|
رحــلــتــي الــثــانــيــة إلــى مــالــيــزيــا (مــايــو 2015) ... العرب المسافرون ماليزيا الحمدلله رب العالمين حمداً كثيراً طيباً مباركاً فيه يليق بجلال وجهه وعظيم سلطانه أقدم هذا التقرير المتواضع بين أيديكم ليستفيد منه الجميع كما استفدت من عدد من التقارير، لذا يمكنكم أن تعتبروه رد بسيط ورسالة شكر وعرفان لكم، فكما قال رسول الله صلى الله عليه وسلم : ( من لا يشكر الناس لايشكر الله) وقبل ما أبدأ بتقريري أود أن أشكر كل الأعضاء اللي ساعدوني في الردود على استفساراتي وعلى الأعضاء اللي وضعوا تقاريرهم وتجاربهم اللي استفدت منها كثراً، والحمدلله بفضل الله وبفضلكم جميعاً نجحت رحلتي الجميلة إلى ماليزيا السؤال : ليش أخترت ماليزيا ؟؟ الجواب : ما كان في الحسبان أني أروح ماليزيا، كنت مخطط هالسنة أروح إلى دبي لمدة (10) أيام بعد عيد الفطر المبارك، لأن الأطفال استانسوا من دبي المرة اللي طافت، وفي يوم من الأيام وصلني رسالة إلى الإيميل من طيران القطرية وهي تخفيض على كل الوجهات بنسبة (40%) لمدة (5) أيام ويكون آخر يوم للسفر هو (17 يونيو 2015) وتصفحت الرسالة وإلا تذكرة كوالالمبور (164) دينار بحريني، لحظتها كنت في الدوام، على طول أتصلت في مدرسة أبني راشد قلت لهم متى يخلصون الامتحانات النهاية، قالوا لي يخلص بتاريخ (18 مايو 2015) قلت لهم أكيد، قالوا لي أكيد، قلت تمام مع السلامة، يعني عندي (30) يوم للسفر قبل رمضان، ورحت طيران على النت واختار رحلة الذهاب بتاريخ (20 مايو 2015) ورحلة العودة (10 يونيو 2015) من بانكوك، وإلا سعر التذكر مع التأمين (170) دينار، على طول حجزت التذكرة. وطبعاَ هذي راح تكون زيارتي الثانية إلى ماليزيا وسبب أختياري لها لأني في المرة الأولى ارتحت لها وايد واستانست وايد فيها وما شبعت منها، وقلت هذي المرة أروح لها مع عيالي، واخترت تايلند أيضاً للاستجمام في بوكيت وللتسوق في بانكوك. وقبل ما ندخل بالتفاصيل راح أخبركم عن بعض المواضيع اللي فادتني في سفرتي كثيراً وهي برامج نزلتها على تلفوني الأيفون وهي كتالي : والحين توكل على الله ونبتدي تقريرنا بالتفاصيل : عدد أفراد الرحلة : (2) كبار (2) أطفال عدد الأيام : (10) أيام ماليزيا (10) أيام تايلند 10 أيام ماليزيا موزعه على النحو التالي : (2 ليالي في سيلانجور / 3 ليالي في كوالالمبو / 4 ليالي في بينانغ) 10 أيام تايلند موزعه على النحو التالي : (4 ليالي في بوكيت / 6 ليالي في بانكوك) التذاكر الفنادق وطبعاً في هذا التقرير راح أركز على (10) أيام اللي في ماليزيا فقط، وبعدها بإذن الله راح أعمل تقرير منفرد عن تايلند في بوابة السفر إلى تايلند انتظروا التفاصيل في الردود القادمة بإذن الله :(125): |
رد: رحــلــتــي الــثــانــيــة إلــى مــالــيــزيــا (مــايــو 2015) ... اعذروني على عدم ترتيب الموضوع بشكل جميل لأن ما قاعد يصير مسافات بين الكلام :(46): |
رد: رحــلــتــي الــثــانــيــة إلــى مــالــيــزيــا (مــايــو 2015) ... ماشاء الله تبارك الله بداية موفقة وجميلة بخصوص برنامج التاكسي / هل هو عالمي او مختصر على ماليزيا انطلق وابدع لنا يابو راشد .. ملاحظة / تم تعديل التنسيق |
رد: رحــلــتــي الــثــانــيــة إلــى مــالــيــزيــا (مــايــو 2015) ... الف الحمدلله على السلامة يابو راشد .. التقرير مرتب والبداية تبشرنا بتقرير مميز .. الوجهات اللي اخترتها في الرحلة موفقه وجميلة .. ننتظر باقي التقرير والصور والتفاصيل .. |
رد: رحــلــتــي الــثــانــيــة إلــى مــالــيــزيــا (مــايــو 2015) ... هلا يا أخوي oceanus من ذوقك يا أخوي .. وإن شاء الله يقدرنا على عرض التقرير بأحلى صورة .. بخصوص برنامج التاكسي هذي فقط في ماليزيا وأتوقع فقط كوالالمبور لأني يوم رحت المستشفى في صنواي لاجون كان موجود أيباد عند البواية ومفتوح على هالبرنامج للي يبي يطلب تاكسي .. والأخت دينا بعد تطرقت حق هالبرنامج في تقريرها =========================== الله يسلمك يا أخوي فهد المنيع ومن ذوقك يا أخوي .. وإن شاء الله الله يوفقني في سرد التقرير بطريقة مميزة وأشكركم يا أخوان على المرور ويعطيكم العافية |
رد: رحــلــتــي الــثــانــيــة إلــى مــالــيــزيــا (مــايــو 2015) ... الحمد لله على السلامه ابو راشد ..... في انتظارك بقوة للتقرير ،،، لان تقاريرك مشوقة وممتعة |
رد: رحــلــتــي الــثــانــيــة إلــى مــالــيــزيــا (مــايــو 2015) ... ما شاء الله باين بيكون خوش تقرير انتظر تقريرك يالغالي و اتمنى التقرير يحتوي ع الاسعار لزيارتك للاماكن و هم جميع الامور اللي تفيدني لانه زيارتي قريبا وياليت لو تفضلت تدخل على استفساري و تفيدني http://www.arabtrvl.com/vb/t7683.html |
