☆★ كرسي الاعتراف ★☆ - الصفحة 44

Deena · 15-12-2016, 04:03 PM

اقتباس : المشاركة الأصلية كتبت بواسطة قصة حب

دندوون دينا
قرأت بعض ردودك واعترافاتك
انا معجبة بشخصيتك ومثل ما قالت اختنا الغالية ام عزيز
انت امرأة ناجحة
ربي يوفقك ويسدد خطاك ويحفظك لبيت واهلك

وان شاء الله ربي يكتب لي مقابلتك وجها لوجه

برجع اقرأ عدل ان شاء الله اليوم
بس لازم نضبط القعدة كنافة وقلاص شاي

تحياتي لك ،،

حبيبتي يا قصقوصة والله انتو اللي كلكم ذوق وكرم أخلاق .. الله يسعدك ويزيدك من نعمته آمين ..

والله يكتبلنا لقاء يا رب .. طالما عم أخطط لزيارة الكويت فلا بد من جلسة مع كل الحبايب .. بس قولي يا رب تزبط

آخـــرفـــرصـــة, مجدي, فيصل و 4 آخرون معجبون بهذا.

آخـــرفـــرصـــة · 15-12-2016, 05:11 PM

حبيت أمسي على مشرفنا الغالي مجدي
الرجل العصامي صاحب العدسة الجميلة
و ارحب فيه على كرسي السعادة

جيت أسال لقيت أنهم هلكوك أسئلة
فـ تضامناً معك لن تزيد أسئلتي عن 20 سؤال

فيلم لا مانع لديك من مشاهدته أكثر من مرة ؟
عند تعرض الطائرة لمطبات هوائية كيف يكون شعورك ؟
شو رأيك برحلات الكروز وكيف علاقتك مع البحر ؟
معنى السفر الاقتصادي عند مجدي ؟
الصينيون يفضلون السفر في قروبات ما رأيك بهذا النوع من السفر ؟
عوامل تحدد وجهتك القادمة ؟
الطريقة المفضلة للتعامل مادياً خلال رحلتك ؟
ما رأيك بالسفر وحيداً solo travel ؟
مزايا الاعتماد على مرشدين خلال رحلتك ؟
شو رأيك بمغامرات مثل القفز من الطائرة أو السباحة مع القرش ؟

ما شاء الله تكتب الكثير من التفاصيل هل تدونها خلال الرحلة ؟
هل تجد نفسك في الكتابة ؟
الكاتب الجيد قارئ جيد ماذا قرأت مؤخراً ؟
مبدع في تقاريرك هل اكتشفت هذي الموهبة هنا في المنتدى ؟
مجدي اضافة كببرة للمنتدى فـ كيف تعرفت عليه ؟

الرياضة المفضلة لديك ؟ وفريقك المفضل عالمياً ؟
نوع الكاميرا التي تفضلها ؟
هل تستخدم الفوتوشوب للتعديل على صورك ؟
العدسة و الاعدادات اللي مجدي يفضلها ؟
نصائح للمبتدئين في التصوير ؟

يسعد مساك يا عسل

مجدي, احمد الحربي, Haksa77 و 6 آخرون معجبون بهذا.

مجدي · 15-12-2016, 05:17 PM

اقتباس : المشاركة الأصلية كتبت بواسطة طوق الياسمين

شكراً دينا
اعطيتينا من خبراتك ووقتك

أهلاً مجدي

-هل انت شخص رياضي وايش انواع الرياضات اللي تمارسها او تتابعها؟

-اول بلد زرته ؟

-لو خيرت بين البقاء في بلدك او الهجرة توافق وايش البلد اللي راح تختاره؟

- ذوقك رفيع كاظم وماجدة اذن موسيقية من الجيل الجديد فنان تطرب لصوته؟

-كاتب تستمتع بقراءة كتبه؟

-حب السفر والقراءة أثر واحد على الاخر بمعنى سافرت لبلد بسبب كتاب او قرأت كتاب بسبب بلد؟

-اول صورة احترافية صورها مجدي تذكرها وتحتفظ بها؟

-صور حفلة الزواج كيف كانت ؟

-السفرة الجاية لوين ولماذا؟

-حلم الطفولة والمراهقة والشباب ايش تحقق وايش تغير ؟

اهلا وسهلا بيكي مميزتنا
وسامحيني اذا كانت أجوبتي طويلة

-هل انت شخص رياضي وايش انواع الرياضات اللي تمارسها او تتابعها؟

سؤال جميل، أنا كثير بحب الرياضة، وأنا صغير في بداية المرحلة الابتدائية أتدربت فترات صغيرة سباحة وكرة قدم وكرة سلة.

لكن في هذيك الفترة انتشر بشكل كبير جهاز الفيديو الVHS وجهاز الأتاري (أكيد الي من جيل الثمانينات عارف عن ايش بحكي ههه)
والدي الله يطول بعمره جبلي اياهم هدية كمكافأة على تحصيلي بالمدرسة
وأول فيلم شفته كان فيلم صيني لـ"بروس لي" ومن وقتها وأنا بعشق الأفلام الصينية وكل الأفلام الي فيها رياضات الدفاع عن النفس، مثل الكونغ-فو والكاراتيه (الي متابع تقرير رحلتي عن الصين أكيد عارف هالشي).

فبعد ما الوالد لاحظ اهتماماتي قرر يدخلني دورة كونغ-فو وهيك أمضيت من عمري 3 سنين وأنا امارس هذه الرياضة في أواخر المرحلة الابتدائية وبداية المرحلة الإعدادية، بعدها انتقلت لرياضة الكاراتيه واتعلمتها لمدة سنتين، وفي المرحلة الثانوية انتقلت لرياضة بناء الأجسام.

ولكن بفترة امتحانات التوجيهي ما كان عندي وقت للرياضة وكان تركيزي كله عالدراسة، فاعتزلت كل أنواع الرياضة واستمريت بهذه الحالي أثناء دراستي الجامعية وبعدها كمان، لحد ما قررت قبل كم شهر اني أرجع أهتم بالرياضة، فبدأت بممارسة الركض، والحمد لله قدرت خلال أقل من 3 أشهر أرجع لياقتي البدنية شوي شوي.

اما بالنسبة لمباريات كرة القدم فغير متابع وما بهتم كثير، ممكن احضر بوقت فراغي اذا كانت مباراة مهمة مثل الكلاسيكو، والمباريات الوحيدة الي ممكن اتابعها هي كأس العالم كل 4 سنين.

-اول بلد زرته ؟

الأردن حبيبتنا
يااااه على جرش وعمان وإربد والزرقا

-لو خيرت بين البقاء في بلدك او الهجرة توافق وايش البلد اللي راح تختاره؟

مستحيل، اذا قررت أنا وغيري انا نهاجر، رح نترك البلد لمين ؟
استحالة بعد كل هالمعاناة وتمسك أجدادنا بأراضينا نسلمها بكل هالبساطة
مهما كانت الصعوبات ومهما كان اسم الدولة والي حاكمها

- ذوقك رفيع كاظم وماجدة اذن موسيقية من الجيل الجديد فنان تطرب لصوته؟

تسلمي الله يخليكي
ممكن تقولي اني من أكبر المتابعين من أنا وصغير لكاظم الساهر، لكن آخر فترة بحكم السن الموضوع خف شوي مع هيك ما زلت بشتري البوماته. وماجدة الرومي كان ألبومها أول ألبوم بحصل عليه في حياتي، الوالدة ربي يقويها اشترتلي البوم الأطفال الي أصدرته في سنوات الثمانين وأهدتني اياه ومن وقتها وأغانيها ما بتفارقني.

