السلام عليكم ورحمة الله وبركاته
احب اشكر المنتدى والقائمين عليه لما لهم من الفائده في جميع رحلاتي هذا اولاً

ثانياً رحلتي كانت على الخطوط الايطاليه لأول مره بالنسبه لخطوط ايطاليا وبخط سير الرياض روما واشنطن ذهاب وعوده خذيتها بالدرجة السياحيه بحدود 2500 واشوفه سعر ممتاز في عز الصيف وخصوصاً اني اشتريتها قبل الرحله بأسبوعين تقريباً..
الرحلة كانت في 11 جولاي لمدة 24 يوم .. الخطوط جيده وكانت الطائرة اللي تطلع من الرياض جديده وكانت مقاعدها 3-3 والطائرات اللي تطلع من روما الى واشنطن اكبر 2-4-2 لكن ليست جديده لكن معقوله ولكن الشاشات مافيها لغة عربيه والاكل اقل من عادي الله يديم النعمه ومقاهدها وسط لكن فيها درجة اعلى من السياحي واقل من البزنس اسمها بريمير ايكونمي ومقاعدها حلوه لكن اغلى من السياحي العادي وايضاً فيها الثلاث صفوف من السياحي اكبر من السياحي فاذا كان حظك فيها تعتبر ممتازه وعموماً حجز المقاعد برسوم تبداء من 15 يورو الى 79 يورو حسب المقعد الى قبل الرحله ب24 ساعه تكون مجاناً والعفش لك قطعة وحده الا البريمير قطعتين وكل قطعة زايده ب156 يورو والقطعه الثالثه ب220 يورو هذا كل مايخص الخطوط وكان الترانزيت في الذهاب 4 ساعات في روما والعوده 8 ساعات في روما …

تعامل الموضيفين اقل من عادي ومافيهم ابتسامه او ترحيب زايد بالمسافر

نزلت واشنطن وكنت حاجز كامري من شركة سقست تامين شامل بحدود 42 دولار لليوم ولكن سويت ترفيع واخذت بي ام x3 تأمين شامل واخذت زود عليه المساعده على الطريق 24 ساعه والحمد لله ما احتجته وطلعت علي اليوم ب82 دولار
رحلتنا هذه المره لامريكا رقم 12 ونزلنا في واشنطن 3 ايام في منطقة التايسون
وبعدها رحت بالسياره الى بافلوا شلالات نياقرا تقريباً 650 كيلو وجلسنا ليلتين

بعدها رحت ميتشقن مدينة ديترويت وجلست ليلتين

وبعدها رحت شيكاغوا اعتقد 500 كيلو وجلست 4 ليالي

وكنت ناوي اكمل الى دنفر كلورادو ولكن حسيت اني بتعب نفسي خصوصاً ان العوده من دنفر الى واشنطن حوالي 3000 كيلو فقررت اغير الوجهه وانزل جنوب الى معشوقتي اورلاندو المسافه 1800 كيلو فقطعتها في يومين لان العوده من اورلاندو الى واشنطن 1300 كيلو

المهم جلسنا في اورلاندو اسبوع وبعدها رحت واشنطن لكن ريحت في مدينه اعشقها في كارولينا الشماليه اسمها روكي ماونتن وبت فيها ليله بعد ماقطعت حول 900 كيلو من اورلاندو

اليوم الثاني واصلت الى واشنطن وكانت المسافه 350 تقريباً وسكنت في نفس الفندق اللي سكنت فيه في البدايه باقي المده اللي في الرحله 4 ليالي للراحه والاستعداد للعوده

جاء وقت الرحله وكان هناك اعصار في واشنطن والغي هبوط واقلاع جميع الرحلات من والى مطار دالس في واشنطن وتم الغاء الرحله واعطونا الايطاليه سكن جنب المطار وكوبون واجبات ورجعت واستاجرت سياره حق ليله وحده لاني سلمت سيارتي
هههههه وكلفتني 109 دولار ليله وحده

المهم اليوم الثاني ايضاً تاخرت الرحله 6 ساعات وجلسنا في لاونج التركيه في مطار واشنطن ومع هذا اعطونا ايضاً كوبانات مره اخرى كل راكب 20 دولار تشتري من المطار واستفدنا منها …
صار التاخير خيره لان الترانزيت في روما قل من 8 ساعات الى ساعتين تقريباً والحمد لحقنا على الرحله ووصلنا وكل شي تمام ولله الحمد وكانت الطائره فاضيه من واشنطن الى روما وخذيت 4 مقاعد وام سلمان 4 مقاعد وخذها نومه ههههههه

امريكا جميله ومريحه ومافيها تعقيد ومافيها غطرسة اورباء وبهذلتها وارتاح فيها والسفر بالسياره ممتع …

البنزين اغلى ماعبيت ب4.20 للجالون في شيكاغوا وارخص ماعبيت ب2.95 والمتوسط حدود 3.50

الفنادق اللي خذيتها كلها ممتازه اغلى واحد 650 ريال والارخص 370 ريال

التعامل في المطار ممتاز صحيح وقفونا في المطار عند الجمارك علشان التمر يمكن 45 دقيقه واخر شي قالوا روحوا حتى ماشافوه مجرد سؤال وبس الاهم تكون صادق معهم وتفصح لكن لا تكذب عليهم وحنا اللي بادرنا وقلنا لهم معنا تمر يوم سالنا موظف الجوازات وش معكم ممكن تفصحون عنه …

الحمد لله لم يواجهنا اي مشكله عداء مره وحده وقفنا البوليس في شيكاغوا وكنا مسرعين نمشي 50 مايل والسرعه 35 واعطاني انذار مكتوب وليس مخالفه

بالنسبه للتولز كان عند الشركة حقت السياره اليوم ب20$ لكن انا ماخذ جهاز من ول مارت من اول ب20$ وشاحنه ب100$ ورجعت وباقي فيها 29$ ويشتغل في اغلب الولايات اللي في شرق امريكا اعتقد اسمه ايزي باس لونه بنفسجي تحطه على الزجاج الامامي للسياره


حاولت اني اذكر اهم الاشياء للفائده للجميع لانه كما استفيد من المنتدى اريد الجميع ايضاً يستفيد

تسلم أبو سلمان
على هذا المختصر الجميل للرحلة

مخططكم رائع
واتفق معك أن أمريكا أجمل بكثير من أوروبا

سعر الخطوط الايطالية رائع وهي خيار جيد لأمريكا
تجربتك معها راح تفيد كثير
لأنها بدأت قريب عندنا وتخطط للتوسع في رحلاتها

شكراً

الله يعطيك العافيه بوسلمان
تجربة حلوه معلومات مهمة عن الطيران الايطالي
تقرير مختصر ومفيد بنفس الوقت
ما شاء الله حلوه لفتكم في امريكا
قواك الله وان شاء الله نشوف لكم سفرات اكثر واكثر

ما شاء الله رحلة جميلة لاجمل بلد رأته عيني
امريكا ما تمل منها وكل جزء فيها حكاية
كمية الشوق لها لاتوصف لكن ضروفي الان تمنعني من السفر
تحياتي لك

شكرا على نقل تجربتك للسفر الى امريكا
ونتمنى تزودنا بالصور

خير الكلام ماقل و دل,

الحمدلله على سلامتك