رد: رحــلــتــي الــثــانــيــة إلــى مــالــيــزيــا (مــايــو 2015) ... حمدلله عالسلامة احجز لي يا عسل في الصفوف الامامية لمتابعة تقرير باين عليه انه بطل وفيه اشياء جديدة هاي مزمز |
رد: رحــلــتــي الــثــانــيــة إلــى مــالــيــزيــا (مــايــو 2015) ... الحمدلله ع السلامة ياغالي ,,,, احجز لي مقعد في درجة رجال الاعمال التقرير كبداية مبشر بالخير والباقي جاي في الطريق ان شاء الله |
رد: رحــلــتــي الــثــانــيــة إلــى مــالــيــزيــا (مــايــو 2015) ... حبيبنا ( بو راشد ) وتقرير عن ماليزيا .. أثق تماما بتميزه .. قرأت مواضيع سابقة لأبو راشد .. تنم عن قدرة فاااائقة على الصياغة والجدولة والترتيب .. ترتيبك جميل .. أين لنكاوي من القائمة يارجل :yolks00430: سعر التذاكر جدا مغري ويستحق ألاّ يفوت .. اختيارات الفنادق مميزة لسيلانجور وبينانغ ( اخترت الأجمل والأرقى ) ننتظر تقييم أسكوت كوالا .. هذا المتصفح سيكون ( خط ساخن ) بالنسبة لي .. أعرف تماما كمية البذخ التي ستقدمه لنا .. بانتظارك .. |
رد: رحــلــتــي الــثــانــيــة إلــى مــالــيــزيــا (مــايــو 2015) ... بداية قوية وتفاصيل رائعة موعودين بتقرير من العيار الثقيل يعطيك العافية |
رد: رحــلــتــي الــثــانــيــة إلــى مــالــيــزيــا (مــايــو 2015) ... حيا الله بوراشد و الحمد لله على السلامة تقرير رائع اتوقع راح يحطم البوابة الماليزية و بقوة ! خصوصا اذا كان هناك تفاصيل دقيقة و تحديدا سرد مصاريف الرحلة ننتظرك ... لا تتاخر علينا |
رد: رحــلــتــي الــثــانــيــة إلــى مــالــيــزيــا (مــايــو 2015) ... هلا ومرحبا بالتقارير المميزة اعذرني على الوصول متأخرة :(5): لازم ما تطوفني تقارير ماليزيا وتايلند لكن الظرووف الصحية الحمد لله بو راشد مبدع ما شاء الله وبدايات التقرير توحي بالجميل القادم ترتيب وتنسيق الرحلة سبب لنجاحها متابعينك ولا تطول علينا ،،،، آآآآآآآآه كم اشتقت لماليزيا وتايلند تحياتي لك وللأسره الكريمة |
رد: رحــلــتــي الــثــانــيــة إلــى مــالــيــزيــا (مــايــو 2015) ... الحمد لله على السلامه و بإنتظارك لا تتأخر علينا. |
رد: رحــلــتــي الــثــانــيــة إلــى مــالــيــزيــا (مــايــو 2015) ... الله يسلمك يا أخوي إبراهيم من ذوقك يا أخوي .. وإن شاء الله تستمتعون بالتقرير ======================= تسلم يا أخوي رايموند إن شاء الله في التقرير راح أذكر لكم كل رينغت وين صرفته وآنه وايد مركز على الأسعار لأني كنت نفسك أبحث عن الأسعار وإن شاء الله راح تجد كل التفاصيل في التقرير وتستفيد منه وايد ======================= الله يسلمك يا أخوي himzmz وحياك الله وإن شاء الله تستمتع في التقرير ======================= الله يسلمك يا أخوي ابو عمر _ JDH وحياك الله وإن شاء الله تستمتع في التقرير ======================= تسلم يا أخوي كتكات783 من ذوقك يا أخوي وحياك الله وإن شاء الله تستمتع في التقرير بخصوص لنكاوي آنه رحتها من قبل .. وهالمرة كان الوقت ضيق علي فلازم أضحي ببينانغ أو لنكاوي .. وضحيت بلنكاوي لأن مطارهم مب دولي ومطار بينانغ دولي فلقيت رحلة مباشرة من بينانغ إلى بوكيت على طيران الفاير فلاي وما حصلت من لنكاوي إلى بوكيت ويوم حجزت الطيران الدولي وييت أبي أحجز تذكرة بينانغ إلى بوكيت إلى خلصت التذاكر فضطريت أحجز على الماليزية ترانزيت كوالالمبور ======================= الله يعافيك يا أخوي MOBARKI وحياك الله وإن شاء الله تستمتع في التقرير ======================= الله يحييك يا أخوي أبوعبدالله (الاسفار ) والله يسلمك يا أخوي إن شاء الله التقرير يكون عند حسن ظنكم ويكون من أفضل التقارير وإن شاء الله راح يتم سرد الأمور بتفاصيل ======================= أهلين وسهلين بالأخت قصة حب ما تشوفين شر أختي قصة حب وإن شاء الله تقومين بالسلامة من ذوقج أختي وإن شاء الله تستمتعين بمتابعة التقرير يوم كنت في جنتنغ تذكرتج وايد وراح تعرفين السبب في سرد التقرير ======================= الله يسلمك يا أخوي Turki1407 وحياك الله وإن شاء الله تستمتع في التقرير |
