اصبحنا و اصبح الملك لله
اليوم ال 13 "حجر غواياكيل"
الاربعا تاريخ 2021/12/29

بوينس دياس
قعدنا على الراحه ماعندنا شي نسويه اليوم حتى مسحه قلنا ما نبي نسوي ..

تريقنا بالغرفه و عقب طلعنا نتمشى في المول يمنا ..

خذينا من صبواي حق العشا و ردينا الفندق نقعد على الاسكله ونتحسر على عمرنا ونقول جان الحين احنا في هالمكان الفلاني و طرنا من هالمنطقه ..

لو الكراسي تنطق ووالله بينطقون ان هالثنتين كسروا خاطرنا



المطار جدامنا ومو قادرين نطيييييييييييييييييير



كلمني ابوي وقال قلت حق امج عنج ..

ابوي عالغدا في الكويت بلغ امي واخوي ان فيني كورونا .. امي بجت وقالت انا كنت حاسه وادري في شي خاشينه عني الحين شلونها ومن متى فيها ؟؟ انا ماكنت مصدقه سالفة الطاقم .. ومنو معاها .. اختي تهديها وتقول لها اهي زينه ومافيها شي اللي معاها اشوي كحه وصدرها .. وتتصل علي فيديو تبي اتأكد ما قدرت تكلمني دقيقتين على بعضهم وسكرت الخط و ادز لها صوري اني الحمدلله بخير بس مو قادره اتصدق .. تقول ابليس لعب فيني لعب في الافكار شنو يسون بروحهم لو تعبوا منو يشوفهم يمكن احد يأذيهم تقول لعب ابليس فيني عدل ..

انا والله ان اللي رفع ضعطي التفكير فيهم لاني احاتيهم امي وابوي ادري بشنو يفكرون وشلون يحاتون فالضغط من الصوبين مرتفع ..

خالي يتصل ويقول اكيد مافيج شي وامورج زينه .. قلت اي خالي الحمدلله امورنا طيبه ..

تعشينا انا والدكتوره وكملنا سيف العرب ونمنا ..

وانتهى يومنا على امل باجر يتغير حالنا ..

اصبحنا و اصبح الملك لله
اليوم ال 14 "حجر غواياكيل"
الخميس تاريخ 2021/12/30

بوينس دياس

المفروض اكون في نيويورك مع اختي الحمدلله على كل حال ..

قعدنا على الراحه وقلنا بنسوي مسحه اليوم مع ان متوقعين النتيجه بس قلنا نسوي يمكن الله و رحمته علينا اتغير النتيجه .. وقلنا بنسوي عند تقريبا 3 مختبرات راحت فيها خشومنا رحنا المختبر الاول سوينا انتجن وقالت 24 ساعه تطلع النتيجه وهم قلنا بنشوف وضع المختبر اذا قدرنا نكلم اللي تسوي المسحه تسويها على الخفيف ما تكون قويه وان ترحمنا في النتيجه وتكون نيغتيف .. رحنا المختبر الثاني ولا بس موظفة وحده ترا الترجمان شغال معانا محد يتكلم انجليزي .. قلنا لها قصتنا من اول شي ومتى حاشتنا الاعراض مثل ما قلنا حق الدكتور قالت انا بسويلكم و بخليكم انتوا تشوفون النتيجه في وقتها جدامكم قلنا اوك قالت عقب ساعتين تعالوا طبعا انتجن .. رحنا المختبر الثالث والاخير دخلنا ولقينا موظف واحد قاعد وقلنا له بالضبط نفس المختبر الثاني تخيلوا قب وشب علينا صراخ وزف يعني انتوا بتخلوني اغش وازور النتيجه واطلع على القانون انا والدكتوره خفنا قلت امشي نطلع لا ينادي علينا الشرطة ما تسوى علينا .. والله ونطلع منه ونقعد صوب برغر كنغ ننطر الساعتين تمر و احنا كلش مو مهتمين لها اصلا قلت حق الدكتوره ما اتوقع بنكون نيغتيف شكلنا بنكمل لي 1/6 اهني قالت حتى انا نفس توقعج .. خلاص فقدنا الامل بالنتايح ..

اهني خلصت الساعتين قمنا من الكافيه ردينا المختبر الثاني جان تقولنا لحظة انا قالت لحظة جان تحوشني افكار سوده لايكون هذي بعد مبلغه علينا الشرطة وتبيهم ياخذونا لانها قالت لحظة ودخلت داخل وتلفونها دق قلت دكتوره رحنا فيها شكلها مبلغه علينا تقولي لا أبرار لا تقولين جذي عيل ليش دخلت داخل وتكلم بالتلفون والله نشف دمنا خلاص ما فينا حيييل .. عقب 5 دقايق ردت جان تقول تعالوا شوفوا رحنا نشوووف ولا النتيجه شنووو ؟؟؟

نيغتيفووووووووووووووووووووووووو
نيغتيفووووووووووووووووووووو

وااااااااي صرخنا في المختبر عندها ولمينا بعض ونبجييييييي ونسجد سجدة شكر و اهي طالعنا وتضحك .. تقول اشفيكم ليش تبجون قلنا تعبنا واحنا كل يوم نسوي مسحه نبيها تضبط ما ضبطت و لان نبي نرجع حق اهالينا ناطرينا .. مسكينه باركت لنا واكرمناها وقلنا لها هذي عشان البشاره اللي بشرتينا فيها .. وانا بلحظتها سويت مسحه ثانيه بي سي ار حق ردت الكويت لان انتجن بس ادخل فيها امريكا ..

