أماكن ضعها على مفكرتك حينما تزور لبنان

ابو عمر البيروتي · 21-07-2020, 04:25 PM

من مدينة الحَرف, جبيل من يرغب بفنجان قهوة صباحي مشبع برائحة الزهور

ابو عمر البيروتي · 23-07-2020, 07:50 AM

اقتباس : المشاركة الأصلية كتبت بواسطة ابو عمر البيروتي

من مدينة الحَرف, جبيل من يرغب بفنجان قهوة صباحي مشبع برائحة الزهور

المدونة المهتمة بالسياحة و السفر " Travel blogger " ندى عبد ربه من مصر زارت جبيل و كتبت إنطباعاتها عن المدينة في التقرير التالي

بحر ومراكب وشوارع عتيقة .. ليه بيبلوس (جبيل) تستاهل يوم مخصوص من رحلتك للبنان؟

أول مرة رحت بيبلوس أو جبيل كنت مع اتنين أصدقاء لبنانيين كانوا قايمين بدور المرشد السياحي في رحلتي؛ عدّينا عليها بس في السريع مأخدناش أكتر من نص ساعة، ولأنهم زاروا مصر قبل كده فكانت أول جملة قالوهالي واحنا في الطريق: "هتحسي إن بيبلوس شبه شارع المعز وخان الخليلي بالظبط"، وهي آه في الحقيقة فيها شبه من ناحية شكل شوارع معينة أو واجهات المحلات أو الروح نفسها اللي بتحسها وانت بتتمشى في خان الخليلي، بس الموضوع كان أكبر من كده بكتير، مشفتهوش غير في زيارتي التانية اللي فضيت فيها يوم كامل لبيبلوس لوحدها مش مجرد تعدية عالماشي .. الزيارة التانية دي كانت كفاية أوي إني أعتبرها المدينة المفضلة بالنسبالي في لبنان.

جبيل -حسب الاسم الفينيقي أو الاسم اللي قالوه قدماء المصريين- هي مدينة ساحلية صغيرة على بُعد 35 كيلو تقريباً من بيروت، ويُقال إنها من أقدم المدن المأهولة بالسكان على وجه الأرض عمرها أكتر من 7000 سنة، وابتدت قرية صغيرة لصيادين السمك وصانعي السفن، وأحلى حاجة فيها إنها المعادلة المظبوطة أوي بين المدينة الشيك العصرية والمدينة الأثرية القديمة.

إزاي تروح بيبلوس؟

أنا شخصياً كنت قاعدة في جونيه واعتمدت على أوبر اللي أخد مني 20 دولار (حوالي 320 جنيه)، بس فيه شركتين تاكسي ممكن تعتمد عليهم واتعاملت معاهم في مشاوير تانية مرة لما كنت قاعدة في بيروت ومرة من جونيه، كل اللي بتعمله إنك تبعتلهم على الواتس آب إنت عايز تروح من فين لفين وبيبعتلك التكلفة وكل التفاصيل.

من بيروت: Pure Taxi Service

من جونيه: Bob Taxi

" إضافة شخصية مني " إذا كانت ميزانيتك محدودة يمكنك ان تذهب إلى جبيل بواسطة باصات النقل الجماعي من مركز إنطلاق الباصات " مستديرة الدورة في بيروت الشرقية إلى جبيل فقط بمبلغ 2000 ليرة يساوي بأسعار صرف الدولار الامريكي بتاريخ اليوم 23/7/2020 تقريباً نصف دولار

لو حابب إقامتك تبقى هناك

أي حد بيسافر لبنان غالباً هيختار إقامته تكون في بيروت، وكده كده سهل تتحرك من بيروت لأي حتة تانية أو تقضيها رحلات صد رد، بس لو حابب متثبتش في حتة وتجرب تبات في كل مكان هتعدي عليه فهيكون عندك أحسن أوبشن اللي هو الشاليه، سهل جداً تلاقي على Airbnb شاليهات/ستديوهات بتبقى على الجبل أو الكورنيش وفيو على البحر يجنن وبأسعار أرخص بكتير كمان من بيروت (على سبيل المثال الشاليه اللي في الصورة ده بـ26 دولار في الليلة ويكفي 5 أشخاص).

" نصيحة رائعة "

السوق القديم .. والشوبينج!

أول حاجة بتستقبلك في المدينة هي السوق القديم، في الأول هتشوف المحلات الشيك والبراندات والمطاعم الجديدة، وكل ما تدخل كل ما هتتعمق أكتر في الحواري الضيقة والمحلات القديمة، أرض وحيطان حجرية وأبواب خشب، ومنتجات كتير أوي لبنانية الصنع ومعظمها صناعات يدوية، هتلاقي حاجات كتير تحب تشتريها وتبقى أحلى سوفونير يفكرك بالمكان.

نصيحتي الشخصية ركزوا على الديكورات اللي بتتحط في البيت، بيتفننوا في شكل المفارش واكسسوارات البيوت اللي بيبقى شكلها عتيق، وطبعاً أي حاجة ليها دعوة بالحفريات والمصنوعات الخشبية.

