف كنا انا وزوجي مع هذا العفش ،، لااا والادهى من هذا كله انه لمن ننزل من الطيارة ورانا مشاوير في المطار قبل ما نستلم عربيتنا وعفشنا ( اخر محطة في المطار عند الوصول لكوالا هي استلام الامتعه ) فلكم ان تتخيلوا المعاناه لمن نزلنا من الطائرة ، ولمن ركبنا القطار المتوجه للجوازات ، ولمن وقفنا طابور في تختيم الجوازات ، ولمن مشينا مشوار الين ما وصلنا لاستلام الامتعة ،، المطار هناك جدا كبير ماشاء الله تبارك الله ،، معاناة حقيقية جدا للاسف .. كانت بالتناوب بيني وبين ابو جاسم في حمل راشد ، هذا غير تعب جسومي وغيرته من اخوه ، بس يقول " ي بابا شيلني انا تعبان " المهم من هذا كله : ( إنه في رحلة العودة الى ارض الوطن : اتعلمت الدرس جيدا جدا جدا ، فخليت العدد من 5 شنط الى شنطتين فقط لاغير ولا ارضى النقاش في هذا الامر مع ابو جاسم ، شنطتين وبس وبس حتى شنط الطياره اللي يعطونا هيا مجانا ما ابغاها ما اخذتها سواء في رحلة الذهاب او العودة ) رحلة العودة : 3 شنط في الشحن 2 شنط معانا ع الطائرة : ( 1 شنطة كروس للاوراق المهمه – 1 شنطة لاغراض راشد ) فانتبهوا انتبهوا تقعوا في نفس الخطأ اللي وقعت فيه ..! حتى اذا كان ما عندكم اطفال شنطه كروس لكل شخص فقط للاغراض الشخصيه ، واذا مررا تبغوا اشياء تشيلوها معاكم خذوا الشنطة الصغيره اصغر حجم السبورت ابو كفرات ،، واذا ماعندكم هذه الشنطة خذوا شنطة ظهر وحدة افضل لشخص واحد فقط مو انتي وزوجك الاتنين تشيلو شنط ع الظهر – واحد فيكم بس ، عشان تكونوا خفيفين مرتاحين ،، حماس الفرحة هوا اللي خلاني من دون تفكير جيد اني اشيل عفش بيتنا معايا << ولسا حقولكم اش سويت بالعفش هذا كله ، جايتكم في الحكاوي :(58):.. 2- تنويه : اذا كان اطفالك كبار فحلو كل واحد يكون عنده شنطة على ظهره يحط اللي يحب فيها ،، اما انا جسومي صغير بس ينزل الشنطه من ظهره ويخلينا نشيلها له فحرام تعبته بالشنطة وتعبنا احنا كمان معاه .. 3- وفي حاجة كمان مخدة الرقبه جدا مهمه ، بس انا شفت انه مالها مكان بين هذا العفش اللي شايلته معايا فما اخذتها ،، اتمنيييتها وانا ف الطيارة ، لانه والله جدا جدا ضروريه ،، كنت اقول هما يعطوني مخده ومن هذا الكلام ، وهناك اتفاجأت انه المخده لاتسمن ولاتغني من جوع ،،، مررا صغيرونه ماتسوي شيء ههههههه الرقبه اتكسرت والعظام دخل في بعضه مع النومه المدري كيف جايه !!.. :yolks0050: المهم ترا في موقع يبيعوا مخدة الرقبة اللي تتنفخ بالهواء ومعاها طاقيه كمان عشان تغطي عينك من الضوء .. مررا اتمنيت اني اشتريتها :(141):بس ان شاء الله المرة الجاية ، بحيث لمن اخرج من الطياره افضي الهواء منها وادخلها في الشنطة ... فابحثوا عنها وهيا خيار جدا ممتاز عشان مايكون معاكم عفش .... 4- العربية والعربية صحيح انها ماقصرت ابدا معانا ،، الا اني من تجربة اتمنيييت اني اشتريت عربية yoyo اللي تتطبق وتصير بحجم جدا صغير ونقدر ندخلها معانا الطياره .. والله انها اختيار رائع وموفق وجميل ،، انا من الان ناويه اشتريها ان شاء الله صح انها غاليه شوي بس والله من التعب اللي شفناه ف السفر تستاهل كل قرش ،، وفي منها تقليد صيني كثير وارخص من الاصليه ( الاصلي دايم يعيش ويعمر معاك ) مايستاهل تدفع هذاك المبلغ في التقليد وتخرب وتنرمي بعد فتره بسيطة ... على فكرة انا لقيتها في ماليزيا ارخص من السعودية ب 200 ريال ،، وكنت خلاص حشتريها بس ما شوفتها الا في اخر الايام ... وقلت خلاص اشتريها من السعودية لانها اصلا كذا ولا كذا حتفيدنا حتى في مشاويرنا العادية .. يعني مثاليه في كل زمان ومكان .. مو شرط للسفر . الان تابعوا التقرير : في مطار الملك عبد العزيز بجدة وصلنا المطار في تمام الساعة 10 ليلا ، والاقلاع كان في الساعة 2 ص ،، مااهي الا نص ساعه الا ونحنا خلصنا تختيم وشحن شنط وقص بوردينق وتفتيش ،، المطار كان فاضي تقريبا ماشوفت زحمه ،، وجلسنا ننتظظر مرررا كثير ،، ( معليش ننتظر ولا اننا نتاخر ويسير زحمه ولا مشكله .. الحمد لله ) صعدنا الطائرة وقلبي صعد قبلي شعور ماينوصف مرررا شيء جميل ،، طبعا مانسيت الاذكار والتحصين ليا ولاولادي ولابوهم .. [IMG]http://www.arabtrvl.com/up/uploads/a...0178144281.jpg[/IMG] مرت الـ 9 ساعات كالبرق ما ادري كيف ،، تم تقديم وجبتين ع الطائرة : عشاء – فطور الاكل جدا لزيز ماشاء الله تبارك الله اما الاكل عند العودة الى جدة كان جدا ماله طعم ومو لزيز ابدا الله يكرم النعمه بس ... كل شيء كان جميل ف الطياره ماعندي أي ملاحظات سلبيه .. والاجمل كان موقعنا في الطائرة ، الان ساضع لكم صورة مقاعدنا ،، [IMG]http://www.arabtrvl.com/up/uploads/a...0179540381.png[/IMG] ليش عجبني هذا المكان ؟! 1- الاكل يخرج من المطبخ على طاولتنا احنا اول شيء ،، 2- سرير الطفل اللي ينام فيه راشد يوضع امامنا ،، 3- مساحه واسعه عند الاقدام بحيث انه رشودي وجسومي انبسطوا وجالسين ع الارض يلعبوا وماخذين راحتهم ، وجسومي ف الاخير فرشتله البطانيه ع الارض ونام عليها ومرتاح في النومه وماخذ راحته في الترفيس والشقلبه حقت النوم .. 4- ابو جاسم جالس في الطرف وجسومي في الوسط وانا عند الطاقه .. 5- اول ناس نخرج من الطياره .. [IMG]http://www.arabtrvl.com/up/uploads/a...0178145464.jpg[/IMG] هذا سرير الطفل ، طبعا السرير يكفي لطفل عمره سنه فقط .. لانه جدا صغير مايوسع لطفل ابو سنه ونص حتى ،، لانه راشد عمره بالضبط 11 شهر وعلى القد السرير .. [IMG]http://www.arabtrvl.com/up/uploads/a...8017954052.jpg[/IMG] على فكرة هذا المكان لا احد ياخذه الا اللي عنده اطفال ، لانه في هذا المكان فقط يقدروا يحطوا سرير الطفل فلا تكونوا انانين وتاخذوه لانه المقاعد بالحجز ، فخلوا هذا المكان للي معاهم اطفال ،، اذا انتوا بدون اطفال اقعدوا في أي مكان ف الطائرة براحتكم ي عرسان ، وكل ما بعدتم عن هذا المكان كان الهدوء لكم اكثر .... تنويه : اذا اطفالكم مرررا مزعجين وكثيرين البكاء ، احجزوا في المقاعد الخلفيه جدا اخر الطائرة ، لانه دايما ف اخر الطائرة مافي احد .. الكل يحرص يكون قدام ، وفي اخر الطائرة الحمام محد يستخدمه كثير والمطبخ قريب منك واذا فيه مصلى تقدري تروحي المصلى تسوي تمارين انتي وعيالك وتاخذوا راحتكم ... تم الوصول لمطار كوالا والتوجه للقطار ومن ثم تم شراء الشرايح من شركه سيليكوم ، كان عندهم عرض شريحه ب 45 رنجت فيها 4 قيقا نت و10 رنجت اتصال المهم احنا اشترينا شريحيتن ليا وحده ولابو جاسم وحده .. نحتاج النت لقوقل ماب اكثر شيء .. وضروري عشان اتواصل مع ابو جاسم ادا نزل البقاله ولا راح يجيب لنا عشاء وهكذا .. طبعا جزاكم الله خير ياللي قلتلوا لنا انه اهم شيء ندور عروض الانترنت وبالفعل افضل عرض للانترنت اخذناه .. وعلى فكره استخدامي كان فقط لقوقل ماب وراجعين لجده ولسا النت ما خلص .. اما الواتس واليوتيوب من واي فاي الفندق جدا جدا سريع النت في كل فنادقهم حتى