الله يافرحتنا في هاليوم ما شالتنا ريولنا من الوناسه بنطيييير ..
والله ناخذ تاكسي ونطير على المول نغير حجز الدكتوره قالت متى نخلية قلت اذا في الليلة نطير الليلة قالت اوك ونشوف الخطوط وقالت في ليلة 31 الفير تروحون المطار قلنا اوك واكلم سفرياتي ونغير الحجز الى 12/31 اطير من غواياكيل الى ميامي .. واكلم ابوي واقوله يبا طلعت النتيجة نيغتيف الحمدلله ويطير من الفرحه و يبشر امي واخواني..

ونرجع صوب منطقتنا وندخل المووول ونتغدا في ايهوب .

ابرد على قلبي عقب الاسبوع الناري اللي مر علي





ونرجع الفندق نسوي ليت جيك اوت و نجهز اغراضنا و واحد من اللي يشتغلون في الفندق يهبل وايد خدوم ويعرف عن الاسلام كان يقول حق مطعم الفندق شنو ناكل وشنو ما ناكله وطلب لنا التاكسي حق الليله يوصلنا المطار ..

ووصلنا التاكسي الساعه 11

معلومه غواياكيل بالليل ما عندهم اشارات مرور الكل يمشي من غير ما يوقف لدواعي الامن لان لو وقفت ممكن يفتحون الباب عليكم وتأذون بجريمة قتل او سرقه او اي جريمه ..

وتوكلنا على الله الى المطار مع ادعيه تسهيل الامور ووصلنا مطار غواياكيل اللي كنا بس نشوفه الايام اللي طافت ..

دخلنا المطار واحنا ندعي انهم مايردون مثل ما سوو مع البنات اللي كانوا معانا من جم يوم ..
الحلو الطيران الامريكي اذا سويت اونلاين جيك ان افضل لان يعطيكم التأكيد على بوردنغ المغادرة وهذا اللي صار لان خذينا التأكيد اونلاين طفنا بسهاله .. عكس اللي مو مسوين شغلهم اونلاين تأذوا اشوي ..
دخلنا وصلنا كاونتر الجمارك اللي قاعد 3 مرات يسألني محطتج الاخيرة وين واقوله ميامي مو راضي يختم ويخلصني ما ابي اقوله الكويت اخاف يقولي وين بي سي ار من جذي اصريت على ميامي .. عقب ختم وطوفني ..

الله اهني خلاص تنفسنا الصعداء على قولتهم وحسينا ان كان علينا هم ونزااااح الحمدلله ..

و صورة لكم المطار صغير وسوق حره بسيط









طلع الازرق









وصعدنا الطياره وقلبي طاير من الفرحه















ومن فوق جبال الانديز وغابات الامازون ودعنا غواياكيل و الاكوادور بحلوها ومرها .. ذكريات ما تنسي ابد في هالدوله ..



الى اللقاء يا اكوادور ولنا رجعه و زيارة مره ثانية لكن متى الله اعلم ان شاء الله تكون في اقرب وقت ممكن ..

دوله جميلة جميييلة تستحق الزيارة ..

اصبحنا و اصبح الملك لله
اليوم ال 15 مغادرة الاكوادور
اليمعه تاريخ 2021/12/31

قود مورنينغ

وصلنا ميامي عقب طيران دايركت 4 ساعات ونص ..





نزلنا الله يا الزحمه زحمه مو طبيعية في مطار ميامي..
ودعت الدكتوره اهي عندها طيران داخلي الى لوس انجلوس و انا وراي ترانزيت مدته 12 ساعه في ميامي وبعدها اطير على الاماراتية الى الكويت .. المفروض على التركية تذكرتي بس ما في التركية الا بتاريخ 1/3 ..خليتها على الاماراتية ..

كاونتر مطار ميامي ما سأل عن اي شي و لا خذوا مني شي بس قالي جم يوم بتقعدين قلت الليلة اطير انصدم يقول لييييش قعدي نيويير اهني قلت ماعليه مره ثانية .. الحين مالي خلقكم
وبس قالي ولكم ومن غير ختم على الجواز استغربت من هالنقطه..

طلعت من المطار ولا يوزعون هالجهاز مجانا تيست في البيت و خلال 15 دقيقه تبين النتيجه خذيته و خليته حق الكويت ..