رد: رحــلــتــي الــثــانــيــة إلــى مــالــيــزيــا (مــايــو 2015) ... تكملة المقدمة طبعاً قبل السفر الواحد يبحث ويفكر ويخطط، ويرتب أمورة قبل السفر، طبعاً كل ما كان التخطيط سليم كل ما كانت الرحلة حلوة ورائعة على الرغم من أني سافر من قبل إلى ماليزيا إلا أني قعدت أبحث عن أماكن جديدة وأستفيد من تجارب الغير في البداية تم ترتيب الرحلة وعدد الأيام في كل مدينة وتم الوصول إلى هذه النتيجة وبعدها تم التخطيط للأماكن السياحية اللي راح يتم زيارتها، مع العلم إني أخترت الأماكن بعناية لإرضاء الأطفال لأن الرحلة هذي المرة علشانهم وبعد الإطلاع على تقرير الأعضاء وتجاربهم والبحث عن وجهات الأطفال ولنا أيضاً نحن الكبار تم الوصول إلى هذه النتيجة مع العلم إني لم أستفد من هذا الجدول إطلاقاً لأن الكتابة أسهل من العمل طبعاً طاقة تحمل الأطفال تختلف عن طاقتنا نحن الكبار، فأحنا الكبار ممكن أن نطلع من الصبح إلى الليل، ولكن الأطفال بسرعة يتعبون فتم تغيير الجدول والأعتماد على حالة الأطفال كنت إذا أطلع الأطفال الصبح لازم أرجع العصر علشان يرتاحون شويه وبعدها أطلع فليل، أو أني أطلع من الصبح إلى المغرب وبعدها أريحهم، لأن إذا ما أرحتاحوا يزعجوني ويمللوني وخصوصاً البنت الصغيرة إذا تعبت تبكي وفي النهاية تنام علي ولازم أشيلها لذلك لم أعتمد كثيراً على الجدول وإنما أعتمدت على تعب الأطفال والحين راح أطلعكم على الأدوات اللي صورت بها طبعاً أخذت معي كاميرا فيديو سوني وكاميرا تصوير أيضاً سوني ولكن لم أستخدمهم بتاتاً الكاميرات اللي استخدمهم هم GoPro hero 4 black edition وهي للتصوير في الماء في والتصوير العادي وفيها ميزة أنها تصور بزاوية 170 درجة وعدستها عين السمكة iPhone 6 + iPhone 6 plus وأنتظروني في الحلقة القادمة تفاصيل اليومين الأول والثاني وأتمنى لكم متابعة شيقة :yolks00260: |
رد: رحــلــتــي الــثــانــيــة إلــى مــالــيــزيــا (مــايــو 2015) ... متابعينك اخوي وبانتظار بارت جنتنق - الله يذكرك بالخير يارب |
رد: رحــلــتــي الــثــانــيــة إلــى مــالــيــزيــا (مــايــو 2015) ... بداية موفقة اخي بو راشد في انتظار تكملة التقرير |
رد: رحــلــتــي الــثــانــيــة إلــى مــالــيــزيــا (مــايــو 2015) ... بداية موفقة ورائعة متااابع وياااك يالغالي يعطيك العافية أبو راشد |
رد: رحــلــتــي الــثــانــيــة إلــى مــالــيــزيــا (مــايــو 2015) ... حياج الله أختي قصة حب وإن شاء الله بارت جنتنغ قريب بإذن الله ===================== حياج الله أختي سوسو الصغيرة وإن شاء الله تستمتعين بمتابعة التقرير ===================== تسلم يا أخوي Haksa77 والله يعافيك يا أخوي .. وإن شاء الله تستمع بمتابعة التقرير |
رد: رحــلــتــي الــثــانــيــة إلــى مــالــيــزيــا (مــايــو 2015) ... بداية موفقة ورائعة متااابع وياااك يالغالي في متابعة تقرير الرائع .. |
رد: رحــلــتــي الــثــانــيــة إلــى مــالــيــزيــا (مــايــو 2015) ... تسلم يا أخوي عاصي القلوب وحياك الله وإن شاء الله تستمتع بالتقرير |
رد: رحــلــتــي الــثــانــيــة إلــى مــالــيــزيــا (مــايــو 2015) ... اليوم الأول والثاني (20 + 21 مايو 2015) يوم الأربعاء الموافق (20 مايو 2015) الساعة (2:00) ظهراً جهزنا شناطنا وسكرناهم وجهزناهم علشان نوديهم للسيارة لأني أدري راح تصيدني مشكلة مع الشناط وصندق السيارة وهي صورة الشناط وبعد معاناه مع الشنط وصندوق السيارة تغدينا وتوكلنا على الله وطلعنا من البيت قبل الطيارة بـ (3) ساعات وكانت طيارتنا الساعة (6:20) المغرب، تحسباً لأي طارئ من زحمه أو حوادث السير وغيره، وأيضاً لأني راح أوقف سيارتي في مواقف المطار، والحمدلله الطريق كان سالك وما صادتنا أي زحمة أو أي شيء ووصلت مطار البحرين الدولي ورحت للمواقف اللي قريبة من المطار وهي (B) وهذي المواقف يتم احتساب مبلغ دينار واحد لكل يوم وهي قريبة من المطار وتقدر تروح لها سيراً على الأقدام لمدة 5 دقائق، وللعلم هناك (5) مواقف في مطار البحرين الدولي وهم (A,B,C,D,E)، موقف (A) وهو للفترات القصيرة لأستقبال وإنزال المسافرين وأسعارة تبدأ من (0 دقيقة إلى 20 دقيقة / 400 فلس) ومن (21 دقيقة إلى ساعة كاملة / 500 فلس) و (يوم كامل / 10 دينار)، والموقف (B) هو للفترات القصيرة والمتوسطة وسعره (1 دينار) لكل يوم وهذا الموقف تقدر تروح للمطار مشياً على الأقدام، والمواقف (C,D,E) هو للفترات الطويلة وسعره (1 دينار) لكل يوم وهذه المواقف بعيده قليلاً عن المطار ولكن المطار يوفر حافلة (24) ساعة مجانية لنقل المسافرين من المواقف إلى مبنى المطار والعكس. المهم وصلنا المواقف (B) وإلى زحمة والموقف ممتلئ ومسكرين البوابة، كلمت الموظف قالي مليان الناس تدخل وماتحصل موقف وتطلع، قلت له مو مشكلة آنه بدخل وإذا ما حصلت بطلع قالي كيفك