ماليزيا... كل عام وإليك وجهتي ...

ثنيان · 07-10-2016, 05:23 AM

العذر والسموحة على التأخير..

بما اني ناوي اروح لا ايبوه في طريقي لبينانج قررت اني استفيد من وجود السيارة
واروح اتمشى بعيالي
فكرت اروح اي ستي لكن جربته في رحلتي 2015 والحقيقة لايستحق تكرار الزيارة
قررنا نروح بوتراجايا لانها قريبه وماقد جيتها قبل وشي جديد ماجربته
بحثت في برنامج ويز وحطيت الوجهه وتوكلت على الله
الطريق سهل وما واجهت صعوبة في الوصول بفضل الله ثم ملاح الرحلة (أم العيال)
ماسكة هالجوال وماعندها غير رح يمين ورح يسار لين وصلنا بوتراجايا
كانت جميلة وحلوه منظمة وواسعه والخضره فيها خيال

طبعا انا ما ادري وش قدامي لاني ماكنت محضر اني اروح لها واللي اعرفه انها منطقة راقية
فيها مقرات وقصور الحكومة واعرف ان فيها جسر اشوفه بالصور دايم لكن ماقد جيته
ولا اعرف عنه شي
وصلت للجسر وفعلا مثل الصور ولاني ما اعرف المنطقة بس أخبر اني قريت منذو مبطي
انه فيه مسجد كبير وبحيره وقوارب

لكن وين واي مسجد ما ادري طبعا البرنامج يطلع لي المساجد اللي حولي لكن مايعلمني
وش عنده من فعاليات
شفت مسجد زوين ولونه وردي من بعيد وشكلة كبير ونظيف قلنا خلنا ننصاه
ومادام الموتر معك رح ولا يهمك
وصلت للموقع ,وشفنا هالعالم والسيارات والباصات وزحمة وكان هو اللي نسمع فيه
وكان عبارة عن منطقة كبيره جدا فيها مقر الحكومة والمسجد
وتحت المسجد فيه سوق صغير ومكان تأجير قوارب صغيره

قلت خلنا نصلي العصر بالمسجد وبعدين نفتر ونشوف وش قدامنا
المسجد كبير جدا وهو ايضا مزار سياحي يجونه السواح بالباصات
ويلبسونهم زي محجب للنساء ويخلونهم يدخلون .
اماكن الوضوء تحت المسجد كبيره ونظيفة لكنها مشوااار
وفيه الحرس الخاص بالمسجد ولهم زي خاص يساعدونك
في اي شي تبيه وهم في غاية اللطف والفزعة
المسجد موقعه رائع تصلي وانت فوق بحيره ومناظر الخضرة والماء تشرح البال والخاطر

عشان تنزل تحت للسوق والقوارب فيه درج متحرك ومصاعد من خارج المسجد
اذا طلعت تلقاه على يمينك
لقيت محلات لبيع التذكارات والاشياء البسيطه ومأكولات خفيفة
توجهت لتأجير القوارب وخذيت لي قارب انا وعيالي ب160 رنقت لمدة 30 دقيقة
لكنه فرفر بنا في البحيره حول الساعة أو أقل بشوي وكان يشرح لنا عن كل المباني والقصور
اللي نشوفها حولنا ولاندري وش قصتها
والحقيقة كان جدا متعاون وبشوش استمتعت في الرحلة لان المنظر من البحيره يختلف كثير
وأفضل وقت لزيارتها هو وقت العصر عشان حرارة الشمس

خلصنا جولتنا وكان وقت المغر قرب وقلت خلني ارجع للفندق قبل الليل ولان ورانا سفرة بالبر
ولله الحمد قضيت وقت ممتع مع عيالي في مكان جميل
ولا كان فيه اشكالية في طريق العودة او صعوبة كل شي واضح من ناحية علامات الطريق
واللوحات الارشادية

السفر بالسيارة الى ايبوه والكميرون...

.
.
.

فيصل, أبن السلطنة, قصة حب و 1 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
وجهتي القادمة الى أوربا .. خططو معي	سكوب	البوابة السياحية	5	11-08-2016 02:40 AM
أنتم من تحددون وجهتي ,, يالله اقلطوا	الانيق	البوابة السياحية	11	02-05-2016 02:08 AM
محتاااااره احدد وجهتي	abrar11920	البوابة السياحية	16	25-11-2015 07:19 PM