بشكل عام من المطربين الحاليين بفضل علي الحجار، محمد عبده، عبد الله رويشد، هاني شاكر، أصالة نصري، أنغام. وطبعا كل الجيل القديم. ما بسمع الأغاني الحديثة السريعة إلا نادرا.

-كاتب تستمتع بقراءة كتبه؟

ما عندي كاتب واحد مفضل، بقرأ كل كتاب ممكن حتى لو كان الكاتب غير معروف

في آخر ثلاث أشهر ونص تقريبا قرأت هذه الكتب :
ماذا قدم المسلمون للعالم لراغب السرجاني، أنتيخريستوس لأحمد خالد مصطفى، ساق البامبو لسعود السنعوسي، 1984 لجورج أوريل، قواعد العشق الأربعون لإليف شفق، في قلبي أنثى عبرية لخولة حمدي، رحلة الـ100 عبيط لعمر عباس. وحاليا عم بقرأ حول العالم في 200 يوم لأنيس منصور.

بميل أكثر لكتب التاريخ والحضارة الاسلامية والعربية، علوم الأديان، كتب الاختراعات والاكتشافات العلمية وخصوصا تاريخ الإنسانية والكواكب، كتب الصراعات والنزاعات العالمية.

أما بالنسبة للروايات بفضل المغامرات والأكشن والغموض والخيال، وأحيانا الروايات الرومانسية والكوميدية حسب مزاجي خصوصا بعد ما أقرأ كتاب ثقيل فلازم أقرأ شيء خفيف بعده علشان ما أتعب ذهنيا ونفسيا هههه. أما الشعر فهو المرض الي صعب أتخلص منه.

اذا بتحبي أصورلك مكتبتي الورقية ما عندي مانع

-حب السفر والقراءة أثر واحد على الاخر بمعنى سافرت لبلد بسبب كتاب او قرأت كتاب بسبب بلد؟

أكيد القراءة أثرت فيي، أعطتني دافع للاسكتشاف وحب التعرف والتعلم والتجريب، وهذا خلاني أحب السفر. لكن لحد الآن ما سافرت بلد بسبب كتاب أو العكس.

-اول صورة احترافية صورها مجدي تذكرها وتحتفظ بها؟

هههه سؤال جميل
هي مش صورة احترافية انما من أوائل الصور الي حبيتها وحسيت حالي من بعدها بحب التصوير
كانت أثناء رحلتي زمان مع العائلة في الأردن وكنا في إحدى الأحراش
أخذت اخوتي وطلبت من كل واحد منهم يوقف حد شجرة، ويعملوا اشكال بايديهم
وهيك علقت هذه الصورة في بالي من أيامها

-صور حفلة الزواج كيف كانت ؟

صعبة ، اكتشفت اني ما بحب حدا يصورني ما بعرف ليش
خجل وارتباك وضغط
وأنا أصلا ما بحب الحفلات والدوشة
لكن الصور نفسهم طلعوا حلوين الحمد لله

-السفرة الجاية لوين ولماذا؟

حاليا في بالي أسافر كوستاريكا في امريكا الجنوبية
لكن كل سنة بكون مقرر شيء وفجأة بغير رايي

-حلم الطفولة والمراهقة والشباب ايش تحقق وايش تغير ؟

سؤال كبير
حلم الطفولة اني اخلص دراستي الجامعية والحمد لله اتحقق
حلم المراهقة اني اشتري سيارة والحمد لله اتحقق هههه
حلم الشباب اني أبني بيتي الخاص واتزوج والحمد لله اتحقق
حاليا أهم أحلامي الاطفال وان شاء الله ربنا يرزقنا قريبا. اضافة لاني ناوي اشتري الشهر الجاي جهاز كمبيوتر جديد عليه القيمة، ومن بعدها عدسة محترمة للكاميرا واحتمال اجدد كاميرتي.

شرفتيني بأسئلتك حقيقة
اسئلة محترمة من انسانه محترمة

Deena, احمد الحربي, الغردقاوي و 5 آخرون معجبون بهذا.

مجدي · 15-12-2016, 05:19 PM

اقتباس : المشاركة الأصلية كتبت بواسطة الغردقاوي

آخر اليوم أيه اللي راح تختار الضحيه التاليه ؟؟؟
أنت حتقعد على الكرسي أسبوع كامل يا صديقي

ما كنت عارف إني رح أعقد قراني على كرسي الإعتراف

Deena, احمد الحربي, الغردقاوي و 3 آخرون معجبون بهذا.

مجدي · 15-12-2016, 05:40 PM

اقتباس : المشاركة الأصلية كتبت بواسطة احمد الحربي

نرحب فيك مره ثانية اخي مجدي

س 1 اغرب واصعب موقف مر معك بالسفر ؟

س2 هل تؤيد تعلم اكثر من لغه ؟

س 3 كيف اكون مصور محترف ؟

س 4 كيف عرفت منتدى العرب المسافرون ؟

س 5 رأيك بشكل عام بالمنتدى وماذا يحتاج ؟

اعتقد كفاية عليك كذا

تحياتي

تحياتي لحضرتك أخوي أحمد شرفتني

س 1 اغرب واصعب موقف مر معك بالسفر ؟

أصعب موقف كان في رحلة العودة من بكين، كنا آخر من دخل الطيارة وهذا الحكي قبل اقلاعها بدقايق معدودة، الله ستر.

س2 هل تؤيد تعلم اكثر من لغه ؟

جدا، لأنه بتفتح مجالات كثيرة امامك
عالأقل ممكن تستفيد منها كثير بالقراءة، وأكيد رح تفيدك بالسفر
مثلا أنا بقرأ كثير كتب باللغة العبرية خصوصا الي مترجمة من لغات أخرى، لأنهم بهتموا جدا بالترجمة بعكس دور النشر العربية للأسف
أنقضت الأيام الي كان فيها العالم العربي والاسلامي الرائد في الترجمة والطباعة على مستوى العالم

وفي ناس كثير بحولوها لوظيفة مثل أختنا دينا

بنصح كثير بتعلم اللغات المستخدمة بشكل كبير خصوصا في عالم الانترنت والأعمال والاقتصاد، مثل الانجليزية والفرنسية والصينية والاسبانية.

س 3 كيف اكون مصور محترف ؟

أولا علشان يصير الشخص مصور لازم يحب التصوير ويكون عنده صبر وذوق، هذا أول شيء بدونه ما رح يوصل للاحتراف.

أما الاحتراف فسهل، ممكن تتعلم فنون التصوير واساسياتها بنفسك وانت في البيت، عن طريق بعض المواقع والفيديوهات عاليوتيوب.

س 4 كيف عرفت منتدى العرب المسافرون ؟

من زمااااان، كنت عضو غير فعال، لكن كنت أقرأ تقارير كثيرة واتمتع فيها. وصلت المنتدى عن طريق البحث في جوجل عن مواقع مختصة بالسفر.

