تاريخ الرحلة : 20 نوفمبر حتى 5 ديسمبر 2025 - 16 يوم ب 15 ليلة ..

اليوم الأول يوم السفرالسبت
تاريخ 2025/11/20

على بركة الله نتوكل على الله ونتجه لمطار الكويت مبنى الخطوط الكويتية..



التوصيات والتعليمات اللي قبل كل سفرة من قبل الإدارة العليا الله يحفظهم ..

وصلنا مبنى الخطوط الكويتية على الساعة 6:30 ص



وناسه الكاونترات فااضية ما في زحمة







عكس سفر الصيف زحمة
انا من عشاق السفر في هالوقت



خلصنا من الجمارك ودخلنا سوق الحرة





بوابتنا المتجه الى باريس







ماشاء الله الطيارة كانت فل ووايد معانا من اهلنا من السعودية ..



وهالعايلة كانوا جدامنا دخلوا واحنا داشين شفت بوردنغ طايح عالارض بداية الممر و توهقت قلت هل اهو اللي في بالي او غيره ولدهم شفته مسك البوردنغ بس موعدل ولا خشه فقلت اهو ..
المهم خذيته ورجعته للكاونتر قلت لهم في شخص طاح منه اكيد بيرجع لكم خشوه..
واحنا واقفين عند باب الطيارة انا عيني عليه صراحة اشوفه بدا يدور جان اقولهم البوردنغ عند الكاونتر روحوا اخذوه مساكين شلون توهقوا واختبصوا ..





نوع طيارتنا A330-841



تقسيم الطيارة
2-4-2



توكلنا على الله وطرنا الساعة 8:30 ص

فيديو الاقلاع




عقب ساعة وزعوا علينا الريوق



وصلنا فوق الاجواء الفرنسية الساعة 2:30 م

طبينا مطار شارل ديغول





مع النظام اليديد للبصمة حاشتنا زحمة طولنا فيها على ما خلصنا تقريبا 40-45 دقيقه



خذينا جناطنا وركبنا القطار عشان نروح فندقنا .. نبات ليلة في باريس ونكمل طريجنا ..
اخترنا فندق عند المطار



الجو باااااارد ونزل ثلج خفيف

وصلنا فندقنا الساعة 2:15 الظهر .. وعلى طول استلمنا الغرفة
حجزت في courtyard by marriott paris charles de gaulle central airport.

الليلة بسعر 200 يورو
نوع الغرفة ديلوكس بسريرين منفصلين.
من موقع اكسبيديا



















الغرفة نظيفة ومرتبه وحجمها حلو ..موقع الفندق ممتاز وايد قريب عالمطار..

عقب ريحنا اشوي طلعنا وطلبت اوبر نروح داخل باريس

ممر الفندق





وصلنا الشانز



وصلنا اوبر من الفندق لي المطعم بسعر 30 يورو
رايحين ناكل في مطعم نوره اللبناني





الاجواء كانت عجبه في باريس هالوقت ماتوقعتها جذي

حاضر معانا المعبوج

طلباتنا







الحمدلله على النعمة .. الاكل طيب وكميته راهيه
حسابنا 85 يورو

عقب طلعنا نتمشى وبما ان موسم الشتا يعني الشمس تغيب بسرعة
رحنا صورنا جم لقطة عند شعلة الاميرة ديانا بس ما قدرنا نطول في الشانز وايد برد واحنا مو حاسبين لبس شتوي كلش ..



هذي شعلة الاميرة تحت صار الحادث



برج ايفل







اجواء الشانز بالليل



خذينا اوبر ورجعنا فندقنا بسعر 50 يورو بالليل الاسعار تزيد في اوبر..

فندقنا من برا



انتهى يوم الترانزيت في باريس الحمدلله وباجر ننطلق لوجهتنا الحلم ..
نلقاكم على خير ان شاء الله

نفس مساري لما رحت البرازيل
حتى باريس وقت ما وصلت كانت ثلوج
وسكنت بـ ماريوت في الشانز

هذا أفضل مسار بس الخطوط الفرنسية ما أعجبتني
لأن الرحلة 11 ساعة والكراسي ضيقة
وزيادة أكلهم كله خنزير لذا قضيت الرحلة على
قطعة خبز مع جبنة فقط
و رفضوا يعطوني خبز زيادة يقولوا ما يكفي الركاب