تمشية وسط حواري جبيل

فيه حالة من الهدوء والسكينة مسيطرة على المدينة دي، يعني أنا رحتها يوم جمعة وقبل رمضان بحاجة بسيطة؛ كنت ماشية سامعة القرآن اللي بيبقى قبل صلاة الجمعة بصوت عالي من المسجد، وفارشين الحصير الأخضر اللي واصل لحد حيطان الكنيسة، وبيحطوا زينة رمضان في الشارع، وبعد الصلاة ما خلصت بساعة تمشي تسمع الشوارع مليانة مزيكا وسط المطاعم والبارات اللي بتستعد لسهرة طويلة بالليل.

قلعة جبيل

بيسموها برضه "القلعة الصليبية" وده لأن بناها الصليبيين في القرن الـ12 الميلادي، بس على أساس كان بدأه الفرس من حوالي 500 سنة قبل الميلاد، وطبعاً لما تبقى ماشي في قلعة عدّى عليها أباطرة وملوك وحكّام وتاريخ على مدار آلاف السنين؛ هتحس بهيبة غريبة للمكان، ولأنها كبيرة فالتمشية فيها ممتعة من أول تفاصيل الطراز المعماري والممرات والخنادق اللي فيها، الجنينة وحطام العواميد اللي على البحر، والمسرح الروماني والمنظر البانورامي اللي بتشوفه من فوق .. كل تفصيلة فيها حلوة جداً.

متحف موقع جبيل

جوة القلعة نفسها فيه متحفين، متحف موقع جبيل وده فيه شوية وثائق وحفريات وآثار عن تاريخ جبيل؛ بس معظم الإكتشافات هتلاقيها في المتحف الوطني في بيروت، وغيره في ساحة القلعة فيه متحف ذاكرة الزمن؛ وده برضه فيه تشكيلة أحجار ونقوشات عمرها أكتر من مليون سنة.

مسجد السلطان عبد المجيد

مسجد صغير لكن قصته هي اللي خلته مشهور وكل الناس بقت تحب تعدّي عليه، ده لأن أساس المسجد اتبنى في عصر الخلفاء الراشدين، وبعدين اتهد وعلى انقاضه رجع اتبنى تاني في عهد صلاح الدين الأيوبي، وبعدين جيه السلطان العثماني عبد المجيد عمله اعادة ترميم في القرن الـ17، وفي القرن الـ19 قرروا يزودوله قسم للنساء وحتى بنوه بأحجار لونها أصفر جابوها من أنقاض قلعة جبيل اللي على بُعد خطوات من المسجد.

" إضافة تعريفية بجامع السلطان عبد المجيد "

الشيخ غسان ناجي اللقيس إمام المسجد ، الحائز على الإجازة في الشريعة والقانون من جامعة الأزهر، يتحدّث عن مساجد جبيل التي "تؤشّر للحضور الإسلامي في المدينة، وأبرزها هو مسجد السلطان عبد المجيد، الذي بُنيَ سنة 1186 ميلادية بناء على ما ذكره العديد من المؤرّخين"، بحسب اللقيس الذي أردف أن "المسجد بُنيَ زمن صلاح الدين الأيوبي".

أما سبب تسميته فيوضحه اللقيس قائلاً "لأنه رُمّم زمن السلطان عبد المجيد، وبعد ذلك، حصل ترميم آخر له زمن الأمير يوسف الشهابي"، مُضيفاً أن "هناك وثيقة تشير إلى أن الأمير الشهابي عندما ولّيَ على جبيل، وجد كنيسة مار يوحنا، وقد حوّلها العثمانيون إلى إسطبل، فأعاد الكنيسة إلى المسيحيين، وبنى مئذنة المسجد، وعيّن إماماً له براتب بالقروش".

أما مئذنة المسجد، فهي تتمايز عن بنائه بحجارتها الكبيرة والمصقولة، خلافاً لحجارة المسجد الصغيرة، ما يُعزّز الاعتقاد أنها بُنيت في زمن مُغاير لبناء المسجد.

ومن الميزات الأخرى للمسجد أن "منبره حجري، بينما كانت المنابر عادة من الخشب، بالإضافة إلى ساعة محفورة فوق المئذنة لمعرفة وقت الصلاة، والساعة صحن حجر مجوّف، لكن فُقِدَت منه القطعة التي تؤشّر إلى الوقت، وإلى مواقيت الصلاة، إضافة إلى وجود نبع للمياه، يُستخدَم للطهارة".

تثري المسجد لوحة هي صورة لوثيقة، الأصلية منها موجودة في متحف بريطانيا، بحسب اللقيس الذي أوضح إنها "الرسالة التي أرسلها النبي محمّد، إلى أمير البحرين، يدعوه فيها إلى الإسلام".

