اكيد لاحظتوا اختلاف وتغير الشعب
المناطق الساحلية اكثر فيها مهاجرين من الافارقه من زمن العبودية ..





تواجه غواياكيل في بعض الأحيان تهديدات زلزالية كبيرة بسبب طبقات تربتها وموقعها على حلقة النار وجنوب منطقة اندساس شمال الأنديز. يمكن أن تتضرر المدينة بسهولة بسبب الزلازل حيث تتكون تربتها الضعيفة والقابلة للانضغاط من رواسب ناعمة عميقة فوق الصخور الصلبة والرواسب في بيئة معتدلة الملوحة. لا يتم توقع تهديدات تسونامي إلا لمناطق الزراعة الساحلية ، وليس المناطق المأهولة الرئيسية.







الثقافة

يتم تعريف الثقافة السائدة في الإكوادور والأكثر جوهرية من الهجرة الحديثة إلى من المستعمرين الإسبان، بعد وصول الأوروبيين في 1499.
هاجر عدد أقل من غيرهم من الأوروبيين والأمريكيين الشماليين إلى البلاد في أواخر القرن 19 وأوائل القرن 20، وبأعداد أقل والبولنديين والليتوانيين والإنجليزية والأيرلندية، والكروات أثناء وبعد الحرب العالمية الثانية.

تم العثور على الأقلية من أصل أفريقي معظمهم في محافظة شمال الساحلية ازميرالدا. وهذا يرجع إلى حد كبير إلى حطام سفينة من القرن 17 من جاليون تجارة الرقيق قبالة الساحل الشمالي من الإكوادور. سبح القلائل من الناجين الأفارقة إلى الشاطئ وتوغلوا في الغابة حيث ظلوا كما الرجال الأحرار والحفاظ على ثقافتهم الأصلية، لم يتأثروا من المحافظات الأخرى من الساحل أو في منطقة الأنديز.



يتم دمج مجتمعات السكان الأصليين في الإكوادور في الثقافة السائدة بدرجات متفاوتة، ولا سيما مجتمعات السكان الأصليين النائية من حوض الأمازون.

هذي المنطقه اللي فوق تقريبا نفس كوميونا 13 في كولومبيا بس اقل خطوره والحين صارت منطقه سياحية ..





ونتمشى داخلها

التركيبة السكانية

التنوع العرقي بين سكان الاكوادور أكبر مجموعة عرقية هم المولدين، أحفاد المستعمرين الإسبان والشعوب الأصلية، والذين يشكلون 65% من السكان.
الإكوادوريين الأبيض (الأبيض أمريكا اللاتينية)، الذين يشكلون 19% من سكان الإكوادور ويمكن العثور عليها في جميع من الإكوادور.
خلال الحقبة الاستعمارية السكان البيض كانت أساسا أحفاد من إسبانيا. اليوم السكان البيض هو نتيجة لمزيج من المهاجرين الأوروبيين، معظمهم من إسبانيا، إيطاليا، فرنسا، ألمانيا، وسويسرا الذين استقروا وتداخلوا مع السكان البيض من الإكوادور في أوائل القرن 20.
الإكوادور لديها وجود الإكوادوريين من أصل لبناني وفلسطيني. وبالإضافة إلى ذلك، هناك نسبة صغيرة (0.4%) من اليهود ، الذي يستند أساسا في غواياكيل وإلى حد أقل كيتو التي تم تضمينها كجزء من السكان البيض.
الهنود الحمر 13% من عدد السكان الحالي ومعظمهم في المناطق الريفية من المقاطعات الساحلية من إكوادور، اما في مرتفعات جبال الأنديز حيث المولدين، السكان البيض والهنود الحمر ، والافارقه يكاد يكون معدوم باستثناء طائفة صغيرة في محافظة امبابورا بوادي شوتا.











المطبخ

المطبخ الإكوادوري متنوع ومتباين مع الظروف الزراعية المرتبطة بها. معظم المناطق في الإكوادور تتبع الترتيب في الاكل من الحساء، وبالطبع يتضمن الأرز والبروتين، ومن ثم الحلو والقهوة ومشروب البينول وطحين الماتشيكا حتى النهاية. العشاء هو عادة أخف وزنا ويتكون أحيانا فقط من القهوة أو الشاي بالاعشاب مع الخبز.

