السلام عليكم ورحمة الله وبركاته

ابي فزعتكم يا اعضاء المنتدى ولاتبخلون علي من خبرتكم وادري انكم مابتقصرون ان شاء الله

انا كنت رافض فكرة السفر الى تركيا الين قريت كم تقرير من الاخوان الله يعطيهم العافيه وخذني الحماس وحجزت لي انا والمدام وبتني 6 سنوات

الوقت 11-25 جولاي (14 ليله) والذهاب والعوده من مطار الملك فهد الى مطار اتاتورك ولاكن لقلة الوقت والتزامي في العمل ماقدرت اكون فكره كامله او احدد خط سير الرحله وقلت الشباب اكيد ماراح يقصرون ويعطوني من خبرتهم شوي

حبيت في رحلتي ان شاء الله يكون اولها الذهاب الى الريف واستئجار سياره وفي اخر الرحله اسطنبول لتبضع والله يكون في عون جيبي

وابي اخذ رايكم بعد في الذهاب الى بدروم ولاكن للاسف مالقيت تقارير مكتوبه عنها وكل الزوار يفضلون الذهاب الى طرابزون

افيدوني تراني ضايع ابي جدول لخط سير الرحله وطريقة التنقل الله لا يهينكم والله يعطيكم العافيه..

عليكم السلام

بودروم شلها من سفرتكم لأنها ماتصلح في شهر جولاي

حر ورطوبه ماعدا الشمال حر في جولاي

تقدر تروح بورصه و بعدها يلوا و ترمال وبعدها ع سبانجا و منها ع اسطنبول

رحله سعيده بإذن الله


أرسلت بواسطة iPhone بإستخدام Tapatalk

وٍعَلْيّكَمُ الْسَلآإمّ وٍرٍحَمُةٌ الله وٍبُرٍكآإتَهّ



يا عزيزي


تبي العلم مني ؟؟
حلوو انك حددت الفترة للسفر
14 ليلة


ثاني خطوة هي تحدد ميزانيتك
قبل تحدد خط السير



لأن خط السير يعتمد كلياً على الميزانية
من وجهة نظري





وكاقتراح بسيط بما انكم عايلة صغيرة


ابيك تقول لي
بالضبط متى تنزل مطار اتاتورك
الوقت و اليوم

وبالضبط متى ترجع من اتاتورك للسعودية
بالوقت واليوم



عندها خذ مني الجدول اللي بقترحه لك




وايضاً حدد لي وش جوك بالفنادق
هل تحب الخمس نجوم والرفاهية والموقع
والا بس مكان نظيف وامان وكويس






تحياتي


أرسلت بواسطة أوكسير بإستخدام Tapatalk

ردِّدْ دائماً:
سبحانك اللهم وبحمدك ( أستغفرك وأتوب اليك )

يعطيك العافيه اخوي سامي 224 وخلاص بدروم انحذفت من خط السير

memo تسلم وماتقصر بس ياليت لو تفيدني بعدد الايام في كل منطقه وترتيبهم وطريقة التنقل من منطقه الى الثانيه

حبيبي اوكسير قريت لك نصايح كثير للاخوان في المنتدى

اسمع يالخوي

اولا بالنسبه للميزانيه في حدود ال 15 الف يزدون شوي مومشكله لان الواحد ماوده يقصر على نفسه وهو رايح ينبسط

ثانيا ان شاءالله بيكون وصولي مطار اتاتورك يوم 11 جولاي الساعه 12:20 الظهر والاقلاع من مطار اتاتورك الى ارض الوطن يوم 25 جولاي الساعه 1:20 الظهر

ثالثا الفنادف وانا اشهد انك جبتها على الجرح يا اوكسير
بصراحه انا كنت من الناس الي مايحجز غير خمس نجوم ولاكن اكتشفت اني يادوب ارجع للفندق وقت النوم بس من بعد الفطور في الصباح عشان كذا قررت لا للخمس نجوم بعد اليوم ويكفيني فندق يكون نظيف وامان وموقعه يكون قريب من اماكن كثير لتمشيه بالارجل

والله يعطيك العافيه وعساك على القوه وننتظر آراء الاخوان والاخوات والكل يدلو بدلوه في هذا الموضوع وان شاءالله افيد واستفيد

يا غالي يابو تركي



اوكي انا بقترح عليك
بس ترا وقتك بالموسم
يعني زيد الميزانية ( احتياطياً )
خصوصاً دامك مقتنع ان الواحد يرخي على نفسه بالسفر لانه طالع تمشية وسياحة



لو كان وقتك اكتوبر ونوفمبر و ديسمبر ويناير
كنت بقول لك الخمسطعش تزيد وتكفي وترجع ومعك اربعة الاف




اوكي اسمع مني مقترحي لك فديتك




قبل كل شيء
بهالساعة المباركة واليوم المبارك
ان الله يغفر لابوي واخوي وجميع اموات المسلمين ويعفو عنهم
ويجمعنا بهم بالجنة واياكم





الوصول 11 july
دامك بتوصل الظهر على الفندق ع طول
والمنطقة اللي تناسبك
هي المدينة القديمة وتشمل احياء
سيركجي جولهانه سلطان احمد بايزيد
وكلها متجاورات مع محبي المشي ممتازه جدا
ولا يوجد تعب اطلاقاً
كل ما يشغل تفكيرك ويتعب همتك الجو
لان جولاي في اسطنبول حار
وشمسهم حارقه وليست كما في المملكة الحرارة 40 ويلعبون كورة [emoji12][emoji16]





