تجربتي مع حلبة سباق السيارات .

هناك حلبة سباق ظريفة في أطراف بوكيت . يعني لما اقول اطراف بوكيت مسافة أبو 30 دقيقة بالسيارة من سنتر بوكيت تقريبا .

الربع ساعة ب 850 بات للشخص مع دفع تأمين 500 بات عن كل شخص مستردة نهاية الجولة .


متعة ولكن أكرر الحذر من التهور . ألعب وأنبسط وأستمتع . لكن لا تعمل فيها بطل راليات وتجيب العيد وقد لاسمح الله تضر غيرك .

علما إنهم حريصين في عدد تقريبي للسيارات في كل جولة . وإذا في امطار خفيفة عادي ممكن يستمر اللعب .

لبس الخوذة مهم . يوجد كافيه في وسط المضمار بكراسي وطاولات . لمن لايمارس اللعبة .


أنصح بها للمتعة

تجربتي مع مملكة النمور

تقع بجنب حلبة سباق السيارات عادي تروحها برجلك . قريبة جدا .

عبارة عن مجموعة من النمور بشتى أنواعها . الدخول بتذاكر حسب الفعالية إذا تبغى تتصور مع النمور داخل القفص أو لآ ......الخ بس والله ماني فاكر سعر التذكرة بس لاتقل عن 1500 بات للشخص اذا حاب تتصور .

أنا اخذت بالتصوير

أول مرة أنا ونمر داخل قفص

دنا بخاف من الكلب يطلعلي نمر هههههههه


رغم قناعتي التامة بأن الحيوانات بشكل عام لايمكن التنبؤ بما تفعل . لكن توكلت على الله . مع تحذير المدرب بعدم لمس أماكن معينة في النمر وخاصة منطقة الرأس . وأتبعت التعليمات . والحمد لله ربي سلمني .

الفعالية تعود لمدى رغبتكم . أنا عن نفسي لن أكررها .؟ خلاص هيا مررررررة

تجربتي مع الفنادق في بانكوك وبوكيت

في بانكوك

ليلة واحدة عند الوصول
جناح جونيور بشرفة
أخدوا تأمين 1000 بات

https://www.booking.com/hotel/th/cen...8b&aid=1886474



ليلتين في بوكيت

جناح علية بغرفة نوم واحدة . ( دوبلكس )
ما أخدوا تأمين

https://www.booking.com/hotel/th/ang...8b&aid=1886474


11 ليلة في بوكيت . كانت 7 ثم مددت كمان 4 ايام
غرفة كومفي مع إطلالة على المحيط
ما أخدوا تأمين

https://www.booking.com/hotel/th/oce...8b&aid=1886474


ليلة قبل مغادرة بوكيت
فيلا مع مسبح - كينغ
ما أخدوا تأمين

https://www.booking.com/hotel/th/cen...8b&aid=1886474


5 ايام بانكوك
جناح غراند سكايلاين بغرفة نوم واحدة مع إطلالة على النهر
أخدوا تأمين 2000 بات

https://www.booking.com/hotel/th/cha...8b&aid=1886474









يظل السكن خيار في بانكوك وبوكيت متعدد ومفتوووووح بشتى أنواعه .

لكن كما هو الحال مع كل شيء في هالدنيا

ما قد يعجبني قد لايعجب غيري . والعكس صحيح أيضا .

تجربتي مع تسليم السيارة في المطار

رحت قبل موعد رحلتي بوقت كافي . تحسبا لأي ظرف طارئ لاسمح الله . وصلت مكان تسليم السيارة وهو نفسه مكان الإستلام .

شيك عليها الموظف وتأكد من أن البنزين فل . ووقعت على الأوراق وأخدت صورة لها بالجوال بأن كل شي أوك .




لكن

كانت اللكااااااااعة حاضرة معانا وقتها . أنا من عادتي قبل أسلم أي سيارة مستأجرة . اوديها مغسلة أغسلها وأروقها وأعطرها من الداخل عشان التدخين .

أخينا الموظف لقي بعض زهر السيجارة في المقعدة الخلفية مدري كيف طار راح هناك هههههه شكلي وأنا ماشي . المهم حب يعمل فيها ( ضيق ) قالي غرامة التدخين في السيارة 3500 بات . وفعلا كلامه صحيح وأنا موقع على هالشي في ورقة استلام السياة

مع إني والله مشتري معطر مخصوص عشان أبخ السيارة حتى لما وصلت وقبل لا يجيني الموظف بخيتها ههههههه .