في منطقة المرتفعات، لحم الخنزير، والدجاج، ولحم البقر، (خنزير غينيا) الاكله الشعبية ويتقدم معاها مجموعة متنوعة من الحبوب ( الأرز والذرة) أو البطاطا.

في المنطقة الساحلية المأكولات البحرية تحظى بشعبية كبيرة،من الأسماك، والروبيان، يتم تقديم سافيجه مع الموز المقلي ، الذره، أو tostado.
كاراسكو هو الغذاء الرئيسي في المنطقة الساحلية وخاصة غواياكيل. (الأرز مع الفاصوليا واللحم البقري المشوي) هي واحدة من الأطباق التقليدية من غواياكيل، كما هو الموز المقلي، والتي غالبا ما تقدم مع ذلك.
في هالمنطقة المنتج الرئيسي الموز، حبوب الكاكاو، والربيان، البلطي، والمانجو، والفواكه ، وبين غيرها من المنتجات.

في منطقة الأمازون، من دعائم النظام الغذائي هو يوكا، ويدعى في مكان آخر الكسافا. العديد من الفواكه المتوفرة في هذه المنطقة، بما في ذلك الموز والعنب والنخيل والخوخ والخ.

ونشوف هذا الباص السياحي







وخذينا باصنا وبالاتجاة الى فندقنا ..
في غواياكيل ما ينصح التمشي و الطلعه باليل .. يفضل الواحد يكون في سكنه .. الامن باليل مو اوك فيها خصوصا منطقة الكورنيش اللي كنا فيها منطقتنا احسن بس بعد يفضل ما نطلع الا بقروب .. ومانفترق عن بعض ..

الليله وحده من القروب تغادرنا الى وجهتها وتكمل رحلتها الى كوستاريكا وعقبها انا و 3 معاي طيارتنا الفير الى ميامي..

وصلنا الفندق وكلنا ناطرين نتايج pcr ورانا رحلات دولية .. وصل الايميل بالنتايج واحنا عند باب الفندق تقريبا الساعه كانت 7 م ..
بدينا ناخذ النتايج بالدور شكلنا ناطرين نتايج امتحان المهم اسمي تأخر ما طلع عقب نص ساعه بين بالايميل ولا النتيجه ؟؟؟




POSITIVO
شنوووووووووووو منووووووووووو
أبرار نتيجتها بوزتيفووووو
لااااا لاااااااااا
أنا لا تجذبوووون وييين ما اشوففف .. مكتوب أبرار شوفي .. والله ما قمت اشوف انتوا من صجكم انا بوزيتيفوووو
والله هذا المكتووووب
لاااااا لااااا مو من صجكم قولوا غير هالكلام ..
انا مافيني اعراض شلوووووون والله مو تعبانه ولافيني اي نوع من اعراضها ..

الا انتي يا أبرار شلون تحوشجج انتي اكثر وحده ملتزمه فينا ومافيج اعراضها "هذا السعودي يواسيني "
قلت اسكت انا شدراني انت الحين مو وقتك " انا ويهي ضغطه مليون و معصبببه "
القايد لا تحاتين بنضبط الامور امشوا ندخل الفندق ونشوف شنو نقدر نسوي ..
أنا شنو بنسوي واضحه نتيجتي بوزيتيفو يعني بقعد اهني وانحجر بروحي لاااااا انا تعبت ابي ارجع الكويت ..
وحده من البنات لا ما تقعدين تطلعين.. وحده ثانية صبر انا بعد شكلي بكون معاج لان احس بتعب و ماوصلت نتيجتي ..
أنا شلون اطلع يااااا ناس النتيجه واااااضحه ..


وصل ايميل ثاني فلانه بوزيتيفووووووو ....
لالالاااااااااااااا

تخيلوا القروب كله بيسافر الا انا واللي معاي بنقعد ..
دخلنا الفندق سوينا روحنا ما فينا شي و كلنا اجتمعنا في غرفة القايد .. قاعدين يفكرون شلون يطلعونا من غير حجر ..