خذ لك ليلتين
تستكشف جميع معالم المدينة القديمة
توب كابي
المتحف الاسلامي
ايا صوفيا
الجامع الازرق
جامع سليمان القانوني
ميدان الحصن
بيت ابراهيم باشا
حمام حريم السلطان <<< الدخول للنساء
وفي ساحة السلطان احمد بتلقى باصات الهوب هوب باصات طابقين
داخلي وعلوي مكشوف
ياخذك بخط سير يفر فيك شوارع اسطنبول
جداً مناسب واسعار رمزية


في يوم 13 july
يكون تسجيل خروجك
وعلى المطار يا عزيزي
هرباً من الحر اللي بيخرب متعتكم في اسطنبول نوعاً ما ( حسب تقبلكم للحرارة )

وتركب طيران اقتصادي على طرابزون
غير مكلف ان شاءالله
ذهاب وعودة
وتستطيع الحجز عن طريق الموقع الالكتروني
وانتبه فقط للتوقيت
يفضل الذهاب صباحاً
والعودة عصرا قبيل المساء



في طرابزون من المطار استاجر سيارة
ولا تاخذ الا من الشركات العالمية المعروفة


وعلى طول اوزنجول يا حبيبي
اقعد فيها 3 ليالي
14-15-16 july
ومنها تمر على شكرسو و سلطان مراد
ويكفيك الاستجمام فيها والجو العليل تعيش جوك يا شيخ

وبعدها تروح ايدير ليلتين تكفي توفي
17-18
تعيش في طبيعتها والحمامات الكبريتيه كذلك



وتنطلق الى طرابزون وامكث هناك ليلتين
19-20
منها تستكشف المنطقة من معبد صوميلا بس مسكر ومغارة كال ومنتزه ومقهى بوزتبه
وتتنقل في ميدان طرابزون جدا جدا رائع
وتستعد بتسجيل الخروج للمطار والعودة لاسطنبول




تسكن في فندق غير الاول كنوع من التغيير
او اذا عجبك الفندق الاول تعيد وتسكن به ما يضر من باب ( شيء مجرب خير من شيء مذكور )





يكون عندك فيها
خمسة ليالي
21-22-23-24-25



تكمل فيها الجولات البعيدة اللي ما شملتها في اسطنبول اوب ما جيت

جولة البسفور
شاطيء اورتاكوي ومقاهيه الكلاسيكيه الراقيه
مقهى ومنتزه اولوس بارك
مقهى ومنتزه القبور ( ههههههه اقصد بيرلوتي ) وعنده جامع صلاح الدين الايوبي وقبره في منطقة ايوب
رصيف امينونو ( وااااااه يا ريحه السمك وووع ههههههه )
ومدينة فيلاند الترفيهيه
والاكواريوم
وميني ترك <<< احس مالها سنع
واخيراً التسوق والحركات وصرف مافي الجيب

مجمع اسطنبول راقي وحلو بس ارخ الريال شوي
مجمع الزيتونه مو كبير بس حلو وفيه محلات كلاسيك كويسه
مجمع جواهر لابأس
والسوق المصري
والبازار الكبير

واسواق شعبية في اروقة المدينة القديمة




لكن خل عندك قاعدة لا ترضخ لأول سعر او سلعة
كل ما تشتري شيء ستجد ما هو افضل منه او اقل سعراً من شرائك ( فلا تستعجل )



وما يمنع في يوم معين
اتفق مع المكاتب السياحية
تطلع بدري بدري وتروح بورصه
يوم كامل
وتتغدى هناك
وتشوف جبل الاولداغ والشجرة المعمرة
والسوق الروسي وسوق الجلود






الفنادق ما حددت لك شيء
لان كل واحد و رغبته
وموقع بوكينغ افضل خيار لك


جزيرة الاميرات
رايي الشخصي كلام فاضي
وسبانجا ويلوا والريف المجاور لاسطنبول
عوضتك فيه بالشمال افضل لك
توقيت سخان فرن


وهذا ما لدي يابو تركي






ترا تعبت وانا ماسك الجوال واكتب هههههههه





تحياتي



أرسلت بواسطة أوكسير بإستخدام Tapatalk

ردِّدْ دائماً:
سبحانك اللهم وبحمدك ( أستغفرك وأتوب اليك )

وتلقى في مواضيع المنتدى الطيب


اسماء المعالم السياحية والاسواق والبازارات والخرائط والاحداثيات وكل ما تحتاجه



برامج الجوال اللي راح تفيدك


google maps
trafi


الاول للخرايط والتوجيه
والثاني في اسطنبول يعلمك متى يوصلك اقرب مترو او ترام او باص




تحياتي


أرسلت بواسطة أوكسير بإستخدام Tapatalk

ردِّدْ دائماً:
سبحانك اللهم وبحمدك ( أستغفرك وأتوب اليك )

فديتك يا اوكسير ويعطيك العافيه كفيت ووفيت والله يرحم والدي ووالديك ويرحم موتانا وموتى المسلمين امين

خط سير جميل ونصائح رائعه واختيارات مناسبه وننتظر ردود الاخوان ونصائحهم وخصوصا للفنادق لاني ماقريت عن اي فندق

تحيه يا اوكسيييييييييير والله انا سفر تي الثلاثاء القادم ,,ومازلت استفيد مشاركاتك الجميله السريعه ,, مانلام في حب العرب المسافرون ,,,,,
الفنادق عن طريق البوكيينق ,,انا اول الايام في السلطان احمد وبعد العوده من الشمال اخترت السكن بالقرب من تقسيم ,,والله الله في تضبيط الخطه قبل الحجوزات...انا خططت للسكن اخر يومين في اسطنبول ثم بعد ما حجزت الفنادق ,قررت اخليها 3 ايام ,, وقروشه الين ضبطت امور الفندق ..يعني خطط تخطيط كامل ثم توكل على الله واحجز الفنادق...
اتمنى لك التوفيق,,,,