مستشفياتهم في نت مفتوح . المهم : عند تختيم الجوازات طابووور جدا طويل ووقفنا ف الطابور ،، وافتكرت كلام هاي مزمز انه قال انهم يمشونا للبدايه بسبب اطفالنا بس ما كان فيه احد نكلمه اثناء وقوفنا ف الطابور ،، وكان اصعب شيء بالنسبه لنا في مطار كوالا ، لاني قلتلكم بدون عربيه ومعانا كم شنطة << خلاص لا تتخيلوا شكلناا يكفي بهدله ... :yolks0080: المهم خلصنا الطابور وتنفسنا الصعداء اول مادخلونا بعد تختيم الجوازات ،، تترسم الفرحه والوناسه عليكم على طول تحسوا انكم مدري ايش :yolks00310: ،، اممممم يعني حاجه تجننن شعور لايوصف ،، يجيكم احساس ودكم ترقصوا سامري :yolks00250: قدام الناس من الفرحه << ياربي ضعت وانا اعبر المهم ان شاء الله وصلكم الاحساس الجميل :yolks00660:.... ودايما قولوا الحمد لله و الشكر لله على كل شيء انتم في نعمه انكم سافرتوا وانكم تحسوا هذا الاحساس ،، في غيييركم كثيييير نفسهم ومنى عينهم يكونوا في المكان اللي انتوا فيه .... يارب لك الحمد حتى يبلغ الحمد منتهاه ،، ولاتنسوا ( ولئن شكرتم لا أزيدنكم ) ... وسامحوني ما صورت كثير في المطار ،، شايفين كيف حالتنا :20: الزبدة من يوم مطار كوالا : اولا : النزول من الطائرة . ثانيا : ركوب القطار للتوجه الى منطقه تختيم الجوازات . ثالثا : شراء شريحه جوال او تأجيل الشريحه لوقت اخر ، اذا تم تأجيل شراء الشريحه فتوجه مع الناس الى منطقة تختيم الجوازات .. وحتشتري الشرايح من كوالا ، لانك ماحتقدر ترجع لشرايح المطار لانك خلاص تم تختيم جوازك ودخلت كوالا .. رابعا : التوجه الى استلام الامتعة ( ستظهر لك شاشات دور على رقم رحلتك ويقولك وين تتوجه على أي سير للشنط . خامسا : التوجه للبوابه لركوب التاكسي والتوجه للفندق .. ( طبعا اللوحات الارشادية ماحتقصر فلا تشيل هم ولا تخاف ولا تحتاس وانت هناك ، الامور جدا سهلة وميسرة وبسيطه وحتى ما حتحتاج تسال احد عن أي مكان ، من كثر اللوحات الارشادية هناك ) اوك اللي حصل معانا بعد النزول من القطار انه الناس تجري جري تقولوا سباق مارثون ، المهم احنا سرنا نوخر للناس ونخليهم يجروا ، احنا اصلا مافي مجال نمشي بسررعه ،، يكفي اننا محملين فسرنا نمشي على مهلنا ، ووقفنا لشراء الشرايح ومنها استراحه من الحمل ،، وبعد ما شغلنا الشرايح ، توجهنا الى منطقه تختيم الجوازات واتفاجأنا بالطوابير الكثيرة ،، وامرنا لله وقفنا طابور لا بأس به ،، تعرفوا لو اتاخرنا كمان 5 دقايق كان من جد نمنا ف المطار ذاك اليوم هههههههه :(38):،،، والسبب كان انه واحنا واقفين الا فجأه يدخلوا علينا طلاااااب كثيييييير جدا جدا شكلهم في رحلة مدرسيه طلاب ثانوي كانهم ،، المهم عينكم ما تشوف الارض من كثرهم ماشاء الله وتعرفوا كيف لمن تكونوا مع اصدقاء لكم الوقت يمر وانتوا منتوا حاسين فيه ،، يحليلهم يسولفوا ومبسوطين والطابور يمشي على مهله وهما في عالم والزحمه ماتعني لهم أي شيء <<< واضح اني كنت أتأملهم من طول الانتظااار آآآآه :yolks00440:، الحممد لله بس انتهى ذلك اليوم على خير .... طبعا بعد ما استلمنا الأمتعة ،، :e11e: توجهنا للبوابات الخروج ، وعند الخروج تقابلكم كشكات تكاسي وجولات وكل شيء ،، قلت لابو جاسم شوف بس المكتب هذا بكم التكسي للفندق ؟؟ حب استطلاع فقط :sly: قال ب 160 رنجت من المطار الى الفندق في سيلانجور ( الفندق حقنا البوتيكي 33 ، بجوار صنواي لاجون جدا قريب ) ،، المهم طبعاا انفجعت من السعر :yolks00420:وقلت لا طبعا الله يخلي اوبر وجراب ،، طبعا ردي كان بناء على خلفية سابقه من تجاربكم ي الأعضاء الرآئعييين ،، وفعلا طلبنا جراب الارخص طلع لنا ، ب 75 رنجت وتوكلنا على الله اثناء انتظارنا للتاكسي ،، تعرفوا مين جاء لنا يكلمنا !!!! اكيد عرفتوهم ي اصحاب الخبرة .. :yolks00520: الرجال اللي يجوا يبغوا يصيدوكم في جولات ومدري ايش :yolks00490:.. طبعا كنا مستعدين لهم استعداد تام .. ومحصنين نفسنا منهم ومنتبهين لكل شيء .. :(33): المهم ابو جاسم قال للرجال شكرا شكرا مانبغا وكمل مشي اصلا ماوقفنالهم حتى .. نبغا نتخارج ونخرج تعبانين ع الاخر ،، احنا واقفين نستنى التكسي الا رجع لنا يقول لنا " يو ار سبيك ارابيك ، تعال شوف هذا اش مشكلته ، تعال تعال " من جد حاجة زي النشبة ما رد عليه ابو جاسم وعلى طول خرجنا برا عند المواقف نستنى التاكسي ونشرد منهم . تنويه مهم : الحذر والحذر من أي شخص يحاول المساعدة ،، عيش في ماليزيا نفسك واهلك وبس ،، لا تنغر للضحكات والابتسامات ،، اوك صح انهم شعب بشوش وخلوق بس كن حذر حذر لنفسك واهلك واطفالك ،، في نهاية الامر انت في بلد غريب .. ( ساذكر لكم موقف حصل معانا لاحقا ) ويارب لك الحمد واخيرا ركبنا السيارة بعد تعب وتعب وتعب طويل << تعب طيارة وتعب مشي وتعب حمل وتعب طوابير << فعشان كذا لازم تكونوا خفيفين سواء معاكم اطفال او من دون .. [IMG]http://www.arabtrvl.com/up/uploads/a...0179541464.jpg[/IMG] الطريق من المطار الى الفندق جميل جمال سبحان الله ، منظر الاشجال فتنة سبحان الله استمتعت بالمناظر جدا وانا ف قمة التعب [IMG]http://www.arabtrvl.com/up/uploads/a...0180035852.jpg[/IMG] وصلنا الفندق بالسلامة :yolks00580: https://s-ec.bstatic.com/images/hote...0/71049799.jpg https://t-ec.bstatic.com/images/hote...0/66094889.jpg الصورة من النت الجزء القادم حيكون عن : - 5 ايام في سلانجور و الاماكن التي تمت زياراتها... - فندق البوتيكي 33 مميزاته وعيوبه - المستشفى ورشودي - المطاعم - استئجار السيارة - اهم مقتنيات المطبخ المفيدة ف السفر - موقف التبرع الخيري لأطفال ماليزيا ؟! - شنطة المطبخ |
بداية موفقة ورائعة أم جسومي متااابع وياااك شكرا لك بحجم السماء أرسلت من SM-G900F بإستخدام تاباتلك |
اهلين ام جسوم صراحه عدد الشنط كثيره جدا في الطياره واتخيلت وضعكم نحن كنا خمسه بالغين بس اكتفينا نحن النساء بشنط الكتف و ولد عمتي شنطه ظهر و الوالد شال شنطه فيها ضرورياتنا وسناك شنطه الكروس ومخدات الرقبه جدا مهمه وكانت من مقتنياتنا انا صادفت ٣ او ٤ اشخاص وكلهم في الاسواق يدوني ورقه لتبرع للاطفال بس كان شكلهم مريب وما اديتهم وجه هل صارلك موقف معاهم وضح وضعهم ؟ ننتظر التكمله |
اقتباس:
هلا فيكي ي عسل مافي مجال للمقارنه بيني وبينكم انا لو كنت مكانكم كان سويت نفس الشيء بس الاطفااااال ف السفر واحتياجاتهم ،، لو انتي مكاني كأم ، حتعرفي ليش سويت كذا من قلقي وخوفي انه ينقص شيء على اولادي ،، جسومي ماشاء الله عليه حركي جدا فكنت افكر في امرين الاول : شنطه خاصه له اعلمه الخصوصيه وانها هذي اشياءك الخاصه الثاني : عشان اشغل وقته ف الطياره ( اشتريت له لعبتين وكتاب قصص ودفتر تلوين ) اما شنطة راشد فهدا طفل خايفه انه يصير موقف في المطار او تتاجل الرحله او يصير موقف طاريء ماتدري الظروف فكنت ماخذه احتياطي اكثر شي لراشد لانه ف النهايه طفل مايتحمل زينا احنا الكبار .. هذا بخصوص شنط الاطفال اما بخصوص شنطنا فاخذنا الحماس الشديد ولم نتدارك الامر الا في ارض مطار كوالا وانا كاتبه انها اول سفره ليا للخارج طبيعي وقعت في هذا التخطيط السيء بخصوص الشنط الزياده واللي ماهي ضروريه جدا وساتطرق لموضوع التبرع الخيري ان شاء الله شاكره لك مرورك :e110: |