القايد يدور مختبرات فاتحه .. مالقينا عشان نحاول نغير النتيجه تزووووووير
وندور وندور لو بس انسوي انتجن وندخل على الاقل امريكا مو لازم بي سي ار .. مافي كلهم مسكرين لان اليوم كريسماس وانا لازم اكون في المطار الفير ..
اللي بتروح كوستا ريكا قالت اعرف احد يزور ويغير النتايج خلونا نسوي لكم بس على الاقل تطلعون من الاكوادور و تروحون امريكا ..
انا انتوا من صجكم نزور ونطلع اشفيكم ترا احنا في الاكوادور يعني لو ننصاد شنو يصير فينا ؟؟
أبرار محد يجيك بس يشوفون النتيجية ويمشونكم ...
أنا و ان صادفنا احد لعين وجيك على الكود وشاف نتيجه غير شنو بنسوي من يحلها ذيج الحزه ؟؟
قالت انا دشيت دولتين بفيك ريزلت ومحد درا عني .. قوي قلبج وروحوا ...
لا لا لاااا مابي اسوي ازور ما يسوى علي انصاد في غربه ومو اي ديرة و كافي اللي شفته اول ما طبينا المطار مع فلان لما خذوه وبعدين لاتنسون الثانية اللي معاي ترا دكتوره ومبتعثه في امريكا تخيلوا تنصاد شنو بيصير لها ؟؟؟؟؟؟ كل شي يروح عليهاااا

ونرد نفكر ونفكر ونفكر ونفكر ..
واحد قال انا اصلا بعد شاك في نتيجتي بس دام طلعت نيغتيف الحمدلله .. الدكتوره و اهو كانوا شاكين في اعمارهم انهم كورونا وكانوا يقولون احنا يمكن فينا كورونا ..
بس انتي يا أبرار مافيج شي ..
قلت هذا اللي حارني انا مو قاعده اشتكي من شي و لا تعبانه ليش بوزيتيف ؟؟؟؟ ياربي صبرني ...

اخر شي توصلنا له ان نغير نتيجة الاختبار ونخليها نيغتيف ..
دزيناها حق ناس شطار في التزوير.. ولان وقتهم غير عن وقتنا قلنا خلاص احنا بنروح غرفنا ومتى ماوصلت النتايج المزوره دزوهم واتس اب ..

اللي بتروح كوستا ريكا توكلت على الله وراحت المطار اهي اول المغادرين من القروب ..

طبعا الليله هذي مافي نوم ننطر النتايج و نشوف شنو يصير مع اللي بالمطار ..

وصلت المطار و طافت الجمارك و امورها بالسليم و قالت أبرار ترا محد جيك علينا بس شافوا نيغتيف و مشيت ..

زين الله يسهل .. احنا لما الحين ما وصلتنا المزوره ..

تقريبا الساعه 2 باليل وصلني بالواتس اب النتيجة المزوره طبعا انا اشوفها وخايفه و قاعده احاتي شلون بطوف بالمطار فيها وكل ما اذكر سالفة اللي معاي وقت اللي خذوه اخترع واخاف زيادة ..

المزورة بالضبط اخت الاصلية محد يشك فيها بس في حال لو قال بسوي سكان على الكود يا ويلتي ويلتااااااااه ..

المفروض الساعه 4 الفير ناطرنا السايق يوصلنا المطار انا و الدكتوره و 2 معنا زوج و زوجته كلنا بنفس الطياره الى ميامي ..

كلمتني الدكتوره الساعه 3 الفير قالت أبرار انا ما ابي اروح وبقعد اهني اسوي مسحه ثانية و انحجر ولا اروح و اجازف بعمري و مهنتي و شهادتي قلت انا معاج ماني رايحه وبقعد ..

دزينا بالواتس اب احنا قاعدين وبنجرب نسوي مسحه الصبح و نشوف شنو يصير معانا..

ليش روحوا لا تحاتون بتطلعون منها .. قلنا لا و اذا ما طلع منها شلوووووون ..؟؟
راحوا الزوج و زوجته ودخلوا وقالوا بس شافوا النتيجه و مشينا .
الله معاكم ..

الحين انا اكلم السفريات اللي حاجزه معاه تذاكري وقلت له حاشتني كورونا غير حجوزاتي "وقتها كان اوميكرون" مسكين وايد ضاق خلقه علي و شلون وشنو بتسوين وانتي اهناك قلت الله يفرجها علينا سواة الله ابرك شنو بسوي .. المفروض من ميامي اروح نيو يورك و اكمل سفرتي اهناك لي النيويير وحاجزه في فندق هوتيل 1 عند السنترال بارك كنسلت الحجز و غيرة حجز التركية من نيويورك الى اني اطلع من ميامي .. غيرها وحط لي حجز يديد بتاريخ 28 ديسمبر ..

