..:: تقرير برائحة القهوة البيضاء الماليزية ::..

ام جسومي · 10-12-2016, 04:26 PM

جزء المطــــــــاعم :

قبل ماتبدأوا معايا ، حابه اقولكم لمن كتبت المطاعم و المولات اتضح انهم حيكونوا جزء جدا كبير
ومرهق ليا في اضافة الصور للقسمين ...

فرأيت انه عشان اعطي كل جزء حقه اني افصلهم عن بعض

وحنزله في اقرب فرصه لانه تقريبا جاهز

المطاعم اللتي تمت زيارتها :
1- الطربوش مو البيراميد في سيلانجور
2- بيتزاهت في مول البيراميد
3- صاقر الهندي في الصنواي لاجون
4- مطعم بيتزا ( CUBES PIZZA ) في الصنواي لاجون بسيلانجور
5- ناندوز في التايمز سكوير في كوالا
6- مطعم 69 و 60 في برج كومتارو في بينانغ
7- Fuel shaek برجر
8- كافيه هارد روك
9- ماكدونالدز
10- كنتاكي
11- مطعم ( PIZZERIA ) فندق الهارد روك
12- كافيه ديب اند ديب Dip N dip في البيراميد في سيلانجور
13- ستار بكس
14- برجر كنج

بسم الله نبدأ :

- مطعم الطربوش في مول البيراميد في سيلانجور الدور : ( LG2 ) :

نبذه بسيطه عنه :
يعد مطعم عربي ، يقدم المشويات بكل انواعها .

سبب اختياري له :
المدح الكثير عنه في المنتدى هذا ..

الاسعار :
متوسطه الى رخيصه ..

الطلب ورأي فيه :
طلبنا شيش طااووق ليا ، وحمص وبرياني دجاج وبطاطس وسفن .

صراحة انصدمت من الطعم ، الله يكرم النعمه ،،
الشيش طاووق ماقدرت اكله فيله طعم زناخه ومافيله ريحه الشوي ، تعرفوا المشويات يكون لها طعم الشوي مبخره تجيكم ، هذا لا يمت باي صله للشوي ..
واما البرياني فصارحه كان عباره عن كبسه يضحكوا علينا اذا هذا برياني .. اكلناه من الجوع بس .. ولا انه مو قد كذا ..
الحمص ممتاز
الظاهر انه انخفض مستواه جدا ، لانه كل اللي مدحوه كانوا يقولوا انه جدا لزيز .. فاكيد تدنى مستواه ..
وللعلم روحنا له في الساعه 2 ظهرا للغداء ، وكان المطعم فاضي ، وجلسنا في المنطقة المكشوفة ،،
نبغا ناكل ونستمتع بالاطلاله على مسابح الصنواي لاجون ..
كان يوجد ثلاث طاولات جالسين فيها ناس يعسلوا ..

واثناء قدوم الاكل الا تمطر هذيك المطره القويه الشديده ،، صراحه الحمد لله جمال هذا الجو شفعلهم وماخلانا نقوم من المطعم ندور مطعم تاني ناكل فيه ..
التقييم :
2/5

الصور :

الشيش طاووق حقي

برياني دجاج لابو جاسم

موقع المطعم :
Tarbbush Restaurant

- بيتزا هت في مول البيراميد في سيلانجور : الدور LG2

نبذه بسيطه عنه :
مايحتاج اقول شيء عنه معروف للجميع ، مطعم بيتزا

سبب اختياري له :
قلنا يلا نجربه ، طفشنا من ماكدونالدز .

الاسعار :
بيتزا كبيره بـ 50 رنجت تقريبا

الطلب ورأي فيه :
طلبنا بيتزا خضار ( للمعلومية اغلب البيتزاالخضار ف ماليزيا يحطوا اناناس مع الخضار )
طعمها ابدا مو زي حق جده ،، جدا سيئة مالها طعم تحس انك تاكل بيتزا مسلوقه ههههه مافي بهارات او أي طعم جميل او ناطع ..
والعجينه امممم مو مرا وااو

التقييم :
2/5

منيو المطعم :
http://pizzahut.com.my/dining/menu-pizza-supremes.html

- مطعم صاقر الهندي في الصنواي لاجون في بداية الحديقة بعد السوق :

نبذه بسيطه عنه :
مطعم هندي يقدم الاكل الهندي بانواعه ، ونظامه على بوفيه ، انت تختار اللي تبغاه والرجال يغرف لك في صحنك .