المسجد بصيغته الأصلية أشبه بمربّع صغير، تعلوه قبّة تراثية معهودة في مساجد المرحلة التاريخية عينها، ومدخله الأصلي لجهة الغرب، يتغطّى بإنشاءات حديثة أقيمت بهدف توسيع باحة الصلاة.

والمدخل الأساس هو من حجارة مُقنطرة، تعلوها نقوش زخرفية جميلة في خطين، وفوق المدخل الرئيسي السابق ارتفعت لوحتان منفصلتان، لكنهما متراتبتان فوق بعضهما بما يخالف التسلسل التاريخي للترميمين، فنقش على اللوحة العليا منهما بالخط الثلث المتداخل: "رُمّم في عهد السلطان عبد المجيد"، وتحتها "رُمّم في عهد الأمير يوسف الشهابي".

وبالنسبة للمُصلّى النسائي، فيوضح اللقيس أنه "كان في الأصل زاوية، وهي ردهة للتعبّد والاعتكاف، بُنيت زمن العثمانيين".

الزاوية تابعة للمسجد منذ تأسيسها، مُرمّمة بصورة لائقة متناسبة مع المحيط، يحوطها سور من الحديد المشغول على بساطة حراب، لكنها تحافظ على طابعها التراثي.

خلصنا الآثار ننزل البحر

بما إنها على البحر الأبيض المتوسط يبقى أكيد البحر شبه بحر الساحل ومرسى مطروح، والميزة هناك إنك ممكن تروح تحجز يوم في أي أوتيل عالبحر عشان تنزل الشاطىء بتاعهم، أو عندك الشواطىء المجانية بتاعة جبيل؛ واللي بالمناسبة لطيفة جداً ونضيفة وده كان الاختيار اللي أنا رحلته، غير كمان إن بطول المينا تقدر تقعد على الأحجار الضخمة اللي هناك أو على البنشات وتستمتع بالفيو ومنظر المراكب وتحديداً وقت الغروب .. مش محتاج خالص تقعد في المطاعم الغالية اللي عالبحر

وصلنا لمعاد الأكل

مبدأياً كده من أول ما توصل هتلاقي أماكن كتير تفطر فيها؛ من أول المناقيش السريعة والكعك لحد وجبات الفطار بكل ما لذ وطاب من أكل لبناني، وترشيحي الشخصي هو مطعم اسمه é baladi، غير بقى طول مانت ماشي قضيها آيس كريم وحلويات شرقية .. الاختيارت ملهاش حصر.

المحطة اللي بعد كده كانت مطعم "فينيقيا - Feniqia" واللي عامل افتكاسة إنه بيجيبلك فرن صاج بحجم صغير أوي على الترابيزة وعدّة المناقيش والحشوات وإنت تعملها بنفسك وتسوّيها، وده مجرد Welcome gesture كده لكل الناس قبل ما الميكس جريلات والكلام اللي بجد ييجي بعدها، بس أكيد بما إننا في مدينة ساحلية يبقى هيكون عندك أماكن كتير لأكلة سمك حلوة من ضمنهم مطعم "باب المينا".

جبيل بالنهار غير جبيل بالليل

المدينة الصغيرة ذات الطابع الشعبي البسيط دي شكلها بيتغير تماماً بالليل، المحلات بتقفل والمطاعم والبارات بتتوسع برة ويبتدي السهر بقى، والجزئية دي شبه شوية شارع مار مخايل بالليل إنك عندك اختيارات كتير لأماكن حلوة بيتلعب فيها مزيكا وجو؛ مع النقطة الزيادة هنا إنك لسه في المدينة الأثرية الكيوت اللي شخصيتها بتتغير كل شوية.

كده وصلنا لخلاصة تجربتي العزيزة في مدينتي اللبنانية المفضلة، بس معلومة أخيرة عالماشي .. لو رايحين جبيل في الصيف نشّنوا على أيام مهرجان جبيل؛ مهرجان غنائي وبيبقى فيه حفلات وايفينتات حلوة كتير، ولو رايحين في الشتا يبقى نشّنوا على الكريسماس، ده لأن شجرة الكريسماس اللي بتتعمل في مدخل جبيل والديكورات اللي حواليها بتبقى حدث كل سنة بيوصل للعالمية كمان لما الشجرة تدخل في تصنيفات مجلات ومواقع السفر.

صفحة المدونة على إنستاغرام

https://www.instagram.com/nada_abdrabou/

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
ضع إستفسارك عن لبنان هنا	التآيفون	بوابة الدول الاخرى	29	01-06-2019 05:49 AM
بزور لندن اول مره !!!	roritta-1	بوابة بريطانيا	3	30-11-2017 11:29 AM
أختر حلمكـ حين تزور بوركاي.!؟ (( الصخرة التي أدهشة السياح.! ))..بقلم.حسن الحجيلي.	silent_dove	بوابة الفلبين	8	25-12-2015 12:43 PM
جبيل لبنان	شارلوك هولمز	بوابة الدول الاخرى	26	09-12-2015 07:39 PM