خلصت منه الحين افكر شلون اقول حق اهلي ان فيني كورونا كلهم ناطريني ارجع .. واتذكر كلام ابوي لما كان يقول صبري لا تسافرين الحين و امي لما امنعت اختي انها تروح نيويورك وتنطرني اهناك و انا اروح لها ونلتقي في نيويورك و يضيق خلقي وضغطي يرتفع
واحاتي شلون لو انتكست حالتنا في المرض واحنا في هالديرة والكل ماشي بس انا و الدكتوره وهذول ما يفهمون انجليزي خير شر ..
ليلتها اتوقع مخي كان بينفجر من الضغط و التفكير .. قلت لازم ادق على ابوي ..
واكلم ابوي وخانقتني العبره احاتي ردة الفعل ادري مو هينه عليه خصوصا ان اهو عارف اهل الربو مع كورونا اتعبوا لما قلت له فيني كورنا صرنا في لحظة صمت من الطرفين انا و اهو عقب قلت له يبا انا بخير و طيبه لا تحاتي الحمدلله مو تعبانه و لا حتى فيني اعراضها والله واذا تبي اكلمك فيديو الحين اتصل .. واتصل عليه فيديو عشان يتطمن اكثر .. قعد حبيبي يستغفر و يهديني لان صج حسيت بخرعه ما ادري ليش ويعطيني ارشادات الفيكس و المشروبات الدافيه وربعهم و شنو اسوي ..
عقب دقيت على اختي وقلت لها و قعدت تبجي وبجيت وياها وقلت لها لا تقولين حق امي بقولها كنسلوا طيارتنا لان الطاقم حايشته كورونا.. واختي تقول شلون الحين اذا تعبتي لا سمح الله شلون قلت في يمنا كذا مستشفى ان شاء الله ما نتعب و انا مو حاسه بتعب الحمدلله بس الدكتوره اشوي تعبانه ..

انتهى يومنا على كورونا .. الحمدلله على كل حال ..

اصبحنا و اصبح الملك لله
اليوم ال 10 الاخير "المفروض مغادرة الاكوادور"
الاحد تاريخ 2021/12/26

بوينس دياس

قعدنا على الساعه 8 ص نمنا تقريبا الساعه 5 الفير
وعلى طول على اول مختبر يم فندقنا رحنا مشي انا و الدكتوره و اللي شاك بعمره و السعودي ..
ولا زحمممممممه على المختبر لان مو كل المختبرات فاتحه .. واغلبنا سواح كلنا معانا جوازتنا .. عقب ساعه تقريبا وصل قايدنا وطيارته على الساعه 2 الى كوستا ريكا و السعودي طيارته الساعه 2 الى ميامي ولا يوصل له بالايميل تغير موعد الطياره الى الساعه 1 منتصف الليل مع الكويتي اللي شاك بعمره.. و 2 من البنات طيارتهم على نيويورك الساعه 2 الظهر ..
سوينا مسحه احنا الاربعه انا و الدكتوره و اللي شاك بعمره و السعودي .. وقالوا تقريبا من 5- 7 ساعات تطلع النتيجه على الايميل او الموقع .. المختبر بظهر برغر كنغ .. مالي نفس اصور النفسية تحت الصفر "صور معاده"



رجعنا الفندق نغير غرف ونمدد الاقامة حقي و حق الدكتوره .. وقلنا ناخذ غرفه وحده ارخص لنا .. كنا بنغير الفندق بعدين قلت خلينا على هذا أأمن و اشرح من الباجي وكل شي يمنا ..

خذينا twin

هذي صور من النت









قعدنا في الحوش شوي



الساعه 12 القايد و 2 من البنات راحوا المطاار طيارتهم الساعه 2..

واحنا رجعنا المختبر و ماطلعوا النتايج .. رحنا برغر كنغ نتغدا محد فينا تغدا شرينا الاكل وقاعدين نشوفه ..
ناطرين النتيايج ..
اشوي ولا توصلنا انا و الدكتوره نفس الشي و اللي شاك بعمره طلع بوزيتيف بعد و السعودي نيغتيف .. انسدت نفسنا زيادة ..

