سياحة عائلية في اورلاندو الأمريكية - الصفحة 5

سوسو الصغيرة · 08-03-2015, 10:25 AM

يا سلام عليك يا بو سعود
شو هاذا كل الالعاب تخوف ... يعني ما اقدر العب ..
يعطيك العافية

أبو سعود Q8 · 08-03-2015, 09:50 PM

مرحبا بالجميع

اليوم راح يكون جزء خفيف وبسيط
بعيدا عن الأماكن الترفيهية

اليوم بتكلم عن الشقه الي أجرناها بسفرتنا الأخيرة

الشقة كانت في منتجع اسمة

VISTA CAY RESORT

وموقعها جيد جدا حيث انها تقع بمنتصف الطريق مابين
شارع الانترناشونال درايف ومدينة السي وورلد

كل منهم يبعد 5 دقايق تقريبا عن الشقة

هذا موقع المنتجع الرسمي على الانترنت

Vista Cay Resort Condo Rentals in Orlando Florida

وهذا ايضا تابع لنفس المنتجع
Vista Cay Resort By Millenium in Orlando Florida | Official Website of Vista Cay Resort

الشقه كانت مكونة مكن غرفتين وصالة وتكرمون حمامين ومطبخ وغرفة للغسيل
مع موقفين للسيارة وانترنت مجاني

بالبداية شفت المنتجع بموقع بوكنق المعروف ، وكان السعر لا بأس فيه
وبعدها رحت لموقعهم الرسمي وكان في عرض على بعض انواع الشقق
لكن بالنهاية حجزت الشقة من موقع

Airbnb

أخليكم مع بعض الصور

هذا مدخل المنتجع والرسبشن

هذا البلوك الي فيه شقتنا

هذي غرفة النوم

وهذا تكرمون حمامها

هذي الصالة
وفيها الأريكة تفتح وتصبح سرير أبو نفرين

هذي غرفة النوم للعيال

وهذا تكرمون حمامهم

المطبخ

أخذت الشقة لمدة 8 ليالي ( 9 أيام ) وكان سعرها الاجمالي
913$

وهو ما يعادل
265 دينار كويتي

يعني تقريبا الليلة سعرها 33 دينار

الشقه على بعضها كلها ممتازه

سواء الموقع أو السعر أو الاثاث والتجهيزات أو الانترنت المجاني
شي واحد كان سلبي وهو المطبخ !!
لم يكن مجهز بالكامل

وعلى فكرة ، المنتجع كان كامل التجهيزات من حمامات سباحة للكبار وللصغار وملعب كرة تنس والعاب للأطفال وغيرها من الأمور
بس مو لاقي ولا صورة صالحة للنشر لهذي الأماكن
لكن بوجه عام المكان ممتاز وأنصح فيه لمن يريد شقه قريبة من السي وورلد أو حتى شارع الانترناشونال درايف

AL Tunaijiمعجبون بهذا.

هاوية الاسفار · 08-03-2015, 10:00 PM

ما شاء الله عليكم
معظم الألعاب تخوف صراحه و يبغيلها حد قلبه قوي
و كل مدن الألعاب كبيرة و مسليه
نتمنى انه تكون عندنا مدينة ألعاب بهالحجم و الضخامة في دبي
بانتظار البقية

أبو سعود Q8 · 08-03-2015, 11:57 PM

اقتباس : المشاركة الأصلية كتبت بواسطة هاوية الاسفار

ما شاء الله عليكم
معظم الألعاب تخوف صراحه و يبغيلها حد قلبه قوي
و كل مدن الألعاب كبيرة و مسليه
نتمنى انه تكون عندنا مدينة ألعاب بهالحجم و الضخامة في دبي
بانتظار البقية

مشرفتنا الظاهر من النوع الي تخاف من الألعاب
لازم تاخذين دورة مع العيال عشان تنسين الخوف وتتمتعين باللعب

بالنسبة للمدن اي والله كبيرة ومسلية لآخر درجة
انا قريت قبل مدة طويلة ان دبي قاعده تبني مدينة ملاهي عالمية ، يمكن يونيفيرسال ستوديوز ماني ذاكر
عموما ، ماشاء الله دبي فيها كل شي حلو
الله يزيدكم من خيره ويحفظ دار الحي من كل شر

أبوعبدالله · 10-03-2015, 10:09 AM

تقرير جميل كعادة تقاريرك الجميلة يابوسعود

بالنسبة للشقة كيف أقدر أحجز عليها او مشابها لها ؟

لأني دخلت على الموقع اللي حجزت منه وطلع لي عدة شقق في نفس المجمع ...

أبو سعود Q8 · 11-03-2015, 11:12 PM

اقتباس : المشاركة الأصلية كتبت بواسطة أبوعبدالله

تقرير جميل كعادة تقاريرك الجميلة يابوسعود

بالنسبة للشقة كيف أقدر أحجز عليها او مشابها لها ؟

لأني دخلت على الموقع اللي حجزت منه وطلع لي عدة شقق في نفس المجمع ...

