تمنيت ذكرت وين سكنك عشان تتضح الصوره اكثر
1- بخصوص الحسين لازم تعرف انك رايح لا احد اقذر كافيهات على وجه الارض فلا تقرب كافيهاتهم وشيشهم
الحسين فيه سوق شعبي اسمه الغوريه ..وشارع المعز تراث واثار ومحلات يعني اطلع من بعد الظهر بالمترو على العتبه تمشى فيها شوي وبعدها اتجه للحسين عشان تلحق شارع المعز يقفل 4.5 العصر
وارشح العشاء في مطعم اسمه فرحات الحسين مطعم مشويات وحمام محشي وهو من افضل مطاعم المشويات في مصر
2- الاهرامات نصيحتي الصبح قبل الحر ولو تاخرت مافي مشكله بس لازم قبل العصر لانهم يقفلون المدخل 4 مساء و مهوب بالشكل اللي تتوقعه الزياره متعبه شويه ولازم تتفق مع اسطبل تاخذه من خيل ومرافق .. السعر من 150 الى 250 جنيه لفه طويل ساعتين على الاقل .. طبعا الاصطبل بيقول لك 500 و600 لكن ما عليك منه اتركه وهو يركض وراك وزي ما قلت لك 150 الى 250 وطبعا زيارة الاهرام كلها تقريبا من ساعتين الى ثلاث ساعات
3- انت ما قلت وين سكنك عشان نعرف الموالات اللي جنبك ولكن الافضل هو ستي ستار في مصر الجديده وكافيه كنوز في الدور الرابع غالي لكنها نظيف وقريب من الستي ستار .. مول ثاني اسمه جنينه مول بس اقل منه بكثير وكلها فيها صالات سينما وكافيهات
فيه مول جديد اسمه مول مصر توه مفتوح في اكتوبر ما اعرفه لانه جديد زي ما قلت لك
وقريب منه مول اسمه مول العرب كبير وفيه ترفيه ومطاعم اجنبيه كثيره
واما الكاميرات انصحك تشتري من عندنا ارخص والضمان شغال عندهم نفس الموديل اغلى من عندنا بفرق 20% وان حبيت تشتري الموالات اللي ذكرت كلها فيها وكالات الشركات اليابانيه والكوريه
4- المطار في مصر الجديده ركز معي ...و موعد طياراتك بعد الظهر ما فيه امكانيه للتمشي.. الاسواق الشعبيه العتبه والغوريه بعيده عنك وما يبدا الشغل الا بعد الساعه 11 صباحا ولا تلحق نهائي نهائي
لكن فيه سوق قريب من المطار مهوب بعيد عنه اقل من نص ساعه عن المطار اسمه روكسي تقدر تلف فيه شوي وتلحق طياراتك ان شاء الله
فيه جامعة الدول العربيه تمشى فيه وتعشى في حضرموت السمار (مندي) ومقابل له فرغلي عصير وعندك الكافيهات في الشارع شانتي مقابل حضرموت او تمشى قدام عند العمده .. الافضل تروح بعد الساعه 8 مساء
وانتبه انتبه انتبه من اي واحد يكلمك في جامعة الدول امش ولا كنك سمعته
سامحنا ان نسينا و لاتتردد في استفسار
والله يستر عليك