اهلا اخوي انا من صلالة وحياك الله بين اهلك واخوانك بتنورونا

بخصوص الجو حلو ماشاء الله وشهر اغسطس احلا والحين الحمدلله
الشلالات بدت تنزل ولله الحمد

الجدول حلو بس يحتاج له بعض التعديلات مثلا في مساراتكم عشان تنجزوا اكثر من الاماكن

اول يوم ولاية مرباط هي ساحليه وفيها حصن مرباط وعلى عودتكم روح مكان الجاذبية على طريق عقبة حشير
ومن بعد اطلع من عقبة اشور الى ان توصل منطقة في الجبل اسمها طوي اعتير مكان اخضر بس فيه ضباب
وتكون منتبه على الطريق

اليوم الثاني روح عين صحنوت من الصباح وبعدها اطلع الطريق للجبل اسمه طريق ( شير ) او ( اغير ) عادي كلها نفس المعنى وطريق حلو يغطيه الغابات والخضار
ومن بعدها روح وادي نحيز وبعدها انزل وروح سهل اتين للغدا والجلوس

اليوم الثالث روح شاطئ المغسيل وشوف النافورات الطبيعية وكهف اسمه ( المرنيف ) وبعدها اطلع الجبل وروح منطقة شعت .... ملاحظة ( ارجو الانتباه على الطريق جدا في طريق شعت لان ضباب كثيف ) بس مكان يستاهل الحقيقه
وبعدها وانتوا راجعين روحوا منطقة اسمها افتلقوت

يعني شعت والمغسيل وافتلقوت في يوم واحد لانهم على نفس المسار


اليوم الرابع روح وادي دربات وعين اثوم وعين طبراق وعين حمران وعين رزات لانهم على نفس المسار

اليوم الخامس عندكم جبل اتين وعين جرزيز

وبإمكانكم تقسيم الايام ع حسب راحتكم
انا فقط اعطيتكم الاقتراح وبعض المسارات الي قريبه من بعض جمعتها لكم مع بعض

اقتراحات ممكن تفيدكم مثل
سوق ( الحافه )
شاطئ الدهاريز
حديقة السعاده
حديقة صلاله
مارينا صلاله
صلالة جراند مول
صلالة جاردنز مول
سهل اتين
كل هالاماكن يعني في وقت الفراغ بعد الجولات السياحيه

اتمنى لكم اطيب الاوقات عندنا في صلاله