هلا اخوي أبو عبدالله
حياك الله بالتقرير

بالنسبة للشقة انا أخذتها من واحد اسمه رائول
Raul
هذا رقم تليفونه الي عطاني اياه بالحجز
Raul Tel : +1 786 285 7667

ممكن انك تتواصل معاه وتحجز الشقة أو انك تحجز أي شقه أخرى بنفس المبنى
لأني اتوقع انهم كلهم بنفس المستوى

وإذا احتجت أي مساعدة انا حاظر وبالخدمة

تحياتي

أبو سعود Q8 · 09-03-2015, 12:03 AM

مدينة المرح

Fun Spot

هذي المدينة ليست عالمية مثل ديزني ويونيفيرسال وسي وورلد و و و الخ ، إنما مدينة محلية
لكنها رووووووعة لعدة أسباب راح أذكرها بعد شوي
المهم انها مدينة العاب مناسبة للكبار والصغار
في لها فرعين أحداهما في اورلاندو والآخر في منطقة كيسيمي وهي منطقة ملاصقة لاورلاندو
في هذا الجزء بتكلم عن الموجودة في اورلاندو

الموقع الرسمي :

هذا موقعهم على الانترنت ومنه تقدرون تختارون المنطقة المراد زيارة حديقتها

Fun-Spot

العنوان :

كما ذكرت ان في لهم فرعين أو مدينتين
عنوان الحديقة الموجودة في اورلاندو :

Add : 5700 Fun Spot Way
Orlando, FL 32819

تقريبا يكون مكانهم بأحد أطراف جانبي شارع الانترناشونال درايف
يعني قريبة جدا من سكنا

الأسعار :

التذاكر في هذي المدينة ما تعتمد على العمر ( صغار وكبار ) إنما على الطول !!
في طول أو حد معين عندهم والي أقصر من هذا الحد يكون له سعر ارخص من الي أطول منه
الطول أو الحد هذا هو 54
بس لا تسألوني شنو وحده القياس لأني مادري
طبعا مو بالمتر ولا بالسانتي متر ، يمكن بالقدم أو بالانج أو غيرها من وحدات القياس

الي طوله أكبر من 54 سعره = 45$ دولار
الي طوله أقل من 54 سعره = 35 دولار

طبعا هذا السعر
الرسمي عند بوابة الدخول
وممكن لو تحجزون عن طريق موقعهم بتحصلون على خصم 5 دولار لكل تذكرة
أما لو تسوون مثلنا وتحجزون من محل فزت اورلاندو ............ فالسعر يكون أرخص من السعر الرسمي وأرخص من سعرهم بالموقع الألكتروني

ساعات العمل :

تختلف أوقات العمل على حسب الأيام
هناك أيام تفتح فيها الحديقة الساعة 10:00 صباحا وأيام أخرى تفتح الساعة 2:00 الظهر
أما وقت الاغلاق فهو ثابت عند منتصف الليل في كل يوم

مميزاتها

بقولكم عن مميزاتها الي شفتها وليش حبيناها وحبينا زيارتها أكثر من مره بالسفرة الواحده

1- لأن سعر تذاكرها رخيص جدا ، فهي ارخص من ديزني ويونيفيرسال و و و و
2- لأن مساحتها أكبر مما تصورت ، يعني كبيرة وفيها العاب وايد ومتنوعة وتناسب كل أعمال الاطفال
3- لأن العابها كلهم حلوين ، مافي شي ممل
4- لأن ما عليها زحمه نهائيا ، الناس قليلة بالحديقة لدرجة ان اليهال يلعبون اللعبة 3 أو 4 مرات متتالية !! والله ما أقص عليكم بس هذا الصج
يمكن احنا زرناها بيوم ما كان فيه ناس وايد أو يمكن اهي جذي الحديقة ما يزورنها ناس وايد ، الله اعلم
5- السبب هذا أكيد بيحبونه الحريم ، وهو ان بجانبها آوت لت كبيييييير جدا جدا ، وطبعا الحريم ومن ظمنهم ام سعود يفضلون التسوق على المرح واللعب
لذلك احنا ( الرجال ) نودي الحكومة ( الحريم ) لصرف وتدمير الميزانية ( التسوق ) واحنا نمسك ونراقب العيال ( بحسره )

والحين تعالوا معاي ندخل الحديقة الي حبيناها كلنا

هذي بوابة الدخول

من أحلى وأسرع الألعاب بالحديقة هذي اللعبة

تمتد على مساحة كبيرة وطويلة

يالله يا اعضاء منو بيلعب مع العيال

مشرفتنا ( هاوية الاسفار ) أم علي الظاهر تخاف من هذي الألعاب
في مكان فاضي عند سلمان تعالي ولا تخافين
العيال اسم الله عليهم بانتظارك