لكن آنه أقولك لا تدخل ووفر وقتك قلت له آنه مب خسران شيء كلها 5 دقايق وآنه طالع، ودخلت وقلت هالدعاء (اللهم لا سهل إلا ما جعلته سهلا، وأنت تجعل الصعب إذا شئت سهلا) دقيقة وإلا واحد طالع من موقفه ورحت وقفت مكانة وقلت الحمدلله الله سهل أمورنا، وأخذت لي جاري وحطيت فيه الشنط ورحنا على مبنى المطار، دخلنا وإلا كاونتر طيران القطرية مفتوح ومافيه زحمه وعملنا الشيك إن ودخلنا المطار وتمشينا، ومثل العادة في كل سفرة الأطفال يدخلون السوق الحرة وكل واحد ياخذ له حلاوة أو كاكاو صارت عادة عندهم، وبعدها رحنا على ماكدونالدز وغدينا الأطفال وشويه وإلا ينادون على رحلتنا التوجه إلى البوابات ورحنا على البوابة وطلعت البوابة الروحه للطيارة بالباص، نطرنا الزحمة تخف وركبنا الباص ورحنا الطيارة، وأحنا في الباص قاعد أدور طيران القطرية مب محصلة أقول في قلبي أكيد الباص مضيع أو بيودونا على طيران الخليج، وشوي إلى الباص وقف يم طيارة لونها بيضاء وفيها أخضر وعليها ومكتوب عليها المها، أحترت قلت شسالفة ركبت الطيارة والطيارة من داخل كراسيها لونها أخضر وكانت الطيارة جديدة جداً فعرفت أنها تابعة للطيران القطري ولكن ما عرفت ليش الطيران القطري مسويين جذي، هل بيسوون شركة طيران ثانية تابعة لها وأسمها المها أو أنهم راح يغيرون أشكال طياراتهم، الله العالم. طارت الطيارة متأخرة ربع ساعة وآنه قلبي يحاتي الطيارة اللي بعدها اللي من الدوحة إلى كوالالمبور لأن الترانزيت فقط (50 دقيقة) وأحنا تأخرنا (15 دقيقة) يعني ما بقى لنا إلى (35 دقيقة)، وصلنا مطار الدوحة وقمت وكلمت المضيفة قلت لها أبي أنزل بسرعة لأن عندي رحلة وما بقى لي وقت، تقولي أنطر شوي ويقوم واحد ثاني نفس حالتي ويشرشح المضيفة وخلالها ما تسوى فلس حمر ههههههه، المهم كانت الطيارة واقفة بعيد وما كان خرطوم كان باص ولين ما نزلنا إلى الباص ووصلنا مبنى المطار ومشينا بسرعة بسرعة شوي إلى اليهال يبون يروحون الحمام، كلش كلش كلش مب وقته، لقينا حمام في طريقنا ودخلناهم بسرعة بسرعة ورحت سألت موظف عن مكان بوابتنا وقالي روح سيدة وآنه أمشي وأمشي طلعت بوابتنا بعيدة، ويوم جربت من البوابة وجفت لين الحين في ناس واقفين يبون يدخلون البوابة أرتحت وقعدت أمشي على راحتي لين ما وصلت البوابة ودخلنا الطيارة وإلا الطيارة كانت مب مليانة، وهم بعد هالطيارة تأخرت نص ساعة بسبب الناس اللي مثل حالتنا، وأول ما ركبنا الطيارة قدموا لنا المناديل المعطرة وعلى الساعة (7:40) طارت الطيارة، وبعد (45 دقيقة) قدموا لنا عشاء الأطفال لأني كنت طالب وجبة خاصة للأطفال، وكانت على شكل شنطة سبونج بوب وفيها باستا على كرات اللحم وعصير وكيك وكاكو وبسكوت، وهذي صور لوجبة الأطفال وبعدها بربع ساعة تقريباً قدموا لنا قائمة الطعام وبعدها وزعوا علينا العشاء، وكان العشاء صدر دجاج عليه صلصه الطماطم وبطاطس مهروسة وكان معه كاكو وكيك بالشكولاته وسندويش مع زبده، وكان الأكل لذيذ وهذي صورة لعشائنا وبعد الأكل وزعوا الشاي والكوفي والأشربة، وبعدها سكروا المصابيح ونمنا، وكل ساعة تقريباً يمرون علينا بالمشروبات أو بسلة فيها أنواع من الكاكو والجبس، واللي نجح فينا ولدي راشد محد كان جالس جنبه وأنسدح ونام ما شاء الله عليه طول الرحلة، وهذي صورة من السناك اللي وزعوه علينا وقبل ما نوصل بساعة بدأت الشمس تشرق وتظهر ملامح الغيوم وكانت في غاية الروعة وكأنه رسمة رسام سبحان الله وإليكم صور السماء والغيوم ومعها ملامح من الأراضي الماليزية وعلى الساعة (8:30) وصلنا إلى مطار كوالالمبور، نزلنا من الطيارة وطبعاً من الطيارة إلى عزكم الله الحمام مساكين الأطفال أول ما قعدوا من النوم سيدة يبون يروحون أعزكم الله الحمام، وبعده مشينا إلى ما وصلنا هالمكان وبعدها رحنا عبر الميترو إلى مبنى الآخر اللي فيه الجوازات واستلام الأمتعة، والحمدلله كان المطار فاضي والجوازات كانت فاضية ومافي أحد، خلصنا من الجوازات وبعدها رحنا أستلمنا شناطنا ورحنا لمكتب تاكسي المطار وقلت له أبي تاكسي إلى فندق صنواي لاجون،قالت لي جم شخص وجم شنطة, قالت لها (2) كبار و (2) أطفال و (5) شنط، قالت لي (167) رينغت لأن يبي لكم سيارة كبيرة، ودفعت ورحت لمكتبهم خارج المطار وعطيتهم البطاقة وودوني حق باص وقالي هذي سيارتكم، ركبوا الأغراض وركبنا ومشى بنا السائق متوجهاً إلى فندق الصنواي لاجون وهذي صور من طريقنا إلى الفندق وبعد تقريبا (45) دقيقة وصلنا إلى الفندق، وأول ما وصلنا ودخلنا الفندق حسيت بفخامة مو طبيعية، كان مدخل الفندق واللوبي جداً فخم وكبير، ورحت للأستقبال وأعطيتهم الفوتشر، وقعدت