اهلا بالبطل كازامي

منور المنتدى بطلتك البهية

نواصل معكم:

انتهيت في شهر رمضان من الحجوزات واستقريت على الجدول وكامل الخطوات.
وتفرغت للعبادة وكسب الحسنات. أسال الله ان يرحم حالنا.
كانت الفترة بين الحجز والرحلة حوالي 4اشهر. وهي فترة ممتازة ولو زادت لكانت افضل
فكلما حجزتم ابدر وحرصتم على التبدير كلما نلتم التوفير وسلمتم من الغلا والتبذير.

أخذت الايام تتصرم والليالي تنقضي وانا اعدها عدا واحسبها امدا وكانها لن تنقضي ابدا.
الشي الوحيد الذي لازمني خلال هذه المده هو المنتدى وانتم بالاخص. فازددت اثراء بالمعلومات
ومعرفة بالكثير من الدقائق والتفصيلات وهذه زاد رحلتي جمالا وروعة بكل ماتعنيه الكلمات.

وأخيرا وصلنا الى ساعة الصفر والاغراض والشنط من قبل اسابيع وهي تنتظر وتقف جاهزة في الزوايا
وكانها اشد لهفة مني الى زيزا. ربتت بيدي على روسهم لازيل الغبار وايقظهم من سباتهم وقلت
بهمس حان وقت الرحيل ايه الاحبه.

كنت حريصا على عدم اخبار احد حتى موعد الحسم ثم ساخبر والدي فقط والبقية ليس مهما ان يكونوا
على درايه. وهذا من باب قول المصطفى عليه افضل الصلاة واتم التسليم (استعينوا على قضاء حوائجكم بالكتمان) ولكن كنت الوحيد الذي لايدري ان كل العالم يدرون اني رايح زيزا. حتى القطوة اللي تحت الدرج
ناظرتني وانا انزززل الشنط وكأنها تقول (ماليزيا ياخاين). ولاتلومون الكازامية فوالله طلعت افضل من بعض الرقققالة. عموما الخبر انتشر من المرافقين الاخرين الBBC والCCN. واصلا عادي خل الناس تعرف.
وبيني وبينكم والله انها اكلت معي.. بس وش اسوي. ياشينها يوم تكذب على الناس وهم عارفين.

المهم الاقلاع من مطار جده الساعة 8مساء. والى الرياض ومن هناك نقلع 11مساء الى كوالمبور.
كل الامور سارت بسلاسة وكنت بالمطار من الساعة 6مساء. اقلعت الطيارة في وقتها من جده.
ولكن في في الرياض تاخرت حق 35دقيقة والسبب ان الخطوط السعودية عندهم مطلب رئيسي ان تكون العائلة متجاورة في المقاعد وهاتك حويس وناس ترفض وناس تقوم وبالاخير كان لهم مااردوا واقلعنا
وكانت الابتسامات تعلو محيى الجميع كيف لا وهم ذاهبون الى دولة السرور والفرح والبهجة.


ولاباس ان اذكر لكم اني اخطات في اختياري للمقعدين الاخيرين بالطائرة. لان الطيران السعودي لايكون الدخول والخروج الا من الباب الامامي بالطائرة وكنت مضطر امر امام الجميع لاصل لمقعدي. وهذا الاختيار سببه ان بالطيران الاماراتي سويته واعجبني فالحمام اكرمكم الله قريب والباب قريب فهم يفتحون الباب الخلفي واول من ينزل واول من يركب ولااحد يضايقني.لكن الفكرة ذي ماتصلح بالطيران السعودي وافضل مقعد هو اللي عند باب الطواري او اللي بعد مقاعد الدرجة الاولى. وجهة نظر.

كانت الخطوط السعودية عال العال وفخمة ولاتفرق كثير عن الاماراتية . والرحلة تيسرت ووصلنا بالسلامة.
وهنا سأضع شرحا يسير عن مطار كوالا وعن مكتب التكاسي بالمطار.
عند الهبوط ستلاحظون المطار كبير ومترامي الاطراف وهو عبارة عن قسمين, اوبينها قطار. واليكم صورة المدرج وستلاحظون وجود الممرات المتحركه للصعود والنزول


بعد السماح بالنزول لاتستعجلون ترى ماليزيا متهي طايرة والمطار منظم ومرتب يعني الاول والاخير بيصلون سوا واهم شي خذوا اغراضكم كلها ولاتنسون شي. ترى ربعنا اذا وصلوا هناك يفغرون.
وهذا هو الممر المتحرك


الممر هذا ممكن طوله حوالي 20 متر . وهو همزة وصل بين الطائرة والمطار.
في نهاية الممر المتحرك ستجد امامك سيب معترض وطويل وبه سير متحرك. اتجه لليمين وواصل السير.
هذي لقطة من على السير المتحرك


وفي المنتصف ستجدون هذه اللفته



طبعا لو رحت يسار ستجد اخر السيب هذا زجاج يطل على مدرج الاقلاع.
واصل السير بعد مالفيت يمين(او حسب اتجاهك اذا الوصول). انت الان تتجه الى القبة الزجاجية وبها دورات مياه ومحلات وكونترات واسواق ومصلى بالدور الثاني ومطاعم . ولكن مايهمنا هو القطار الكهربائي وهو قطار يربط المطارين ببعض. وهذه صورة القبة وستكون في الامام وييسار الصورة يسكون زجاج القطار