سبب اختياري له :
المدح له في هذا المنتدى

الاسعار :
متوسطه الى رخيصه ، ممتازة

الطلب ورأي فيه :
طبعا بعد ماخلص ابو جاسم وجسومي سباحه ، رحنا لصاقر نتغداء ..

طلبنا : برياني رز مع دجاج ، ايدام ، 2 سمبوسه ، بتر شيكن ، نان ، سفن
حتى البرياني حقهم كانه كبسه ، اش السالفه في ماليزيا كلها عندهم مشكله في البرياني محد يعرف يسويه شكله !!!
مو مرا لزيز
البتر شيكن الز حاجه مرا طعم ولذيذ مع العيش النان ..

التقييم :
3/5

الصور :

- مطعم البيتزا ( CUBES PIZZA ) في الصنواي لاجون امام مطعم صاقر الهندي

هذا المطعم رهييييييب انصحكم بيه بشده ، الحين ابو جسومي وجسومي جالسين يسبحوا وانا انتمشى في المكان استكشفه ، الا واشوف قدامي ثلاث كشكات : واحد يبيع بطاطس مقليه وسندوتشات برجر ، وواحد بيتزا ، والثالث ايسكريم وفشار ..

المهم عيني طاحت على البيتزا قلت يلا خليني اشتري بيتزا عشان اول مايطلعوا من المسبح حيكونوا مرا جيعانين
فقلت اسويلهم هيا مفاجأه .. ههههه

المهم فيه مقاسين كبيره وصغيرة
البيتزا حقتهم على شكل مربع وليست دائريه
الصغيرة بسعر 14 رنجت
والكبيره ب 40 رنجت

اممممم ياربي ايش اخذ ....!!
قلت يلا اعطيني الصغيره نجربها اخاف اطلب كبيره وتطلع مو لزيزه وخسرت 40 رنجت ع الفاضي ..
فخلينا ع المضمون .. ووبس طلبتها بالخضار ..
واول ماخرجوا من المسبح هجوووم ع البيتزاا وطلعت مرا لزيزه
والله ندمت وقلت ياريتني طلبت الكبيره .. هههههه
طبعا الحجم الصغير ي دوب تكفي نفر واحد يعني مرا صغيره ..

المهم هذا المطعم لاتنسووه اشتروا منه اذا قرصكم الجوع وانتوا في الالعاب المائية الصنواي ..
وله اكثر من فرع في الملاهي انا شوفت فرعين له في الالعاب مدري اذا فيه ثالث او لا ..
الفرع الثاني قريب من منطقه الـ نيكولودين ..

التقييم :
4/5

منيو المطعم :

Cubes Pizza

الصور :

فرع صنواي لاجون بجانب نيكولودين

- ناندوز في التايمز سكوير في كوالا

في ايامنا الاخيره في كوالا ، كنا نتجول في التايمز سكوير ..
وبالصدفه لقينا هالمطعم في وجهنا وقلنا يلا
نجربه ..
وفعلا طلبنا 4 اطباق
برجر دجاج – الشيش طاووق – ورز مع دجاج وخضار مشويه – سلطه سيزر
البرجر اسوء من السيء العيش قاسي وناشف و الدجاج فيله ريحه سيئة زناخه –
الرز والدجاج مايتاكل استغفر الله الله يكرم النعمه بس – اما الشيش طاووق كان جيد نوعا ما مبخر له رائحه الشواء الممتازه بس الطعم في بعض القطع ايضا فيه زناخه طعم سيء .. السيزر جيدا جدا
طبعا يقدمو لك كل انواع الصوصات المشكله في الـ الحار – والحار الوسط – الشديد الحراره – صوص الثوم – صوص الزنجبيل – صوص بالليمون واشياء كثيره ..
المهم الصوصات الحاره ( الاكسترا هوت والميديم هوت )
والله بس ذقت شي خفيف جدا جدا ، على طول جاني ضغط شديد في اذني من الحراره
انتبهوا اذا كنت مو من محبين الاشياء الحاره جدا فانتبه تنسى نفسك مع الاكسترا هوت ،
يجيب بلاوي ومشاكل ف الجهاز الهضمي .. هههههه
في البدايه حتقول مو مرا حار عادي ومفعوله يبدا بعد ثالث او رابع لقمه منه جدا خطيير انتبهوا منه هههههه

التقيم :
1/5

الصور :

برجر الدجاج

شيش طاووق لابو جاسم

سيزر سلاد

رز بالدجاج

منيو المطعم :
Our Menu | Nando's Malaysia

- مطعم 59 و 60 في برج كومتارو في بينانغ :

سبب اختياري له :
تعرفت عليه من هذا المنتدى واكثر مطعم كنت متحمسه له خصوصا انه يقع في برج عالي في الدور 59

الطلب ورأي فيه :
طبعا احنا رحنا له في فترة الظهيرة ، يعني غداء ، ففي فترة الغداء منيو محدد ، وفترة العشاء منيو مختلف عن الغداء وهكذا فترة الصباح ..
وفي كل منيو سواء صباح او غداء او عشاء لديهم منيو للاطفال . .