تسوي الإجراءات وقالت لي تبي تسوي ترقية لغرفتك قلت لها كم راح تكلفني قالت لي (390) قلت لها لا ما أبي وايد، كلمت مديرهم وردت قالت لي آنه كلمت المدير وقالي (350) وبعد مشاورات مع أم العيال توكلنا على الله وعملنا ترقية من غرفة بريمير إلى غرفة كلوب، وكان في الفرق بين الغرفتين (الأسرة في الكلوب أكبر من البريمير، الكلوب في الطوابق العلوية والبريمير في الطوابق السفلية، الكلوب تكون مطلعه على الحديقة، الكلوب فيها مشروبات الظهر وكوكتيلات العصر مجاناً، والكلوب فيها غسيل وكي 3 قطع مجاناً يومياً، والكلوب أيضاً تقدر تفطر في مطعم طابق الكلوب ولكن المطعم صغير بعض الشيء)، وهذي صور لفندق صنواي لاجون والغرفة هذي مدخل الفندق وهذي الممرات المؤدية إلى الغرف وهذي أهي غرفتنا وهذ صور الغرفة بكاميرا تلفون الآيفون http://www.arabtrvl.com/up/uploads/a...4450719594.jpgوهذي صور أعزكم الله الحمام بكاميرا الآيفون وهذي صورة الغرفة بكاميرا القوبرو وهذي صورة أعزكم الله الحمام بكاميرا القوبرو وهذي إطلاله الغرفة وهذي المطعم الخاص بفئة الكلوب وهو مطعم الفطور ومكان الشاي وقت الظهيرة ومكان الكوكتيلات وقت العصر وبعد ما خلصنا إجراءات الدخول إلى الفندق استلمنا البطاقات رحنا الغرفة ويابوا شناطنا بسرعة ما تأخروا، وبعدها أخذنا دوش، وقلنا بنام شوية وبنريح، الأطفال طبعاً نايمين في الطيارة وشبعانين نوم هههههههههه، أحنا كلش حالتنا حاله، الأطفال قعدوا العبوا في الأيباد مالهم وشبكناهم لهم على الواي فاي وكل واحد شغل له فلم وقعد يطالع وأحنا نمنا تقريباً 3 ساعات، كان المخطط أن نروح حديقة الماينز وندرلاند ولكن كنا تعبانين وراحت علينا نومه، وقلت مالنا إلى مجمع البراميد وبدلنا ملابسنا ورحنا تمشينا في المجمع وكانوا بعض المحلات عاملين تخفيضات، تمشينا وتسوقنا من المجمع وأشترينا للأطفال ملابس، وبعدها أشترينا أيسكريم من ماكدونالدز وكملنا تمشيتنا لين ما الأطفال استسلموا وتعبوا، قلنا نشتري لهم عشاء ونخليهم ياكلون في الفندق، وكان أقرب شيء لنا ماكدونالدز وأخذنا لهم وجبات ورجعنا الفندق، راشد تحمل ووصل لين الفندق لكن شوق مسكينة تعبت وشلتها ونامت على كتفي لين وصلنا الغرفة ونامت بدون عشاء، وبس تعشينا وقعدنا شويه ونمنا. واسمحولي على سوء التنسيق لأن ما يصير فراغات بين السطور والفقرات ووصلنا إلى نهاية حلقة اليوم وهي يوم السفر ويوم الوصول نلقاكم في الحلقة القادمة مع اليوم الثالث ترقبونا :yolks00260: |
رد: رحــلــتــي الــثــانــيــة إلــى مــالــيــزيــا (مــايــو 2015) ... نار يا حبيبي نار بداية مشوقة وصور رائعة وسرد اروع فيه كمية مهولة من التفاصيل الدقيقة هاي مزمز |
رد: رحــلــتــي الــثــانــيــة إلــى مــالــيــزيــا (مــايــو 2015) ... شعلل البوابة الماليزية يابو راشد مبدع في السرد .. وتصويرك جدا جميلة لازم نشوف لك كم صورة في بوابة الكاميرات |
رد: رحــلــتــي الــثــانــيــة إلــى مــالــيــزيــا (مــايــو 2015) ... ماشاء الله تبارك الله , سرد ولا اروع وتصوير في غاية الدقه والجمال الفرق اللي دفعته لغرفة الكلووووب جداً مناااااسب والغرفه باين عليها النظافه واااااااااااصل فنحنُ معاااااااااااااااااااااااك |
رد: رحــلــتــي الــثــانــيــة إلــى مــالــيــزيــا (مــايــو 2015) ... من ذوقك يا أخوي himzmz وتسلم يا أخوي وأشكرك على مرورك ====================== من ذوقك يا أخوي oceanus وتسلم يا أخوي وأشكرك على مرورك |
رد: رحــلــتــي الــثــانــيــة إلــى مــالــيــزيــا (مــايــو 2015) ... من ذوقك يا أخوي ابو عمر _ JDH وتسلم يا أخوي وأشكرك على مرورك |
رد: رحــلــتــي الــثــانــيــة إلــى مــالــيــزيــا (مــايــو 2015) ... بدايه قويه جدا يابو راشد سرد مفصل جميل وتصوير جميل...الترانزيت 50 دقيقه قليل جدا والحمد لله أنكم لحقتوا على الطياره الثانيه..كيف انطباعك يابو راشد على الخطوط القطريه هل كانت الطياره حديثه من ناحيه الشاشات و سعه المقاعد لأني كانت لي تجربه سابقه معم وكانت الطياره قديمه ولا تعكس سمعه القطريه .. |
