بسم الله الرحمن الرحيم

نجم / صباح الخير

أبو علي / صباح الفل

فطور وشاهي في البلكونه

آجواء مختلفه

غيوم ونسمه لطيفه ربع ساعه !!

شمس وحر ربع ساعه !!

بعد ساعه رجعنا لتكييف الصاله

بعد مشاورات قررنا نطلع نتمشى في أحد المولات

جاكرتا فيها الكثير والكثير من المولات

ومو أي مول !!

المول عندهم على أربع أدوار وانت طالع

بعد الإطلاع على خريطة جاكرتا تبين وجود أشهر وأرقى مولين جنب بعض وهما

اندونيسيا بلازا - جراند اندونيسيا

ويقعان بالقرب من الشقه ( 20 ) دقيقه بالتاكسي

ولكن !!

وصلنا بعد ( 45 ) دقيقه بسبب الزحام الممل اللي يضيق الصدر والحساب ( ستين الف ) = 20 ريال تقريباً

اندونيسيا بلازا .. من أفخم المولات اللي شفتها .. في نظري يحتوي على 90% من الماركات العالميه الراقيه اللي بالعالم كله

المول عدد مرتادينه قليل جداً لغلائه

















جراند اندونيسيا .. أيضاً لا يقل عنه فخامه .. وهو ملاصق له .. يبعد دقيقه واحده فقط عنه سيراً على الأقدام







ولكن !!

حبينا نأكل حاجات خفيفه .. لقينا الأسعار متفاوته .. وأرخصها الاتي : -

الكوفي = 14 ريال !!

قطعة كيك = 12 ريال !!

علبة كولا = 5 ريال !!

قنينة ماء = 4 ريال !!

من ( ستار بكس ) اخذنا اثنين كوفي = 30 ريال مع الضريبه !!

نجم / شكلنا بنحول فلوس زياده !! على ها الأسعار فلوسنا اللي جبناها من السعوديه بتخلص !!

أبو علي / اي والله الأسعار كأننا في أحد مولات جده !!

نجم / طيب والأندونيسين الضعوف كيف يأكلوا الحاجات هذي ؟؟

أبو علي / اندونيسيين مين يا حبيبي !! شوف الناس اللي في المول أغلبهم صينيين .. وهذولي معاهم فلوس .. المهم الحين نبغى نتعشى .. أكلهم ذولي مررره ما يناسبنا !! اندومي ومقلي .. والباقي ما ندري حلال ولا لا ؟؟

نجم / أنا معايا لسته بالمطاعم اللي تقدم أكل عربي

( المطاعم العربيه في جاكرتا جيده .. ولكن ليس بنفس جودة مطاعمنا في جده وأسعارها تعتبر عاليه )

كانت البدايه بمطعم ( حضرموت )

المطعم جيد وعنده جلسات عربي .. وأكله أيضاً جيد .. ويعتبر أقل مطعم من ناحية الأسعار

نجم / نفر المندي بحوالي 25 ريال !!

أبو علي / والشيش طاووق النفر 20 ريال !!

نجم / وين التيس اللي قيمته 200 ريال والكلام اللي كنا نسمعه

أبو علي / قول للزمان ارجع يا زمان

نفر مندي + نفر شيش طاووق + صحن حمص + واحد كولا = 60 ريال تقريباً

رجعنا للشقه بتاكسي = 15 ريال

يتبع ..

برنامج اليوم الاول في جاكرتا //

تسوق

اندونيسيا بلازا

جراند اندونيسيا


العشاء

مطعم حضرموت

أهلاً بنجم المنتدى ...

في أحد استفسارات البوابة تفاجأت برد لك تذكر تواجدك هناك ...

ومن لحظتها وأنا انتظر هذه البداية ....

يكفي هذا التقرير ... معرِّف ( نجم السياحة ) لتعرف أن الحظ الجميل حالفك ....

( طيب كم راح تجلسون ؟؟؟ ) ههههههههههه ( جملة رنااااانة ) فيها كم من السعاااااادة

اسمح لي أولاً ... بأن ألومك لعدم طرح أي استفسار للترتيب أو الاستشارة ..

الأحبة هنا .. خبراء ودااااائماً حاضرين لمد يد العون ... خصوصاً وأنّ الرحلة شبابية ( ترتيبها غير معقد ) ..

حبيبنا ( عاشق الخالد ) قال نقطة مهمة ( 9 ) كثيييييييرة جداً ع جاكرتا ..

وأتفق معك تمااااااااماً بكل ماذكرته عن جاكرتا ....

ماذكرته عن انتهء زمن (إكراميات ) جوازات المطار ... أسعدني كثيراً ..

كلمة حق السفير الجديد ( أسامة الشعيبي ) له جهوووووود راااائعة بكل مايخص السائح السعودي ..

متابع معك بفرح ... تقاريرك دائماً ذات قيمة عاااااالية ...