ام جسوووومي ..... شو هالاحاسيس اللي عيشتينا فيها ... وصف دقيق و رهيييييييب ... و الله حاسه كانك توصفين الرحله لاختك - صديقتك حرصك على ذكر أدق التفاصيل رهييييييب الحمدلله كنتِ مستعده زين للرحله و الحمدلله اعطيتينا من وقتك و مشاعرك و وصفك الجميل شااااااااااكرين عزيزتي و متابعين :) |
بداية موفقة ورائعة :e306: |
وعليكم السلام ورحمة الله وبركاااااااااااته الحمدلله ع السلامة ونجاااااااااااااااح الرحـــــله ماشاء الله واضح انك دارسه ومحضره كويس للسفرررررر الله يعين من جد الاطفال متعبين في السفر تبارك الرحمن التقرير مميز ومعلومات جمليه بإنتظار التكمله ع احر من جمر مع ام جسومي مش حتقدر تغمض عينيك |
الف الحمد لله على الســــــــــــلامه ما شاء الله عليك تفاصيل مهمه ودقيقه جداً وكأني طالع معاكم في الطياره سالفه الشنط والله مشكله واعاني منها في المطارات والتسحيب ههههههه الله يعين اختيارك للمقاعد بالطائره ممتاز جداً تجهيزكـ للسفر قبله بـ 5 اشهر والقرأه هو من اهم النقاط لنجاح الرحله لآن بعضهم يجي ويكتب احيانا في الأستفسارات قبل السفر بكم يوم وساعدوني ويصيح ههههههههههه متابع معكـ هذه التفاصيل المهمه بالنسبة للمستشفى بالنسبة لي ما فيه احد راح ماليزيا و ما مر عليهم بالنسبة للأطفال الواحد يحاول قدر المستطاع انه يتركهم اذا فيه احد يهتم فيهم لأنهم متعبين جداً اما اذا كان عمره فوق ال 6 سنوات هذا تقدر تتعامل معاه |
الله يعينكم المسافر بروحه يتعب بالتنقل بين المطارات والطوابير وغيرها الله كان بعونك مع العيال ربي يحفظهم الشنط لازم توفرين كل شي لراحة الاطفال زين سويتي بس لو ماخذين وحده سحب لجسوم ورشود اخف لكم احسنتي باختيار الكراسي في الطيارة والمفروض هم يعطونكم هالمكان عند قص البوردينغ اذكر بنتي اول ما تطير الطياره تنسد اذنها وتنام كانت مريحتني ههههه وكنتي شاطره في اختيار تاكسي اوبر يعطيج العافيه ومتابعين معاج للآخر |
بداية تقرير مميز جدا واذا كان هذا مستوى اول تقرير لاول رحلة فنحن امام كاتبة تقارير من الطراز الاول ميزانية الرحلة ممتازة جدا ونبا نعرف كيف سواها ابوجاسم اختيار مقعد الطيارة فى الصف الاول للى معاه طفل رضيع مهم جدا متابعين معك يا ام جاسم وفى انتظار باقى التقرير |
وصف جميل ودقيق فعلا زي ماقالوا الاعضاء اذا كان ذا تقرير اول رحلة فنحن امام كاتبه تقارير من الطراز الاول سيتم شراء المخدة شكرا للتنبيه ننتظر باقي الاجزاء للاستفادة |
الف الحمد لله على سلامتكم ما شاء الله عليك شااااااااااطرة ودراسة زين عدل مدل عاشوا عاشوا عاشوااااااااااااااااااااااااااااااااااااا مع التصفيق الحار تبارك الرحمن اول تقرير وعشنا معك الجو على الآخر فنانة ومبدعة اعتقد تقريرك بيكون قنبلة الموسم الله يحفظ لك عيالك ويعينك أعمارهم صغيرة ومع السفر العناية بتكون اكبر كلماتك تفاصيلك كلها اتونس وتخلي الواحد غصب يتابعك تحياتي لك والف مبروك نجاح الرحلة وراجعة بعد عندك فلوس انت ممتازة وقيادتك للرحلة عجيبة سفرتي الأخيره بأغسطس الماضي كانت رائعة ومثلك رجعت بفلوس بشنطتي ولما صرفتهم صاروا 100 دينار كويتي شريت فيهم اغرض البيت والجمعية تحياتي لك حبيتي ولاتطولين علينا بالصور والتفاصيل |
خووووش تقرير وخووووش تفاصيل شكلنا موعودين بتقرير صاروخي ماشاء الله والله تعبتي روحج مع هالعدد من الشنط بس أنا مقدرة كونج أم تخافين ينقص شي على اليهال يلا الحياة تجارب لو مامرينا فيها مابنقدر نتعلم ونتحاشاها مستقبلاً بس أهم شي الرحلة تكون ناجحة التفاصيل أعشقهاااااا كثري منها ولج مني دعاء في ظهر الغيب من أخت لأختها هذي البداية وجذي حمستيني لماليزيا وشوقتيني لها أكثر وأكثر يعني مابيخلص التقرير إلا وأنا أركض ورا الطيارة :1: |
ماشاااء الله تفاصيل دقيقة ومفييدة جداً .. في الانتظار ، رحلتنا بعد شهرين تقريباً وتقريركم عجييييييب :e306: يعطيكم العافية |
اقتباس:
باذن الله تستفيدون من هذا التقرير المفصل .. |
اقتباس:
شكرا لك على الاطراء ،، وان شاء الله اكون عند حسن الظن باذن الله :e305: اقتباس:
جزاكم الله كل خير على الكلمات الجميلة اللي كتبتوها سعيدة اني افدتك ،، :e305::e305: اقتباس:
فديييييييييتش ،، على رااسي والله أخجلتيييني بكلماتك ،، ان شاء الله اكون عند حسن الظن :18: اقتباس:
يسعدلي قلبك ي رب :1::1::1::1::1:اقتباس:
واياك ي رب :18: وماحقصر ان شاء الله :e305: |
اقتباس:
:24::24::24: شكرررا جزيييييلا :e306::e306: |
اقتباس:
ربي يسلمك من كل مكروه ،، شكررااا من القلب على مرورك الجميل ،، استمتع معي بالرحله أجل :7: |
اقتباس:
امين حبيبتي ويحفظ لك كل غالي عليك ،، تصدقي فاتتني ،، تنقهري انك مخططه لكل شيء وفجأه تتفاجيء انه راح عن بالك شيء مرا بسيط زي كذاا يلا ان شاء الله المرات الجاية .... سلمتي على مرورك :e305::e305: |
جزء سيلانجور وقبل ما اكمل الجزء الجديد فيه نقطتين نسيتها في جزء ( يوم السفر ) وهي : - بخصوص الشنط : أفتكرت اني ما ذكرت وزن الشنط عند الشحن ، الحمد لله في رحلة الذهاب ماواجهنا صعوبة ابدا في وزن الشنط .. مع انه الشنطة الكبيرة كانت 24 ك بس محد كلمنا ،، وفي رحلة العودة كنا مرا خايفين من وزن الشنط ، لانها من جد كانت ثقيله ، والحمدلله عدت على خير .. - بخصوص الاطفال والضغط مع الطيارة : زي اطفالي كذا مرا صغار ففي حركه حلووا تسووها عشان مايحسوا بالضغط الشديد اثناء الاقلاع ،، وهيا انك تجوعي اطفالك قبل الرحله بوقت بحيث انهم اول مايصعدوا الطيارة يكونوا جيعانين ، وأول ماتبدأ ترفع الطيارة عجلاتها من الارض ، هنا تقومي بحركتك السريعه بإعطائهم الوجبات حقهم ، زي راشد طفلي على طوول اعطيته رضعته ، لانه مع الاكل يخف الضغط على اذنهم .. - وترى هذه الحركه كثير اعتمدتها في السفر ،، حتى كمان لمن كنا في المصعد بنطلع لأعلى قمة المنارة في كوالا ، نحس بضغط في الاذن لان المصعد يصعد بسرعه كبيره ، فهنا كمان اعطيته الرضعه بسرعه ، فحبيبي مايحس بألم الحمدلله .. والان نبـــدأ بسم الله ....... ( سيلانجور ) وصلنا الفندق بالسلامة ، واستلمنا الغرفة وحطينا عفشنا ،، وفي اثناء ذلك ، أفتكرنا اننا ميتين جوووع ، فايش نسوي الحين !! فينزل ابو جاسم يستكشف المنطقة وبما انه البيراميد مول قريب جدا ، فراح واشترى لنا ماكدونالدز .. << وهذي هيا لسعة الجوع اللي تجبرك تاكلي أي شيء اهم شيء انه اكل ... ومن هذيك اللحظة ارمق ابو جاسم هذيك الرمقة اللي معناها " قال ريجيم واكل صحي قال " :yolks00350: المهم الحين اجيكم بالمفيد والمهم : اسم الفندق : فندق البوتيكي 33 ( الفندق نجمة