يا دار لاهنتي و لا هان راعيج ( الكويت 2013 ) - الصفحة 2

هاوية الاسفار · 13-02-2015, 04:13 PM

السلام عليكم و رحمة الله و بركاته

منتدى العرب المسافرون الكـــويت

اليوم بكتب لكم تقرير عن رحلتنا لدولة الكويت العزيزة على قلوبنا

تاريخ الرحله 23/12 الى 28/12 نهاية 2013

اعضاء الرحله

هاوية الاسفار / زوجي /اولادي اثنين ، 5 سنوات و 8 سنوات

التصوير من كاميرا نيكون D90

سامسونج جالاكسي S4

رحلتنا كانت بالسيارة عن طريق البر

طلعنا من دبي تقريبا الساعه 8:30 الصبح و مرينا على مطعم غنتوت الملكي

خذنا سندويشات بيض و طماط ( شكشوكة ) و شاي حليب عدني على اصول و طبعا الطعم و لا اروع

كملنا المسير لين ما وصلنا الحدود

خلصنا الاجراءات بسلاسه و الحمدلله ما شيء زحمة و اول ما نخلص من منفذ الدولة و ندخل الحدود السعودية نشوف محطة سحاب للبترول و هني نعبي السياره و نعبي بطوننا و اكلهم بصراحه و هاي صورة احلى بخاري بالدجاج

ادينا صلاة الظهر و العصر في المصلى اللي في المحطة و انطلقنا و طبعا قبل ما نسافر كانت الايام ممطره امطار غزيرة جدا و هاي الصورة تشهد

و طبعا في كل رحلة او طلعه بالسيارة لازم نكون مجهزين دلال الشاي و القهوة و بعض المكسرات و بعد الغدوة الدسمة لا بد من ارتشاف كوب شاي

و كملنا دربنا مع المرور على بعض المحطات للبترول و اخيرا وصلنا

خلصنا الاجراءات بسرعه و انطلقنا الى فندقنا ( لي رويال ) موقعه في بنيد القار

الفندق هادي و ما فيه زحمه و هاي غرفتنا مطله على الشارع العام

و اول ما نفتح الباب السرير على يسارنا

و هذا على اليمين

حجزنا كان غرفة كبيرة او سويت بصراحه نسيت شو كنت حاجزة بس الغرفة كبيرة وايد و هاي بعض الصور

و هاي ضيافتهم

غلاية الماي

و هاي الصورة من صوب الغنفات

و هاي اطلالة الغرفة و تشوفون ابراج الكويت

و هذا الكبت صغير وايد

و هاي الثلاجة بتشوفون ام حسين موجودة

تكرمون الحمام

حمامهم صغير مقارنة بحجم الغرفة و ارضية الغرفه كانت خشب و الغرفة كبيرة و فاضيه و الجو كان بارد جدا جدا ثلجنا

ريحنا شوي و صلينا المغرب و العشا و على طول توجهنا لمقهى الشميمري

و طلبنا خبز رقاق بالزعتر اول مرة اجربة بالزعتر بس كان لذيذ و غوري شاي

و هذا فرن المشاوي

خذنا كباب لحم نسيت اصورة الصراحة ما نسيت بس من كثر القطاوة اللي تحت الطاولة كنا خايفين منهم و لاهين وياهم خلصنا و كانت الساعة 10 و خلاص المقهى بيسكر و استغربت لانه من وقت وايد توقعت يكون مفتوح لين 12 او 1

و خلص يومنا الاول على خير و اشوفكم في اليوم الثاني مع مغامرات يديده

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رحلتي اللندنيه ( 2013 )	هداوه	اوروبا	77	09-02-2016 11:54 PM
الكويت ...وما ادراك ما الكويت	توبليرون	بوابة الكويت	32	21-01-2016 12:38 AM
جورجيا - يونيو 2013	الركيب	بوابة جورجيا و اذربيجان	32	25-05-2015 05:34 AM
استفسار يااهل الكويت الكريم وكل من سافر الكويت	جميله	بوابة الكويت	11	31-03-2015 12:54 AM