ماشاء الله عليهم

في العاب للكبار وفي للصغار
الكل بيستانس بالحديقة

وين مشرفتنا أم حسين ( توبليرون )
صديقها ياسين بانتظارها

بالعافية

هذي لعبة الزحلاقية

هذي أيضا من الالعاب المثيرة والسريعة

حبيبي الله يحفظه

من قبل ما نزور الحديقة كنا نمر عليها ونشوفها من الشارع
واليهال كانوا يحنون علي يبونها عشان يجربون لعبة السيارات
وهي لعبة تقريبا للكبار لأن السيارات تعمل بالبانزين وعلى حلبة حقيقية وكبيرة
والحمد الله ان وديتهم عشان يجربون اللعب فيها ويستانسون

يويو زعلان لأنه مالعب

بس الحمد الله قالولي يصير يركب معاي بالسيارة

وحتى ياسين طوله ما يأهله لقيادة السيارة بروحه ، لازم انا أكون معاه

تعالوا نكمل لعب بالمدينة الرائعة

الشيئ الحلو الي صارلنا ان بعد ما خلصنا من كل الالعاب رحنا للآوت لت القريب من الحديقة
تسوقنا وتغدينا وأخذنا أم سعود
ولما طلعنا العيال شافوا الحديقة وقاموا يحنون يبون يرجعون ، فرجعنا للحديقة ولعبنا لغاية ما غابت الشمس

طبعا ما حجزنا تذاكر مره ثانية يكفي وجود الشريط على ايديكم للدخول واللعب لمدة يوم كااااااااامل

تقييمي للحديقة :

ماله داعي أعيد وأكرر مميزات الحديقة لأني ذكرتهم بالأول
باختصار ، الحديقة عجيبة و عجبتنا كلنا وأنصح فيها لكل سائح مع أطفاله
أما لو كنتوا من غير أطفال ...... روحوا الآوت لت

إن شاء الله عجبكم جزء اليوم ..... ؟؟
أحس ان البوابة فيها خمول ................

AL Tunaijiمعجبون بهذا.

هاوية الاسفار · 09-03-2015, 01:21 AM

لا بالعكس يا ما لعبت بالالعاب في القرية العالمية اول ما فتحوها
و عندنا بعد مدينة ألعاب الهيلي في مدينة العين فيها ألعاب تعتبر خطرة على أيامنا و اخر مرة زرناها بعد الزواج و لعبت وَيَا اختي الكبيرة خلينا العيال عند الرياييل و احنا استمتعنا بوقتنا و بعدين صار عندي عيال و ما كنّا نفكر نزور أماكن الترفيه عشان ما نضيع وقتنا و نكتفي بأماكن لعب الأطفال
بس الحين كل ما لها الألعاب تخوف و تستوي خطيرة يعني اذا ركبت الكبسولة يكفي
متابعين التقرير بشوق

منيرة · 09-03-2015, 12:23 PM

يا سلام عليك يابوسعود Q8

تقرير فايف ستار

بالنسبة لسعر التذاكر ارخص مرة اخذتها البحرين - لندن - نيويورك - لندن - البحرين 280 دينار بحريني على طيران الخليج بالتعاون مع اميركان ايرلاين

و الترانزيت بلندن مايزيد عن ساعتين

واصل

أبو سعود Q8 · 10-03-2015, 12:05 AM

اقتباس : المشاركة الأصلية كتبت بواسطة منيرة

يا سلام عليك يابوسعود Q8

تقرير فايف ستار

بالنسبة لسعر التذاكر ارخص مرة اخذتها البحرين - لندن - نيويورك - لندن - البحرين 280 دينار بحريني على طيران الخليج بالتعاون مع اميركان ايرلاين

و الترانزيت بلندن مايزيد عن ساعتين

واصل

أ
هلا بمشرفتنا منيرة
أشكرج على مرورج ومتابعتج للتقرير
وإن شاء الله ياخذ التقرير فايف ستار بالمعلومات والصور الي فية

بالنسبة لسعر تذاكركم رخيص نوعا ما ، بس حجزنا على الخطوط السعودية كان أرخص بكثير
عموما السعر يعتمد على الحجز المبكر وعلى الموسم ايضا
حاليا سعر التذكرة على الخطوط الكويتية 215 دينار مباشره إلى نيويورك وبالعودة ترانزيت في لندن
السعر جدددددددددا رخيص بس لو بتحجزينها بالصيف سعر التذكرة مو أقل من 500 دينار
حتى الاماراتية مسوين عرض من الكويت إلى نيويورك 250 دينار ، بس بهذا الوقت مو للصيف

أسعار الصيف مولعه حاليا للأسف

مشاهدة نتائج الإستطلاع: ما هو تقييمك للتقرير لغاية الآن ؟؟
ممتاز	104	95.41%
جيد جدا	5	4.59%
جيد	0	0%
مقبول	0	0%
المصوتون: 109. أنت لم تصوت في هذا الإستطلاع

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
رايحين اورلاندو ،، واحتاج مساعده	Hanadonh	بوابة امريكا	8	03-04-2015 03:18 AM
اورلاندو شهر 7+8	Mafio98	بوابة امريكا	6	18-03-2015 09:02 AM
شركه شحن في اورلاندو	Rainbow	بوابة امريكا	0	13-01-2015 09:38 AM