س 5 رأيك بشكل عام بالمنتدى وماذا يحتاج ؟

المنتدى إلزامي لكل شخص بعشق السفر، مثل كتاب الجبر لمدرس الرياضات. المميز فيه العلاقة الجميلة والترابط بين الأعضاء، بتحس انك في بيتك وبين أهلك، انا شخصيا الموقع الوحيد على النت الي فعال فيه بشكل يومي هو المنتدى.

بحتاج الى الاستمرارية فقط، لأنها هي الوحيدة الي بتضمن التطور، ويوم عن يوم رح يكبر أكثر وأكثر، ويزيد عدد الأعضاء، وعدد المميزين فيه.

تسلم أخوي أحمد عأسئلتك الجميلة
تحياتي لشخصك المحترم

Deena, احمد الحربي, فيصل و 6 آخرون معجبون بهذا.

Deena · 15-12-2016, 06:43 PM

الأخوة سألوا كتير شغلات كانت ببالي، وبخاصة عن الجواز والدولة وشعورك من ناحيتهم ..

ما خلوا لي كتير أسئلة. وانا اصلا لطيفة وأسئلتي خفيفة وملاحظاتي ظريفة

اوصفلنا علاقتك بالأشياء التالية:

- السيجارة

- الأرجيلة

- التلفزيون

- الأكل البحري ههههههه

- أصدقاء المدرسة

- السناب شات

- الدبكة الفلسطينية

وبس

احمد الحربي, مجدي, فيصل و 4 آخرون معجبون بهذا.

مجدي · 15-12-2016, 08:29 PM

اقتباس : المشاركة الأصلية كتبت بواسطة فهد المنيع

يا هلا بالمبدع مجدي
تفضل يا حلو .. وتحملنا

- جوازك وجنسيتك لتلك الدولة هل يسبب لك مشاكل عند السفر ، يعني نظرة استغراب او استنكار او كره . وكيف شعورك وانت عربي مسلم مالك علاقة بالجنسية ؟
- من خلال تقاريرك تهتم بادق التفاصيل وهذا يحتاج وقت وجهد في السفر ، هالشي ما يضايق زوجتك ؟ وكيف توفق بين الامرين ؟
- في التصوير هل انت من النوع اللي يحب يقتني افضل الكميرات والعدسات ويعرف تقنياتها او من النوع اللي يهتم بالتصوير نفسه والاخراج الجميل ؟
- ذكرت انك ما تقدر تزور الدول العربية بسبب جوازك ، هل جيت للحج او العمرة قبل كذا وكيف للي مثل حالتك يحج ؟
- الفلسطينيين في الضفة وغزة كيف ينظرون لكم يا عرب 48 ؟
- ماهي وجهة نظرك تجاه المبادرة العربية ؟
- بحكم تميزك في التقارير السياحية وش تنصح اللي حاب يكتب تقرير مميز ؟
- هل كثرة التصوير في السفر وتوثيق التفاصيل قللت من استمتاعك الفعلي بالاشياء ، او التصوير جزء من المتعة ؟
- رحلتك الاخيرة للصين كان معك زوجتك واخواتها .. هل شلت همهم واثر هالشي على استمتاعك بالرحلة ، او كانت تجربة جميلة ؟ ----> انتبه لايشوفون الموضوع
- صفة فيك تتمنى تتخلص منها في السفر ؟ وصفه تتمنى تكتسبها ؟
- لو كنت في سفره ومرتب جدولك اليومي بالملي وصارت لك مشاكل غيرت ترتيب الرحلات واضطريت تصف في طابور طويل لمدة ساعتين ووصلت لمرحلة من التعب النفسي والجسدي ولما وصلت شباك التكت حصلت الغردقاوي موظف التذاكر يقول لك التذاكر انتهت توكل على الله .. وش بتسوي له ؟

- وش بعد اممممممم خلاص يكفي وتقبل محبتي وتقديري

هلا بأخوي الفنان فهد
اذا ما رح أتحملك رح أتحمل مين يعني
عالراس وغالي

- جوازك وجنسيتك لتلك الدولة هل يسبب لك مشاكل عند السفر ، يعني نظرة استغراب او استنكار او كره . وكيف شعورك وانت عربي مسلم مالك علاقة بالجنسية ؟

حصلي أكثر من موقف لكن أصعبها كان أثناء رحلة العودة من سريلانكا، كانت تذكرتي بتضمن ترانزيت في مطار دبي.

قبل ما أدخل بالحكاية حبيت أقول ان أغلب الي حاملين الجواز الاسرائيلي بتجنبوا الترانزيت في مطارات الدول العربية تجنبا للمشاكل، لأنه في احتمال يتم توقيف الشخص واستجوابه، وحصل مرة قبل هيك انه تم منع الطيارة من الهبوط في المطار وتغيير مسارها اضطراريا لدولة مجاورة بتقيم علاقات دبلوماسية مع اسرائيل بسبب انه أحد الركاب معه جواز اسرائيلي.

لكن المشكلة انه أغلب اليهود الي ساكنين اسرائيل معهم جنسيتين وبحملوا جوازين على الأقل، مثل ما انتم عارفين أصولهم أوروبية، لذلك بستعملوا جوازهم الأجنبي في رحلاتهم ومش الجواز الاسرائيلي، وعلى فكرة بنزلوا في المطارات وبدخلوا الدول العربية والاسلامية عادي جدا بدون ما حدا يعرفلهم او يستجوبهم، هذه المعلومة يمكن كثير من اخوتنا العرب ما بعرفوها.

أما المشكلة انه الفلسطينيين الي معهم هذا الجواز مثلي، ما معنا جواز غيره نهائيا، حتى ما معنا الجواز الفلسطيني الي بتعطيه السلطة الفلسطينية لسكان الضفة وغزة، لأنه احنا لا نعتبر مواطنين ضمن الحدود الي واقعه تحت نفوذ السلطة الفلسطينية، انما مواطنين داخل الحدود الي حاكمتها اسرائيل. لذلك وضعنا جدا صعب، ما بنقدر ندخل الدول العربية وبعض الدول الاسلامية نهائيا، إلا باستلام دعوة من مواطن أو مؤسسة موجودة في هذه الدولة وبطلب خاص انه ما يتم ختم جوازنا، لأنه في حال تم ختم الجواز من دولة عربية رح يتم توقيفنا فورا بعد ما نعود وندخل اسرائيل واحتمال كبير يتم اتهامنا بالخيانة والتخابر مع العدو. حالات قليلة بيتم فيها السماح النا ندخل الدول العربية بشرط نقدم طلب لوزارة الخارجية، ويكون سبب الزيارة رسمي، يعني مشاركة في حدث رياضي\فني الخ.. والدولة العربية طبعا بتشترط انه يكون معنا جواز فلسطيني، فبيتم التنسيق مع السلطة الفلسطينية انها تعطينا جواز فلسطيني مؤقت.

لكني حبيت أخاطر لأنه كان نفسي أزور دولة عربية مثل الامارات، حتى لو كان المطار بس، ولما سمحتلي الفرصة رغم اني ترددت كثير، لكن اتوكلت على الله وحجزت ترانزيت في دبي.