اهني صارت لنا سالفه مع اللي شاك بعمره نتيجته الاولى وقتها ينتهي قبل الطيارة و كانت نيغتيف و الثانية بوزيتيف شلون بيطير ؟؟
رجعنا الفندق وقعدنا باللاونج خلاص انا و الدكتوره استسلمنا .. اللي شاك بعمره غير وقت نتيجة الاختبار الاولي ..
تقريبا الساعه كانت 4 العصر ولا يدخلون علينا البنتين اللي طيارتهم المفروض الى نيويورك !! احنا عيونا طلعت من مكانها اشفيكم ليش رديتوا ؟؟
اهما المطار ما مشونا يبونا نسوي اختبار ثاني انتجن !!
احنا شنووووووو لييييييش ؟؟ ما ندري بروحهم جذي من كيفهم يبونا نسوي انتجن ..
أنا و الدكتوره وااااااااي اشوه ان كنسلنا و ما رحنا هذا وانتوا نتايجكم نيغيتف جذي سوو عيل احنا جان شسوو فينا ...
مساكين اثاريهم رايحين مختبر قبل ما يرجعون الفندق قريب على المطار و سوو الفحص و رجعوا الفندق لي موعد الطياره الثانية اللي غيروهال لهم .. ونتيجتهم تطلع تقريبا على ال6 واهما لازم بالمطار 7 باليل .. وصلت نتيجتهم الحمدلله نيغتيف وتوكلوا على الله الى المطار و بعدها نيويورك ..
على الساعه 10 باليل اللي شاك بعمره و السعودي راحوا المطار طيارتهم الساعه 1 منتصف الليل ..
اللي شاك بعمره يقول اتوقع اني ختمت القرآن قبل ما ادخل و الحمدلله طافوا وطاروا الى ميامي ..

وتمينا انا و الدكتوره بروحنا في غواياكيل ..
كلمت امي وقلت انا ما طرت بعد طيارتنا الطاقم حايشته كورونا .. ما صدقتني وتقول حق اختي احس فيها شي يعني الطاقم تحوشه كورونا يبدلونهم بوقت ثاني قلت بدلونا بس عقب يومين .. سكرته منها واهي مو مصدقه بس بتمشي معاي ..

وانتهى يومنا انا والدكتوره بروحنا ..

اصبحنا و اصبح الملك لله
اليوم ال 11 حجر غواياكيل
الاثنين تاريخ 2021/12/27

بوينس دياس

قعدنا على الراحه انا والدكتوره و طلعنا نتريق بحوش الفندق اشوه ان الفندق مافي زحمة اوادم يعني كنا تقريبا 3 طاولات و واحنا بروحنا طاولتنا بعيدة ..
ولا اشوف الواتس اب ولا كل اعضاء السفره اول ما وصلوا وجهاتهم ودولهم سوو بي سي ار مره ثانية ولا كلهم حجر فيهم كورونا اللهم اللي في كوستاريكا فيهم كورونا و طالعين امورهم عادية ..

يعني القروب كله متكرون و انا والدكتوره كنا من الاوائل و اعتقد حاشتنا من يوم المزرعه اللي كنت فيه وايد تعبانه اهي بعد كانت تعبانه .. يعني انا واهي تقريبا صار لنا 10 ايام حايشتنا و احنا ما ندري ..

رحنا اليوم مختبر ثاني نسوي بعد مسحه .. الله ورحمته اتغير النتيجه .. ما في نفس الشي ما تغيرت ..

كلمت سفرياتي و قلت له غير الحجز النتيجة نفسها و غيرناها الى تاريخ 30 ديسمبر.. والدكتوره نفس الشي ..

رحنا المجمع اللي صوبنا خذينا غدا من شيليز و رجعنا الفندق ..



تغدينا وقعدنا على الاسكله نشوف اللي يطيرون و احنا محبوسين اهني .... اااااااه ياقلبي ذكرى مؤلمة حزتها والله حسيت روحنا جياس خمام الكل بعد عنا و مشى عنا



دقينا على سفاراتنا وحده في البرازيل و حده في بنما و قلنا لهم قصتنا و قالوا اذا تبون اي شي او قاصركم شي احنا موجودين .. قلنا نبي مختبر يطلع نتايجنا نيغتيف اضحكوا علينا و قالوا صعب في الاكوادور ..
وردينا استسلمنا لواقعنا ..
ابوي يكلمني و يحاتينا قلت الحمدلله امورنا طيبه ولما الحين انا مافيني اعراض ولا تعبانه والدكتوره اشوية كحة ..
وبالليل طلبنا عشانا و سهرنا على سيف العرب و نمنا ..