والحين انطر نتيجة بي سي ار من مختبر امس صاحبتنا عشان اطير باليل ..المشكله بيوصل على ايميل الدكتوره ايميلي مو شغال وانطرها تدز اللي النسخه بالواتس اب ..

طلعت خذيت شتل شيراتون المطار حاجزه فيه ليله لا سمح الله النتيجه تطلع عكس الا عندي مكان انام فيه وعقب اروح ديتونا عند رفيج ابوي ..

وهذا الشيراتون









دقت الدكتوره جان تقول أبرار وصل البي سي ار .. قلت بشري اسكتت قلت خلاص بعد عرفت بوزيتيفوو يالله اشوه اني في امريكا مو مشكله .. جان تقول لااا نيغتيفووووووو ..
واااااااو واخيرا الحمدلله ..
وتوصلني نسخه على الواتس اب واخيرا نيغتيفووووو

ونكمل تصوير الغرفه















الفندق تعيس لكن اهو افضل الموجودين صوب المطار .. النظافه نص ونص الاثاث مستهلك الخدمه بطيئه ..

نمت لي نومه حلوه عقب النيغتيفوووو لي قبل الاقلاع ...

تابع يوم 12/31

عقب ما ريحت جهزت اغراضي ونزلت اسوي جيك اوت وانطر الشتل يوصلني المطار .. رحت مبجر عشان اسوي ابقريد على الاماراتيه بزنس ..
وراي طريج 14 ساعه ونص ضروري بزنس من غير تفكير .. اعتقد خذيت التذكره 220 على السياحيه او اقل و دفعت الابقريد 330 د.ك ..
جيكوا على اوراقي وابلكيشن المسافر حق الكويت .. واتجهت الى كاونتر الجوازات وطفت من غير ختم خروج ..

وهذا مطار ميامي والسوق الحره ..











مطارهم مو حلو ووايد محلات و مطاعم مسكره ما عندهم موظفين .. ولان قانون امريكا ما يسمح الشغل الا للمطعمين ..وايد شركات خسرت و سكرت بسبب هالموضوع..

ناطره البوابة



وفتحت ودخلنا بالسلامه







جنطة الانتعاش





قلت دعاء السفر واقلعنا من ميامي





المقبلات " حمص - متبل - محمره والخ "







وعقب ساعه من الاقلاع احتفلوا بالجو بنيو يير ..
هابي نيويير 2022/1/1 ..

حطيت راسي ونمت ماقعدت الى عقب تقريبا 8 ساعات ..

وقدموا لنا الريوق ..





الحمدلله على السلامه تم الوصول الى دبي 2022/1/2 ..
و ترانزيت عندي تقريبا 3 ساعات وبعدين الى الكويت الحبيبه..

والى البوابه دخول الطياره الى الكويت









ووصلت الكويت بالسلااااااااامه
كولولولووووووووووووش
2022/1/3



خلصت من الكاونتر و ابوي حبيبي ناطرني برا ما قدرت اسلم عليه خفت تكون فيني بقايا كورنا ..
المفروض اسوي حجر 3 ايام وعقبها اسوي مسحه .. اختكم وصلت وعلى طول راحت سوت مسحه ولا تطلع النتيجه بوزيتيف لااااااااا بعد ما خلصنا و تطبيق شلونك يحطوني في الحجر 10 ايام .. لااااااااا توني خالصه من حجر وتردوني في حجر .. والله وانحجر في البيت و ما اشوف امي ولا اخواني ..
كله الغلط مني ليش سويت حزة وصولي لازم انطر 3 ايام بس والله خوفي على بيتنا ..

وبديت الحجر مع تطبيق شلونك



الحين حسيت بالحجر الصجي انحكرة عدل عكس لما كنت في الاكوادور اهني ما اعتب باب الغرفه اللي محجوره فيها ..



اكل المحجووورين وينج يا غواياكيييل



قضيت الحجر بكتاب غابريل عن حياته و كولمبيا خلصته تقريبا بأسبوع ..

واسوي تيست منزلي بالجهاز الامريكي



وادزها في قروب بيتنا اقولهم خلاص اطلع قالوا لا قعدي مكانج كملي الحجر .. هااا يوم كنت في الاكوادور ناطرين ردتي ولا رديت لا قعدي بالحجر .. عايله قاسية

ونستمر في الحجر



وينك يا ربيان غواياكيل



الحمدلله على سلامتي غدا شري و طلعت من الحجر ...



سامحوني على اي قصور او غلط بدر مني وسامحوني على الاطاله .. اتمنى هالتقارير تفيدكم لو بالشي البسيط ..

واهني اقولكم انتهت قصتي ومغامراتي الحلوه في اعالي جبال الانديز وغابات الامازون الاكوادور وفي هالرحله العجيبه بين كولومبيا و الاكوادور على امل ان القاكم في دول يديده بتقارير يايه ..

شكرا على متابعتكم و تشجيعكم ..