اوك هذا المطعم قصته شويه سيئه معانا من بدايته ..
وهوا في احد الايام لنا في بينانغ قررنا اننا نروح نتغدا فيه ، المطعم موجود في العاصمه لبينانغ
وهي ( جورج تاون ) ، يبعد من فندق قولدن الشانغريلا حوالي 35 دقيقه .. فتوكلنا على الله وذهبنا له ..
لقينا باركينغ قريب من المدخل رحنا وقفنا سيارتنا ودوخنا سبع دوخات
لين عرفنا كيف نخرج من برج المواقف ونبغا نتوجه لبرج كومتارو اللي فيه المطعم ....
طبعا كنا نسال الامن واللي يقابلنا عن الطريق ويوصفوا لنا هوا ونمشي ونضيع ..
آآآه والله تعبنا هذا اليوم طالعين نازلين نمشي ونرجع للمكان اللي كنا فيه تقريبا
اتوقع الناس اصحاب المحلات حفظونا واحنا كل شوي نرجع لهم ...
المهم هذا عشان بس وقفنا سيارتنا ف الباركينق .. اما اللي حيجي بتاكسي ..
على طول التاكسي يوقفكم عند باب البرج ...

ماعليكم بالطويله المهم ..
واخيرا وصلنا لعند باب البرج .. اول ماتدخل حتلاقي كورنر صغير مكتوب فوقه اسم المطعم ،
هما يستقبلوك ويطلعوك الين فوق الى المطعم ....
المهم وصلنا عندهم وكانت الساعه 1 ونصف ظهرا ..
قالت الموظفه : خلاص باقي نص ساعه وتنتهي فترة الغداء والعشاء تبدا من 4 او 5 عصر اذا ماني غلطانه ..
تعرفوا كيف وجوهنا صارت واحنا نطالع ف الموظفه ...!!! << لاتعليق من جد ....
ولا حق التعب اللي تعبناه لين ماوصلنالكم .. تباااا ...

المهم رجعنا وانا اقول مالت على مطعكم هههههه << معصبه تعبنا وف النهايه كذا

انتوا تدروا انه هذا اليوم كان يوم المقالب لنا من بدايته والله ..
في الصباح : كنا رايحين لحديقه الفواكه واتفاجأنا انه مقفل ..
ودخلنا حديقة التوابل وجلسنا انتظار نص ساعه وخرجنا من دون ماندخل الحديقه
وتوجهنا الى برج كومتارو وضيعنا السبع ضيعات ورجعونا من المطعم
ورجعنا الفندق اكلنا ماك ..
والعصر روحنا السوق الليلي ورجعنا من نص الخط تعبنا من المشي في الشارع وسط الزحام
واتعشينا ماك برضو

يعني من جد كان يوم معاكس لنا من كل شيء سبحان الله فجأه كذا ،،
يوم كامل راح علينا ع الفاضي ...
والحمد لله جات على كذا واننا بخير الحمدلله
<< يمكن تصادفوا ايام كذا لا تنكدوا على نفسكم ولا شيء وخير اذا راح يوم عليكم من دون شيء ..!!
انبسطوا وعيشواا الجمال اللي حولكم ..

المهم اكمل لكم عن المطعم ....

