ماليزيا+اندونيسيا 22يوم وصور بتقنية جديده (للتحدي) - الصفحة 13

رائد بومريم · 06-02-2015, 01:35 AM

وكملنا طريقنا متجهين للهضبه وشفنا حديقة الفرشات

ودخلنا وتفرجنا ب٥٤ تقريبا
واليكم بعض الصور

وفيه بعض الحيوانات

وفيه بعض الفراشات والحشرات حاطينهم في بترينه ويقولون كل اللي موجود في البترينه .. موجودين داخل الحديقه

وطلعنا وكملنا طريقنا الى الهضبه ..

يبتع بإذن الله ...

رائد بومريم · 06-02-2015, 02:07 AM

وحنا في طريقنا متجهين للهضبه .. شفنا حديقة النباتات بس مادخلنا.. وكملنا الطريق وشفنا حديقة الفواكهه

ودخلنا وتفرجنا ب ٧٠ ... طبعا اللي جايين بتاكسي يوقفون تحت .. ويركبون باص يطلع فيهم الى الكاونتر حق التذاكر .. بس انا عندي سيارة .. طلعت بالسياره الى الكاونتر ونزلت قصيت التذاكر وركبت الباص ابو 15راكب وكان معنا ثلاث عوايل تقريبا .. كل واحد مع زوجته ..
المهم معنا واحد يشرح لنا عن كل شجره ومتى تنبت وكل كم تنبت وايش اسمها ووشو طعمها .. وهنا بعض الصور

وبعدين رحنا على بوفيه مفتوح من الفواكهه .. تأكل مجانا وبعدها تختار اي فاكهه تسوي منها عصير وتقدر طبعا تخلط اي فاكهه مع فاكهه ثانيه وتسوي منها عصير وتشرب مجانا.. وهنا بعض صور البوفيه ..

وبعد ماخلطنا عصير الاناناس مع فاكهه ثانيه نسيت اسمها بنصيحه من اللي كان يشرح لنا دخلنا محل هناك يبيع بعض المستحضرات الطبيعيه المصنوعه من الفواكه مثل بودره للجلد من جوز الهند او شي كذا .. المهم ماشرينا منه شي ... وطلعنا وركبنا الباص وبعد ماتجمعوا العوايل الثانيه نزلنا عند الكوانتر ونزل واحد اللي كان يشرح لنا ونزلته معه .. وقالوا لي لا انت انزل تحت ... قلت لهم سيارتي هنا ... قالوا ااااااه عندك سياره .. اوكيه انزل هنا .. (زعطه)
.. قالوا اللي عنده سياره هنا ينزل واللي جاي بتاكسي ينتظر لين ننزله تحت .. وركبنا سيارتنا وطلعنا ووكملنا الطريق متجهين الى الهضبه ..

يتبع بإذن الله ...

رائد بومريم · 06-02-2015, 02:20 AM

وكملنا الطريق متجهين الى الهضبه .. ومرينا على الشلال

ووقفنا على جانب الطريق (خلني ازعط ) ووقفنا سيارتنا على جانب الطريق ودخلنا

ووصلنا للشلال (مش شلال.. مصب ماي)

وصورنا وطلعنا وكملنا الطريق الى الهضبه هذي الاماكن كلها على طريق واحد

يتبع بإذن الله ..

طارق عنايات · 06-02-2015, 02:43 AM

عجبتك الحدائق بو مريم ؟؟

هل تنصح بزيارتها ( التوابل ، الفراشات ، الفواكه ) ؟؟

تسلم ايدك متابع معاك

رائد بومريم · 06-02-2015, 03:09 AM

وكملنا طريقنا الى الهضبه ووصلنا الهضبه

ووقفنا في اقرب مواقف ب٥ رينجت واتوقع ان الهندي قص علينا واخذ منا فلوس والمواقف مجانا مش تبعه اصلا لاني وقفت قريب ورشه وطلع لي من الورشه وقالي الموقف ب 5 رينجت قلت اوكيه ورحنا مشي الى بوابة الهضبه (مشوار بسيط) ..
قلنا للعسكر الموجودين على البوابه نروح من هذه البوابه ؟؟ قالي ايه .. ورحنا .. وبعدين لحقنا وقال وين رايحين ؟؟ قلت ماادري .. انتوا اللي قلتوا لي .. قال الحقني