رد: رحــلــتــي الــثــانــيــة إلــى مــالــيــزيــا (مــايــو 2015) ... هلا بك أخوي Al-Hajri VIP تسلم يا أخوي ومن ذوقك بخصوص طيران القطرية طيران ممتاز .. الطيارة اللي بين البحرين وقطر كانت جديدة جداً أما بخصوص الطيارة اللي من الدوحة إلى كوالالمبور فكانت جيدة جداً وقريبة من الممتاز واستغربت من توزيع المقاعد على الطيارة .. جميع الطيارات اللي من نفس النوع يكون توزيع الكراسي 2 - 4 - 2 أما طيران القطرية فهو 3 - 4 - 3 فتحس أن الممرات جداً ضيقة .. أما بشكل عام فهي ممتازة .. حتى من ناحية الشاشات والأفلام الموجودة فهي جيدة واللي عجبني أنهم مهتمين بالأشياء اللي تخص الأطفال من الأفلام والبرامج أما الطيارة اللي من بانكوك إلى الدوحة كانت روعة وجديدة جداً وهي من نوع (A 380) وكانت رائع الشاشات كبيرة والجهاز كأنه آيفون المشكلة في طيران القطرية في المضيفين والمضيفات شوي تعاملهم جاف ما فيه مرونه وإذا يسوي لك شيء يحسسك أنه متملل من وجهة نظري الشخصية آنه سافرت في 2009 على طيران الاتحاد وكانت أفضل من القطرية في وسع الكراسي والخدمة أيضاً وسافرت في 2012 على طيران الإمارات ولكن على البزنز وكانت على الطيارة (A 380) وكانت ممتازة والخدمة 100 % |
رد: رحــلــتــي الــثــانــيــة إلــى مــالــيــزيــا (مــايــو 2015) ... اخوي ابو راشد الغالي بما إنك ماشاء الله تبارك الله ,,, سافرت الى ماليزيا وتايلند مالافضل في وجهة نظرك من ناحية الاماكن السياحية والفنادق , والمطاعم , والبنيه التحتيه , وتعامل الشعب http://www.arabtrvl.com/vb/t7894.html#post123983 فالك المركز الاول ان شاء الله |
رد: رحــلــتــي الــثــانــيــة إلــى مــالــيــزيــا (مــايــو 2015) ... واصل يابو راشد متابعين معاك التقرير الاجمل والاميز |
رد: رحــلــتــي الــثــانــيــة إلــى مــالــيــزيــا (مــايــو 2015) ... هلا أخوي ابو عمر _ JDH يا أخوي أبو عمر كل بلد له مميزاته أول شيء راح أتحدث عن ماليزيا : ماليزيا بلد منظم وراقي وحتى الشعب الماليزي شعب راقي وسهل التعامل معاهم من ناحية الطبيعة ماليزيا طبيعتها خلابة وبلد نظيف وتحس بالراحة فيه، من ناحية الأماكن السياحة يعني تقريبا نفس الشيء حدائق الحيوانات والرحلات البحرية لكن في اختلاف في بعض الأماكن السياحية والرحلات من ناحية المطاعم ماليزيا أفضل بكثير من تايلند، ومن ناحية البنية التحتية أيضاً ماليزيا تتغلب على تايند بكثير ومن ناحية الفنادق أيضاً ماليزيا تتغلب على تايلند إلى في جزيرة بوكيت في فنادق راقية وفخمة جداً ولكنها غالية ويخصوص تعامل الشعب في ماليزيا تقدر تتفاهم مع الجميع لأن الأغلب يتحدثون اللغة الإنجليزية أما تايلند فتعاني في مسألة التفاهم حتى بعض اللي يشتغلون في الفنادق ما يفهمون إنجليزي تايلند إذا بنتكلم عن بانكوك أهي فيها أماكن سياحية لكن يغلب عليها طابع التسوق ولكنك راح تعاني من الزحمة زحمة كل وقت صبح ظهر عصر ليل كل وقت زحمة وبانكوك فقط للي يبي يتسوق أما بوكيت فهي جميلة وتقريباً تضاريسها مثل ماليزيا فيها أماكن سياحية مثل زيارة الجزر وفنتازيا ولكني آنه أعتبرها جزيرة للاسترخاء يعني تطلع لك يومين أو ثلاث أيام رحلات وبعدها تقعد لك باقي الأيام للاسترخاء وما يميز بوكيت هو تواجد الفنادق اللي توفر فلل خاصة مع برك سباحة وبأسعار معقولة لكنها بعيد قليلاً عن وسط المدينة في ماليزيا أحس براحة تامة عكس تايلند تحس بالخوف قليلاً مثال تركب تاكسي تجوف السايق من راسة لين رجوله كلها تاتو وشكله مجرم وين ترتاح إذا ركبت معاه ونفس الشيء سواقين التك تك أشكالهم ما ترتاح لها لكن في النهاية يبقى كل بلد له خصوصيته وله مميزاته، ولكن آنه من وجهة نظري حبيت وأرتحت حق ماليزيا أكثر من تايلند كوني زرت ماليزيا مرتين فقط وتايلند خمس مرات ==================================== حياك الله يا أخوي ابوخالد313 وإن شاء الله تستمتع في مشاهدة التقرير |
رد: رحــلــتــي الــثــانــيــة إلــى مــالــيــزيــا (مــايــو 2015) ... ماشاء الله تبارك الله , اشكرك على ردك الاكثر من رائع ,,,, صح كلامك الفنادق الفخمة في بوكيت خرافيه جداً وكثيرة عد واغلط من كثرتها , انا نفسي يسمحون لنا احنا السعوديين للذهاب الى تايلند , في خاطري من زمان اروح لجزيرة بوكيت الجميلة |
رد: رحــلــتــي الــثــانــيــة إلــى مــالــيــزيــا (مــايــو 2015) ... العفووو يا أخوي ابو عمر _ JDH وليش يا أخوي السعوديين ممنوع عليهم السفر إلى تايلند ؟؟ في سفرتي الأخيرة في بوكيت رحنا رحلة إلى جزيرة جميس بوند وكانت معانا عائلة سعودية زوج وزوجته وأبنهم الصغير وفي 2009 بعد نفس الشيء يوم أروح رحلة إلى جزيرة جميس بوند كانت معانا عائلة سعودية زوج وزوجته و2 من بناتهم |
رد: رحــلــتــي الــثــانــيــة إلــى مــالــيــزيــا (مــايــو 2015) ... ياسلام بو راشد تفاصيل وصور رائعة عجبني التصوير وايد تسلم الايادي أخيييييييه على تايلند وماليزيا :(153): كل ديره لها طعم :(114): وصدقت ماليزيا ارقى وانظف لكن رحلات تايلند اكثر والتسوق في بانكوك خياااااااااااااالي انا اغوص غوووووووووووص زوجي يقول بس وانا اشتري واشتري واشتري............. :busted_red: متابعينك ،، |