أما بالنسبة للموقف الي صار معنا في مطار دبي، بعد ما دخلت المطار رحت لشباك الخطوط الملكية الأردنية علشان استلم تذاكر الطيران للأردن وتذاكر الطيران من الأردن لاسرائيل، كان في شباكين، شباك واحد للسياح وقدامه طابور كبير، وشباك صغير على جنب للعمالة الوافدة إلى اسرائيل وقدام الطابور ثلاث أو اربع أشخاص عالاغلب من شكلهم فلبينيين. انا وزوجتي طبعا مثل الناس المحترمين وقفنا في طابور السياح. ولما أجا دورنا بعد كثير وقت ابتسمت للموظف وأعطيته جوازاتنا، فجأة بدون مقدمات عبس وجهه واطلع علي وأشرلي باصبعه بعصبية إني أروح لشباك العمالة الوافدة، طبعا وقتها كنت مصدوم وما حكيت اشي، رحنا بسرعة للشباك الثاني، وقتها كان الطابور فاضي، فدخلنا مباشرة وأعطيت الموظفة جوازاتنا، لكن هالمرة حكيتلها قبل ما أعطيها الجوازات "السلام عليكم"، حكتلي وعليكم السلام فأعطيتها جوازاتنا، فجأة بتقلي "عربي ؟" باستغراب ووجهها عابس فيه دهشة، حكيتلها طبعا، سألتني "بتعرف (تحكي) عربي؟"، قلتها آه فلسطيني وانا عم ببتسم لعل الأمور تنحل بسلام، بعدها أخذت تفحص بأسامينا وتحكيلي "مجدي" و "اسم زوجتي"، بعدها هيك اخذت دقيقتين وهي تستوعب الموضوع، فقالتلي "هاي أول مرة بمسك جواز اسرائيلي"، قلتلها الاسرائيليين ما بستعملوا الجواز الاسرائيلي بستعملوا جوازهم الأجنبي لأنه معهم جنسيتين، فهيك ابتسمت وشكلها اتأكدت من لهجتي اني فلسطيني، فبلشت تفحص بالكمبيوتر والدقايق بتمر. بعد وقت طويل أجا موظف ثاني وقف وراها وهو بطلع بالجوازات، فجأة سألها "اسرائيليين؟!"، حكتله لا فلسطينيين، وهو عابس ووجهة غضبان صفن فيي ثواني طويلة وبعدها راح بدون ما يحكي. المهم بقينا قدام الشباك مش أقل من نص ساعة واحنا واقفين، لغاية ما اعطتنا الموظفة تذاكر الطيران للأردن بس، سألتها ليش ما اعطتنا تذاكر الطيران من الأردن لاسرائيل، حكتلي ما بتعرف وهذه أول مرة ما بتطلع معها كل التذاكر، حكتلي آخذهم من مطار عمان.

المهم خلصنا من الشباك ودخلنا صالة الانتظار، زوجتي دخلت الحمام وأنا وقفت في وسط الصالة بستنى فيها، فجأة بدون مقدمات أجا لعندي شخص لهجته مصرية بسألني وين ممكن يدخن سيجارة، طبعا انا ما عندي فكرة وحسيت انه الموضوع مش طبيعي، يعني من بين مئات البشر الموجودين ما لقي شخص ثاني يسأله، أطلعت عاللافتات المعلقة، شفت وحدة مع رسمة سيجارة، قلتله اكيد في هناك محل للتدخين مع انه بتقدر تدخنها بالحمام عادي ما حدا شايفك وصرت اضحك، فجأة أخذ نفسه وراح، لكن العجيب انه راح بالإتجاه المعاكس، فهذا أكدلي انه وكما يبدو أمن المطار بعثوه علشان يتأكدوا من هويتي.

هذا أصعب موقف وفي نفس الوقت أطرف موقف حصلي

- من خلال تقاريرك تهتم بادق التفاصيل وهذا يحتاج وقت وجهد في السفر ، هالشي ما يضايق زوجتك ؟ وكيف توفق بين الامرين ؟

صراحة بالعكس، هي كثير مرتاحه من الموضوع، ما بتتعب نفسها أبدا، كل شيء جاهز ومرتب، بعد ما نوصل البلد بتحول بالنسبة إلها لمرشد سياحي هههه.

- في التصوير هل انت من النوع اللي يحب يقتني افضل الكميرات والعدسات ويعرف تقنياتها او من النوع اللي يهتم بالتصوير نفسه والاخراج الجميل ؟

من ناحية بحب فأنا بحب جدا، لكن في نفس الوقت ما بحب أصرف على الأدوات إلا الي محتاجها بشكل كبير. يعني ما عندي حاليا غير كاميرا وعدسة وحدة بس. المشكلة انه أدوات التصوير غالية جدا، وبالنهاية أهم شيء زاوية التصوير وتقنيات التصوير ومش الكاميرا والعدسة.

- ذكرت انك ما تقدر تزور الدول العربية بسبب جوازك ، هل جيت للحج او العمرة قبل كذا وكيف للي مثل حالتك يحج ؟

سؤال ممتاز
الدول العربية الوحيدة الي مسموح نزورها هي الأردن (زرتها) ومصر (كان نفسي أزورها لكن الوضع الحالي ما بشجع) بحكم اتفاقيات السلام الي وقعتها. بالاضافة للمغرب وما بعرف السبب صراحة. والسعودية فقط للحج والعمرة.

بالنسبة للسعودية علشان نزورها لازم نقدم طلب رسمي للجنة الحج والعمرة الي موجودة عنا والمختصة بتنظيم هذه الرحلات. واللجنة بتقوم باختيار أقصى عدد مسموح فيه خصوصا في موسم الحج، أما العمرة فأغلب الطلبات ممكن يتم قبولها. وهيك بيتم اختيار الأشخاص، وبعدها اللجنة بتقدم الأسماء للوزارة في الأردن، والأردن بتقوم بتجهيز جوازات سفر مؤقتة خاصة بالحجاج والمعتمرين، وباستخدام هذه الجوازات فقط بيتم السماح النا بدخول السعودية. المشكلة انه كل هذه الإجراءات بترفع من التكاليف بشكل خيالي. فهذه الرحلات بتكون محددة بعدد أيام معين وقليل، أعتقد الحج بحدود الأسبوعين أو ثلاث أسابيع، أما العمرة على ما أظن عشر أيام، المهم تكاليف الحج ممكن توصل ما بين 10 الاف إلى 15 ألف ريال (حسب اختيار المسافر اذا كان برا أو جوا)، أما العمرة بحدود الـ 5 الاف، هذه طبعا تكاليف السفر والفنادق بس.

بالنسبة للحج أعداد الي بيتم قبولهم سنويا قليل جدا مقارنة بعدد الطلبات، واللجنة بتقوم باعطاء حق الأولوية للي أعمارهم كبيرة أو الي وضعهم الصحي صعب أو الي هذه رحلة الحج الأولى بالنسبة إلهم. ومثل ما فهمتوا أغلب الناس بالنسبة الهم هذه التكاليف شبه مستحيلة خصوصا اذا أضفنا المُحرم المرافق. فكثير من الناس بتقضي عمرها وهي تجمع المبلغ، وكثير جدا من الناس بيتم رفض طلبها سنة بعد سنة، ولهيك الناس الي بيتم الموافقة على طلبها بتكون فرحتهم رهيبة وكأنه عرس، والأقارب والمعارف والجيران بروحوا يهنوهم ويودعوهم.

