إنتشر فيديو لمشهور تحدث عن مشكلة بأحد الفنادق أن الغرفة السعر مبالغ فيها من الإستقبال وعند فتحه لبوكينج وجد غرف بسعر أقل..

من وجهة نظري من الخطأ السفر دون الحجز المسبق ومعروف بأي بلد بالعالم وقت الإجازات الأسعار مرتفعة للغاية وبشكل جنوني
ثقافة السفر عند البعض معدومة وبعضهم أول تجربة الواحد يتعلم لكن قبل كل شي يحاول يرتب للحجوزات في الفنادق علشان لا يتورط ويتبهذل..

ألحين كمية ذم وسب لتركيا وللأتراك مو طبيعية لدرجة صار عندي خوف وهاجس أرجع لها مره ثانية مع إنها من أجمل البلدان اللي سافرت لها ، ووالد زوجة أخوي من عشاق تركيا سافر لها هو وعائلته والحمدلله إنبسطو وإستانسو فيها ليش المبالغات في كل شي ليش الذم والسخط

عن نفسي وعائلتي زرنا تركيا قبل 8 سنوات والله حصل لنا موقف تافه من سايق تاكسي متعجرف وأخوي رد على كلامه وطلب منه يوقف السيارة ونزلنا وموقف أخر مع بائع صرخ في وجهنا وبعدين عادي رجع وصار سمح وباعنا بالسعر اللي نبغى ، ما أقول تركيا أفضل بلد وأهلها كأنهم ملائكة لكن ما أقول كلهم سيئين وكأنهم شياطين وبالتأكيد في مواقف سيئة تحصل كما هناك مواقف ممتازة..

نصيحتي كن حذر وأترك المبالغة في لبس البراندات (لا تترززون وتستعرضون ) ، رتب حجوزاتك قبل الذهاب للوجهة وأقرأ عنها جيداً ، لا تقبل خدمات ممن يعرضونها في الشارع ، خذ مبلغ مالي على قدر صرفيتك في اليوم ومبلغ إحتياطي وعند الطلب من المطاعم أو المقاهي صور المنيو اللي طلبت منه وراجع السعر ، إبتعدو عن الأماكن المشبوهة ، وهناك مثل قالوا أجدادنا رحمهم الله وهم أعرف وأدرى (يا غريب كن أديب ) ، عند حدوث مشكلة تواصل مع الشرطة السياحية ولا تاخذ وتعطي وتجادل كثير وحقك بيجيك بحول الله وأسأل الله أن يبعد عننا وعنكم المواقف السيئة