رد: رحــلــتــي الــثــانــيــة إلــى مــالــيــزيــا (مــايــو 2015) ... من ذوقج يا أختي قصة حب إي نعم بانكوك حق التسوق .. هناك الحريم ينسون روحهم ههههههههههههه ولكن في نقطة ما ذكرتها يا أخوي ابو عمر _ JDH أن الأكل في ماليزيا أرخص من تايلند بكثير .. أضرب لك مثال في ماليزيا ناخذ 4 وجبات مع 9 حبات نقت من ماكدونالدز يطلع حسابنا ( من40 إلى 50) رينغت في تايلند ناخذ 4 وجبات مع 9 حبات نقت من ماكدونالدز يطلع حسابنا (من 900 إلى 1000) بات يعني ضعف السعر .. وفوق ذي كله أكل ماكدونالدز في ماليزيا أفضل وأحلى بكثير من تايلند بشكل عام تايلند صارت أغلى بوايد من قبل وتخطت ماليزيا في الغلاء .. أما من ناحية التسوق تايلند غلت وايد لكن لين الحين صايرة بضاعتها أرخص من غيرها |
رد: رحــلــتــي الــثــانــيــة إلــى مــالــيــزيــا (مــايــو 2015) ... تقرير رائع و ابداع متواصل الزيارة الثالثة لماليزيا اسألك بان تجرب ولاية جوهر ... راح تعجبك ! لا تطول علينا ,,,,, نحن متواجدون الى اخر التقرير |
رد: رحــلــتــي الــثــانــيــة إلــى مــالــيــزيــا (مــايــو 2015) ... من ذوقك يا أخوي أبوعبدالله (الاسفار) إن شاء الله الرحلة الثالثة راح أخليها كلها في ماليزيا و أزور أماكن أكثر وحياك الله يا أخوي وأتمنى أن يعجبكم التقرير |
رد: رحــلــتــي الــثــانــيــة إلــى مــالــيــزيــا (مــايــو 2015) ... اليوم الثالث (22 مايو 2015) هذا اليوم أسميه يوم الوناسة والتعاسة وراح تعرفون ليش سميت هذا اليوم بهذه التسمية، المهم قعدنا الساعة (8:00) من النوم وذهبنا إلى مطعم الفطور في الطابق اللوبي لأنه أكبر وفيه تعدد الأطباق أكثر من طابق الكلوب اللي حجمة صغير، وأول ما دخلت المطعم، تفاجأت من كبر حجم المطعم والأطباق المتعددة اللي تخليك تحتار شنو تاكل، وبعد ما فطرنا صعدنا الغرفة على الساعة (9:00) وبدلنا ملابسنا وجهزنا شنطتنا ونزلنا إلى اللوبي كان فيه مكتب عند مدخل الفندق من الداخل تابع حديقة الصنواي لاجون وسألته عن أسهار التذاكر وقالي (150 رينغت) للكبير و (120 رينغت) للصغير هذي صورة للأسعار ودفعنا لهم المبلغ وأعطونا تذاكر الدخول وهي عبارة عن ساعة ورقية تلف على اليد، وقالنا شلون نروح للحديقة عن طريق الفندق، ورحنا على وصف الموظف وهو نزلنا من مصاعد الفندق إلى الطابق الأرضي وبعدها طلعنا على بركة سباحة الفندق، وبعدها تمشينا في هالممرات إلى أن جتنا بوابة من حديد وفيها أكسس بطاقة غرفة الفندق، يعني ما تفتح البوابة إلا إذا وضعت بطاقة الغرفة، وهي بوابة خاصة لفندق الصنواي لاجون وبعد ما دخلنا توجهنا إلى كاونتر اللوكرات وأخذنا لوكر كبير نسيت السعر لكني إذا ما خابتني الذاكرة كان (39) رينغت، وحطينا أغراضنا ورحنا على المسابح ولعبنا في الألعاب المائية الزحاليق، وبعدها بدلنا ملابسنا ورحنا لعبنا في الألعاب الالكترونية وتمشينا في حديقة الحيوانات، صورت صور كثيرة للحديقة بس ما أدري وين راحت وهناك بعد ما تقدر تاخذ راحتك في التصوير، والحين أترككم مع بعض الصور البسيطة للحديقة وبعد ما خلصنا من اللعب في الحديقة الالكترونية وتمشينا في حديقة الحيوانات، رحنا لمطعم برجركينج وطلبنا غداء من عنده وأخذنا وجبه عائلية فيها (4) وجبات وكانت بسعر (64 رينغت)، وبعدها وأحنا طالعين مرينا على كشك يبي بيطخ أحمر وشرينا من عنده صحن صغير بسعر (10 رينغت) وماء بسعر (5 رينغت) وطلعنا من الحديقة تقريباً على الساعة (4:30)، ورحنا إلى غرفتنا للاستحمام والراحة قليلاً وبعدها الذهاب إلى مجمع البراميد، وبصراحة ما أتوقعت أن الحديقة رائعة وكبيرة واستانسنا فيها وايد أحنا الكبار وأيضاً الأطفال (وهذي أهي الوناسة). (أما التعاسة فهي) دخلت أم العيال الحمام أعزكم الله تسبح الأطفال وبدأت بشوق وعندما أم العيال تسبح شوق قامت شوق الله يهداها من البانيو تبي تاخذ الصابونة وجان تزلق وتطيح على حنجها على طرف البانيو وجان ينشق ويتبطل حنجها تقريباً 2 سم إلى 3 سم وصار الجرح عميق لدرجة أن عظم الفك السفلي بين من عمق الجرح، ومع الطيحة بعد عضت على لسانها وأنقطع جزء بسيط منه وقام الدم يطلع من حنجها ولسانها، وبسرعة بسرعة اتصلت حق الفندق قلت لهم بنتي طاحت في الحمام وأبي سيارة حق أقرب مستشفى، نزلت بسرعة إلى اللوبي ورحت للاستقبال وقلت لهم آنه اتصلت لكم أبي سيارة للمستشفى أخذوني لأستقبال السيارات برع الفندق وقالي أدفع (17) رينغت