الحمد لله والدي ووالدتي أتوفقوا وقدروا يتمموا مناسك الحج بسلام، وأنا ان شاء الله حاطط ببالي أعتمر مع زوجتي قريبا، لأنه قبولنا للحج بعمرنا الصغير مستحيل. وهذه فرصة نقابل الوجوه الطيبة مثل حضرتك.

- الفلسطينيين في الضفة وغزة كيف ينظرون لكم يا عرب 48 ؟

صراحة سؤالك مميز عجيب ويمكن الجواب يكون أعجب

الموضوع جدا معقد وفيه تناقض كبير، طبعا على المستوى العام كلنا في نفس الطبق، لنا ما لهم وعلينا ما عليهم. لكن على المستوى الشخصي الشعبي داخل النفوس النظرات مثل ما حكيت فيها تناقض غريب، مثل تعقيد القضية الفلسطينية كلها.

المسألة بتتعلق بالشعور النفسي وبالمقدرة المادية. ذكرت سابقا انه الشعب الفلسطيني حاليا مقسم إلى خمس أقسام : فلسطينيو الشتات خارج العالم العربي في أوروبا وأمريكا وغيرها، فلسطينيو الشتات داخل الوطن العربي مثل الأردن وسوريا ولبنان وغيرها، فلسطينيو الداخل أو عرب الـ48 الي أنا منهم، فلسطينيو الضفة الغربية، وفلسطينيو قطاع غزة.

مثلا :

الفلسطيني بغزة الأكثر فقرا بسبب الحصار، بتمنى يكون من فلسطينيي الضفة أو من الشتات في الدول العربية لأنهم عندهم اقتصادهم وتجارتهم حتى لو كانت ضعيفة، أما الفلسطيني بالضفة بتمنى يكون مثل إلي بالـ48 لأنا من الناحية المادية مقتدرين أكثر بسبب فرص العمل الي متوفرة عنا داخل الشركات الاسرائيلية وامكانيات التجارة المفتوحة، أما احنا بنقول يا ريت لو كنا من فلسطينيي الشتات في النرويج ولا في السويد، كان وضعنا المادي أفضل بكثير.

وأيضا من الناحية النفسية الفلسطيني بغزة مقهور مهان محاصر، بتمنى يحصل على الحرية مثل الفلسطيني في الضفة رغم انها حرية منقوصة، اما الي في الضفة بتمنى يكون حر مثل الفلسطيني الي في الـ48 لأنه جواز سفرنا أقوى رغم انا واقعين مباشرة تحت جبروت السلطة الاسرائيلية، لكن احنا بنتمنى لو نكون من فلسطينيي الضفة أو الشتات لأنه جوازنا ما بسمحلنا نزور الدول العربية وأيضا مقيدين بالقوانين الاسرائيلية المباشرة، وحياتنا كلها مرهونة فيهم.

طيب الآن العكس خليك تفهم التناقض. الفلسطيني بالشتات بتمنى يكون في الـ48 علشان يكون في أرضه ويقاوم من الداخل، أما احنا بنتمنى نكون في الضفة علشان نكون حرين في آراءنا ونشعر انا داخل دولة مؤسساتها فلسطينية، شركاتها فلسطينية، شوارعها فلسطينية، منهاجها فلسطيني، كل الشعب فلسطيني بحكي عربي، أما الي في الضفة بتمنوا يكونوا من سكان غزة علشان يساعدوهم يقاوموا ويقهروا الحصار.

وفي النهاية هاي مجرد نظرات ومشاعر داخلية نفسية ما بتشعر فيها أثناء التعامل، كلنا بندعم بعضنا معنويا واقتصاديا، دعم من الشتات ومنا لاخوتنا في الضفة، اما الأخوة في غزة فلا سبيل إليهم إلا بالدعاء والمعونات المحدودة الي بتسمحلنا اسرائيل نمررلهم اياها. وما ننسى انه بتجمعنا علاقات قرابة، يعني كثير من بناتنا متزوجات بالضفة وغزة، وكثير من بناتهم متزوجات عندنا، وأصلا وقبل هيك، كثير من أقاربنا إلي كانوا ساكنين في القرى والمدن الموجودة حاليا داخل حدود اسرائيل هاجروا أثناء النكبة والنكسة للضفة وغزة والشتات، يعني شبكة كبيرة صعب تفككها.

ضيعتك أكيد

- ماهي وجهة نظرك تجاه المبادرة العربية ؟

واقعيا كثير من الدول العربية والاسلامية أقامت علاقات دبلوماسية سرية مع اسرائيل، وبين الفترة والثانية بيتم انتشار خبر أو صورة وبيتم اسكات القضية بسبب حساسيتها. في العلن الدول العربية الوحيدة الي بتقيم علاقات مثل ما هو معروف هي مصر والأردن بسبب اتفاقيات السلام.

بالنهاية في الوقت الراهن وعلى المدى المنظور أمامنا حلين : يا إما إقامة دولة فلسطينية بجوار دولة اسرائيل، أو ضم الضفة وغزة لاسرائيل واعلانها دولة واحدة ووقتها رح تكون الأغلبية الديموغرافية (عدد السكان) هي فلسطينية فهذا الحل اسرائيل رافضته نهائيا وبتحاول تهرب منه رغم ضغط الدول عليها، لأنه مستحيل يقبلوا انه عدد الفلسطينيين داخل الدولة يكون أكبر من عدد اليهود.

المشكلة في المبادرة العربية إنها مبادرة ممتازة لكن بدون دعم وسند قوي، يعني مثل ما بنقول بالشعبي (بدون ظهر)، لأنه طالما اسرائيل ما في أمامها دول عربية قادرة على تخويفها اقتصاديا أو سياسيا أو عسكريا ما رح تقبل بأي حل بينعرض عليها. عمرك شفت واحد قوي أتنازل لواحد ضعيف ؟

عندك مثال ايران، استطاعت تطويع وكسر شوكة كل دول الغرب وخصوصا أمريكا، فقط بالترهيب والتخويف وفرد العضلات سواء الاقتصادية أو العسكرية، فقط بالكلام مش أكثر. فإذا ضلت الدول العربية عامله نفسها محترمة مؤدبة دبلوماسية ما حدا رح يعيرها اعتبار نهائيا، والواقع كلنا شايفينه للأسف. القوي بفرض احترامه على الجميع هذا قانون العالم. والدول العربية امكانياتها ضخمة لا تقارن بأي دولة أخرى، لكن للأسف ضعيفة معنويا ومشتتة.

- بحكم تميزك في التقارير السياحية وش تنصح اللي حاب يكتب تقرير مميز ؟

انصحه أولا يرتب أفكاره وملفاته
ثانيا يكون عنده صبر لأنه كتابة التقرير بتحتاج تأني
ثالثا الاستمرارية وعدم اليأس

- هل كثرة التصوير في السفر وتوثيق التفاصيل قللت من استمتاعك الفعلي بالاشياء ، او التصوير جزء من المتعة ؟

نهائيا، بل على العكس، جزء كبير من فرحتي وسعادتي بتكون من خلال عين الكاميرا، كثير أحيان بوقف قدام منظر معين دقايق طويلة علشان أختار زاوية وإعدادات التصوير، فالصورة بتنطبع في مخيلتي لفترات طويلة حتى بعد ما أرجع من الرحلة.