واحدة ) http://www.arabtrvl.com/up/uploads/a...1932564527.jpg http://www.arabtrvl.com/up/uploads/a...1932564382.jpg الاستقبال http://www.arabtrvl.com/up/uploads/a...8193256443.jpg http://www.arabtrvl.com/up/uploads/a...1932564434.jpg الموقع الرسمي للفندق : About Hotel | 33 Boutique Hotel - Bandar Sunway رابط الفندق في بوكينق : https://www.booking.com/hotel/my/33-...0cbb851c07c83e السعر : 5 ليال بـ 800 رنجت شامل الضريبه نوع الغرفة : ديلوكس كينغ ، مساحة الغرفة 17 متر مربع . ( اكبر حجم غرفه لديهم .) موقعه : في سيلانجور في منطقة بندر صنواي ، بجوار مول البيراميد وصنواي لاجون ، يبعد خمس دقايق مشي ع الاقدام .. سبب اختياري له : نظيف جدا ، رخيص جدا ، الفندق جديد ملاحظاتي وتقيمي : 1- اهم شيء لفت انتباهي في هذا الفندق النظآآآفة ثم النظافة المكان يلقلق ( صاحب الفندق جدا مهتم في نظافته ، هذا ما عرفناه من حوار ابو جاسم مع احد الموظفين ف الفندق ) 2- افضل واريح سرير نمت عليه في سفرتي كلها في ماليزياا جدا مريح السرير والمخدات كمان ، والسرير جدا كبير .. 3- طبعا سعره رخيص تقريبا الليله ب 125 رنجت 4- ينفع لعائلة صغيرة . 5- مساحة الغرف تبدأ من 7 متر مربع الى 17 متر مربع . 6- طلبنا تنظيف الغرف ، لم يحضروا للتنظيف ، ولكن كل يوم يمروا علينا يغيروا القمامه ( اكرمكم الله ) ويعطونا اثنين قارورة ماء جديدة . ومناشف نظيفة . 7- السكن في هذا الفندق ممل قليلا ، لانه اللي يسكنه يستفيد منه فقط للنوم ولاشيء اخر .. 8- لايوجد به مطعم او كافيه ولا شيء .. 9- لكن افضل مافيه الهدوء وقربه من مول البيراميد والصنواي لاجون ، كل يوم نروح المول مشي قريب جدا جدا 10- يوجد بجواره ( بقاله 99 – بقالة 7 الفن – كنتاكي – دومنيوز بيتزا – شرطة السياحة ) 11- المنطقة جدا آمنة . 12- تعرفت على الفندق من بحثي المتواصل في بوكينغ ومن خلال صور الفندق واراء الناس اللي سكنوا فيه من تقيماتهم للفندق من بوكينغ .. 13- اخر ملاحظة : الحرمة في الرسبيشن قالت لنا انه لو دخلتوا موقع الفندق حتلاقوا الاسعار ارخص من بوكينغ .. << انا وقتهاا قلت لاااا ي ريتني فكرت فيها ، بس يلا المرات الجاية ان شااء الله ( فانتوا خلال بحثكم عن أي فندق ، ابحثوا عن افضل الفنادق في بوكينغ وشوفو الصور والتقيمات للفندق الذي أعجبكم ، ثم ابحثوا عن موقع الفندق في قوقل وقارنوا الاسعار ) لانه بوكينغ الصراحة جميل وسهل الاستخدام وحتستفيدوا منه في البحث عن الفندق الأعلى تقييما .. واخر شيء اقوله : انه لو حجزت 5 ايام في صنواي لاجون حيطلع السعر معايا قرابة 2000 رنجت .. تووفييييير ي معلم ، بس والله توفير في شيء نظيف ويستاهل ،، والحمد لله اتوفقنا في هذا الفندق .. صور الغرفه http://www.arabtrvl.com/up/uploads/a...1932564465.jpg الحمام اكرمكم الله http://www.arabtrvl.com/up/uploads/a...1932564496.jpg اطلالة الغرفه ( واضح قرب الصنواي من الفندق ) http://www.arabtrvl.com/up/uploads/a...1931603316.jpg التقيم : النظافة : 5/5 السرير المريح : 5/5 خدمة الغرف : 3/5 ( تقيم جيد لفندق ابو نجمه واحدة ) قربه من كل شيء : 5/5 ( حتى قريب من افضل مستشفى " مستشفى صنواي " الكبيرة والفخمه ) تقيم الفندق في بوكينغ : 8.3 / 10 انتهينا من الفندق الان ننتقل الى ( رشودي والمستشفى ) ذهابي للمستشفى مرتين كانت بسيطه الحمدلله : المرة الاولى : لعمل إشاعة لراس راشد لانه قبل يوم السفر في جدة اخذ له طيحة محترمه من فوق السرير ، الكدمة منتفخه ولمن اضغط عليها كأنها ورم بسم الله ، كانها معبية مويه ، يعني تعرفوا كيف دايما الفقشات حقت الراس تجيكم الوان الطيف تتلون ولمن تمسكوها تعور على طول ، بس اللي في رشودي ما تعوره ومنفوخه مويه .. وياربي قلقت قلق مو طبيعي ،، لاني ظنيت على طول انه جمجمته اتضررت لاني ماني قادرة المس الجمجمه لمن اضغط ع المكان المصاب . والى ثاني يوم ف السفر وانا الاحظها كل مالها تكبر بشكل مفجع ويخوف ، بس خلااااص انا ماني مرتاحه ،، يلا ي ابو جاسم ع المستشقى على طول ابغى اسويله اشاعه اطمن .. طبعا هنا اود اني اوجه الشكر الجزيييل للعضو ( ماجد الفهد ) حيث انني كنت اتابع سنابه وولده ارتفعت حرارته ووداه لهذه المستشفى ومدح فيها .. والحممد لله على سلامة ولده .. واسم المستشفى ( مستشفى صنواي ) وتصادف انها قريبه جدا جدا من الفندق تقريبا 3 دقايق بالتاكسي . http://www.arabtrvl.com/up/uploads/a...1931603021.jpg ونروح المستشفى اللي ماشاء الله كأنها فندق ، المهم ع الطواريء على طول عند الرسبشن يستقبلونا الممرضات عشان ياخذوا وزن وحرارة الطفل واش عنده ، وبعدها يعطونا رقم وننتظر احنا انتظرنا قليل لانه مافي زحمه ابدا ، ودخلنا ع الدكتور وسوا لنا اشاعه ، والحمد لله اتطمنا على راشد ،، جمجمته سليمة ، و طلع انه دم متمجع وحياخذ من اسبوع الى اسبوعين لين مايختفي . الحممممد لله تعرفوا يعني ايش هم كبير زي الجبل انزاح من قلبي ،،، المستشفى : تعتبر غالية جدا بالنسبة لأهل ماليزيا << على كلام الموظف اللي في الفندق .. المبلغ اللي تم دفعة : قبل ما يكشف الدكتور تدفعوا 300 رنجت ، وبعد ما تخلصوا ، يكتبوا تقرير عن المبالغ والمستحقات ويخصموا من الـ 300 رنجت اللي دفعناها مقدما ، حق العلاج والكشفيه وكل شيء ، وانتوا خارجين يرجعوا لك الباقي ،، يعني احنا كنا خايفين انه الاشاعة مرا غاليه تطلع ، بس الحمد لله الحساب كله 150 رنجت .. اما المرة الثانية اللي رحنا فيها المستشفى : تقريبا في اليوم الرابع ، كان بسبب ارتفاع الحراره الشديده لراشد برضو .. وصلت حرارته 39 ونفس الخطوات سويناها تاني واخذوا 300 رنجت ودخلنا .. طبعا اش سوو لنا في الطوارئ . دخلونا على سرير وجابت الممرضة طشت او كروانه فيها موية ، ومنشفة وروشت راشد وخلت جسمه يتهوى ، واعطتوا تحميلة ، ولحظات الا والحررارة تنزل .. والدكتور قال عنده التهاب حلق .. وقال تبغونا نرقده عشان نطمن اكثر .. ( طبعا ترقيد ايش مايستاهل ، طبعا رفض ابو جاسم .. ) واحنا خارجين جالسا اقول لابو جاسم عجيتني المنشفة الكمادة عادي يعطونا هيا عشان لو سخن تاني بسويلوا بيها ،، الا وتجي الممرضه وتعطينا المنشفة من حالها وتعطينا الكروانه كمان ، وانا وابو جاسم نطالع في بعض من جدها هذي ، ويا حليلها وربي يسعدها <<< فرحنا على بالنا كرم وواخلاق عاليه وكذا .. المهم من هذا كله الحساب طلع في الفاتورة 150 رنجت ولمن نقرا الفاتورة : مسجلين حتى سعر الكروانه والمنشفة الكمادة اللي عجبتني وحتى فرش السرير اللي اتعدم بالمويه حاطين حسابه .. << طلعت الشغله لا هي كرم ولا اخلاق مافي شيء ببلاش هههههه اجل لو رقدناه عندهم كم حياخذوا مننا .. الخلاصه : مستشفى مررا كويسه تعامل واخلاق ونظافة ومافي زحممه كثيرة فيها .. شيء نظيف ومرتب .. واي فاي مجاانا ف المستشفى http://www.arabtrvl.com/up/uploads/a...8193160312.jpg ( استئجار السيارة ) في البداية انا كنت ابغى احجز واطلب السيارة من النت عن طريق موقع وضعه في المنتدى أحد الاعضاء الفضلاء اللي جرب الاستئجار من هذا الموقع .. وبحيث انه السيارة نستلمها من المطار ونسلمها في المطار << هذي هيا كانت خطتي .. وكان السعر في الموقع 1400 رنجت لمدة 15 يوم ، سيارة نوع برودوا الماليزية الحجم الصغير ( اربع ابواب ) . << سعر جدا رائع مع التأمين .. بس ابو جاسم فضل انه يتعامل مع احد الاصدقاء له من الطلاب في ماليزيا ، وفعلا تم استلام السيارة منهم وكان الايجار على كل يوم 100 رنجت .. ومدة استئجارنا لها 13 يوم .. اول ثلاث ايام كانت عصيبه جدا بالنسبة لنا ماحبيت التكاسي والبهدله ، نستنى التاكسي مع الاولاد ف الشارع وكدا << مع اوبر وجراب كنا نطلب .. بس الحمد لله لمن وصلت سيارتنا ، لحد يكلمنا نروح ونجي نوقف وقت مانبغا و نلفلف ماليزيا بكيفنا نقعد في أي مكان بالوقت اللي نحب .. << عن جد تجربة جميله ومريحه انصح الكل انه يستأجر له سيارة بالذات مع الاطفال .. ( تعرفوا بالذات في الخط الى بينانغ جسومي ينام ويصحى وينام ويصحى ورشودي زيه ، ونوقف حمامات في نص الخط ونوقف بقاله ونشتري واذا جوعنا نوقف ناكل ونكمل خطنا ) يعني حاجه في منتهى الراحة والامان .... صورة السيارة http://www.arabtrvl.com/up/uploads/a...1931603143.jpg من الداخل http://www.arabtrvl.com/up/uploads/a...1935326391.jpg اهم الملاحظات : - ابو جاسم كان متخوف شوي من السواقه بالعكس ، بس سرعان ما اتأقلم ع الوضع وقال انه الموضوع جدا سهل .. ( شوية ثقة واتوكل على الله ، ولا تخاف ياللي نفسك تستأجر سيارة .. والله انها متعة وراحة ) - المواقف ، في البدايه شويه حسينا انه لازم ندور موقف للسيارة لمن نبغا ننزل مكان ،، بس مع مرور الايام اكتشفنا انه في كل مكان عندهم باركينغ .. - وطبعا هناك في ماليزيا ماعندهم أي شيء ببلاش ، حتى المواقف بفلوس . بس الاسعار جدا زهيده . - في سيلانجور : اكثر شيء فادتنا االسيارة لانه في اماكن كثيرة بعيدة عن الفندق . زي الاي ستي ومسجد بوتراجيا وحديقة الحيوانات . - اما في احترام الانظمة ، فاطمن هناك الشعب جدا جدا محترم لانظمة المرور ،، حتى لو وقفت في نص الخط مستعدين يستنوك لين ماتمشي ولا يدقوا بوري ولا شيء ... ماشوفت برودة دم واعصاب زيهم .. - << ترى والله اعلم اتوقع انه هدوء اعصابهم وبرودة دمهم من الجنة اللي هما عايشين فيها تنعكس على نفسياتهم ،، في كل مكان تشوفوا خضار وخضار منعش كمان ، مو زي شجرنا لونه اخضر باهت ناشف تحسوا الشجره عندنا اتحنطت من النشفان ... بس تلعب علينا انها شجره وكذا :yolks00730: - في بينانغ : إحنا الحمد لله متعودين نمسك خطوط ماشاء الله ، فماكان هناك أي مشاكل وبالعكس كنا نمشي وسط جنة من جنان الله في الارض ... مدة الطريق : 4 ساعات تقريبا من كوالا الى بينانغ واكثر مايزيد الخط الطويل متعة ، هي الامطاار الجميلة << طبعا قلة ولف هنا ف السعودية ماعندنا امطار فكل ما تمطر هناك كأني اول مرة اشوف مطر ، الله يهنيهم ي رب :(60): - وفي وسط بينانغ : استفدنا منها اكثر شيء برضو ، خاصة لمن انقفل الطريق المؤدي الى حديقة الفواكه والطيور والفراشات وكل شيء في بينانغ في هذيك المنطقة بسبب انه شجرة كبيرة طاحت وانعدم الشارع ،، فاضطرينا نمسك الخط الخلفي من الجهة الأخرى لبينانغ ومدتة ساعة ونص تقريبا .. ( الصراحة والله مجانين اننا مسكنا هذاك الخط ،جدا صعب ووسط الجبال نطلع والطريق ضيق جدا ومن كثر الخوف كنا بنرجع للفندق بس وقتها خلاص قدنا قطعنا مشوار مرا طويل .. ) والله حفظنا وسلمنا وزرنا الحدايق ورجعنا على خير .. << والان ننظر للموضوع انها كانت مغامرة جريئة لنا .. :yolks00660: ( الحمدلله اننا مسكنا الخط للحدايق الساعه 10 ص ، وهذا فادنا في وقت العودة للفندق ، بحيث اننا زرنا كل شيء ورجعنا قبل ماتغيب الشمس ... ) - اما في كوالا : ما استفدنا مرا كثير منها طول الوقت وهيا واقفه في الموقف بس اللهم كانت السيارة تقربنا للاماكن اللي نبغاها ونوقفها باركينغ وكل اليوم يروح ف المولات . - البنزين كان تمام مايصرف كثير . على قولة ابو جاسم - مدري اذا كانت هذه المعلومة مفيدة : انه صاحب السيارة اعطانا الكرت حق التاكس الضرايب حق الطريق ، واحنا شحناها وفي كل نقطة تاكس تاخذ مننا رنجت او رنجتين ونص ،، - اما في الخروج من كوالا الى بينانغ تاخذ 40 او 54 رنجت وكذلك في الدخول نسيت كم المبلغ للدخول حول ال40 او 30 ، و عادي اذا خلصت البطاقة اثناء خروجك من كوالا او نسيت تشحنها في موظفين هناك تقدر تدفعلهم كاش . << احنا نقص علينا رينجت واحد فدفعناه كاش . ... << طبعا هذا في حال خروجك ودخولك للمدن .. - ترى لو تحسبوا كل مشاويركم بالتكسي مع الانتقال بالطيارة او الفيري في مخطط رحلتنا حتلاقوا اننا وفرنا على نفسنا كثير بالسيارة .. - وكل واحد فيكم ادرى بمخطط رحلته ، فانت تعرف متى اكثر شيء تحتاج السيارة ،، وموشرط كل ايام الرحلة تستاجرها زيننا ، انت ادرى ..!! - يعني في بعض الناس لازم لازم يحتاجوا يركبوا طيارة او يبغوا يجربوا الفيري السفينه .. ( الاماكن المخطط زيارتها ) لم تتم زيارتها : ( لا استطيع افادتكم في هذه الاماكن لعدم تمكنا من الذهاب اليها ) منتزه الماينز وندرلاند ملاهي ديسا ووتر بارك كيدزانيا الاطفال تمت الزيارة بنجاح : ( وساتحدث عن كل مكان بالتفصيل في الاسفل ) حديقة الحيوانات زوو نيقارا المدينة المضيئة ( I city ) مسجد بتروجايا المدينة المائية ( صنواي لاجون ) 1- حديقة الحيوانات زوو نيقارا : طبعا رحنالها تقريبا في ثاني يوم ، لسا ما وصلتنا سيارتنا .. فأخذنا تاكسي اوبر ، من سيلانجور الى زوو نيقارا ، تقريبا 45 دقيقه ،، المهم واحنا في الطريق كان الجو بدأ يغيم وتتجمع الغيوم ، http://www.arabtrvl.com/up/uploads/a...1932150194.jpg ما ان وصلنا الحديقة الا ومطره شديده ماشاء الله ،، واصابني القليل من خيبة الامل ، خفت انهم مايدخلونا مع المطرة .. لا واحنا قاطعين مشوار .. المشكلة ما اشترينا مظلات ، بس الاولاد انا من جده اشتيرلتهم جاكيتات المطر . وماخذتها معايا ... الزبدة ،، داخلين يعني داخلين ماني راجعه الفندق بستنى المطر يخلص .. وهذي جلسة ... :yolks00600: المهم نروح عند التذاكر ونقولهم بندخل وكذا يقولوا ما حتشوفوا شيء ، قلنا عادي بندخل .. ودخلونا الحمد لله دفعنا انا وابو جاسم 200 رنجت تقريبا وجاسم مجانا 3 سنين .. وراشد مجانا في كل الحدايق .