بسم الله الرحمن الرحيم


اليوم السابع
اصبحنا واصبح الملك لله لا اله الا الله

الاماكن المراد زيارتها
1 - ادفنشر زون
http://www.shangri-la.com/penang/ras...dventure-zone/
يفتح يوميا من 10ص - 7 م
اطفال المنتجع = 48 لباقة نص اليوم و 25 لباقة ساعتين
اطفال خارج المنتجع = 35 رنجت لباقة ساعتين

2 - رحلة الصيد
سعرها ثلاث ساعات 300 - 350 رنجت شاملة الاكل مع التوصيل والعودة للفندق

3 - الايكو سكيب
تفتح يوميا من 10 ص - 6 م وتغلق الاثنين
الكبار = 83 رنجت الصغار = 55 رنجت من ( 0-3 ) مجانا



صحينا اليوم الساعة 6 وصلينا واتجهزنا شوي الصغير بس يستفرغ قلت لابوحسن انزلوا افطروا وانا بقعد معاه واعطيه دواء الاستفراغ وحق السخونة بعدين بعد ساعة دق ابو حسن قلي كيف الولد قلت تمام بس فيه سخونة قال ابوحسن الغي الرحلة حق الصيد قبل الرجال مايجي قلت تمام ودقينا على احمد وقلنا له قال تمام مافي مشكلة قله ابو حسن خلاص تودينا بكرة المطار بكم قال ب 60 رنجت قله تمام موعدنا بكرة قله رحلتنا 11 ونص قله تمام اجيكم 8 قله تمام قله ابو حسن اشوف قله اكد لي اليل قله تمام وبعده الدواءالولد ارتاح نزلت الساعة 7 ونص وفطرته وابوحسن والبزورة سبقونا للشاطي وشفنا اسعار البارشوت والجيت واتفقنا مع واحد العصر الجيت ب 150 والبراشوت ب 180 وهناك قعدنا للساعة 9 ونص وبعدها طلعنا اساس نتجهز اساس نروح الايكو سكيب ولبسنا ونزلنا وطلبنا اوبروفترة انتظارنا الولد رجع يستفرغ ابو حسن اعتذر من صاحب اوبر وراح الرجال ورجعنا والبزورة زعلوا وانا قاعدة افكر ايش اكل الولد قاموا الحبايب الصغار يقولوا ياماما والله امس قعد يشرب من موية المسبح تذكرت ان فعلا البارح شرب وخاصمته وقلت اكيد منه المهم اتوجهنا بعدها للادفنشر زون



























المكان بارد بارد بشكل وحلووممتع المهم قعدوا يلعبوا لين الساعة 2 واثناء الانتظار ابو حسن راح عمل له جلسة مساج على الشاطىء للجسم ب 45 رنجت وبعد ماكملوا لعب رحنا مطعم البار وطلبنا البيتزا واكلنا وكنت ساعتها اتواصل مع ليمو بالواتس وقالت لي لو الولد طاب روحي الشلالات قلت تمام بكلم ابو حسن وكلمته قال نشوف البزورة كيف واخذنا جولة بالمنتجع ولعبوا البزورة شوي بالكورة في الملعب واخذوا لفة بالاسكوتر















ونحنا طالعين الغرفة قالوا البزورة ماما مانبغي نروح مكان نبغي نسبح قلت لهم بنروح الشلالات وتسبحوا هناك قالوا لا ياماما والله تعبانين قال ابو جسن خلاص مو لازم دامهم مايبغوا ممكن انا اروح وانتي تقعدي معهم قلت والله نفسي اروح قال لا خلاص المرة :وصلنا الغرفة واعطيتهم دواء سخونة وناموا قال ابو حسن البزورة ناموا يالله فرصة نروح نركب البارشوت والجيت قلت تمام منزل بس بشرط ضروري نطلب بيبي سنتر من الاستقبال لان الولد تعبان قال تمام نزل طلب البيبي سنتر وجات واعطيناها رقم الجوال لو صار شي واستودعتهم ربنا ونزلنا



وكانت الساعة 4 نوصل الشاطي وبدا ينزل مطر خفيف وقعدنا ننتظر الرجال لان كل الدبابات مشغولة جانا واحد ثاني قال تبغوا قله ابو حسن بكم قله نص ساعة ب 200 قله لا بنتظر واحد قلي النص الساعة ب 100 قله طيب خلاص طالعنا ببعض وقلنا بسم الله وشغلنا الدباب وانطلقنا فعلا شي شي ماحصل روعة وكمان الجو مطر كان شعور جدا رائع بس للامانة مااخفيكم امر ذي اول مرة بحياتي اجرب الجيت وكنت متوترة وخائفة وكل ماابو حسن يسرع اقله ورائه بزورة لايطلع لنا سمك قرش في امواج المهم على قولته جننته ههخخ. للامانة خائفة اكثر شي بسبيين
اولا انا مااعرف اسبح والشي الثاني و في شخص غريب مع بزورتي بالغرفة وولدي تعبان يعني وقتها ياكم فيلم كتبته وشفت نهايته هههه وفوقها الجو جميل ومطر وكذا يعني للامانة شي
المهم خلصت النص الساعة وانا بين شد وجذب مع ابو حسن وصلنا الشاطي قال ابو حسن بناخذ نص ساعة كمان بس ذي المرة انا اسوق واجبرني ابوحسن والحمد لله اجبرني يعني للامانة مااعرف اوصف الاحساس بس لازم لازم تجربوه بس للامانة بعدها بديت اخاف ورجعتليا الافلام خصوصا اشتد المطر وبدات اشوف الناس بترجع وناس بتروح بعيد وابو حسن يقلي ادعس روحي بعيد الحقي ذاك الدباب وانا اقله لا لا مطر مطر وبعدين مين يلحقني لو غرقت والحمد لله رجعنا للشاطي

