28-01-2015, 11:04 PM
|
#6 |
مميزة العرب المسافرون
تاريخ التسجيل : Dec 2014 رقم العضوية : 398 الدولة : الامارات الجنس : انثى المشاركات : 781
| أوسـمـة: هداوه |
كل الاوسمة:1 (more»)
| |  رد: موسوعتي الصغيره عن مدينة كوانزو التجاريه
رابعا : سوق هايين للاكترونيات
هذا السوق موجود داخل مدينة كوانزو ، وهو متخصص للاكترونيات
مثل الموبايلات والعاب الاطفال الاكترونيه واجهزه المطابخ والتلفزيونات
واكسسوارات الموبايلات وكل شي اكتروني .
وفي سوق اكترونيات كبير في مدينة شنزن واللي تبعد عن كوانزو على ما أعتقد
3 ساعات او اقل
نرجع لسوق هايين ..
انا اشتريت من عندهم تلفزونات ماركة فيلبس وعليها ضمان عالمي ، ولما رجعنا
وكلمنا الوكيل اكد النا انه تحت الضمان .
اما بالنسبه للاسعار ...
في الصين اعطونا اسعار في البدايه اغلى من عندنا
(( انا كنت ماخذه قبل السفر اسعار هاي الماركه حسب حجمها ))
انا تجادلت معاهم في السعر حتى حصلت على اسعار اقل منا
بعد هاى المعلومات الحلوه عن التلفزيونات اقولكم ، لاتشترووووووووووووون من الصين وانا تندمت اني اشتريت .
والسبب ....
1- الافضل اشتروه من بلادكم لانه لما تاخذون من الوكيل اللي في بلادكم بتحصلون معامله افضل لو من برع .
2- مهما حصلتوه برخص من عندهم الافضل من بلادكم (( طبعا انا اتكلم عن ماركه عالميه )) لاني انا حسيت اني ماوفرت ، بعد مارجعت البلاد من 4 شهور اسعارالفليبس نزلت عندنا ، وكارفور سوى عروض على ماركة فليبس وغيرها
(( خصم وهديه )) يعني انا ماسويت شي .
3- لاتنسون على الاسعار اللي اشتريت فيهم حطوا اسعار الشحن من بلادهم
والمصاريف اللي هنيه
عموما لاتشترون اكترونيات لين تتأكدون من انكم فعلا مستفيدين
خامسا: سوق ون لينك للهدايا
بعد ماخلصنا الاسواق المهمه للبيت ، قررنا نزور الاسواق الداخليه للتسوق الشخصي
فخذتنا حليمه الى سوق الهدايا سنتر ون لينك ، وهو داخل كوانزو...
وهو عباره عن سنتر يتكون من 3 أو 4 طوابق ، ويوجد في هذا السنتر بضائع متنوعه
امثله على البضائع الموجود في هذا السنتر :
1- اكسسوارات الشعر .
2- فاضات جميله لديكورات البيت.
3- ورود صناعيه.
4- اشكال كثيره من الميداليات للكبار والصغار ، وفي منهم بالكريستال ، وفي منهم
بشخصيات كرتونيه / وعلى شكل ماركات ومجسمات مختلفه ، ورخيص وايد ، مثلا
انا اشتريت ميداليه مرصعه بالكريستال من عندهم بقيمة 10 دراهم وهي نفسها انا
اشتريتها من عندنا ب80 درهم.
5- عندهم استكرات لليهال وللموبايلات وللحناء واشكال عجيبه
غريبه وبرخص مثلا انا اشتريت من عندهم استكر كريستال للموبايل ب3 دراهم ونفسه
انا ماخذه منه من قبل من البلاد ب75 درهم .
6- عندهم علب وصناديق خشب للهدايا.
7- اكتشفت عندهم محل ما أذكر اي طابق يمكن الثالث ، حصلت عنده مرايا ببراويز
مذهبه تجنن ، واسعاره وايد رخيصه ، يعني انا اشتريت تقريبا اكثر من10 مرايا بأقل
من 2000 درهم ، ووحده من هاي المرايا انا سمت سعرها في البلاد حصليتها
700 درهم ومن عندهم اعتقد خذيتها 150 درهم .