المطعم رحنا له اليوم الثاني من بدري الساعه 10 ص توجهنا له ..
والحمد لله وقفنا سيارتنا وعرفنا نوصل له بسرعه البرق هذا اليوم هههههه ،،،
واستقبلونا وطلعونا الى المطعم ..
اول مادخلنا المطعم حسينا بكتمة وحر شديد ، التكيف جدا سيء ..
الاطلاله راائعه تجنن ..<< هذا اكثر مايميز هذا المطعم
المطعم مستواه عالي جدا جدا .. حتى في تقديم الاطباق فن وتناسق وابداع ف التقديم ..
بس مو هذا المهم ،، المهم كيف الطعم ..
طبعا اعطونا المنيو ونختار صنف من المقبلات وصنف من الطبق الرئيس وصنف من الحلا ..
وبعدين بالتدريج يجيبوا لنا الاطباق .. << مدري ليش حسيتهم زي برنامج ماستر شيف اللي يجي ف التلفزيون ..
المهم جابوا المقبلات ،،،
ابو جاسم طلب سيزر سلاد ، وطلب لي شوربه طماطم ومعاها دجاجه صدور ..
السيزر سلاد : لايسمن ولايغني من جوع كان عباره عن ورقتين خس وربع صدر دجاجه
يمكن اقل من الربع كمان ،
المهم ملعقتين الا وخلص طبق ابو جاسم ويطالع في صحني جالس ...
انا طبعا كنت ف الحمام مع راشد وابو جاسم طلب طلباتي ..
المهم طبقي شوربه طماطم < عفوا قصدي شوربه كشنه طماطم ..
اقول لابو جاسم انا آخرتي اكل كشنة المكرونه اللي اسويها ف غمضة عين ..
يضحكوا علينا جالسين هذولا ...
والله صراحه سدت نفسي الشوربه اصلا جالسا اتغصبها مافدرت اكملها ..
وجسومي جابوا له توست وكب كيك و2 كوكيز

ناديناهم يشيلوا صحونهم هذي ويجيبوا الرئيسي ..
وجا الطبق الرئيسي .. لقلة الخيارات ف المنيو اختار ابو جاسم ليا وله نفس الطبق دجاجه مشويه مع بطاطس مقليه وخضار مسلوقه ع البخار ..
المهم ماهذا ياهذا .. انا الدمعه في عيني خلااص ..
نص دجاجه صغيرونه مشويه مافيها لحم حتى اش تشبع هذي ..
المهم جالسين ناكل ونبغا نبكي من الصدممه ..
الا واقول لابو جاسم اقولك كلهم يجيبوا الحساب ونبغا نخرج وخلي الحلا لهم ياكلوا .. اذا هذا اكلهم من البدايه كذا كيف اجل حلاهم ... انسدت نفسنا وخرجنا والله ..
ولا حق اللفلفه والتعب حق امس عشان خاطر هالمطعم السيء .....

بخصوص الجرسونات اللي هناك جدا سيئين ، ولا احد حولك
تقول كانهم مشغولين بس والله المطعم كان فاضي ..

التقيم :
0/5

الصور :

جلسات المطعم

سيزر سلاد لابو جاسم

كشنه الطماطم هههه

وجبه جاسم للاطفال

معليش الوجبه الرئيسية من هول الصدمة ماصورناها صراحة ...

منيو ومواعيد واسعار المطعم
TOP View Restaurant & Lounge - THE TOP Komtar Penang: Top Penang Attractions & Restaurants

- مطعم Fuel shaek برجر ( الحب )

هذا المطعم طحنا عليه فجأه ، غريبه محد اتكلم عنه في هالمنتدى ،،
كنا يوم في سوريا مول في كوالا ..
وشفت اغلب الناس في منطقه المطاعم ياكلوا من هذا المطعم ..
قلت لابو جاسم يلا نجربه ..

وطلبنا :
وجبه برجر دجاج ليا – وبرجر لحم لابو جاسم ..
ياربااااااه على هذا الطعم واخيرا اخيرا لقينا شيء لزيز احلى من ماك ،،
البرجر اعطيه 10/10 ، طعمه كانه برجر على الفحم ، لزيز وناطع وفيله طعم ذات نكهة لزيزه ...
المهم اعتمدوه وان شاء الله مايخيب ظنكم فيه ..
هوا مطعم يبيع عنده باستا وبيتزا وبرجر ..
مره من المرات طلبنا بيتزا لجسومي وانا ماذوقتها بس ابو جاسم ذاقها ويقول لزيزه ..

التقيم : 5/5

الصور :

برجر الدجاج من الداخل يمي يمي

منيو المطعم :
Your Source Of Western Food In KL | Menu | Fuel Shack

- مطعم كافيه هارد روك :

ياااااااااااااااااارباااااااااااااااااااااه على هذا المطعم الخورافي اللزيز ،
نعمه من نعم الله في ماليزيا هذا المطعم الامريكي
اللي اعجز عن وصفه ،، وربي وانا اكتب لكم جوعت اشتهيته ...
المطعم هذا اكلنا منه خلال اقامتنا في بينانغ في فندق الهارد روك ،،
واكتشفنا انه له فرع تاني في كوالا لمبور .. قريب من البافليون .. بالتاكسي تروح له مو مشي ..
موقعه في بينانغ ، المدخل حق الكافيه بجانب مدخل الفندق من الخارج تدخلوا له ، يعني ماتقدر تدخله وانت داخل الفندق .. البوابه للكافيه من الشارع ..