- رحلتك الاخيرة للصين كان معك زوجتك واخواتها .. هل شلت همهم واثر هالشي على استمتاعك بالرحلة ، او كانت تجربة جميلة ؟ ----> انتبه لايشوفون الموضوع

شلت همهم كثييييييير، وأثر على استمتاعي أحيانا، لكن اذا بتحب تعرف التفاصيل فانت مجبور اتابع التقرير لأني ما بدي أحرق الأحداث ههههه
فعلا الله يستر ما يشوفوا شو كتبت

- صفة فيك تتمنى تتخلص منها في السفر ؟ وصفه تتمنى تكتسبها ؟

ما بتمنى اني اتخلص منها، لكن حابب أجرب الشعور لما أسافر بدون تخطيط وترتيب مسبق، مش عارف ليش الإشي مخوفني.

صفة بتمنى اكتسبها ؟ هي مش صفة انما بتمنى لو اقدر آكل من الأكلات الشعبية في الدول الي بزورها، الأكل بالنسبة إلي مشكلة.

- لو كنت في سفره ومرتب جدولك اليومي بالملي وصارت لك مشاكل غيرت ترتيب الرحلات واضطريت تصف في طابور طويل لمدة ساعتين ووصلت لمرحلة من التعب النفسي والجسدي ولما وصلت شباك التكت حصلت الغردقاوي موظف التذاكر يقول لك التذاكر انتهت توكل على الله .. وش بتسوي له ؟

لا حول ولا قوة إلا بالله
الغردقاوي لاحقني حتى لهون ؟
ابتعدي عني أيتها اللعنة الفرعونية هههه

أسئلتك صديقي في الصميم
شخص مثقف محترم اتشرف بمعرفتك
استمتعت بكل جواب فسامحني عالإطالة

فيصل, الغردقاوي, توبليرون و 6 آخرون معجبون بهذا.

مجدي · 15-12-2016, 09:39 PM

اقتباس : المشاركة الأصلية كتبت بواسطة Haksa77

بااك مرة أخرى لك
أسئلتي بتكون خفيفه ولطيفة عليك بأذن الله
س/ متى بدأت احتراف التصوير وماهو نوع الكاميرا ؟؟
س/ ماهي أول دولة سافرت لها ؟؟
س/ ماهي الدولة التي أعجبتك كثيراً من الدول التي سبق أن زرتها وتود زيارتها مرة أخرى ؟؟
س/ ماذا يحتاج المنتدى ليعود لسابق عهده ؟؟
انتهى ...
تحياتي ،،

هلا بأهل المغرب الشقيق
تسلم على تعاطفك معي وتخفيف أسئلتك لأنه الشباب ما شاء الله ما قصروا نهائيا هههه

س/ متى بدأت احتراف التصوير وماهو نوع الكاميرا ؟؟
بدأت اهتم بصورة كبيرة بالتصوير ودراسة أساسياته من حوالي 4 سنين. كاميرتي من نوع Canon 70D.

س/ ماهي أول دولة سافرت لها ؟؟
جارتنا الغالية المملكة الأردنية الهاشمية

س/ ماهي الدولة التي أعجبتك كثيراً من الدول التي سبق أن زرتها وتود زيارتها مرة أخرى ؟؟
ان شاء الله رح أكرر مستقبلا زيارة جميع الدول الي زرتها حتى اليوم إذا ربنا أراد. لأنه إلي ذكريات جميلة في كل وحدة منها. وحاسس انها صارت جزء مني. أكثر دولة حابب أزورها بسبب جوها وطبيعتها وبساطتها هي زنجبار، وأكثر دولة حابب أزورها لأني حاسس انه في كثير معالم وأنشطة وأماكن لسة لازم استكشفها فيها هي الصين.

س/ ماذا يحتاج المنتدى ليعود لسابق عهده ؟؟
المنتدى الحمد لله بالمسار الصحيح، عم يطور يوم بعد يوم. للأسف تم هدم المنتدى السابق بسبب قرارات تعسفية دكتاتورية. لكن قدروا الشباب الله يعطيهم العافية من وضع الحجر الأول الى من بعده بمجهودنا جميعا عم بنبني البيت كله. المهم حاليا الاستمرارية والإصرار.

تسلم أخوي على اسئلتك الجميلة
تحياتي لحضرتك وان شاء الله أقدر أزورك في أرضك قريبا

Haksa77, الغردقاوي, توبليرون و 4 آخرون معجبون بهذا.

مجدي · 15-12-2016, 10:14 PM

اقتباس : المشاركة الأصلية كتبت بواسطة أبو مهاب

الله يعينك يا مجدي على عصابة الستات

انا عندي كم سؤال

1- قبل كم شهر ، كانت في مبارة لمنتخبنا السعودي مع منتخب فلسطين وطبعا السعودية رافضة اي علاقة او تطبيع ، وقتها رئيس الاتحاد الفلسطيني كان يقول ممكن تدخلوا فلسطين بدون ما تتخنم جوازاتكم فهل هالشي صحيح؟

2- اذا فهمتك مظبوط ، انت جوازك يمنعك من دخول بعض الدول العربية ولا كلها، طيب واوروبا كيف وضعها؟

3- كيف ممكن تشرح (التطبيع) بكلمات او أوصاف سهلة؟

4- صراحة أنا غير متابع لتقاريرك بشكل كبير ، بحكم ان الدول اللي سافرت لها مش على قائمتي ولا حتى أفكاري ، لكن شو الشيء اللي جذبك لزيارتها؟

5- ماهي الدول غير العربية اللي تتمنى زيارتها؟

6- هل شاركت في مسابقات تصوير؟

7- طلب مش سؤال

نبغى منك تقرير مبسط عن مدينة القدس الشريف (قليل سياحيا غزير اجتماعيا)

عصابة ستات محترفة الله وكيلك
الله يعين الي بوقع تحت ايديهم هههه

1- قبل كم شهر ، كانت في مبارة لمنتخبنا السعودي مع منتخب فلسطين وطبعا السعودية رافضة اي علاقة او تطبيع ، وقتها رئيس الاتحاد الفلسطيني كان يقول ممكن تدخلوا فلسطين بدون ما تتخنم جوازاتكم فهل هالشي صحيح؟

صحيح فعلا، حسب القانون الاسرائيلي بإمكان الزائر انه يطلب عدم ختم جوازه، انما اضافة الختم على التأشيرة مثلا أو على ورقة خارجية

2- اذا فهمتك مظبوط ، انت جوازك يمنعك من دخول بعض الدول العربية ولا كلها، طيب واوروبا كيف وضعها؟

للأسف جوازي بمنعني أدخل كافة الدول العربية، ما عدا الأردن ومصر والمغرب والسعودية لأداء مناسك الحج والعمرة. وبعض الدول الاسلامية مثل أندونيسيا وماليزيا وغيرها. أما بالنسبة للدول الأوروبية فالوضع ممتاز، الجواز بسمحلي أدخل الأغلبية العظمى منها بدون الحاجة لفيزا.