حق السيارة للمستشفى، دفعت وركبنا السيارة إلى المستشفى وكان المستشفى قريب من الفندق وكان أسمه صنواي وهو تابع لشركة الفندق. وأول ما وصلنا المستشفى رحنا على طول إلى الطوارئ وعملوا لنا تسجيل دخول ونادوا الدكتورة وعاينتها وقالت لنا يبي لها خياطة، ولازم ننومها في المستشفى على الأقل يومين علشان نخدرها تخدير كامل ونسوي لها الخياطة وراح تكلفك هالعملية (6000) رينغت، قلت لهم المبلغ وايد وآنه بكرة بطلع من الفندق وبروح كوالالمبور، قالت لي الدكتورة عيل مافي إلا نسوي لها العملية الحين بدون تخدير كامل راح نخدر فقط المنطقة ولكن إبرة المخدر مؤلمة وقلت لي بعد بشرط أنكم تساعدونا في مسكها، قلت لها أوكي موافق، قالت لي هذي العملية راح تكلفكم تقريباً (2000 إلى 3000 رينغت) قلت لها مو مشكلة، قالت لي روح المحاسبة وأدفع (3000) رينغت، وإذا طلع المبلغ أقل رجعنا لك المبلغ، وإذا طلع أكثر أدفع الفرق، قلت لهم الحين ما عندي (3000) رينغت عندي بس (1500) رينغت، وفلوسي الباقي في الفندق، قالوا لي روح الفندق جيب الفلوس وتعال، ورحت لأستقبال المستشفى قلت لهم أبي تاكسي وأخذتني الموظفة إلى جهاز السامسونغ تاب وكان في البرنامج اللي ذكرته في المقدمة عن طلب التاكسي وعملت لي طلب للتاكسي، أنتظرت 15 دقيقة ووصل التاكسي، قلت له ودني فندق صنواي لاجون، قام الغبي ووداني فندق البراميد، قلت له أبي فندق صنواي لاجون، قال أوووه نسيت وقالي عاد الحين لازم نطلع على الشارع الرئيسي وما أدري شنو قلت له سوه اللي بتسوية يالله بسرعة وصلنا الفندق، ووصلنا الفندق بعد 20 دقيقة من الحواطه، أخذت الفلوس ورجعت أخذت سيارة من الفندق بنفس السعر عطيتهم (17) رينغت إلى المستشفى، ورحت للمحاسبة ودفعت لها (3000) رينغت وأعطوني رصيد وبعدها دخلوا بنتي إلى غرفة العمليات وربطوها جسمها كله بأحزمة وأنه ماسك يدها وممرضة ماسكة رجلها ووممرضة ثانية ماسكة راسها، وأهي مسكينة تصيح من قلب، وبعد معاناه قدرت الدكتورة تطق إبراه المخدر الموضعي، وانتظرنا شوية وبعدها خيطت الدكتورة الجرح بـ (3) غرز من الداخل وبعدها (5) غرز من الخارج، وبعدها غطوه بالقطن واللزاق وطلعنا، وقعدنا ننطر حوالي نصف ساعة لين ما يحسبون تكاليف العملية، وبعدها نادتني المحاسبة وقالت لي الحساب كامل طلع (1980) رينغت وراح نرجع لك الفلوس الباقية وأعطوني باقي المبلغ ودواء مسكن للجرح، وأخذت الفلوس ورحت على الاستقبال وقلت لها أبي أتصل حق الفندق أطلب سيارة، وأتصلنا حق الفندق وطلبنا سيارة ترجعنا إلى الفندق قالي (25 رينغت) قلت له ليش آنه مساعة رحت المستشفى مرتين بـ (17) رينعت، قالي إذا طلب السيارة ناخذ عليك (50%) زيادة، قلت له أوكي آنه أنتظركم في المستشفى، واحنا ننتظر شفت ستاربوكس في استقبال المستشفى ورحت شريت للأطفال (2) دونات، وبعدها نطرنا حوالي (5) دقايق وإلا السيارة عندنا رجعنا الفندق ورحنا للغرفة وقعدت مع شوق أواسيها وأحضنها وأحاول العب معاها وأضحكها لين ما جفتها صارت شوية طبيعية لأنها كانت خايفة ومن كثر البكاء والصراخ تعبت، قلت لها تبين أوديج المجمع أشتري لج لعبة، قالت إي. وبدلنا ملابسنا نزلنا على مجمع البراميد وإلا أغلب المحلات بدأت تسكر لأنها كانت الساعة (10) فليل، فرحت بسرعة بسرعة إلى مطعم الطربوش علشان نتعشى عنده (على توصية الأخت قصة حب) ويوم وصلنا عنده إلى طلع المطعم فاتح ومايسكر إلا الساعة (11)، دخلنا المطعم وطلبنا حمص وبطاطس وطبق روبيان مشوي وطبقين كباب مع رز وطلع الحساب (178) رينغت، وهذي صور للعشاء وبعد ما خلصنا عشاء طلعنا على المجمع وإلا كل المحلات سكرت، وقلنا خلاص خلنا نرجع الفندق ونرتاح بعد هالتعب، وفي رجعتنا إلى الفندق مرينا على ساحة التزلج وإلا كان في مباريات هوكي الجليد واستانسو الأطفال وقعدوا يجوفون ويشجعون، وكان جنبنا ماكدونالدز قالوا الاطفال يبون آيسكريم وشريت لهم آيسكريم، وقعدنا نجوف المباريات لين (12:15) قلت لهم بس يالله خلاص خلنا نروح الغرفة صرنا تعبانين وورانا تجهيز الشناط، وبس ورجعنا الغرفة ورقدنا الأطفال وقعدنا أنا وأم العيال نرتب الشنط ونسكرهم لأن بكرة راح نروح إلى كوالالمبور، وبعد ما رتبنا الشنط نمنا. ولين هني خلصنا حلقة اليوم الثالث أسمحولنا اليوم ما صورنا صور وايد لأن كنا في الحديقة وبسبب الحادث اللي صار وهذي مصاريف اليوم الثالث ونلقاكم إن شاء الله في أقرب وقت مع حلقة اليوم الرابع وإنتظرونا :yolks00290: |
| الساعة الآن 07:39 PM |
Powered by vBulletin® Copyright ©2000 - 2024, Jelsoft Enterprises Ltd.
Search Engine Friendly URLs by vBSEO