ووصلنا للبوابه وقصينا التذاكر للقطار

المهم وصعدنا بالقطار على الهضبه ب ٣٠ وصلنا فوق

فيه مطاعم

ومحل يسوي اشكال بالشمع

واخذنا سيارة الجولف جوله ب ٣٠

اخذ فينا لفه و تصوير

هذه نبته اللي تأكل الحشرات .. اذا دخلت فيها حشره تسكر عليها

وهذه على شكل وجه انسان

وشفنا النبته المستحيه اللي تكون مفتوحه اوراقها واذا لمستها تسكر اوراقها بس ماصورتها للاسف
وهنا منظر على جسر بينانج اللي يربطها بباقي ماليزيا

وهنا منظر على بينانج

وكانت فيه بيوت فوق الهضبه يقول السواق حق سيارة القولف انها بيوت للاسره الحاكمه القديمه ولكبار التجار بس تركوها ذا الحين ولا يجون الا في اوقات بسيطه في السنه ..
وخلصنا اللفه بسيارة القولف وشفنا ذا الطريق

ومشينا فيه وشفنا فيه مسجد وجنبه كنيسه
وهذا المسجد .. صلينا فيه

وهذا الكنيسه قدامها العاب

وبعدها نزلنا من الهضبه

يتبع بإذن الله ...

رائد بومريم · 06-02-2015, 03:19 AM

وطلعنا من الهضبه ورحنا مجمع غورنيه
ماادري ليه ماصورت من الخارج

تمشينا فيه شوي وتعشينا

ولابد من الحلى

وعندهم انواع ايسكريمات عجيبه

وهذا الذي لايقاوم (خصوصا ان عندهم نكهات كثيره)

وبالرغم من كثرة النكهات الا ان الطلب مايتغير هنا او هناك (واحد بالجبن وواحد بالنوتيلا)

ورجعنا الفندق وسالنا السيكيورتي حق الفندق ..فيه مغسله ثياب؟ قالوا فيه بس مسكره ذا الحين.. وقال واحد واقف جنب السكيورتي عطها الاستقبال وهم يودونها .. سالت الاستقبال؟؟ قال فيه مغسله... طيب اعطيك الثياب ذا الحين؟؟ قال المشكله مااقدر ارسلهم الا الصباح ..طيب ومتى يخلصون؟؟ قال ثاني يوم بيخلصون.. وللاسف ثاني يوم حنا بنمشي الكاميرون .. قلت لا خلاص
وبكذا انتهى اليوم الخامس

رائد بومريم · 06-02-2015, 03:24 AM

اقتباس : المشاركة الأصلية كتبت بواسطة طارق عنايات

عجبتك الحدائق بو مريم ؟؟
ايه نعم عجبتني
هل تنصح بزيارتها ( التوابل ، الفراشات ، الفواكه ) ؟؟
ايه نعم انصح بزيارتها
وفي نفس الوقت اقول انك تقدر تستغني عنها لانه فيه غيرها في مدن ثانيه
مثل الفواكه موجوده في لنكاوي والفرشات اتوقع موجوده في كوالالمبور
واللي اشوفه انه اذا كان ماعندك وقت والايام اللي بتقضيها في ماليزيا قليله .. مثلا اقل من عشر ايام تقدر تستغني عن هذه الحدايق وعن كل بينانج وتخلي رحلتك بس لنكاوي وكوالالمبور .. اما اذا كان عندك متسع من الوقت .. لا .. اقولك رح لها.. تستاهل.
تسلم ايدك متابع معاك

الله يسلمك

فيصل · 06-02-2015, 07:19 PM

حلو ما ضعت
ومريت بالطريق التوابل

بس ما تتوثع أن الفراشات اللي بكوالامبور افضل

A.Alsubhi · 06-02-2015, 08:40 PM

يعطيك العافية اخوي بو مريم جزء ولا اروع

مالاحظت ماكدونالدز فروع جنوب شرق اسيا افضل من فروعنا من ناحية لذة الاكل

Al-Hajri VIP · 07-02-2015, 10:33 PM

الله يوفقك يابو مريم على التقرير الجميل جدا جدا...ننتظر باقي الإبداع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلة الى اندونيسيا و ايضا ماليزيا ارجو الافادة	ابو الوليد	بوابة اندونيسيا	10	30-07-2019 02:29 AM
محتاج مساعدتكم بجدول 16 يوم ماليزيا و اندونيسيا	abdullah551	ماليزيا	15	06-12-2017 07:08 PM
مقارنة بين ماليزيا و اندونيسيا	ali-333	بوابة اندونيسيا	28	02-07-2015 06:15 AM
التصوير بتقنية 360 درجة ببرنامج bubbli على الايفون (للتحدي)	رائد بومريم	بوابة الكاميرات	20	27-06-2015 01:55 AM
ماليزيا+اندونيسيا 22يوم وصور بتقنية جديده (للتحدي) القسم الاندونيسي	رائد بومريم	بوابة اندونيسيا	65	26-06-2015 02:07 AM