لانه رضيع .. طبعا اسعار دخول الماليزين ارخص الى النصف مننا .. http://www.arabtrvl.com/up/uploads/a...1932907124.jpg واشترينا مظلات من عند بوابة الدخول .. المظلة ب 44 رنجت مرا كثير .. فلاتنسوا المظلات تشتروها من بدري .. اول ماتدخلوا الحديقه بعد ماتشتروا التذاكر حتلاقوا كشكات زي كذا http://www.arabtrvl.com/up/uploads/a...1935097021.jpg وحبذا لو اشتريتوا المظلات اللي تدخل الشنطة تتقفل تصير مرا صغيرة .. نصيحه مهمه ترا عشان لا تتعبوا في شيل المظلة الطويلة مرا مقرفه لمن تشيلها .. طفشتنا صراحة .. وكل ما نبغا نرميها نفتكر ال40 رنجت كثيره عليها .. علما انه انا لقيت ب 19 رنجت مظله تتطبق وتدخل ف الشنطة .. اوك لمن تدخلوا الحديقة ،، في عندهم سيارات مكشوفه مغطية السقف ... فهذه السيارات تقربك الين بداية الحديقة .. ترى مررررا مفيده وحلوا احسن من انكم تمشوا مشوار مرا طويل لين ماتوصلوا عند بداية الحديقة .. << لانه اصلا ورااااااكم مشي مو بس طويل الا ال ال ال طويل .. << الحديقة جدا كبييييرة .. اوك تدفعوا كمان 10 رنجت تذكرة ذهاب وعوده لهذه السيارات ، بحيث توصلكم لين بداية الحديقة ، وتوقف عند اقفاص الاسد والنمر .. واذا خلصتوا لفلفه في الحديقة ترجعوا عندهم ويرجعوكم لبوابة الدخول .. .. هذي صورة السيارات داخل الحديقة http://www.arabtrvl.com/up/uploads/a...1933439662.jpg طبعا بين الحيوانات المفترسة وبينكم مجرى مائي كبير وحاجز كهربائي .. حترككم مع الصور .. http://www.arabtrvl.com/up/uploads/a...1932150021.jpg http://www.arabtrvl.com/up/uploads/a...1932150123.jpg من داخل الحديقةوالاجواء ممطره http://www.arabtrvl.com/up/uploads/a...1932150315.jpg http://www.arabtrvl.com/up/uploads/a...1932564351.jpg http://www.arabtrvl.com/up/uploads/a...1932150346.jpg http://www.arabtrvl.com/up/uploads/a...8193215048.jpg اول شيء حتشوفوا الزرافات http://www.arabtrvl.com/up/uploads/a...1932150082.jpg النمر http://www.arabtrvl.com/up/uploads/a...1932150377.jpg جواميس http://www.arabtrvl.com/up/uploads/a...9321504610.jpg http://www.arabtrvl.com/up/uploads/a...1932150439.jpg الفيل http://www.arabtrvl.com/up/uploads/a...1932564579.jpg http://www.arabtrvl.com/up/uploads/a...9325647210.jpg ممرات الحديقة http://www.arabtrvl.com/up/uploads/a...1932907041.jpg النمر الابيض الجميل http://www.arabtrvl.com/up/uploads/a...1932907072.jpg http://www.arabtrvl.com/up/uploads/a...1932907347.png http://www.arabtrvl.com/up/uploads/a...8193290713.jpg فلامينقو http://www.arabtrvl.com/up/uploads/a...1932907265.jpg صورة عائليه تحت المطر والاجواء خورافيه والجمال الرباني يأسر القلب :e204: http://www.arabtrvl.com/up/uploads/a...1935691221.jpg الا الباندا لم ندخلها ماله داعي يكفي ماشوفناه من حيوانات .. اكثر ما شد انتباهي من الحيوانات : الفيل والاسد والنمر الابيض والزرافة والفلامينغو والجواميس ، والثور وما ادراكم ما الثور سبحان الخالق اول ماشوفته انفجعت صراحة كيف هذولا الامريكان اللي يركبوا فوقه ،، يوووما مرررا يخوووف انا بس شوفته اترعبت قال اركبه قال .... :yolks00180: كان مرا بعيد وماني قادر اخذ له صوره حلوا .. طبعا قبل ماتروحوا الحديقة افضل انكم تشتروا لكم سناكات وموية ،، وترى موجود ف الحديقة كشكات تبيع سناكات ومويه وفشار واسكريم .. بس انا شعاري اكون مستعدة دائما ولاتنسوا الكاميرا تشحنوها فل وجوالاتكم فل .. لانه التصوير هناك خرافة جميل جمال ،، ماشاء الله . كثير في المنتدى نصحوا اننا نروح زوو نيقارا احسن من افاموسا .. فانا عشان كذا اخترت هذه الحديقة .. من زمان نفسي اشوف الحيوانات كدا ع الطبيعة من دون اقفاص .. ممتعه التجربة جدا جدا .. بمجرد انك تشوفي الاسد قدام عيونك مافي حديد بينك وبينه تحسي بحمااااس ويزداد ضخ الدم لديك << ادرينالين ي حبيبتي هههههه :(34)::(34): لا ولمن يطالع فيك وانتي تطالعي فيه يختي مدري اش احس المهم تجربة حلوا .. :(141): 2- مسجد بتروجايا : http://www.arabtrvl.com/up/uploads/a...1931603184.jpg http://www.arabtrvl.com/up/uploads/a...1931603255.jpg جميل جدا ماشاء الله ماعندي أي ملاحظات تذكر في هذا القسم عدى انه رحناله في صباح اليوم الثالث وكان فاضي ،، وكان مطل على اطلاله البحيره الجميلة .. وهذي بعض الصور من عدسة ابو جاسم : 2- الاي ستي ( المدينة المضيئة ) : في مساء ثالث يوم رحنا لها ، مكان جميل جدا جدا ، ساحر وآخاذ ، ذهبنا اليه في الساعة 6 ليلا يوم كان ممطر جدا جدا ، والامطار جدا غزيرة .. من شدة غزارة المطر محنا قادرين نشوف اللي قدامنا ، بالقوه نشوف انوار السيارات .. << لحظات مرعبة والله أول مرة ننحط كذا في هذا الموقف .. خفنا على نفسنا بس الحمد لله سرعان ما هدأت الامطار قليلا .. وواصلنا مسيرنا ، ابو جاسم كان بس يقول يلا رجعنا ، وانا ارد عليه " لا والف لا يدي بيدك وسنواصل والله يحفظنا .. " ههههه اهم شي ما ارجع الفندق .. << احنا فينا عقدة سيول جدة فعشان كذا خايفين من المطر ، فطول الوقت وانا اهدي من روعة أنفسنا ، فبس اردد واقول " انه هنا العالم عايشة حياتها بالطول والعرض وسط المطر ولا نقطة مويه تشوفها في الشارع سبحان الله .. الوضع عندهم جدا عادي .. " سامحوني اخذني الهرج ونسيت الاي ستي ،، نرجع لها طبعا لفينا في الحديقة واخذنا الكثير من الصور .. أصلا ما تقدر تمسك نفسك انك ما تصور .. اللي لاحظته انه الاي ستي عباره عن مدينه مصغره فيها شوارع وحدايق منفصله كل واحده عن الاخرى . كانك من جد تمشي في مدينه صغيرة ... قسم فيها الاشجار وفيها العاب ملاهي . وفيها قطار يمشي فوق الحديقة كلها .. بس ماركبناه ، كان زحمة طوابير < طلاب مدارس في رحلة والحديقة الثانيه برضوا فيها اشجار وملاهي وزيادة فيها عالم الثلج مادخلناها من بعيد شوفناها ، تعبنا من المشي ومايحتاج ندخلها لانه نفس الاشجار اللي ف القسم الاول واصلا كان في درج طويل للاسفل ، اصتصعبناها مع عربيتنا وقلنا بلاش ننزل .. وعلى فكره كل هذا ولسا المطر مستمر بس على خفيف وقريب منها متحف الشمع .. دخلنا الحديقة مجانا مافيها رسوم . خريطه المدينه المضيئة عشان توصل لكم فكره المكان http://www.arabtrvl.com/up/uploads/a...1933892961.jpg صور الاشجار المضيئة http://www.arabtrvl.com/up/uploads/a...8193356872.jpg http://www.arabtrvl.com/up/uploads/a...1933568733.jpg صورة بانورامية http://www.arabtrvl.com/up/uploads/a...1933568764.jpg عالم الثلج مادخلناه : العيال لسا مريضين وخفت يمرضوا زياده .. ومتحف الشمع : جميل ... بس عندي ملاحظة مدري هل احد فيكم حس بهذا الشيء زيي ؟!! الاحساس هوا طول وانا امشي وسطهم وانا متضايقة قلبي مقبوض احس ،، بالذات لمن دخلت قسم تماثيل الروك والمغنين والله حاسه اني مخنوووقه مرا سرت اقول لابو جاسم بسرعه نطلع ماني قادرا اتحمل المكان .. اصلا انا مررا ماا استمتعت كثير ، بس ابو جاسم انبسط ع الاخر .. اتصور معاهم كلهم .. ههههه وربي احس شياطين متلبسينهم بسم الله الرحمن .. ( لاتدخلوا هذاك المكان الا وانتوا متحصنين واذكروا الله ) ملاحظة : المكان فيله رائحة عاديه بس غير مستحبه كثير ومظلم نوعا ما ،، يعني الاضاءة مااعجبتني في كل المكان مظلم ، ومافي تكييف ممتاز .. طبعا اسعار الدخول لغير الماليزين اعلى من الماليزين ، والله ماني فاكره السعر تقريبا ، بس اتوقع 85 للشخص الواحد والطفل 45 رنجت .. ( العربية ماسمحوا لنا بدخولها .. ) الحديقة كبيرة ولها تكملة بس ما كملناها حسينا بملل وتعب . المطاعم القريبه من الاي ستي : يمكن فيه مطاعم بس صراحة ماشفت غير كنتاكي << وهذا المطعم اكلناه فيه مضطرين من الجوع ومدري كيف اكلته كل ما افتكره نفسي تلوع الله يكرم النعمه .. سيء اصلا انا مرا ما احب كنتاكي .. 