وانتهى يومنا على خير و على امل اليوم الثاني نكون نيغتيف ...

اصبحنا و اصبح الملك لله
اليوم ال 12 "حجر غواياكيل"
الثلاثا تاريخ 2021/12/28

بوينس دياس

قعدنا على الراحه وطلعنا في ليوان الفندق نتريق



شنو نسوي .. تقول الدكتوره تبين نروح نسوي مسحه قلت لا خلاص صار لنا 4 ايام واحنا نسوي خليها نشوف لي باجر .. قلت شرايج نمر على طبيب وناخذ cover letter إنا احنا حاشتنا من زمان وتوها بينت في الاختبار .. قالت صح خل ادخل اشوف طيران الامريكان ياخذونها عشان نروح نسويها قلت اوك ..

جيكت ولا الامريكان ياخذون فيها .. زين تمام عيل نشوف عيادة قريبه صوبنا .. وندخل قوقل ماب و نلقى ورا المجمع في مستشفى وفي مختبر ..
طلعنا و رحنا مشي لي المستشفى الجو حار ورطب بس قلنا نمشي عشان ما تكسرنا كورونا .. الدكتوره احسها تعبانه بس تقولي لا زينه انا الحين .. قلت ان شاء الله ..

وصلنا المستشفى قلنا نبي دكتور .. طبعا محد يتكلم انجليزي ولا احد يفهمنا نشغل الترجمه ونسمعهم بالاسباني .. قالوا الحين مافي يبيله نص ساعه ويوصل قلنا اوك ننطر ..

هذا اسم المستشفى اللي رحنا له

Kennedy Clinic Hospital Samborondón



قلنا نسوي مسحه دام في مختبر وسوينا المسحه على ما يوصل الدكتور .. اهني خفنا لو دخلنا على الدكتور وعرف عنا او فينا اعراض مبينه علينا خصوصا الدكتوره تعبانه الكحه فيها قويه قلنا عسى ما يحبسونا و يحجرونا في محاجرهم .. يا حسرتنا .. ها شنو نسوي ندخل ولا لا ؟؟

نفكر ونفكر ونفكر .. بالاخير قلنا ندخل ونتوكل على الله ..

دخلنا الا الدكتور ما يعرف ولا كلمه وحده بالانجليزي ريال عود وبنته دكتوره اتصل عليها وقال لها ترجمي لي اهي تعرف انجليزي .. قالت له يقولون نتايج اختبار ال كوفيد بوزيتيفو ..
خاااف الدكتور وقام لبس كل اللبس الوقائي .. وشرحنا لهم من متى فينا كورونا وانا تقريبا من تاريخ 12/18 احنا فينا الاعراض وتوها بينت لما سوينا المسحه والحين صار لنا 10 نبي cover letter انا احنا خلصنا فترة الحجر المقرره .. لما فهم السالفه قال اوك بس خلوني اجيك عليكم ..
اشوف الاكسجين و الضغط والحراره
انا والدكتوره اهني تبريدنا قلنا عسى ما يطلع فينا شي و يحبسنا .. خصوصا ان الدكتوره فيها كحه صدرها تعبان ..

فحص الدكتوره اول وانا ادعي ان امورها تكون طيبه .. الحراره اوك الضغط اوك ولا يقول الاكجسين لا .. يا ساتر انا بقلبي شنو يعني وشنو بنسوي اذا الاكسجين نازل في الجسم .. ويقولها شلون جذي الاكجسين تقوله مافيني دوخه او اعراض نقص الاكسجين وتقوله قايس مره ثانيه نفس الشي الاكسجين نازل .. يا ربي شنو بيسوي فينا هالدكتور .. قال لها ريحي اهني ..

الحين دوري انا محدثتكم الحراره اوك الاكسجين اوك الضغط ؟؟ اشفيه الضغط مليوووووون مرتفع ارتفاع مو طبيعي .. اخترع زيادة الدكتور شلووون وليش مرتفع اقوله لاني معصبه ومتنرفزه لازم يكون مرتفع ويقايس مره ثانيه ويقولي خلج ريلاكس قلت انا ريلاكس بس معصبه مات علي من الضحك يقول شلون قلت معصبه على الوضع اللي انحطيت فيه فأكيد يكون ضغطي مرتفع وبعدين عندي في تاريخ العايله ضغط اكيد حاشني معاهم ..

