السلام عليكم
كيفكم يا شباب ويا شابات
جلست الصيفية هذي في بريطانيا مدة شهر , وبكتب لكم عن هذه الزيارة بشكل متقطع بمواضيع منفصله
ولكن حبيت أبدا بمدينة أكسفورد الصغيرة والثرية والجميلة واللي يسمونها مدينة الأبراج .. وعرفت ليش يسمونها بهذا الإسم بعد مازرتها
الحلقة الأولى من موضوع اكسفورد بخصصه للفنادق .. لأني كسول ومالي بكتابة التقارير
لكن أحسن انها دين علي لازم اقدم شي لهذا الصرح الكبير وأفيد المستخدم المسافر



الطيران كان على الخطوط القطرية اللي أعطيها 5 نجوم
عشقي لهذا البلد خلاني أحب حتى طيرانهم
سعر التذكره 2800 ريال تقريبا
طرنا من مطار الكويت لأنه أقرب لي من الرياض



وهذا هو مطار الكويت .. نسيت أصور ولكن لقيت هذي الصوره الوحيده عندي بالكاميرا
بتاريخ 10/7/2016 الساعه 10.30 صباحا
وصلنا لدوحة الخير الساعه 11،45 تقريبا
كان الترانزيت تقريبا 3 ساعات ومر بشكل سريع



وطرنا من الدوحة الساعه 3 العصر ووصلنا هيثرو الساعه 8،30 ليلا
عملنا تشيك أوت بسرعه وبدون تأخير مع العلم بأن المطار كان مزدحم لكن هذا هو مطار هيثرو
تلقا زحمه لكن تخلص بدقايق
وبسبب الشغل الضروري لصاحبي قررنا الذهاب الى اكسفورد على طول وبعدها نتجول بانحاء بريطانيا
أخذنا تاكسي وكان فان ب120£ مادري ليش صاحبي صمم على الفان مع العلم أننا 2 بس
وهي تبعد 75 كم ووصلناها بساعه تقريبا

مثل ما قلت لكم اليوم بكتب عن الفنادق .. وان شاء الله أكتب عن باقي رحلة اكسفورد متى ما حصلت لي فرصه



حجزنا اون لاين في فندق Travelodge Oxford Abingdon Road
لمدة 5 ليال وكان سعر الليله 96 £
مددنا ليله اضافيه 106£ اون لاين ايضا لان الحجز من الفندق على الدسك كان ب 116£
والمجموع 586 £
صار لنا موقف مع هذا الفندق اذكره لكم في آخر الموضوع موقف يضيق الصدر
ماعندهم غرفه توين .. اللي عندهم دبل فقط
طلبنا منهم سرير اضافي جابوه لنا وكان مكسور
قلنا لهم كافي الفراش والغطاء والمخده أخذوا سريركم المكسور ما نبيه
الفندق عبارة عن دورين أو ثلاث والمطعم بالدور الأرضي بجانب الاستقبال



لاحظ بالصورة اللوبي وفي آخره المطعم
اللوبي صغير والغرف وسيعه نوعا ما ( اللي راح بريطانيا يعرف وش أقصد )
وهذي الغرفه





طبعا شغل عزابيه .. أنواع الفوضى ,, المشكله ان صاحبي عايش جو انه مرتب وانا ارفع له
الفندق نظيف كحال فنادق بريطانيا وأوروبا عموما
الواي فاي مجاني لمدة نصف ساعه فقط كل يوم
بعدين تقدر تشتريه اليوم ب 3£
الفطور كان بوفيه فطور بريطاني ( فاصوليا و بيض و فطر و نقانق خنزير طبعا وبعض المرات يحطونه خضار و خبز وزبد وكورن فلكس )
مثل ما قلت لكم فطور وبريطاني 100%
اذا ما كان حجزك مع الفطور راح تدفع تقريبا 8£
تقدر تطلب أدوات الكوي كاملة من الاستقبال ويجيبونها لك مجانا
مكان هذا الفندق جنوب اكسفورد على شارع Abingdon Road وبجانبه مباشره red bridge staition Park and Ride
الفندق يبعد عن السنتر نص ساعه مشي و10 دقايق بالباص
وكنا نروح بالباص ونرجع مشي يوميا
كان رقم الباص 300 و X3 و X13

الفندق الثاني


jurys inn WOLVERCOTE سكنا فيه 5 ليال
سعر الليله بدون الافطار تقريبا 110£
مددنا ليله سادسه ب 113£
مجموع 663£
أيضا ما عندهم غرف توين .. عطونا مزدوج وطلبنا سرير اضافي وجابوه
الفندق عبارة عن دور واحد فقط كبير جدا والمطاعم والبارات فوق
اللوبي كبير وفسيح ويشرح الصدر والواي فاي موجود ومجاني ومرتب أكثر من فندقنا السابق
الغرف مثل ترافلودج تقريبا ولكن الحمام أوسع مره





أدوات الكوي كلها موجوده من غير طلب
فطورهم ايضا بوفيه بريطاني مثل أغلب فنادق بريطانيا .. فطورهم واحد
وفيه حمام سباحه للنزلاء
مكانه عكس فندقنا السابق ويقع شمال اكسفورد في منطقه WOLVERCOTE .. موقف الباص اسمه Millway Close ورقم الباص اللي يوديك للسنتر 6
وهو أبعد من الفندق الأول بالنسبة للسنتر

الفندق الثالث
رجعنا لصاحبنا الأول Travelodge Oxford Abingdon Road
وسكنا فيه حجزنا 3 ليالي الليله 93£
وكان المجموع 279£
يعني مجموع جلستنا في اكسفورد 15 ليله ب 1528£
بعد ما كنا مقررين نجلس فيها ليلة وحده بس
أما الموقف اللي حصل لنا في هذا الفندق بعدما رجعنا له المره الثانيه
طلبنا سرير اضافي فقالوا لنا ما عندنا سرير اضافي !!
قلنا لهم حنا كنا قبل اسبوع تقريبا عندكم وجبتوا لنا سرير اضافي وكان مكسور
قالت الموظفه بابتسامه صفرا وديناه للتصليح
قلنا ماعندنا مشكله
عطونا الماترس مع الغطاء بس
قالت راح مع السرير للتصليح !!
كنا ننتكلم معاهم بذوق ولكن غيرنا نبرة الصوت ولكن بأدب
قلنا كيف فندق ما فيه سرير اضافي !! بنمشيها ولكن كيف مافيه ماترس أو غطا اضافي
فرضا لو طفل بلل فراشه أو شخص كب قهوه على الفراش وش العمل !!
ردت المديره قالت قلنا لك مافيه
قلنا لها هذي وقاحه .. هل حنا غير مرحب فينا بالفندق ؟؟
صعدنا فوق ونمت على الأرض هذيك الليله
ودخلنا موقعهم وكتبنا شكوى باللي صار
وكان ويك اند
بعد الويك اند كنا في لندن وطلعنا من اوكسفورد .. جانا ايميل من الشركة يعتذرون ويقولون احنا اسفين ونعتذر لكم عن وقاحة الموظفه ولك فاوتشر 100 £ ردينا عليهم
قلنا مابي الفاوتشر نبي تعاقبون المديره الوقحه .. وهم يدرون اننها تقصد اننا عرب ومسلمين لكن ما يقدرون يقولون
وبنفس اليوم ردوا لنا بايميل يقولون ولكم ايضا 70 £ والمديره حولناها التحقيق
قلنا لهم شكرا لكم
بالسفره هذي عرفت الشعب البريطاني على حقيقته بعد ما نزعت نظارة الاعجاب والانبهار
شعب نصاب ولكن بطرقة ذربه
محترمين بحدود القانون ولكن بدون القانون يبقون ينظرون لنا نظرة دونيه
ولكن القانون هو اللي واقف لهم
لا يغرك اسلوبه أو اتيكيته ... تراهم يحاولون ينصبون عليك زي ربعنا العرب اذا سافرنا لهم
اتكلم من واقع خبره يا ناس من واقع انبهار
والحلقة الجاية بتكلم عن الاماكن اللي تستحق الزياره باكسفورد والقرى الي حوالينها
وان كنت ارى انها كلها عبارة عن كنز أثري وعبق التاريخ يفوح منها

اخوكم صلاح (سفير جوجل)

١٥يوم في أوكسفورد

اكيد مليانة اكشن ومغامرات


موقف المديرة يقهر لكن ماشاءالله عليكم تصرفتوا


ننتظر خبرتك ومعلوماتك

ماشاء الله

سعدت بقراءة تقريرك وانطباعك وملاحظاتك
والحمدلله على سلامتكم

بس نصيحة لاتحكم على كل البريطانيين بنفس الصفة..
ولله الحمد لم أواجه هذا الصنف ..

شكراً مرة أخرى لذكر تقريرك عن الفندقين وماحصل معك
كل الود

وعليكم السلام
أهلا بالخبير صلاح
15 يوم فيها أكيد أنها تستاهل أم مرغم اخاك لا بطل ..علشان شغل صديقك أضطريتوا
موقفهم سيء حقيقه
تحياتي لك

وعليكم السلام ورحمة الله .... هلا اخوي صلاح حياك الله ... وترا الجماعة ظاهرهم كويس انا عايش معهم لي سنة ونص الان وكويسين والدليل عطوك فاوتشر ب 175 باوند رضاوه بس عاد حظك انت طحت في التفاحه الخربانة

متابعين معك

استمر متابعين بصمت

آخر مواضيع wla3h

- شريحه انترنت مفتوحه لمدة اسبوع أو اسبوعين ؟ - تجربة حجز فندق عن طريق موقع أقودا !! - كيف اذهب لمطار جاتويك ؟ - مخالفه مروريه تعطل صدور التأشيره البريطانيه !! - •• متابعة طلبات شـــAUGUST ـــهـر فقط ••

توقيع : wla3h

تسلم الايادي سفيرنافعلا اوكسفورد جميلة وتستحق الزيارة انا للاسف زرتها يوم بس وان شاءالله بكرر الزيارة
واتفق معاك في الشعب البريطاني البعض منهم مو كلهم وودي واقول شي بس بحتفظ فيه هههههه ..
فندقكم الاولي لو مستبدلينة بهوليدي ان اكسبرس احسن
بس ماعليه تجربة

يازينها اكسفورد .. قلبت مواجعي ����