المهم طلبنا باستا بالكريمه لجسومي مع الدجاج < يعني فوتشيني ...
وانا برجر دجاج وابو جاسم برجر لحم ...

اقولكم قليله في حقه هذا المطعم المديح والمديح ... اسعاره مرتفعه قليلا
بس والله يستتتتااااهل ..
انتوا لمن تروحوا حتحسوا بالتعب في الاكل .. ولهذا المطعم حتتمنوا كل يوم تاكلوا فيه ...

ترى والله ما ابالغ ، يعني اكلهم زي مطاعمنا الامريكيه اللي في جده ..

التقييم : 10/10

الصور :

هذا طبق جسومي الخطيييييييييير

سامحوني مالقيت صور لبرقراتنا ابو جاسم ...

منيو المطعم :
http://d11kdcggr4h8di.cloudfront.net...ile_7003_1.pdf

- مطعم ( PIZZERIA ) فندق الهارد روك

اثناء اقامتنا في فندق الهار روك ، نزلنا ندور الكافيه حق الهارد روك ،
بس لقينا نفسنا في هذا المطعم اللي وسط المسابح ، وقلنا يلا توكلنا ع الله ونطلب ..
طلبنا بيتزا خضار – فوتوتشيني – مكرونه مكشنه بالطماطم - وصدر دجاج مشوي .. – سيزر سلاد

البيتزا العجينه رفيعه مابقينا ولا وصله الحمد لله
<< على فكره كان هذا اول اكل زي الناس بعد الوجبات السريعه ...
الفوتشيني خلصناها من الجووع وكانت مقبوله ..
وكل شي خلصناه الحمد لله على النعمه ...

التقييم : 3/5

بس من الجوع خلصنا كل شيء هوا مو مررا وااااااااو بس يلا مقبول احسن من الطربوش وغيره ..

الصور :

معليش مالقيت صورة اوضح من هذي ..

منيو المطعم :

http://d11kdcggr4h8di.cloudfront.net...a-Menu-NEW.pdf

- ماك :
غني عن التعريف يمكن اكلناه قرابة العشرين مرة << لا تعليق

- كنتاكي :
اسوء اسوء اسوء شيء على وجه الارض << الله يكرم النعمه شيء مقرف ولا تمشي من جنبه كمان ...
لو مافي غير كنتاكي في ماليزيا كلها مادخلته .. حتى لو مجانا ... ي لطيف

- كافيه ديب اند ديب :
طبعا هذا الكافيه غني عن التعريف جدا جدا ..
بس احتياطا للي مايعرفه ، هوا كافيه يبيع الكريب والبانكيك والوافل .. وعندهم شوكولاته لزيزه قليله فيها
اذا ذقتها تدوخ من طعمها الجنااااان ...
للمعلوميه : ترا طعمه في ماليزيا احلى واحلى من اللي في جده ...
اللي في جده يجيبوا لنا محروق ومايزينوا الصحن زي الناس << يمكن من الزحمممه الشديده اللي عليه عندنا

بس في ماليزيا فاضي جدا محد حوله ...
عشان كدا الطلبات يسووها لنا على روقان ..

هذا الكافيه موجود في قسم مراكش في مول البيراميد مول ..
طلبنا فوتشيني كريب
وبانكيك
ووافل ..
وكابتشينو وموكا

التقيم :
5/5

الصور :

- ستار بكس :
سيء جدا جدا واذا شوفته قدامك غير طريقك عنه مايستاهل تدخله ..

فيه غيره كافيهات احلى والز منه

التقيم :
0/5

- برجر كنج :

افضل شيء ، جدا ممتاز ولزيز ،، زي ماك ويمكن افضل من ماك

التقيم : 5/5

الجزء القادم :

- المولات اللي زرناها كلها
- اش استفدت من هذي الرحله ..!!

فيصل, قصة حب, آخـــرفـــرصـــة و 7 آخرون معجبون بهذا.

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
كنا هنا (3) اروما كافيه ( نكهة القهوة ) جدة	آخـــرفـــرصـــة	بوابة السعودية	49	22-02-2017 10:15 AM
القهوة العربيه	kanari212	بوابة الامارات	1	13-02-2016 03:12 AM
منع شحن القهوة من اثيوبيا	فيصل	بوابة اثيوبيا	28	23-10-2015 04:11 AM
تقرير مصور وجولة في حديقة الحيوانات الماليزية Negara Zoo* " أبوناصر "	أبوعبدالله (الاسفار )	ماليزيا	13	21-07-2015 06:52 AM