8- عندهم تحف ونوافير ، وانا اشتريت نافوره رخاميه ب700 درهم وشفت مثلها
عندنا ب1500 درهم .
هذا بعض اللي اذكره ، الصراحه السنتر وايد فيه اشياء ، ورخيييص ، وحلو للهدايا
وانا سرته مرتين وماغطيته ، وكنت اتمنى اسيره مره ثالثه بس وقتنا كان قصير
سادسا : سوق الشنط والجلود
هذا السوق جنني
سوق الشنط موجود داخل كوانزو ويتكون من 3 او 4 طوابق
وحليمه تقولي هذا احسن واحد ، وجنبه يمكن يمكن 10 سناتر نفس الشي
للجلود والشنط انا مارحتهم ، انا بس دخلت هذا وانذهلت لاتقولون بانكوك هني
اسواق عجيبه ، وهذا يعتبر من اسواق الجمله ، وعلشان جذي احيانا
بعض المحلات ماترضى تبيعلك الا قطع معينه ، اما الاسعار يابلاش ..
شو موجود في هذا السنتر :
1- شنط يد ، وشنط للسفر، وشنط للمدرسه ، ومنها ماركات معروفه مقلده ومنها
ماركات نحن مانعرفها ، بس شو اشياء عجييبه وحلو ورخيييييييييييييييييصه .
2- اكسسوارات واحزمه نسائيه اشكال حلوه وبالكريستال
وتقريبا اسعارهم على 20 و40 درهم ولو عندنا اكيد مب اقل عن 200 درهم .
3- احزمه رجاليه وابواك رجاليه ونسائيه واقلام رجاليه وكلها ماركات
مقلده ومنها تقليد جوده .
4- دلاغات ( جوارب) ماركات مثل اديداس وبوما وشانيل ....الخ
رجالي ونسائي واسعار ببلاش ، اعتقد انا اخذت النص درزن ب 20 درهم .
5- كابات رجاليه ماركات معروفه على 10 دراهم.
6- عندهم بعض ملابس الاطفال ماركة بربري وصدقوني انا
ما اعتقد انه تقليد انا اعتقد انه مصنع لشركة بربري في لندن ، شغل جوده وراقي
ومنها فساتين للبنات الصغار ، وبالطوات للبنات الكبار والصغار ، وملابس ولاديه للصغارواحذيه ولاديه للصغار ، وجاكيتات وتي شيرتات للبنات الكبار ، وكلها ماركة بربري واسعارهم شوي غاليه ، مثلا لبسه بناتيه ب 70 درهم وفي الاصل اكيد مب اقل من 500 درهم وهاي المحلات ماتبيع وايد تبيع الزياده اللي عندها ، يعني ممكن لبسه
تحصلون مقاس واحد منها وماشي غيرها ، وانا خميت هاي البضاعه .
7- سكارفات ( شالات ) عندهم ماركات عالميه نوعين جوده
واقل جوده ، الجوده الواحد ب 40 درهم والاقل ب10 دراهم ، الصراحه وايد نوعيتهم ممتازه وهاذيل عندنا غلايه .
8- بعض المحلات تبيع احذيه .
9- ومحلات تبيع ساعات ماركات مقلده بس ماعجبتني ، في سوق
ثاني مختص للساعات المقلده واكيد عندهم ماركات مقلده اكثر جوده ، ولكن للاسف مازرته .
10 – عندهم اكسسوارت الشعر وغيرها .
هذا كله اللي اذكره من هذا السوق ، ولكن الغالب على السوق هو الشنط والجلود ، وانا
اعرف انه عندهم اسواق متخصصه لملابس الاطفال..
واسواق للحذيه فقط ..
واسواق للاقمشه ...
واسواق للفساتين...
واسواق للساعات .... الخ
كوانزو عالم كبير من التسوق الذي لاينتهي ....
للاسف أختفت الصوره اللي فيها اسم المول
ولكن اذا سرتوا هناك اسألوا المترجم عنه
واللي عنده اسم هالموضوع محتفظ فيه من تقريري يخبرني عنه وانا بضيفه ان شاءالله
التعديل الأخير تم بواسطة هداوه ; 10-02-2016 الساعة 12:52 PM |
|  |
19الاعجاب
العرض الشجري
المواضيع المتشابهه 