4- المدينة المائية ( صنواي لاجون ) http://www.arabtrvl.com/up/uploads/a...1933568641.jpg اول شيء سعر الدخول صار : للكبار سواء لعبت او لم تلعب بـ 150 رنجت ، والاطفال 60 رنجت جاسم عندهم ورقه لمقياس الطول اذا كان تحت 90 سم فيدخل مجانا .. طلع جسومي فوق الـ 90 سم ودفعناله . ممنوع الاكل يدخل للمدينه ، وتفتيش ع الشنط اول مادخلنا . ولاحظت انه تقدر تستاجر عربية اطفال ، عند بوابة الدخول تلاقي العربيات . احجام واشكال مليان . اما هذه المدينة ، فتخيلوا رحنا لها في اخر يوم قبل يوم السفر بالتحديد والسبب المهم : انه الاطفال ثم الاطفال .. شوفوا من كثر ما رايت من تجارب كثير من اقاربي لمن يروحوا الصنواي في اول الايام ، اطفالهم في بقيه السفر مريضين ومزكمين والتهابات وكل شيء ، ويقعدوا طول السفرة يمرضوا في اطفالهم .. فانا فكرت ف الموضوع واصلا كانوا اولادي مريضين من السعودية وفيهم سخونه ، فجاسم خلصت كورس المضاد الحيوي له في سيلانجور اللي كتبه له دكتوره في جده .. طبعا خمس ايام والحمدلله مافيله أي شيء بقيه الرحله .. وراشد كنت على خافض الحراره اللي اعطاني هوا الدكتور في مستشفى صنواي .. اوك فاتخذت القرار انا وابو جاسم في ايامنا ف سلانجور ، انه خلاص نأجلها لاخر الرحلة .. عشان مايمرضوا زيادة .. وفعلا اخر الايام رحنالها بس ...!! صراحة كنا مرهقين جدا وتعبانين قليلا من ارهاق السفر .. وما كنا متحمسين كثيير ، ففقط ابو جاسم وجسومي لعبوا في المسابح حتى ابو جاسم مادخل كل الالعاب الخطيره حقت المسابح زي الزحاليق الكبيره مررا كان في طوابير كبيره وماكان فيله حماس شديد << قلتلكم مرهقين كنا .. الحين ماعليكم فينا مو شرط كلكم تتعبوا وتحسوا بارهاق وكدا ، لايجيكم احباط مني .. المفيد والمهم : من جد من جد نصيحة لكل اب وام الصنواي خلوها قريبه من اخر الايام مو شرط اخر يوم ممكن قبل سفرتكم بثلاث ايام حلو تروحوا لها .. عشان لاايمرضوا اطفالكم والرحله كلها تتخبص بسبب مرضهم .. اوك حتقولوا لي طيب في الفنادق فيه مسابح .. !! ايوا في بيننانغ في مسابح وانبسط جسومي وكل شيء بس المسبح حق الفندق اناا فوق راسه يعني اول مايخرج من المسبح احط المنشفة على راسه ( انا جايبه له منشفه روب ابو طاقية وفيها حزام ، عشان ماتنفك منه واضمن انه يتدفا تمام ) ... غير لمن يككون في الصنواي اليوم بكبره وسط المويه ويتنقل من مسبح الى مسبح ويطلع زحاليق ويلعب بالمويه وينصفق من الهواء .. مع الجري والازدحام حق الناس .. << شوفتوا كيف ..:yolks00710: يعني في مسبح الفندق اأمن له .. هيا كلها ساعه اخليه يسبح مع ابوه ويكفي واخرجه واذا مرا طوول ساعه ونص .. ويتعب من حاله . اما الصنواي من الساعه 10 ص الى المغرب ويالله تشبعوا من الحديقة ومن مسابحها .. ومن جد الصنواي ماتقدر تخلصها في يوم واحد .. الا اذا قسمت وقتك مثلا ساعتين مسابح او ثلاث ساعات وبعدين كل قسم تروح له تعطيه نص ساعه وتخرجوا وهكذا .. حتى لو لعبتوا لعبه وحده في كل قسم نعمه وخير وبركه . ملاحظاتي المهمه : - ايوااا فيه حاجه مرررررا مهمه وخطيرة وتجنن ، اللي هيا شراب المسبح انا شوفته في امازون من قبل السفر بس ما اهتميت بالموضوع كثير .. ولمن كنت هناك شفت اثنين رجال لابسينه مررا كيوت ويجنن عليهم .. هوا فكرته شراب ماسك على الرجل بس ميزته ضد المويه يعني قماشه مايمتص الماء .. وفايدته انه يحمي رجلك . تييييب تعرفوا ليش مهم مررا كذا .. لانه ابو جسومي وهوا يبغا يخرج من المسبح مدري اش اتزحلق فيه واتصقعت رجله في حافة الدرج واصباعه نزل منه دم .. :(158): فوقتها اتمنيييت اني اشتريت هذاك الشراب <<< كثير اشياء اتمنيت اني اشتريها بس وقت السفر ندمت ما اخذتها ، فعشان كذا انا بقولكم عليها عشان تستفيدوا .. - خصوصا انكم هناك مسابح وتنتقلوا من مسبح الى اخر ومو حاله كل شوي تفصخ صندلك وترجع تلبسه هههه - خلاص تلبس الشراب هذا وروح اسبح وامشي واتزحلق وكل شيء وانت في امان حامي رجولك .. << كيف بس اعجبكم صح هههههه ،، ترى ينفع كمان للبحر تمشي فوق الرمل بالشراب مايعدم ولا يدخل التراب في صندلك .. << اقولكم شكلي بشتغل موسوقة دعائية .. طول التقرير وانا امدح لكم في اشياء خطيره :yolks00250: هذي صورة الشراب من امازون ( shose swimming ) http://www.arabtrvl.com/up/uploads/a...1934268971.jpg - هناك الحمامات فيها غرف لمراوش دش خاصه .. لانه كثير مسابح يحطوا لكم مروش خارجي قدام الناس ، يا دوب تغسل جسمك من مويه المسبح . - في اسواق هناك تبيع كل شيء لادوات المسبح من عوامات وملابس سباحة بس جدا غاليه الاسعار .. فاحسن تكونوا مستعدين من بدري قبل السفر اشتروا اشياء السباحه حق اولادكم . - عندهم لبس السباحة الاسلامي للحريم ، في حدود 200 رنجت اتوقع ، المهم كل شيء هناك غالي يعني للطوارئ تشتروا منهم .. - المكان جدا نظيف ،، دائما العمال ينظفوا المكان باستمرار . الكلام في هذه الالعاب جدا يطوول ، اذا بحثتوا ف النت حتلاقوا تقرير يفصل كل قسم على حده .. وياحبذا انكم بعد ماتقرأوا التقرير اللي في النت المفصل عن الحديقة هذه ، تقرروا اش تبغوا تدخلوا من قسم ، واش الالعاب اللي تبغوا تجربوا وحطوها في نوت او ملاحظه عندكم ، عشان صدقوني لمن تروحوا هذاك المكان من دون تخطيط مسبق حتتوهوا من كبر الملاهي ويضيع الوقت كله وانتوا تمشوا تدوروا عن اماكن الالعاب وتستكشفوا المنطقة .. فحتلاقوا خريطة المدينه المائية اطبعوها وسووا دائرة على الاماكن اللي مرا تبغوا تزوروها وهكذا .. لانه هذا المكان بالذات اروع واحلى حديقة مائية شامله كل شيء ، حتى حديقة حيوانات في اقفاص تلاقوا عندهم . المطــاعم : اش رايكم انا افضل اني اخلي المطاعم اللي جربتها في جزء خاص لحاله .؟! بدل ما اني في كل تقرير اكتب عن تجربتي لكذا مطعم .. شنطة المطبخ وما ادراكم ما شنطة المطبخ هههههههه << تلاقيكم مترقبين هذا الجزء جدا بما اني كنت منزلة اول موضوع ليا بخصوصه ... بسم الله .. اذا راجعتوا موضوعي في هذا الخصوص ، حتلاقوا اني ماخليت شيء وكنت ابغى اشيله معايا ، غير مدركة اني تهورت قليلا وتحمست قليلا أخرى ،، فمن هناا يا اعزائي ، ان شاء الله تستفيدوا مني في هذه النقطه جدا جدا .. اول شيء حكتب لكم الاشياء الضرورية اللي لاغنى عنها من نظري في السفر في كل احوالكم عرسان عوائل : ولكم حرية الخيار : - غلاية الماء . الحجم الصغير طبعا - دلة العرب للقهوة الكهربائية ( اكيد معاها البن والزعفران والهيل ..