أصبحكم بالخير بتوقيت كتابتي لهالمنشور


أضع بين يديكم هذي الصور الي اخذتها برحلتي بزمن كورونا ومن أصعب الفترات إلى مرت علي والتزام المجبر لسلامتي الصحيه أن التزم بلبس الكمام طول الوقت هذا تمر صعب لكن مع جمال المكان والرحلات والتنقلات يخفف من ثقل ليس بوزنه لكن بكتمة وهم الكمام



هنا قرية #golyazi صباح باكر وكان البال وده بأكل شعبي بسيط وخفيف وجا ع بالي اني أمر القريه واشوف أحوالها من الصباح الباكر عكس الزياره إلى سبق كانت بفترة الظهيره وزحمه وعالم



وتوفقت واخترت أن افطر بأحد البيوت مسوين بالسطح مثل مطعم أهل البيت نفسهم يطبخون إلى تبيه ويقدمون لك فرش وطازج وحار واسعارهم جدا رخيصه



واستمتعت بالمنظر والأجواء المشمسه ومافي ناس وزحمه لا



وفي صور كانت اطلاله لسكني في شارع التي بارمك وكانت اطلالتي جميله ع بيوت واشوف كل شي لي اكثر من اطلاله بحكم موقع الشقه ع شارعين شارع رئيسي وداخلي بتشوفون صورة طبق الفاكهه وصورة خافته الأنوار فقط نوافذ مفتوحه وأشجار هذي اطلاله أخرى ع شارع رئيسي ومقابل مطاعم وووو



وانا من الشخصيات إلى احب شكل البيوت إلى جذي واحب اشوف الشعب وحياته والأتراك معروف عنهم يعشقون ويموتون ع جلسة البلكونه وانا صرت مثلهم


طبعا ب ٩٠ يوم في تركيا وفي بورصه سكنت أكثر من مكان بما انه عندما أكثر من مكان وكل مكان موقعه يختلف عن الآخر وهذا تكتيك وذكاء مني لمن اقولهم اشترو شقق خل كل واحد ياخذ بمكان عشان نستفيد من بعض أو عشان كل من يأخذ خصوصيته ووووو


وعندنا لا ناس ماخذين عمارة كامله للأب وأبنائه هم بعد وناسه





سبق يمكن كلمتكم ع مطعم المشويات المشهور في بورصه عند الأتراك قبل السواح وفعلا لذيذ ويمكن هذا اكثر مطعم زرناه وكلنا من عنده وحتى عند عودة الفراخ قبلي للكويت كانو يقولولي شخباره تروحين له والا خلاص قلت الااروووح واكل منه ومكان كم خالي ومبين بعد خشمي

نظافه استقبال بشاشه أسعارهم زينه جودة الاكل المكان لهم أكثر من فرع في بورصه الخدمه اهي إلى ميزه المكان صراحه جميع من يعمل بهذا المطعم بشوش وخدوم ومن دون مقابل

له جلسات خارجيه و اخليه وشعبيه

#cigergah


https://www.instagram.com/p/CEy0RZ3A...d=6c9lotkhox8o




مطعم أخر جربته سوالف همبرغر وشيبس. سلطات إيطاليا واوروبي لذيذ صراحه ومزدحم أغلبه أتراك وسواح بعد ومعروف ويعتبر من المطاعم إلى عليها تقيم عالي بالمواقع الاجنبيه والعربيه وحتى مطعم المشويات كذلك عليه تقييم عالي


أكثر من مره زرته وكانت الأطباق مختلفه ولذيذه
جوده ومذاق وسعر وخدمه ومكان له عده أفرع وجلسات كبيره. متنوعه وفي مكان لغير المدخنين


#happy mmoons cafe


https://instagram.com/happymoonscafe...d=imolu4uoycxr


وعندك صورة لمطعم إسكندر أشهر من علم وموجود بكذا منطقه وحي وشارع في بورصه أقدامهم إلى فى هيكل ع كلامهم وبعد الفرع الكبير الي عند غابه أتاتورك و بعد القريه العثمانيه وحديقه الدراجات


ومافيه مادو إلى مستحيل احد ينزل تركيا وماي وآه ويطلب هالحلو اللذيذ إلى فصلت عليه وصار الطبق المفضل عندي اكثر من البقلاوه والكنافه


#mado


وكذلك صور ل شارع #altıparmak مساءا اول ليله ينزل علينا مطر واحنا نمشي فيه وبسرعه أخذت كذا لقطه من الفرحه والوناسه





صور لأحد مساجد السوق المسقف سريع أخذت لقطات داخل حرم المسجد مكان الرجال

وقبل الوصول للمسجد توقفت عند عربة الكستناء ابو فروة اللذيذه ومادري ليش عندهم لذيذه تنوكل ومن نشتريها ونطبخها بالبيت موحلوه


وفي صوره اخذتها لمطعم وانا رايحه لشارع هيكل دايم اشوف زحمه عليه إسكندر

وفي صور لشارع رئيسي قبل الوصول إلى هيكل وحي إلى فيه مطعم إسكندر وقبل الدوار دوار الساعه احنا نسميه بتشوفون هالعجز قاعدين ويسولفون ويضحكون يحليلهم وقلت لازم اخليلهم صوره للذكرى واخليها ذكرى وعبره للأجيال القادمه الشباب واقولهم خلكم مثلهم حكيمين وسنعين وصبورين ومتحملين شقى بعضهم مو طلاق ب طلاق مثل زمن الحين وجيل الحين يمه ياخرعه بسرعه ومايصدق ع اتفهه الأسباب طلق مالت عليه




ذات يوم أخذت السياره وذهب لجبل #uludag وكان خاطري اصعد واصعد واصعد واكشت مع الأتراك مليت من المدينه تحت ومن الناس والمطاعم والزحمه


كنت محتاجه هوانقي صافي وريحة دخان حطب

وصعدنا ودخلنا بعد مشوار طويل وصعود جميل ومخيف وأخذت هاللقطات واشتريت توت فرش من واحد شيبه موقف سيارته بطرف الشارع وارخص التوت كيلو ب ١٥ ليره مادري ٥ ليره ناسيه

وناس موقفه سياراتها ومنزله عزبتها وطناجرها وتطبخ والي باربيكيو والي سفري وأطفال تلعب وشباب يلعبون كوره ومجموعة بنات تسولف وتضحك


وانا امشي واصور وتاره اكل اكلي اللذيذ وللعلم كان في كذا مطعم موجود فوق تقدرون تشترون منهم وفي سيارات واقفه تبيع فواكهه وخضروات محاصيل مزارعهم



ومره من المرات وانا راجعه من مودانيا اشتهيت اكل اكل بحري مع العلم مودانيا كلها مطاعم بحريه بس حزتها ماكنت جوعانه


ودايم هالمطعم بكل سفره ازوره لأنه لذيذ صراحه ولازم تعرفون شنو تطلبون منهم وسعره لا رخيص والغالي متوسط في منهم يقولون غالي ومنهم يقولون متوسط


اسمه تحصلونه مكتوب بالصوره ع المنديل


#kocamanlar balik restoran
له أكثر من فرع في بورصه


#kocamanlar balik besevler

#kocamanlar balik bademli

هذا دايم ازوره واحب الخدمه فيه وكل مره اطلب منهم أطباق لذيذه صراحه أهم شي عندي شوربتهم البحريه والسلطه والسمك كذا نوع اختار بكذا زياره ولذيذ وعندهم ضيافه الشاي أو القهوه وسويت إذا تبون

#ihsaniye agora carsisi





تم الإرسال من VOG-L29 باستخدام Tapatalk