هلا بالطعم كتكات

ترتيب الجدول خاص فيني لظروف معينه

وحبيت أنقل مشاهدتي من ايجابيات وسلبيات للإخوه للإستفاده

ولا جاكرتا من ثالث يوم .. عفشك والجبل

بسم الله الرحمن الرحيم

أبو علي / صباح الخير .. ابا خبر ؟

نجم / يا واد يا اندونيسي !! هذا وانت لك يومين !! صرت بلبل في اللغه الاندونيسيه !!

ابو علي / اقولك ( ابا خبر ) هذي تعلمناها قبل العربي .. والشعب السعودي كله يعرفها !!

اليوم وجهتنا نحو معلم سياحي في جاكرتا وهو

( تامان ميني اندونيسيا انداه ) وتعني ( حديقة اندونيسيا الجميلة المصغرة )

تقع على أطراف جاكرتا في الجنوب الشرقي

المكان عباره عن منتزه كبيير يجمع التنوع التراثي والمعماري لاندونيسيا في مكان واحد يستطيع المرء أن يطلع عليه بيوم واحد

ويحتوي على عينات من جميع مقاطعات اندونيسيا

يحتوي المنتزه على //

1 / بحيرة اصطناعية في وسط المنتزه وبها مجسمات للجزر الاندونيسية الرئيسية

وتقدر تأخذ لفه بمركب ( بوت ) بمكينه أو برجولك بخمسين ألف = 15 ريال داخل البحيره .

2 / تلفريك بحيث ينقلك جوا من طرف المنتزه الى الطرف الآخر = 6 ريال للشخص

3 / العديد من المتاحف مثل الحربي والمواصلات . ( لا أعلم هل برسوم أو لا ) ما دخلناها .

4 / ملاهي عاديه وملاهي مائيه ( صغار ) برسوم .

5 / مزرعة تماسيح ( برسوم ) .

6 / حديقه كبيره للطيور ( خصوصاً الببغاء ) بحوالي = 6 ريال للشخص .

7 / كشكات ومحلات ملابس وتذكارات

الموقع كما اسلفنا كبير والتنقل فيه بواسطة تاكسي أو ميني باص للعائلات .. وللشباب دباب زي ما عملنا .. بتلقاهم قدامك بداخل المنتزه

الدخول للمنتزه عشرة الاف روبيه = 3 ريال تقريباً للشخص

وتحتاج الى يوم كامل على الأقل للاحاطة بجنباته

تاكسي من الشقه للمنتزه ( 40 ) دقيقه والحساب ( 25 ريال ) والحمدلله الزحمه خفيفه لأن الناس داخله جاكرتا واحنا خارجين

عند الوصول .. توجهنا مباشرة للتلفريك لكي يعطيك رؤيه وانطباع وتعرف ايش هرجة ها المنتزه من فوق ( الشخص = 6 ريال )
والوقت كان ربع ساعه تقريباً

بعد النزول من التلفريك .. جانا راعي دباب وعرض علينا يلف المنتزه كامل معاه ( الساعه الواحده = 15 ريال )

وكمان يكون دليل ومرشد سياحي للمنتزه

وافقنا وكان أفضل قرار .. لأن الموقع بالفعل كبير .. وتوجد مواقع ممكن تشوفها وأنت ماشي بدون ما تنزل لها

وأصلاً راعي الدباب كان ينصحنا بالنزول في أماكن معينه .. وأماكن كان يقول ما عندك أحد



















المنتزه كشباب يبغاله حوالي ساعتين , وللعوائل براحتهم كل ما تدخل موقع حتستهلك وقت أكثر

المنتزه لأنه مفتوح في الهواء الطلق .. فأنت وحظك .. إذا الجو زين وغيوم حتطول فيه

وإذا شمس وحر حتتضايق كثير

انتهينا وأخذنا تاكسي ( التكاسي متوفره بالموقع )

في المساء تعشينا في مطعم ( الجزيره )

هذا المطعم العربي كان من أغلى المطاعم اللي أكلنا فيها ( غالي جداً )

لقينا عنده خروف كامل مطبوخ = 800 ريال !!

أخذنا 2 نفر مندي + 2 كولا = 120 ريال !!!!

والأكل كان مش ولا بد اللحم ناشف والرز زيت

لا أنصح بهذا المطعم

يتبع ..

اليوم الثاني في جاكرتا //

اندونيسيا المصغره ( المنتزه )

العشاء في مطعم الجزيره ( لا أنصح به لغلائه الفاحش )

بداية رائعة للتقرير يا نجم المنتدى

واعجبتني التصريفة

زين لقيت لك خوي يروح و يجي معاك
بس لو طلعتوا باندونق كم يوم كان انبسطتوا هناك
الجو الناس المطاعم كل شي مختلف في باندونق

جاكرتا حلوة وفيها معالم واسواق وكافيهات
يعجبني كافية ون في بلازا سنيان
عيبها الزحمة مثل ماقلت

المطاعم العربية كلها استغلال للاسف

متابعين مع الحلوين