ولان القبة ماتهم كثير مااخذت لها صور الا قليل واصلا ماقدرت اصور كلها بشر مثل هذي


واليكم صور مدخل القطار



كلها دقيقتين الى خمس تقريبا وانت واصل الى المطار القسم الثاني من المطار.وهذي صورة بعد ماوصلنا وخرجنا


وهنا ايضا ستجد مكاتب وزحمة ومحلات وعالم ومحلات شرائح اتصالات.وسكون طريقنا من وسطها ونتجه للطرف الاخر
وعموما سيكون اغلب الناس يسيرون في هذا الطريق لانه هو الوحيد الذي يوصلك للشنط.
وهذي صورة توضيحيه


اتبع اللوحات وستجدها تشير الى درج كهربائي وانزل الى الدور الاسفل.


بعد النزول للدور الاسفل ستجد ممر فيه زينه واضاءات وكانهم يرحبون بالقادمين بل هم يرحبون



وهاهو الممر المؤدي الى الجوازات والبصمة وحاول تقف عند امرأه عشان اذا طلبت كشف الوجه
فمايكون في احراج عليك وعلى الاهل



وهذي هي مكاتب الجوازات بعد المغادره منها.



بعد كذا ستكونون متجهين لصالة استلام العفش فيما اتذكر
وستجد عدة سيور ولكن الوضع سريع ومرتب ورهيب وفي ثواني وشنطتك بيدك



ولفت انتباهي هالشنطة وعرفت ان صاحبها من المنتدى فهذه الافكار من افكار الاعضاء مثل قصة حب


بعد الشنط ستجدون صالة كبير .. وفي هالمكان ستجدون الكثير من المكاتب والمحلات مثل مكتب القطار اللي يربط كوالا بالمطار



طبعا بعد ماتاخذون شناطكم تتجهون للخروج وستجدون بالطريق اثناء خروجكم مكتب التكاسي الاول
وهو واضح واغلب الناس يتعامل معه لكنه مكتب سيئ ويستغل المسافرين ويتلاعب بالاسعار فمره المشوار ب80 ومره ب150 ومره شنطك كثيرة ويجبرك تاخذ سيارة كبيرة ويرفع عليك السعر ومره مايسال عن الشنط ومره يحدك على نوع من السيارات بحجة مافي الا هي وتكون سيارة فارهه ومكلفة.
وهذي صورته


وللاسف يوم وصلت وقلت اسم الفندق له. طلب مني تقريبا مبلغ 150رينقت دون اي سوال وقلت له اني العام اخذت التاكسي ب80 فما رد علي وتركته وتوجهت لصالة المغادرة وكاني متجه للخروج وتجاوز البوابة الزجاجية اللي عنده العسكر ثم سالت احد العسكر عن مكتب تكاسي ثاني فاشار الي بالنزول الى الاسفل.
وبالفعل اتجهت يمين خلف محل الدونات والمعجنات وللاسف ماصورت لاني ماكنت متاكد من النتيجه.
ووصلت الى مصعد ودرج كهربائي. فنزلت بالدرج الكهربائي الى الدور الاسفل ثم واصلت الى الدور الذي يليه ووجدت المكتب وهذا الدور هو الارضي الذي به الباصات وبه القطار. وهنا تنبيه لو بغيت تنزل لهذا المكتب ولهذا الدور فاستخدم الدرج الكهربائي ولاتنزل بالمصعد لان المصعد سيوصلك لنفس الدور ولكن بالجهة الاخرى وتضطر تطلع وترجع ثاني بالدرج. فالدور الارضي الذي به المكتب مقسوم قسمين بسبب القطار. فالقطار يفصل الدور الى نصفين.
اليكم اللفته حقت المكتب


وهذا هو مكتبهم



طبعا قلت للمكتب ابي فندق ريومز قالو ماعندنا هالكلام. عندنا نجيب لك تكسي والكيلو بواحد رينقت
سواء التكسي صغير او كبير. قلت حلو . وعلى طول شغلت الخرايط وحددت الفندق وطلعت المسافة 57كيلو. قلت تم . قالو خذ تذكرة ب2رينقت وانطلق وتفاهم من التكسي وحاسبه اذا وصلت وسار المشوار كلها باقل من 60 رينقت ولله الحمد. لا وبعد تكسي انوفا ومتبحبحين ومتوسعين والسواق واحد مطنوخ واخذت رقمه ورجعني المطار بعد يومين بسعر خيالي ب75رينقت وايضا لما رجعت كوالا اتصلت عليه مرتين والوداع كان معه ولاقصر. سعره مثل سعر التكسي الصغير واقل ومسلم ومن اهل ماليزيا وطيب وحبوب.



وختاما لهذا الجزء اليكم صورة توضيحيه للمطار كامل,


اعذروووووني والله اني سيئ بالشرح واتوقع اني حست الموضوع بس ياليت اللي فاهم يوضح اكثر للاعضاء .ولاتدققون

كازامي

ماشاء الله عليك دقيق في الوصف
بس لوتعطيني رقم السواق حق المطار وهل يتكلم عربي عشان اتفق معاه قبل لا اسافر

يالربع الصور عندي ماهي ظاهره؟؟ وش السواه؟
عندكم ظاهرة وتشوفوناه؟