3- كيف ممكن تشرح (التطبيع) بكلمات او أوصاف سهلة؟

برأيي انه التطبيع يفترض يكون منع العلاقات السياسية والاقتصادية والثقافية بين الدول والشعوب، لكن عدم اقحام زيارة المسجد الأقصى وفلسطينيين الـ48 مثلي تحت مظلة التطبيع، لأنه مثل ما هو حاصل حاليا أصبح المسجد الأقصى وحيد مهجور إلا من الفلسطينيين، وتم إقصاءنا إحنا عرب الـ48 عن العالم العربي، لدرجة انه لغاية بداية القرن الـ21 ما كان حدا بالعالم العربي يعرف بوجودنا، ولما كنا نقول ان احنا فلسطيين عرب وساكنين داخل اسرائيل يعتبرونا مباشرة خون ملعونين، وفقط بالسنوات الأخيرة بدأت الصورة توضح وبدأت القضية تبان على حقيقتها، بفضل الانترنت وقنوات التلفزيون. أذكر انا بأواسط سنوات التسعين لما بدأ الانترنت يدخل البيوت، وانتشر التشات عالمواقع، كنا نخاف نحكي ان احنا ساكنين في اسرائيل، لانه مباشرة كان يتم مهاجمتنا ومقاطعتنا. لكن الحمد لله اليوم الوضع اتغير كثير.

4- صراحة أنا غير متابع لتقاريرك بشكل كبير ، بحكم ان الدول اللي سافرت لها مش على قائمتي ولا حتى أفكاري ، لكن شو الشيء اللي جذبك لزيارتها؟

الي جذبني شغف الاستكشاف وفك شفرات المجهول. عندي حب استطلاع شديد لكل بلد غير مطروق. أنا بعكسك، ببحث دائما عن التقارير الغريبة، البلاد إلي بعتقد انه بعيدة عني وصعب اني أوصلها، لأنه هي الي رح تدفعني للبحث والتنقيب والتخطيط والترتيب لزيارتها والتعرف على خباياها، وبعد زيارتها رح تشعر بالإنجاز والاكتفاء الذاتي شعور عمرك ما حسيت فيه. ممكن أشبه شعوري في هذه الحالة بشعور رائد الفضاء أول ما يخطو على القمر.

5- ماهي الدول غير العربية اللي تتمنى زيارتها؟

دول أمريكا الجنوبية، البرازيل الأرجنتين الأوروغواي المكسيك كوستاريكا كوبا ووووو

6- هل شاركت في مسابقات تصوير؟

حتى الآن لا وصراحة ما فكرت بالموضوع
التصوير بالنسبة إلي هواية شخصية ما بعرف اذا رح أحولها بيوم من الأيام لوظيفة

7- طلب مش سؤال
نبغى منك تقرير مبسط عن مدينة القدس الشريف (قليل سياحيا غزير اجتماعيا)

بتصدق انه الصور جاهزة والتقرير بستنى فيي ؟
كنت بجولة تصوير في القدس قبل رحلتي للصين، وغطيت الجولة بالسناب الخاص بالمنتدى، لكن ما لقيت الوقت لحد الآن لكتابة التقرير
لكن ان شاء الله بعد ما انتهي من تقرير الصين رح أجهز تقرير القدس أكيد
وأكيد رح تكون إلي زيارات قريبة لمدن أخرى مثل حيفا ويافا والناصرة وعكا وغيرها
وأي طلب أنا حاضر

اسعدتني أسئلتك كثير
تسلم على وقتك وان شاء الله تكون أجوبتي خفيفة عليك
تحياتي لحضرتك

الغردقاوي, توبليرون, احمد الحربي و 6 آخرون معجبون بهذا.

مجدي · 15-12-2016, 11:22 PM

اقتباس : المشاركة الأصلية كتبت بواسطة آخـــرفـــرصـــة

حبيت أمسي على مشرفنا الغالي مجدي
الرجل العصامي صاحب العدسة الجميلة
و ارحب فيه على كرسي السعادة

جيت أسال لقيت أنهم هلكوك أسئلة
فـ تضامناً معك لن تزيد أسئلتي عن 20 سؤال

فيلم لا مانع لديك من مشاهدته أكثر من مرة ؟
عند تعرض الطائرة لمطبات هوائية كيف يكون شعورك ؟
شو رأيك برحلات الكروز وكيف علاقتك مع البحر ؟
معنى السفر الاقتصادي عند مجدي ؟
الصينيون يفضلون السفر في قروبات ما رأيك بهذا النوع من السفر ؟
عوامل تحدد وجهتك القادمة ؟
الطريقة المفضلة للتعامل مادياً خلال رحلتك ؟
ما رأيك بالسفر وحيداً solo travel ؟
مزايا الاعتماد على مرشدين خلال رحلتك ؟
شو رأيك بمغامرات مثل القفز من الطائرة أو السباحة مع القرش ؟

ما شاء الله تكتب الكثير من التفاصيل هل تدونها خلال الرحلة ؟
هل تجد نفسك في الكتابة ؟
الكاتب الجيد قارئ جيد ماذا قرأت مؤخراً ؟
مبدع في تقاريرك هل اكتشفت هذي الموهبة هنا في المنتدى ؟
مجدي اضافة كببرة للمنتدى فـ كيف تعرفت عليه ؟

الرياضة المفضلة لديك ؟ وفريقك المفضل عالمياً ؟
نوع الكاميرا التي تفضلها ؟
هل تستخدم الفوتوشوب للتعديل على صورك ؟
العدسة و الاعدادات اللي مجدي يفضلها ؟
نصائح للمبتدئين في التصوير ؟

يسعد مساك يا عسل

هلا بالغالي أبو غسان كبير العيلة
قلتلي كرسي السعادة ؟ صادق طبعا ههه
ألف شكر ليك على التضامن
صراحة شو ممكن الواحد يطلب أكثر من هيك تضامن

فيلم لا مانع لديك من مشاهدته أكثر من مرة ؟

واو سؤال حلو
المشكلة اني ما بتذكر الأفلام الي بشوفها ، لا أساميها ولا الممثلين
وأحيانا كثيرة بنسى الأحداث أساسا
لكن بالنسبة للمسلسلات ممكن اختار بسرعة لأنها عالقة بذهني
Prison Break
Lost
Heroes
Game of Thrones

عند تعرض الطائرة لمطبات هوائية كيف يكون شعورك ؟

ممكن ارتجف للحظة لكن بعدها عادي جدا
المشكلة انه زوجتي بتخاف كثير وهون الصعوبة

شو رأيك برحلات الكروز وكيف علاقتك مع البحر ؟

بعشق البحر جدا، لكن ما بحب رحلات الكروز
بحس انها فندق وطايش على سطح البحر
وأنا ما بهتم أبدا بالفنادق، الي بهمني أكثر الي خارج الفندق

معنى السفر الاقتصادي عند مجدي ؟

انك تقدر تستغل أقل مبلغ ممكن في أطول وأغنى رحلة ممكنة بالأحداث والفعاليات والمعالم
تهتم باستكشاف البلد بأكبر شكل ممكن وتخرج الفنادق والطيران من المعادلة قدر المستطاع

الصينيون يفضلون السفر في قروبات ما رأيك بهذا النوع من السفر ؟

ما بحبه، لأنه فيه تقييد لحرية المسافر
مجبر انك تكون مرافق للمجموعة، توكل بالمطاعم الي بختاروها، تزور المعالم الي بزوروها، تتأقلم مع سرعة مشيهم، استعجالك بالتصوير، وبالنهاية قسم كبير من أيام الرحلة بتكون أوقات حرة يعني بتكون دافع مبلغ وقدره للبرنامج والمرشد والطيران وبالنهاية بحكولك هذا اليوم ما في برنامج، وبكرا نص اليوم ما في برنامج، ادفع من جيبك زيادة ودبر أمورك بنفسك وإلا خليك نايم بالفندق، يعني أبشع طرق الاستغلال.