ووقتها وقفوا الانشطة لان نزل مطر قوي اتجهنا للبار اللي جنب المسبح واخذنا اثنين عصير جوز هند وواحد فشار للبزورة وشربنا احلى عصير والله







اشوف الساعة الاقيها 5 ونص بسرعة طلعنا الغرفة لان نحنا طلبنا البيبي سنتر بس ساعة والحمد للله رجعنا والوضع زي ماهو وشكرنها ودخلت الغرفة قلت بروح المسبح وابو حسن قال يالله يالله ننزل المسبح ياام حسن الكل صحى من نومه ويدور لبسه لبسناهم ونزلوا المسبح يلعبوا وابو حسن معاهم وانا رحت اغسل الملابس وارتب الشنط لان بكرة ورانا سفر ونزلت للمسبح قلتخلاص شبعتوا قالوا لسه الساعة 6 انتقلوا لمسبح الكبار مع ابوهم وقعدوا لين 8







بعدها طلعوا اكلوا الفشار وناموا وانا كملت اجهز الملابس والساعة 10 نزلنا واكلنا بالبوفية وكان يجنن بكل ماتعنية الكلمة من معنى وللاسف صور البوفيه ضاعت وللامانة لان البزورة معايا مافضيت اصور بالجوال وكان زحمة كمان اكلنا وحمدنا ربنا على النعمة طلعنا الغرفة وجهزت البزورة من الليل وعطيت الدواء للولد الصغير و نمنا وبكذا انتهى يومنا الاخير في بينانغ اللي يعتبر بالنسبة للبزورة افضل يوم



تقيمي للادفنشر زون
20/20
روعة وحلو وجميلة وفيها نشاط ممتع للاطفال بس احسها صغيرة وباردة مرة مرة مرة يعني وانا انتظر انا وابو حسن بردت مرة لدرجة رحت جبت ملابس للبزورة وغيرتها لهم

تقيمي للبيتزا
20/20
طعمه وخفيفة نفس طعم دومينوزا بيتزا هنا بالسعودية بس احسها دسمة وحجمها مرة كويس يعني نحنا 2 بيتزا كفتنا وزادت قطعتين
ملاحظة البتزا عجبت الجميع بس بصفة عامة انا احب البيتزا البيتي ولا احب اي بيتزا من اي مطعم

تقيمي لركوب الجت
20/20
روعة روعة الاكل لازم يجربوه بس الله الله بالمكاسرة

تقيمي لعصير جوز الهند
20/20
لذيذ يجنن طعم بس ها انتبهوا اطلبوه بارد لان الحرمة سالتني قالت تبغي بارد او حار قلت بارد ويوم وجهت السؤال ل ابو حسن مارد جابته له حار

تقيمي لبوفيه العشاء
20/20
يعني فعلا اكل ايطالي على اصوله روعه روعة واطعم لازانيا وفوتشيني وتيسرامسيوا ذقتها عندهم وللان طعمها بفمي

تقيمي لمنتجع شانغريلا بشكل عام
20/30
الفندق روعة اصنفه لكل الخدمات منتجع متكامل حاولت الاقي غلطة مالقيت لافي الفطور ولا في النظافة ولا في الخدمة يعني ممكن الاثاث صار مستهلك شوي ها شوي يعني مثلا اطراف السرير جلد بعضها مقطع بس

ملاحظة
نصيحة قسموا الحجز فيه و اي فندق رخيص اقلكم ليه مثلا نحنا حاجزين 5 ايام تمنيت اني قسمتها بين فندق التايمز سكوير بينانغ وبين الشانغريلا او بين الشانغريلا واي فندق في وسط البلد لان قعدنا تقريبا اغلب الايام برا الفندق ومااستفدنا لا من مسبح ولا شاطي ولاشي سواء قليل من الوقت ولا من خدمات يعني احس الافضل اللي يروح منتجع زي كذا فيه كل ذي الخدمات انو يحلل المنتجع ويقعد فيه ومايخرج زي ماكان اخر يوم لنا او انه اذا بيروح يروح مكان قريب ومايكون ياخذ وقت كثير بره الفندق وذا الشي في كل مدينة



مصاريف سابع يوم
مساج للجسم = 45 رنجت
عصير من مطعم البيتزا = 34 رنجت
ركوب الجت = 150 رنجت
عصير جوز الهند وفشار = 45 رنجت
غسيل الملابس = 40 رنجت
عشاء بالبوفيه = 176 رنجت
المجموع = 540 رنجت = 450 ريال



في حفظ الرحمن
ابو حسن و ام حسن
دعواتكم