أعطيته اللي فيه النصيب قلت عشان يسكت ويفكني . حسيت إن المبلغ ما عجبه .

قلتلوا خلاص نروح المكتب وندفع الغرامة عادي . لما شافني جاد . قال طيب زودني .

المهم أنا أبغى اخلص زودتوا . ( هالحدث حصل قبل طبعا ما أصور الأوراق بالجوال وأنهي الموضوع )



لذلك أنوه للمدخنين توخي الحذر ؟

تجربتي مع الحلقة في بوكيت !!

وهادي تنفع للعوائل اللي تسكن في فلل في أطراف بوكيت . طبعا في فلل جميلة بمسبابح خاصة بعضها يصل إلى 7 و9 غرف . وفي أبو غرفة بس عددها قليل . الأغلبية من غرفتين وطااااااالع .


المهم قلت أبغى أشوف الحلقة حقتهم ( سوق الجملة )

طلعت موقعه من قوقل ورحت .

كل شي موجود في الحلقة لحوم دواجن كائنات بحرية . فواكه خضروات . وكله طازة وفريش . والأسعار معقولة جدا .

المهم أخدت فكرة وتنفع للعوائل اللي تحب تطبخ وتنفخ

تجربتي مع المطل الزجاجي في بانكوك

كنت مع سائق تاكسي وأبغى صراف . وبدأنا في مجاغة السواقين . قالي فين تبغى تروح بعد الصراف . قلتلوا أبغى اروح ( سكاي ووك ) قالي طيب أنا أحجز لك . سألته بكم قالي الشخص ب 1600 بات وإني راح الاقي زحمة هناك ......الخ قلتلوا لا شكرا أنا حشوف بنفسي .

المهم يبغى يقنعني هههههه آخر شي طلع الوجه الآخر اللي عندي وخليته ماعاد يفتح فمه بكلمة .

ماعلينا . رحت الاسكاي ووك . شوية طابور خفيف ظريف ما أخد مني 5 دقايق أخدت التذكرتين ب 1900 بات .

طلعنا الدور 74 على ما اعتقد وبعدين كملنا للسطح ههههه برضو في مصعد ووصلنا المطل الزجاجي وتلبس خف في رجلك حفاظا على الزجاج . أنا بطبعي أحب الاماكن المرتفعة . فكانت تجربة حلوة وجميلة . وصعدت بعدها لمنطقة تانية تعتبر إنت على ارتفاع 314 م .

ممنوع تدخل المطل الزجاجي معاك شنطة أو جوال أو أي أغراض . التصوير بيكون من أطراف المطل .


أنصح بتجربته لمن يحب الاماكن المرتفعة بالذات

نكمل لاحقا بإذن الله مع تجارب أخرى إن كان منها فائدة

ححاول بإذن الله أشوف موضوع الصور وبعض مقاطع الفيديو حرفعها على اليوتيوب .

بس عاد استحملوني لو اتأخرت عليكم شوية بالذات مقاطع الفيديو

أشكر مقدما كل من قرأ أي تجربة من التجارب وكان له فيها فائدة .


دمتم بخير

ما شاء الله تجارب رائعة
وتفاصيل جميلة للفعاليات

مخططك حلو بالتركيز على بوكيت
لأنها تغنيك عن البقية وفيها كل النشاطات

تجربة الخيول على الشاطئ رائعة
واستئجار قارب لوحدكم جميلة رغم أن السعر مرتفع
لكن يستاهل طالما استمتعتوا بالرحلة
وفيه نقطة مهمة خلال زيارة جزر جيمس بوند وبي بي ايلند
بالتركيز على الأمان ويكون القارب حديث
لأن البعض يحمل القارب أكثر من طاقته

تجربة استئجار سيارة ممتعة
وتكلفة البنزين معقولة جداً

تسلم يا غالي
ومتابعين الابداع

طرح سهل ..... سرد راااائع ..... تقرير خفيف ظريف شكرا لك هذا الطرح الجميل

فكرة ايجار السيارة فكرة بطلة تجعل كل شي جميل في الرحلة لكن تتطلب الحذر

السواقة جهة اليمن ليست صعبة بس شوية تركيز

فكرة البوت الخاص حلوة بس مكلفة جدا

نصيحة لا تحجز أي فعالية يعرضها عليك سائق التكسي احجزها انت بنفسك ارخص لك

كيف طريقة تعبئة البنزين عندهم؟ تبعي بنفسك او يوجد عامل خدمة ؟ هل محطة البنزين هي محطة الغاز للسيارات التي تعمل بالغاز ؟