عوامل تحدد وجهتك القادمة ؟

المبلغ الي بتحتاجه السفرة
وطبيعة البلد وخضارها وبساطتها

الطريقة المفضلة للتعامل مادياً خلال رحلتك ؟

اذا قصدك طريقة الدفع، فأنا بفضل الكاش
رغم انه في بعض الأحيان بكون فيه مخاطرة

ما رأيك بالسفر وحيداً solo travel ؟

مغامرة رهيبة لازم أجربها في يوم من الأيام
نفسي ألف العالم وحيد مع شنطة صغيرة فيها بس كاميرتي واللابتوب وكتاب وقميص وبنطلون واحد بس

مزايا الاعتماد على مرشدين خلال رحلتك ؟

احيانا بكون الاعتماد على مرشد أفضل قرار ممكن توخذه
بوفر عليك من الناحية المادية التنقلات بالمواصلات العامة وسيارات الأجرة
وبختصر عليك وقت كبير كنت ممكن تضيعه بالبحث عن المعالم
وممكن تستغله بالمعلومات وباختيار المناطق المميزة والغير معروفة للسياح
لكن لازم تكون ذكي باختيارك للمرشد علشان ما يتم استغلالك

شو رأيك بمغامرات مثل القفز من الطائرة أو السباحة مع القرش ؟

مستحيل أجربها

ما شاء الله تكتب الكثير من التفاصيل هل تدونها خلال الرحلة ؟

نهائيا، التفاصيل بتذكرها عن ظهر قلب
من اليوم الي بتبدأ في رحلتنا لغاية اليوم الي بنرجع فيه ببرمج نفسي من جديد وبفصل حياتي اليومية عني نهائيا مع حقنة أدرينالين بتعطيني نشاط مع شعلة نار داخلية رهيبة
لذلك ما بوخذ معي شريحة اتصال واذا اشتريتها فقط علشان استخدم الانترنت
ما بتصل بالأهل إلا مرة أو مرتين فقط خلال الرحلة وبالليل بعد ما أرجع من الجولات اليومية
أما بالنسبة للساعات والتوقيت فبوخذها من إعدادات الصور الي صورتها

هل تجد نفسك في الكتابة ؟

جدا، بعشق الكتابة
خصوصا الخواطر والأفكار اللحظية السريعة
شعر أحلام خيال بعيد كليا عن الواقع

الكاتب الجيد قارئ جيد ماذا قرأت مؤخراً ؟

ذكرتها قبل شوي بجوابي لأختي طوق الياسمين
في آخر ثلاث أشهر ونص تقريبا قرأت هذه الكتب :
ماذا قدم المسلمون للعالم لراغب السرجاني، أنتيخريستوس لأحمد خالد مصطفى، ساق البامبو لسعود السنعوسي، 1984 لجورج أوريل، قواعد العشق الأربعون لإليف شفق، في قلبي أنثى عبرية لخولة حمدي، رحلة الـ100 عبيط لعمر عباس. وحاليا عم بقرأ حول العالم في 200 يوم لأنيس منصور.

مبدع في تقاريرك هل اكتشفت هذي الموهبة هنا في المنتدى ؟

تسلم أبو غسان شهادة كبيرة اعتز فيها
بالنسبة لكتابة التقارير فعلا أكتشفتها هون في المنتدى
لكن بالنسبة للكتابة بشكل عام فهي هواية ملاحقتني من وأنا صغير

مجدي اضافة كببرة للمنتدى فـ كيف تعرفت عليه ؟

الله يخليك، تعرفت على المنتدى أثناء بحثي عن مصادر وتقارير للسفر
وأكتشفت فيه كنز ضخم ومن يومها لليوم أتعلقت فيه وأصبح جزء من حياتي اليومية

الرياضة المفضلة لديك ؟ وفريقك المفضل عالمياً ؟

الكونغ-فو والكاراتيه
أما بالنسبة لفريقي المفضل بكرة القدم فهو منتخب البرازيل

نوع الكاميرا التي تفضلها ؟

حاليا كاميرتي عزيزتي Canon 70D رغم إنها كروب فريم
ان شاء الله قريبا رح أحول للفول فريم

هل تستخدم الفوتوشوب للتعديل على صورك ؟

بستخدم أكثر اللايتروم وأحيانا الفوتوشوب
لكن فقط للتعديلات البسيطة مثل تصحيح الألوان والظلال
أو حذف جزء مزعج جدا بالصورة وهذا نادر يصير
وهذه الأمور بعملها بصور معدودة جدا بختارها كأفضل صور وأقربها لقلبي

الصور الي رفعتها لحد الآن في تقرير رحلتي للصين ما تم تعديلها أبدا
إن شاء الله بعد ما أنتهي من التقرير رح أختار أكثر صور حبيتها وأصحح فيها بعض الأمور إذا احتجت لهذا الشي

العدسة و الاعدادات اللي مجدي يفضلها ؟

بفضل عدسات التيليفوتو بالاستخدام اليومي لأنها شاملة
لكن طبعا لكل نوع تصوير في عدسات خاصة بتظهر الصور بشكل أفضل
إعدادات كاميرتي دائما مانيوال

نصائح للمبتدئين في التصوير ؟

قبل ما تشتري معدات تصوير وتصرف عليها دم قلبك
جرب شهر أو شهرين تصور بكاميرا الجوال
إذا حسيت بشغف التصوير اشتري المعدات
وإذا حسيت بالملل بهيك بكون أنقذتك من التبذير

يسعد مساك يا عسل

مساك أسعد عمدتنا
أسئلتك لطيفة مباشرة ممتعة عطرت الجو
مشكور على وقتك
وشرفتني أكيد

فيصل, الغردقاوي, توبليرون و 6 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
☆ أجمل عشرة مناطق للتسوق في طوكيو ☆	السفيرة ب	بوابة اليابان	28	24-06-2019 08:13 AM
☆ أجمل 10 أماكن يمكنك زيارتها في اليونان ☆	السفيرة ب	بوابة اليونان	22	31-12-2017 09:38 PM
☆ أفضل مناطق الجذب السياحي في النرويج ☆	السفيرة ب	بوابة اسكندنافيا	18	27-06-2017 04:10 PM
★ جزيرة رودوس في اليونان ★	السفيرة ب	بوابة اليونان	22	15-02-2016 01:43 AM
☆ صور بيوت اليونان القديمة ☆	السفيرة ب	بوابة اليونان	14	10-08-2015 03:01 AM