السلام عليكم
حبيت اسال عن المخالفات في سويسرا تم تصويري عن طريق كميرا سرعة وجاني ايميلين من شركة sixt بالمخالفة وانك لازم ترسلها لنا عن طريق حوالة دولية فاستغربت انهم ماسحبوها من بطاقتي الفيزا فياليت لو احد يشرح لي كيف راح يكون سدادها خصوصا ان الايميل الي جاني بالالماني لكن المخالفات صحيحة اتذكرها
وهل لو ماسددت بيكون علي مشكلة فياليت شرح يا اخوان
جزاكم الله خير

و عليكم السلام و رحمة الله و بركاته ..

بالنسبة لمخالفات السرعة في سويسرا تقدر تسددها أونلاين أذا وصلتك و في العادة يكون مذكور فيها رقم الحساب و تسوي حوالة أو أيداع في الحساب اللى ظاهر لك في المخالفة و تحتفظ بالإيصال و ترجع ترسله على الأيميل الظاهر في المخالفة ..

أعتقد شركات التأجير لا يقومون بخصمها من بطاقتك الأئتمانية تفادياً للمسائلة القانونية إلا أن كنت قد فوضتهم أنثاء توقيع العقد.

أفضل لك تسددها و لا تخليها تتراكم عليك و ممكن يتضاعف سعرها ...

وعليكم السلام ورحمة الله وبركاته

لازم تدفعهم علشان ما يصير فيك مثل اللي صار فينا ها الصيف،

اقرأ المشاركة رقم 6 في ها الموضوع

https://www.arabtrvl.com/vb/t41129.html


للأسف في اوروبا نظامهم في ها الموضوع غير مريح،
والمخالفة تتم عليك ولو بعد سنين.

سبحان الله، الاسبوع الماضي وصلتنا رسالة من مكتب محاماه في ايطاليا
مكلفينه شرطة مدينة فلورنس ، يطلبون منا دفع مخالفة رادار، كانت في سنة 2017 !!!!
ما أعرف شو سالفة ها السنة اللي سوينا فيها مخالفة في ايطاليا ومخالفة في سويسرا،
والاثنين توْهم انتبهوا في 2019.

بعد ما أعرف ليش مكتب محاماه، شكلهم كانوا بيبلغون علينا الانتربول لو ما دفعنا
والدفع إما عن طريق التحويل لحسابهم في البنك
أو الدخول على رابط معين والدفع عن طريق البطاقة،
وطبعا مبلغ المخالفة زاد عليه مبلغ غرامة تأخير الدفع (المجموع 200 يورو).

في جنوب افريقيا لما تسوي مخالفة يوصلك ايميل من مكتب تأجير السيارات
ويطلبون الإذن بخصم المبلغ من بطاقة الإئتمان، ويخصمونه بعد ما ترد عليهم،
وينتهى الموضوع ببساطة.
حتى مبلغ المخالفة يكون بسيط جدا مقارنة بأوروبا،
آخر مرة دفعنا أقل من 200 درهم،
وفي اوروبا المخالفة ب 200 يورو ... الله المستعان.