ما قصرو الشباب بيض الله وجيهم ..
و لكن زيادة في الخيارات بعطيك خط سير اشوفه جميل من تجربتي له في سفرات عديدة .. و خلاصة تجارب خطوط سير متنوعة في تلك المناطق ..
تكون وجهتكم الاولى ميونخ و تستاجرون السياره منها لكون المانيا تعتبر مناسبة لاسعار السيارات ..
بعدها تتجهون لزيلامسي .. و منها تتجهون للبندقية في إيطاليا .. طبعا قبل البندقية فيه اوتلت جميل .. بعدها تتجهون لميلان .. و بعدها تتجهون لانترلاكن .. حبيتو تمرون على شاموني فهي فرصة طيبه .. و هي تعتبر على الطريق تقريبا .. زيادة حوالي ٤٠ كم .. تفرقون لها من عند اوسطا .. بدال ما تطلعون جبال الالب من عند اوسطا .. تبتلون سيده شوي و تطلعونه من عند مونتي بلانك ..

بعد انترلاكن عنكم خيارين ..
الخيار الاول تتجهون لاوربا بارك مرورا بشلالات الراين .. و بعدها تتجهون لباريس .. و تسلمون السيارة هناك ..
الخيار الثاني تتجهون لجنيف مرورا بمصنع الشوكولاته و لوزان .. و من جنيف لباريس .. و ممكن تسلمون السياره في جنيف و تركبون القطار لباريس .. ولكن بتتعبكم الشناط ..

و تشيلون اسبانيا من الجدول .. خلو اسبانيا لسفره ثانيه .. اسبانيا جوها غير ..
و أشوف كذلك لو تشيلون باريس من البرنامج يكون أفضل .. و ترجعون من جنيف .. لعدة أسباب مهمة وهي ان العائلة كبيره و كثرة التنقل بتكون متعبة لكم .. و ثانيا كون هذي اول سفره لكم ..

و طبعا مثل ما قالو الشباب شيلو فكرة المرشد من تفكيركم .. أقرو تقارير الشباب و راح تكونون أفضل من المرشدين .. و عندكم قوقل ماب ما خلا و لا بقا من الارشاد السياحي .. و أهم شي حملو خرائط قوقل ماب بدون اتصال لجميع المناطق اللي تبون تمرون عليها

خطه سير جميله ولكن ما نحتاج نستاجر سياره لان مع المرشد السياحي سياره عائليه
وحنا نحتاج مرشد سياحي عشان مشكله اللغه ويريحنا من السواقه
فكرنا في الغاء اسبانيا ونروح بس فرنسا وسويسرا وايطاليا
واذا في دوله تنصحونا فيها نزيدها على هاذي الدول وتكون قريبه منها . نفكر نزيد المانيا ايش تنصحونا
لو تقترحون علينا خطه سير بهاذي الدول لان الخطه الي قبل في معها النمسا وحنا ما نبي نكثر دول
ونبي نروح في سويسرا اماكن طبيعيه ونجلس في كوخ او منتجع
وفرنسا وايطاليا في مدن واستكشاف يعني العواصم والمدن الرئيسيه نبي باريس وروما والبندقية ومدن ثانيه تقترحونها علينا
اتمنى تعطوني خطه سير مفصله بالمدن الحلوه
وهل السفر بقطاراتهم مريحه وحلوه او لا لان بالسياره متعب وساعات طويله
ارجو المساعده