الخ ) - اكياس قمامه حجم 30 جالون . - صحون ملاعق كاسات بلاستيك او كاسات ورق . محتويات شنطتي وما الغرض منها : 1- غلاية ماء صغيرة جدا انا ما افضل استخدم حق الفنادق ، تكون غير نظيفه جدا وغير معقمه من كثر الاستخدام .. وأفادتني جدا جدا جدا مايحتاج افصل فيها .. 2- عين كهربائية وقدر صغيرون لغلي الحليب : ( ليس بضروري ويمكن الاستغناء عنه ) انا احب اسويلي كابتشينوا كل يوم لازم اشرب لي كوب .. << سبحان الله في ناس مايقدروا يعيشوا يومهم بروقان الا اذا شربوا دلة القهوه العربيه حقهم .. انا احب كابتشينو حقي .. << فكان هذا الشيء جميل بس ندمت اني اخذته معايا :yolks00630: تيب تدروا اني بعد السفر اكتشفت شيء مرا خطييير >> انا سموني ام الاكتشافات هههههه ، ، المهم مقهورة مرررا اني ماشوفته من قبل ، ولا كان ما اشتريت العين الكهربائية وخففت على روحي مرا كثير .... المهم من كثر ماني زعلانه طلبته قبل كم يوم من امازون والان هوا في الطريق ليا ، حيفيدني في أي سفره قريبه حتى لو رايحين شاليهات وكذا .. خصوصا اني غيرت تخصص ادماني من الكابتشينو الى القهوة البيضاء . . ( على فكرة ترى القهوة البيضاء الذ واطعم مع الحليب .. ) اللي هوا سخان الحليب millk frother وميزته انه يسخن الحليب ويسويله رغوة كثيفة ، وهو يشبه مرا غلاية المويه ، ينشبك على الكهرباء ويشتغل تقدري تخليه يسخن الحليب ويسوي رغوه كثيفة ، وتقدري تخلي الحليب بارد مع رغوة .. هذي صورته .. .. http://www.arabtrvl.com/up/uploads/a...1934268992.jpg http://www.arabtrvl.com/up/uploads/a...8193426913.jpg نكمل المحتويات : - قمارة التوست ( ما استفدت منها مراا كثير بس كان التوست يجنن والجبنه ذايبه منه ، بس تعتبر ماهي ضروريه جدا ) - كاسات ورق ، درزن واحد صحون بلاستيك وملاعق بلاستيك ( مرا مفيده جدا ) - اكياس قمامه كبيره وصغيره ( صراحه اهم اهم اهم شيء اخذته هذا ، تعرفوا كيف يسير حالكم مع القمايم في الغرفه ، فأنا ما اقعد على رحمه اللي ينظفوا الغرف ، خلاص اول باول انظف الغرفه واربط الكيس لمن يجوا اعطيهم الكيس .. ونقعد في نظافه وترتيب الحمد لله .. خصوصا مع حفايض رشودي هههه ) - جونتيات " glovs" – اسفنجة مواعين – فرشاه غسيل الرضاعات – فرش اسنان معجون – سكر ستيفانا – جبنة مربعات كيري – جبنة كاسات وسط ( الجبنه اهم شي صراحه اكثر شيء استفدنا منها هناك مع التوست ) وعرووض الجبنه عندنا ارخخص من الجبنه عندهم .. - سكين – قشارة بطاطس ( استفدت منها في تقشير التفاح عيالي ما يحبوا القشر ، والسكين اقطع لهم التفاح والبرتقال .. ) الكاتشب اذا كنتوا من محبين الكاتشب ، فنصيييييحه اشتروا كتشبكم من بلدكم في السوبر ماركت النوع اللي يجي في اكياس صغيره اللي دايما تنحط في كل المطاعم .. او ابداوا في تجميع الكتشاب من كل الوجبات اللي تطلبوها من برا وحتفيدكم هناك هههههه لانه صراحه ماعندهم كتشب لزيز ، مفلفل سومطرا الكتشب حقهم .. << والله انا شلت الكاتشب من بيتنا بالصدفة يعني مدري اش اللي خلاني اشيله ومرررا فادانا هناك هههه .. ملاحظه مهمه : اذا كنتي ام متحمسه زي لما كنت ترى اقلك هيا ، انتي في اجازه وماحتلاقي وقت تسوي فيه أي شيء .. يا دوب لمن تصحي من النوم تسويلك توست او كورن فليكس للعيال وخير وبركه منك .. اما الاكل الصحي : من اول يوم لنا هناك قرصنا الجوع موطبيعي ، وحاولنا ناكل مشاوي ما عجبنا ولاشيء هناك .. فاستسلمنا لماك والشله المصونه من وجبات سريعة .. ف النهاية كل شخص حر في أيش يشيل وايش يخلي وهذا اللي كتبته ماهو الا نتاج تجربة رحلة واحدة للخارج . بس قبل ما تحط أي شيء في شنطتك ، أسأل نفسك سؤال : هل أنا أقدر استغني عن هذا الشيء....؟؟؟؟؟؟؟؟؟ إذا كانت احابتك نعم : فهوا غير مهم وخرجه من الشنطة على طول ... الى هنــا وكفاية لهذا الجزء : وســــــآآمحوني إن أطلـــــت عليكم في التفاصيل ، أشياء كثيره كنت بمسحها بس من شدة طلبكم اني اكثر تفاصيل خليتها ، فصار الموضوع طوييييل ... الجزء القادم : جزء بينانغ |
الف شكر اختي وجاري تسجيل الملاحظات سؤال ليت لو تحطي لنا رابط لشراب المسبح اول مرة اسمع فيه وخصوصا اني طالب اغراض من النت وبجمعها في بريدي يصير اطلبه بالمرة او حتي لو تكتبي اسمه او اسم الشركة او صورة له والف حمد لله على سلامة البزورة منتظرين باقي التقرير |
اقتباس:
http://www.arabtrvl.com/up/uploads/a...0450795211.png اتفضل هذا رابط الشراب في امازون اكتب في السيرش ( swimming shoes ) https://www.amazon.com/gp/aw/d/B01H3...WEYQYCNBB3N15H |
هلا ام جسوم اول ما شفت انكم رحتوا سيلانجور خمسه ايام استغربت بس طالما معاكم سياره الموضوع سهل والحمدلله على سلامه ولدك والمستشفى يعتبر سعره معقول لاشعه راس انا رحت عياده في بينانق ادوني ادويه كحه ومضاد حيوي ب ٢٥٠ ولا في اي فاتوره ولا اي تفصيل بس مع التعب ما ناقشتهم واهنيك على اختبارك للزو بدل افاموسا لاني رحتها واشوف السفاري لا تستحق الزياره مسجد بوتراجايا جميل جدا وبتكلم عنه في تقرير ان شاء الله اتمنى لو انك زرتي القصر المغربي جميل جدا عاد شنطه طبخك طلعت شنطه باريستا شكلك مدمنه كافيين متابعين معاك |
يعطيج العافيه التفاصيل مهمة لا تخلين شي اكيد في واحد او اكثر بيستفيد من تجربتج والف سلامة على راشد وجاسم اما ادوات المطبخ .... اممممم الله يكون بعونج الغلايه للماي بس هذه مهمة لأن عندج اطفال ويحتاجون ماي حار للحليب حلو انكم حجزتم سيارة ولفيتوا فيها براحتكم والحدايق اللي زرتوها حلوه احلى مافي التقرير كتابتج بلهجتك الجميله استمتعت جدااا فيها بس شنو معنى ( كروانه ) ومتابعين للآخر |
هلا بام المطبخ قصدي ام جاسم:69: ماشاء الله تفاصيل ونصايح من الاخر ابداع ماقصرتي ربنا يسعدك والحمدلله على سلامتهم الاولاد انا اولادي اخر السفرة سخونة والتهاب بس عندي خلطة طبيعية ترفع المناعة ومفيدة للاطفال والعسل مهم جدا والله خير حافظ بالنسبة للغلاية انا مثلك اخدت صغيرة من الدانوب مناسبة للسفر لاني من سابع المستحيلات استخدم حق الفندق وكاوية صغيرة ومثلك صحون وملاعق وكاسات ورق الفندق جدا نظيف ولقطة الصراحة سعره يابلاش بس مغامرة تسكني في فندق نجمة وحدة بس الحمدلله توفقتو وكان نظيف وموقعه جميل الاكل فعلا في صن واي بيراميد طربوش الحمدلله على النعمةبس كان جدا سيء عكس كوالالمبور واصلي لا تتاخري ماشاء الله من امتع التقارير الله يعطيكي العافية:e306: |
اقتباس:
هلا والله بجارتي العزيزة ،، ايوا السعر جدا طيب ،، انا كاتبه انه اتوقعنا السعر اعلى من كدا .. وربي يسلم لك كل غالي ،، وانتي كمان الحمد لله على سلامتك يسعدلي مرورك ومتابعتك معي ،،، :6::6::6: |
| الساعة الآن 03:37 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO