ماليزيا... كل عام وإليك وجهتي ... - الصفحة 3

ثنيان · 12-09-2016, 04:53 AM

قيادة السيارة..

في هذه الرحلة تشجعت وقررت اني اجرب قيادة السيارة في ماليزيا
طبعا بعد ما شفت تجارب بعض الاخوان بالمنتدى توكلت على الله
حجزت السيارة من السعودية عن طريق موقع الطيار للسفر والسياحة

https://www.altayyaronline.com/ar/Cars.html

الطيار عندهم ميزة تختلف عن باقي المواقع الثانية وهي انك تقدر تاخذ
السيارة من مدينة وتسلمها في مدينة ثانية وانا كنت ابي اخذها من كوالا
واسلمها في بينانج لمدة اربعة ايام والباقين تستلم وتسلم في نفس المدينة
الموقع بسيط وطريقة الحجز ايضا بسيطة

اخترت شركة هرتز

موب لان اسعارها رخيصة ولكن لانها شركة عالمية وموثوقة
خصوصا لواحد مثل حالتي اول مرة اتعامل مع شركات تأجيرسيارات في غير بلدي
السيارة كانت هونداي النترا

ب 180ريال في اليوم عشانها كبيرة
وتشيل الشناط (ام العيال تشيل كل اللي تحتاجه واللي ماتحتاجه)

طبعا تحتاج فيزا لاتمام عملية الحجز وللمعلومية كل المواقع وشركات تأجير السيارت
يطلبون فيزا غير مسبقة الدفع لكن ماعليك منهم بطاقتي فيزا مسبقة الدفع من الراجحي
ومشت الأمور وتسهلت مادام الحروف بارزة لايهمونك ولا تقول لهم انها مسبقة الدفع
عطهم البطاقة وابتسم ونفس الشي مع اي مكان او موقع وش دراهم طالما فيها دراهم

المهم اني طلعت رخصة دولية ب 120 ريال من مكتب سياحي بجدة وسددة قيمة مخالفات
قاهر(ساهر)ب2000ريال الله يخلف بس والغبنة اللي تبط التسبد انهم طلبوا الرخصة السعودية
قلتلهم معي رخصة دولية هاكم قالوا مانبي غير السعودية وزين اني جايبها معي
ومدري هل هالنظام مع هرتز بس او مع كل المكاتب

كان الحجز اني اخذ السيارة من مكتب في وسط كوالالمبور وأسلمها في مطار بينانج
كنت محدد تاريخ استلام السيارة قبل السفر الى بينانج بيوم عشان لو حصل شي غير مخطط له
اقدر اتصرف واحجز طيران لاايبوه وما اتعطل ويضيع حجز الفندق (كانت ايبوه في مخطط
الرحلة اني اوقف فيها لمدة 3 ايام قبل اروح بينانج)

وعشان اتعود على القيادة في ماليزيا خصوصا انها يمين ماهو بمثل عندنا
وفي اليوم الموعود طلعت من الفندق واخذت تكسي وعطيته عنوان مكتب التأجير وقالي انت
تبي تستأجر سيارة؟ وعلامات الاستغراب في خشته قلت له ايه رح بس للعنوان ماعليك
وطول الطريق وهو كل ماشاف زحمة يقولي شف الزحمة شلون تبي تسوق انت مع هالناس
وانا اقول ماعليك رح بس وكل ماقربت لكوالا واشوف الزحمة كل ماجتن ام الركب لين اني فكرت
اكنسل الموضوع كله وشل لي وشل الغرابيل وهالزحمات لكن تراجعت وتذكرت الفشلة اللي بتصير
لو كنسلت .. لين دخل بي مع شارع العرب ووصلنا للمكتب حق هرتز والسواق الصيني كنه يقول
الله يعينك يالمسكين .. دخلت المكتب وكان استقبالهم جميل ورائع نسوني التوتر اللي كان فيني
الأجراءت كانت يعني متوسطة استغرقت 30 دقيقة (بسبب ماعندهم سيارتي)

وكانت المفاجأة اني يوم جيت استلم السيارة قالوا لي ماعندنا النترا لكن بنرقي لك السيارة وتاخذ اكبر منها
وش رايك نعطيك هونداي توسان (جيب صغير) وما تدفع شي تاخذها بنفس سعر الالنترا
عاد انا استانست جيب يعني وسع لعيالي ويشيل شناطنا ويعنني ماني راضي عنهم قلت طيب

سألتهم عن بنزين السيارة وعن بوابات الضرائب اللي على الطرق
قالوا لي البنزين فل لكن تراك ترجعه لنا فل مثل ماعطيناك وتعبيها البنزين الاصفر 95

وتاخذ بطاقة اسمها تاتش اند قو

من اي محطة او بقالة سفن الفن لكني مالقيتها غير في صيدلية واتسون اللي قدام الصن واي
وكني باخذ بنادول لكن الشحن تلقاه باي مكان مافي مشكلة
المهم انها تنشحن وقلت لهم حطو فيها ب 30 رنقت على بالي تكفيني لمدة 4 ايام لكن زدتها عقب ب 20 رنقت

واستخدمت برنامج وييز

وكان برنامج ممتاز ورائع يغنيك عن قوقل ماب وسايجك وقارمن
وهو مجاني سهل الاستخدام تفاعل الماليزيين معاه كبير لانه يعتمد على رسائل واشعارات السائقين المستخدمين للبرنامج

يعلمك ان بوه زحمة قدامك واذا بوه سيارة متعطلة واقفة على جنب او اذا فيه حادث لا قدرالله أو نقاط تفتيش
تكتب اول حرفين من الفندق او المكان اللي تبيه ويسرد لك على طول ويعطيك العنوان وكم كيلو عشان تاصل وكم
يبيلك من وقت واذا فيه محطات في طريقك .. المهم اني استفدت منه جدا واستخدمته لين وصلني لبينانج وهو نعم الخوي
توكلت على الله وركبت السيارة ومشيت والأمور سلكت بشكل ماكنت اتوقعه لكن تساهيل من رب العالمين
وجمال السواقة عند الماليزيين محد يسرع ومحد يتجاوز من راسة بدون اشارة ومحد يعلق البوري وراك يستعجلك ويغثك

حست شوي في شوارع كوالا لكن حوسه جميلة عرفتني بعض الاماكن والمناظر لين وصلت لبوابات الضرائب

واتذكر اني ماشريت البطاقة حقتهم وش اسوي بعمري هالحين واختار بوابة مابها سيارات وادرعم لها ووقفت
ومن شين الحظ هي البوابه الوحيده اللي مافيها موظف طلعت هي حقت البطاقة بس تمرر البطاقة على الجهاز وتفتح لك البوابة
وانا ماعندي بطاقة والسيارات وراي سرا لكن لكن شهادة لله مافيهم واحد دق بوري ولا فيهم واحد غير مساره
لين جاء الموظف وبكل ادب قالي ادفع 2.50رنقت عطيته خمسين من الروعه احسبوه يبي يهاوشن وراح وجاب لي الباقي
وفتح البوابه ومشيت كملت طريقي (لين سلمت السيارة في بينانج وانا كل ماجيت عند هالبوابات احوس واروح لبوابة غلط
ماتقبل البطاقة بس الحمدلله بمساعدة عيالي اذا وصلت دلوني على البوابة الصحيحة)

لين وصلت للصن واي لاقون بحفظ الله بدون اي مشاكل وبكل يسر وسهوله
وطلع الموضوع كله بسيط جدا ومايحتاج ابدا للتوتر اللي جاني من قبل
ونظرات الاستغراب كانت على وجيه كل من قابلتهم عند بوابة الفندق كيف استأجرت سيارة ووصلت لهم خصوصا مكتب
التكاسي لانه كان عارف العنوان اللي بروح له وسط كوالا ولمكتب التأجير واستخدمت مواقف نفس الفندق مجاني
عطوني بطاقة دخول للمواقف ونفس الحال مع الفنادق اللي نزلت فيها ومعي السيارة.

مميزات ومساوئ تاجير سيارة وقيادتها في ماليزيا:

- اي مكان تبيه تروح له وقت ماتبي وترجع وقت ماتبي
- زوجتك وعيالك ياخذون راحتهم في المشوار عكس لو انهم في التاكسي
-وتفتك من سواليف بعض السواقين وبثارة الصينيين وريحه الهنود وتماثيل بوذا اللي بكل سيارة اشوفه
- مناظر تشوفها تسر العين والنفس والروح
- توقف بأي مكان تصور أو تمغط وتطلق رجليك ماااااعندك مشكلة
- تسافر اي مكان يخطم براسك أو باللوحات قدامك بالطريق(الكميرون ماكانت في مخططي ابد
لكن شفتها قريبة من ايبوه وام العيال شجعتني نروح لها ورحنا مافي اي مشكلة)
-محطات البنزين متوفرة بكثرة في طرق السفر وهي جميلة ونظيفة وفرصة للمتعة والتجول
- المصليات متوفرة بكل محطة في الطريق
-ترتاح من المطارات ووجع الراس عفش وشناط ووزن وموعد طيارة وانتظار اقلاع وحضور بدري
-القيادة هناك امنه جدا تراهم فنانين حتى سواقة حريمهم ماعليهم
-اختلاف القيادة من اليمين لليسار مافيه اي مشكلة 10 دقايق والوضع معك تمام
(حصل وعكست شارع لكن جت سليمة ماكان غير سيارة وحده في وجهي وقف لين تنبهت
وعدلت وضعي ومشيت بدون اي تذمر منه الحبيب)
-مافي نقاط تفتيش في الدخول والخروج من المدن ولا شفت اي شرطي أو مرور طول مدة السفر
-يازين ساهر عندهم ينبهك يقول لك تراني قدامك لا تسرع (لوحات تنبهك انك في منطقة تصوير سرعة)
مسافة بسيطة بس وبعدين ادعس وانت منت محتاج للسرعة أصلن للأمان أولا وللمناظر اللي تأسرك ثانيا
-سعر لتر البنزين اعبي فل 85رنقت وعبيتها مرتين طوال مدة الرحلة لين سلمتها لهم فل
المساوئ:
حقيقة لم ارى لها اي مساوئ تمنع من التمتع بقيادة سياره في بلاد جميلة مثل ماليزيا (وجهة نظر شخصية وتجربة)
ندمت اشد الندم اني اخذت السيارة لمدة 4 ايام فقط كنت حاجز لجوهور من بينانج على طيران اسيا ولا اقدر استعيد المبلغ او الغي الحجز
تمنيت اني خليتها معي طول الرحلة من راحة ووناسه شفتها وفلة حجاج
لا تحرمون انفسكم وعيالكم من هالمتعة توكل على الله وجرب

يتبع .. أول مشوار بالسيارة مع العائلة .. بوتراجايا

Al-Hajri VIP, أبن السلطنة, آخـــرفـــرصـــة و 6 آخرون معجبون بهذا.

ثنيان · 12-09-2016, 05:01 AM

اقتباس : المشاركة الأصلية كتبت بواسطة عاشقة لنكاوي

اعتبر نفسك ماسافرت ماليزيا
ههه ان شاء الله تزور لنكاوي قريبا وتكون من اجمل الرحلات

سبحان الله في كل مرة أكتبها في جدول الرحلة لكن ماالله يريد .

عاشقة لنكاوي و آخـــرفـــرصـــة معجبون بهذا.

أبو سعد · 12-09-2016, 11:58 AM

كل عام وانت طيب
ما شاء الله بداية موفقة
الصنواي لاجون [emoji7] باْذن الله الأسبوع القادم اروح له
قيادة السيارة في ماليزيا بصراحة ما جربتها وما خطرت على بالي أبدا

متابع معاك التقرير الرائع [emoji106]

أرسلت بواسطة iPhone بإستخدام Tapatalk

آخـــرفـــرصـــة و قصة حب معجبون بهذا.

بن قوت · 12-09-2016, 07:06 PM

ماشاء الله بداية كويسه وحماسيه. وصور روعة معك إلى الأخير

أرسلت من SM-N910C بإستخدام تاباتلك

آخـــرفـــرصـــةمعجبون بهذا.

ثنيان · 14-09-2016, 06:14 PM

اقتباس : المشاركة الأصلية كتبت بواسطة أبو سعد

كل عام وانت طيب
ما شاء الله بداية موفقة
الصنواي لاجون [emoji7] باْذن الله الأسبوع القادم اروح له
قيادة السيارة في ماليزيا بصراحة ما جربتها وما خطرت على بالي أبدا

متابع معاك التقرير الرائع [emoji106]

أرسلت بواسطة iPhone بإستخدام Tapatalk

هلا ابو سعد
كل عام وانت بصحة وسلامة
توصل بالسلامة والله يجعلها رحلة سعيدة يارب
شرفني مرورك

أبو سعد و آخـــرفـــرصـــة معجبون بهذا.

ثنيان · 14-09-2016, 06:16 PM

اقتباس : المشاركة الأصلية كتبت بواسطة بن قوت

ماشاء الله بداية كويسه وحماسيه. وصور روعة معك إلى الأخير

أرسلت من SM-N910C بإستخدام تاباتلك

حي الله بن قوت
متابعتك تسعدنا شكرا لمرورك

آخـــرفـــرصـــةمعجبون بهذا.

أبن السلطنة · 19-09-2016, 07:56 AM

ماشاءالله عليك وهذا مالك في الطويله

تقرير جميل جدا وباديه قويه

متابعين معامك يا بطل

آخـــرفـــرصـــةمعجبون بهذا.

abdullah h · 20-09-2016, 09:07 PM

ماشاء الله تبارك الله

بداية قوية و موفقة وتنظيم للرحلة رائع وفي انتظار ماتبقى

فعلاً من يزور ماليزيا مررررة يعود لها أكثر من مررررة

تحياتي لك

آخـــرفـــرصـــة و قصة حب معجبون بهذا.

آخـــرفـــرصـــة · 20-09-2016, 09:55 PM

رائع يا ثنيان

و أسلوبك ما شاء الله يحمس كن الواحد معك
برافو عليك يا بطل أنك استاجرت سيارة و دبرت أمورك
بالفعل ايجابيات السيارة كثيرة
و أتوقع كثير يسويها بعد تجربتك الرائعة

متابعين معاك يا عسل

أبن السلطنةمعجبون بهذا.

فيصل · 01-10-2016, 07:48 PM

وعليكم السلام ورحمة الله وبركاته
ما شاء الله كل هالزيارات لها
يعجبك اللي يهتم بالنزلاء صراحه يحفز ترجع له مره ثانيه
تسلم السياره بمدينه أخري ليس ميزه في الطيار بل موقعهم يتييح ذلك هيرتز أم غيرها
تجربه جميله لقيادة السياره
البرنامج ويز بالأنجليزي كيف تعرف أن فيه زحمه هل مثل قوقل ماب يظهر لك خط سير أحمر
تجربه محفزه لقيادة السياره
تسلم

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وجهتي القادمة الى أوربا .. خططو معي	سكوب	البوابة السياحية	5	11-08-2016 02:40 AM
أنتم من تحددون وجهتي ,, يالله اقلطوا	الانيق	البوابة السياحية	11	02-05-2016 02:08 AM
محتاااااره احدد وجهتي	abrar11920	البوابة السياحية	16	25-11-2015 07:19 PM