عقب ما فحصنا قال انتي تاخذين حبوب الضغط مدة 5 ايام و رفيجتج تريح وتشرب اشياء دافيه واذا حسيتوا بدخوه على طول تعالوا .. قلنا اوك و التقرير قال بكتبه لكم و ادزه على الايميل .. قلنا اوك وشكرناه ومشينا الحمدلله ..

نزلنا المختبر نشوف النتيجه و لا نفسها قلنا خلاص ناخذ تقرير الدكتور ونطير عليه الى ميامي قلت اوك .. رحنا الخطوط في المطار عشان نسألهم عن التقرير قالوا لازم تروحون مكتب الامريكان في المجمع الفلاني ..
طبعا دخول المطار لازم يكون عندكم حجز اللي ماعنده ما يدخل بس احنا قلنا للشرطي بنحجز من داخل ودخلنا ..

رحنا المجمع اللي فيه خطوط الامريكان Policentro Mall و نوريهم التقرير ونقولهم بنطير عليه مو راضين تخيلوا ونطلع لهم القانون الامريكي شنو قال عن هالتقارير وهم مو راضين يمكن قعدنا عندهم ساعه واحنا نحاول فيهم يمين و يسار مو راضين الا يبونا نقعد 15 يوم حجر وبعدين نطلع مع ان القانون حاطينه في موقع الامريكان و الصحه الامريكية واهم معاندين معانا ..

خلاص اهني مافي ايدنا حيله كل شي سويناه قلنا نأجل تاريخ حجزنا الى 1/6 على ما نرد نسوي مسحات ..
كلمت سفرياتي غير الحجز الى تاريخ 1/6 شكلنا مطولين مع النتيجه ..

رجعنا المجمع اللي صوبنا Village Plaza نزلنا الجمعية نشتري اكل ودخلنا الصيدلية نشتري مستلزمات كورونا ..



ودخلنا الفندق عقب يوم حافل طلبنا روم سيرفس عشا تاكو ربيان عشانا لذيذ بعد هذا



وكلمت امي وقلت نفس الجذبة ونمت .. وقالت حق اختي انتوا خاشين عني شي... انا ادري أبرار فيها شي ..

اصبحنا و اصبح الملك لله
اليوم ال 13 "حجر غواياكيل"
الاربعا تاريخ 2021/12/29

بوينس دياس
قعدنا على الراحه ماعندنا شي نسويه اليوم حتى مسحه قلنا ما نبي نسوي ..

تريقنا بالغرفه و عقب طلعنا نتمشى في المول يمنا ..

خذينا من صبواي حق العشا و ردينا الفندق نقعد على الاسكله ونتحسر على عمرنا ونقول جان الحين احنا في هالمكان الفلاني و طرنا من هالمنطقه ..

لو الكراسي تنطق ووالله بينطقون ان هالثنتين كسروا خاطرنا



المطار جدامنا ومو قادرين نطيييييييييييييييييير



كلمني ابوي وقال قلت حق امج عنج ..

ابوي عالغدا في الكويت بلغ امي واخوي ان فيني كورونا .. امي بجت وقالت انا كنت حاسه وادري في شي خاشينه عني الحين شلونها ومن متى فيها ؟؟ انا ماكنت مصدقه سالفة الطاقم .. ومنو معاها .. اختي تهديها وتقول لها اهي زينه ومافيها شي اللي معاها اشوي كحه وصدرها .. وتتصل علي فيديو تبي اتأكد ما قدرت تكلمني دقيقتين على بعضهم وسكرت الخط و ادز لها صوري اني الحمدلله بخير بس مو قادره اتصدق .. تقول ابليس لعب فيني لعب في الافكار شنو يسون بروحهم لو تعبوا منو يشوفهم يمكن احد يأذيهم تقول لعب ابليس فيني عدل ..

انا والله ان اللي رفع ضعطي التفكير فيهم لاني احاتيهم امي وابوي ادري بشنو يفكرون وشلون يحاتون فالضغط من الصوبين مرتفع ..

خالي يتصل ويقول اكيد مافيج شي وامورج زينه .. قلت اي خالي الحمدلله امورنا طيبه ..

تعشينا انا والدكتوره وكملنا سيف العرب ونمنا ..

وانتهى يومنا على امل باجر يتغير حالنا ..